San Juan 19
19
1Che unibiyaꞌ Pilato nú uzeteꞌcheꞌ bee sundado Jesuse. 2Nu bee sundado cuaꞌ urecheꞌ beei tucu elluꞌñiꞌ eche uzucuꞌbeei equienu, nu ungutubeei liꞌinu tucu laquie morado. 3Che uyabica beei lunu rnibeei:
―¡Nehuañi arre Israel!
Nu udichiu beei ya beei lunu.
4Chequie uchiuꞌu zecaꞌla Pilato nu unilla lubee bene Israel zeꞌe:
―Ubiꞌyacuruhua, hualla caꞌa para nú riꞌihua beyaꞌ nú lá llela niꞌ tucu equiya nú xi uriꞌilla.
5Nu uchiuꞌu Jesuse nzucu elluꞌñiꞌ eche equienu nu nutunu laquie morado nú ungutubeei liꞌinu. Che uni Pilato lubee bene zeꞌe:
―¡Nzuquieꞌlla!
6Che bee uleꞌya enu rnibiyaꞌ cuna bee bene enu rriucu Indu llene Jerusalén chenu ulañiꞌ beei liꞌinu uquixie beei rixiali beei rnibeei:
―¡Uquieꞌella lu cruse! ¡Uquieꞌella lu cruse!
Che uni Pilato lubeei:
―Liꞌihua uyaꞌhualla nu uquieꞌehualla lu cruse, xne liꞌá la llela niꞌtucu equiya nú xi uriꞌilla.
7Pero bee bene Israel zeꞌe ucuaqui beella nú unibeella:
―Liꞌiru rluꞌcuru tucu ley, nu lunú rnibiyaꞌ ley riala nú atilla xne rnilla nú necalla lliꞌñi Diose.
8Chenu ubeneꞌ Pilato nucuaꞌ chiquiꞌ ulliquilla. 9Che uyuꞌu zecaꞌlalla liñi palacio nu unedichiaꞌlla lu Jesuse:
―¿Cá benelu?
Pero lecaxi ucuaqui Jesuse lulla.
10Che uni Pilato lunu:
―¿Xieꞌ la cuaquilu nú rnia la? ¿Xieꞌ la riꞌilu beyaꞌ nú rluꞌcua elurnibiyaꞌ nú nibiyaꞌa nú quielu lu cruse, nu leꞌca para nú laꞌa liꞌilu la?
11Chequie ucuaqui Jesuse lulla:
―Lecaxi elurnibiyaꞌ rluꞌculu lua, tunu lá liquiꞌ Diosee lulu, enzeꞌe bene enu udeteꞌ cuenda liꞌá lulu nzeꞌe rluꞌcu masela equiya luquela liꞌilu.
12Nu desde hora zeꞌe, uquixie rlaꞌna Pilato nú xneca modo laꞌalla Jesuse, pero bee bene Israel zeꞌe ubixialíbeei nú unibeei:
―¡Tunu laꞌalulla lacalu amigoꞌ arre César! ¡Xne titse bene enu rni nú neca arre, rriꞌi condra nzeꞌe arre César!
13Chenu ubeneꞌ Pilato nucuaꞌ uhua zecalla Jesuse eleꞌyaꞌ ante lubee bene zeꞌe nu chu uzuculla lu xleta elu rlualullae, tucu luhuare elu lee bedichiaꞌ hebreo Gabata, nu rni nucuaꞌ labe eleꞌyaꞌ nú necacheꞌ cuna quiee. 14Nu bichia zeꞌe neca bichia xee eliñi baxcu, nu tucu rebibichia, uni Pilato lubee bene Israel cuaꞌ:
―¡Nzuquieꞌ arreꞌhua!
15Pero ubixialíbeei nú unibeei:
―¡Utilla! ¡Utilla! ¡Quieꞌella lu cruse!
Che uni Pilato lubeei:
―¿Xieꞌ quieꞌa arreꞌhua lu cruse la?
Nu ucuaqui bee uleꞌya enu rnibiyaꞌ:
―Lecati stucu neca arreꞌru, tucutsia arre César neca arreꞌru.
16Chequie udeteꞌ cuenda pilato liꞌinu lubee sundado para nú chequieꞌe beei liꞌinu lu cruse.
Uquieꞌe bee sundado Jesuse lu cruse
(Mt. 27:32-44; Mr. 15:21-32; Lc. 23:26-43)
17Nu uchiuꞌunu beei Jesuse nu nuyaꞌnu cruse, nzenubeei liꞌinu “tucu luguare elu lee calavera”, nu bedichiaꞌ hebreo lee Gólgota. 18Zeꞌe uquieꞌebeei liꞌinu lu cruse, nu cuna xiucu bene tucua beei cada tucu chú cueꞌtsenu nu liꞌinu labe. 19Nu unibiyaꞌ Pilato nú uquiee bee bedichiaꞌ equie cruseꞌnu nú rni: “Jesuse bene Nazaret, Arreꞌ bee bene Israel.” 20Huaxi bee bene Israel ungula bee bedichiaꞌ zeꞌe xne luhuare elu uquieꞌe bee bene liꞌinu lu cruse axue Jerusalén, nu bee bedichiaꞌ zeꞌe nequiene cuna bedichiaꞌ hebreo, cuna bedichiaꞌ griego nu bedichiaꞌ latín. 21Enzeꞌe bee uleꞌya Israel enu máse rnibiyaꞌ uni beella lu Pilato:
―Xinu uquieꞌelu: “Arreꞌ bee bene Israel”, mejora uquieꞌe: “Enu rni nú neca Arreꞌ bee bene Israel.”
22Nu ucuaqui Pilato lubeella:
―Lunú uquieꞌa, uquieꞌelane.
23Chenu ulaxu nú uquieꞌe bee sundado Jesuse lu cruse, unaꞌtsebeei xucunu nu utsabeei tacu pedaso xucunu nu uritsiꞌbeei xucunu lu dacubeei. Nu stucu xucunu nú lee túnica nu lunú tucunecatsene nu la nedicune, 24enzeꞌe uni bee sundado lusaꞌbeei:
―La tsaꞌahuane, mejora te itaꞌahua tucu rifa para nú biꞌyaꞌahua taꞌahua riꞌi anae.
Scua uyalu tucu nú niquie lu ichiꞌ Stichiaꞌ Diose elu rni: “Uditsiꞌbeei xucua lusaꞌbeei, nu urita beei rifa equie túnicaa.” Scua neca nú uriꞌi bee sundado zeꞌe.
25Axu elu uquie Jesuse lu cruse nzu naꞌnu cuna belalla, cuna María, unaꞌa Cleofas, nu María Magdalena. 26Chenu ulañiꞌ Jesuse naꞌnu nzu cueꞌtse beneꞌnu enu chiquiꞌ secanu, uninu lu naꞌnu:
―Naa nzucuaꞌ enduꞌlu:
27Nu uninu lu beneꞌnu:
―Nzucuaꞌ naꞌlu.
Desde hora zeꞌe uyucu cuenda beneꞌnu nucuaꞌ naꞌnu niꞌlla.
Unguti Jesuse
(Mt. 27:45-56; Mr. 15:33-41; Lc. 23:44-49)
28Chenu ulaxu nú uni Jesuse scua lunú nediyaꞌlaꞌnu nú uyalula yeene tucu nú riala nú acane. Nu para nú yalu tucu nú nequie lu ichiꞌ Stichiaꞌ Diose, che uninu:
―Rebichia.
29Nu zeꞌe nzu tucu jarra nú achechicu nuꞌ vinagre, che ucuacha beei tucu esponja lu vinagre zeꞌe nu uzucuꞌ beeii lliꞌi tucu aca nú lee hisopo, nu utiꞌbeeii ruꞌunu. 30Chenu ungüeꞌ Jesuse vinagre zeꞌe, uninu:
―Uyalula yeene nee.
Che chu uziꞌquindiquinu nu ungutinu.
Utseꞌe tucu sundado lanza cueꞌtse Jesuse
31Nu bichia zeꞌe neca bichia xee eliñi baxcu chenu rriꞌilu bee bene ye nú xi quiꞌñiabeei, nu la niarquiꞌbeei nú yaꞌna cuerpoꞌ bee bene zeꞌe lu cruse bichia nú sulachi beei, xne bichia zeꞌe neca bichia nú máse necachi neca para liꞌibeei, enzeꞌe unacuꞌbeei lu Pilato nú nibiyaꞌlla nú acha cuchiuꞌ bee bene enu nequie lu cruse enu nehuañiscaꞌ para nú atibeei nu laca beei lu cruse. 32Che uyaa bee sundado nu rluti udiꞌchia beei cuchiuꞌ tucu bene zeꞌe nu che udiꞌchia beei cuchiuꞌ stuculla. 33Pero chenu uyabica beei lu Jesuse ulañiꞌbeei nú ungutilanu. Enzeꞌe ne iꞌchiaꞌbeei cuchiuꞌnu.
34Pero tucu bee sundado zeꞌe utseꞌe lanza cueꞌtsenu, nu uchiuꞌu rene cuna inza cueꞌtsenu. 35Nu bene enu rquieꞌe nucuaꞌ ulañiluꞌlla nú ungae scua, nu neli neca nú rnilla, nu liꞌilla nediyaꞌlla nú neli neca nú rnilla para nú chili arquiꞌhua. 36Ungae scua para nú uyalu tucu nú nequie lu ichiꞌ Stichiaꞌ Diose elu rni: “Niꞌ tucu artaꞌnu lá iꞌchia beei.” 37Nu leꞌca stucu luhuare lu ichiꞌ Stichiaꞌ Diose elu rni: “Lañiꞌ bee bene liꞌinu enu utsee lanza.”
Uhuachiꞌ Jesuse
(Mt. 27:57-61; Mr. 15:42-47; Lc. 23:50-56)
38Chenu ulaxu nú unga ye bee nucuaꞌ che José bene eyeche Arimatea uyanaꞌcuꞌlla cuerpoꞌ Jesuse lu Pilato para nú uyaꞌllanu. José quieꞌ neca beneꞌ Jesuse pero aꞌchiꞌ xne xiquilla bee usticia Israel. Nu chenu uzela Pilato, che uyalla nu unguyaꞌlla cuerpoꞌnu. 39Nu leꞌca Nicodemo enu uyabedichiaꞌnu Jesuse tucu rulaꞌ, uriñayulla tucu ala llichiꞌi kilo mirra nú nucha cuna áloe nú ñia rlia. 40Che unaꞌtse beella cuerpoꞌnu utelabeella venda nú nuꞌ perfume, tucu nú neca costumbreꞌ bee bene Israel chenu rcachiꞌ beella tucu benenguti. 41Axu luhuare elu uquiee Jesuse lu cruse nuꞌ bee aca ndixí, nu zeꞌe nzucu tucu eluhua elu lascaꞌlí achiꞌ nitucu bene, 42zeꞌe ucachiꞌ beella cuerpoꞌ Jesuse xne axue, nu enta quixiela eliñi baxcu nú rriꞌi bee bene Israel.
Currently Selected:
San Juan 19: zpl
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.