Matayo 26
26
Olukwe olwa kwita oYesu
(Mak 14:1-2; Luk 22:1-2; Yok 11:45-53)
1OYesu niyamaare okubaza ebyo byona byona, nʼakoba abeegesebwa baamwe ati, 2“Mumaite nti wakubulayo ebiro bibiri, Obugenyi bwa Kwakalibwaku bwike, era Omwana wa Muntu akwiza okuweebwayo, abambwe oku musaalaba.”
3Awo abakabona abakulu, nʼabantu abakulu omwiyanga, ni bakumbaanira omu kikaali kya Kayaafa oSaabakabona. 4Ni bakola olukwe okukwata oYesu omwibbise leke bamwite. 5Baitu ni bakoba bati, “Tuleke kumukwata mu biro bya bugenyi abantu bateegunga.”
OYesu akusukibwaku amafuta e Bbesaniya
(Mak 14:3-9; Yok 12:1-8)
6OYesu niyaali omu Bbesaniya, omu nyumba ya Simooni eyaali omugenge, 7nakulya, omukali eyaalina ecupa erimu amafuta agacuunyi, era aga muwendo ogwingi, nʼaiza nʼagasuka oku mutwe gwa Yesu.
8Abeegesebwa nibaakiboine, ni bagongera, ni bakoba bati, “Gasiisiirwe ki? 9Akiri nigaakutundiibwe empiiya ni zigabirwa abaseege!”
10OYesu niyeetejerye kyebakukoba, nʼabakoba ati, “Omukali mukumujuunaana ki? Ekintu kyankoore kisai. 11Abaseege baakubbanga naanywe buli bwakeire, baitute nje tinaabbenge naanywe. 12Nansukireku amafuta gani agacuunyi, ateekaniize omubiri gwange okuziikwa. 13Kambakobere amananu; omu nsi woona woona Amawuro Agasai gyegalibuulirwa, na kini omukali oni kyakoore kiribazibwaku okumwizukira.”
OYuda akwikiriza okuliirana oYesu
(Mak 14:10-11; Luk 22:3-6)
14Awo omwei oku beegesebwa eikumi nʼababiri, ayetebwa Yuda Isikariyooti, nʼayaba egiri abakabona abakulu, 15nʼakoba ati, “Mwampeerya ki, ninabeebembera okumukwata?” Ni bamuweerya ebitundu bya feeza amakumi asatu. 16Okuzwa olwo oYuda nʼatoolya akaire akasai aka kubeebembera okukwata oYesu.
OYesu akulya Obugenyi bwa Kwakalibwaku amwei nʼabeegesebwa baamwe
(Mak 14:12-21; Luk 22:7-13,21-23; Yok 13:21-30)
17Ekiro ekikwekeera, omu Bugenyi bwa Migaati Egitatumbisiibwe,#26:17 Bugenyi bwa Migaati Egitatumbisiibwe Bwamalanga ebiro musanju era bwayizukiryanga okucungurwa kwʼabaana ba Isirairi okuzwa omu Misiri. abeegesebwa ni baiza egiri oYesu, ni bamubuulya bati, “Okwendya tukuteekanirize ayi gyewaliira oBugenyi obwa Kwakalibwaku?” 18OYesu nʼabakoba ati, “Mwabe omu kibuga ewa muntu omwei mumukobe muti, ‘Omwegesya akobere ekiseera kyamwe kiri ampi okwika. Ewaamu nigyo yaliira nʼabeegesebwa baamwe, Obugenyi obwa Kwakalibwaku.’” 19Abeegesebwa ni bakola nkʼoYesu niyabalagiire, ni bateekaniza Obugenyi obwa Kwakalibwaku.
20Omu kasyenene, oYesu nʼabeegesebwa baamwe eikumi nʼababiri ni baikaara okulya. 21Ni baali bakulya, oYesu nʼabakoba ati, “Kambakobere amananu; omwei oku nywe akwiza okundiirana.”
22Abeegesebwa ni bakwatwa enaku gingi muno, era buli omwei nʼabuulya, “Mukama, omuntu oyo niye ninje?”
23OYesu nʼairamu ati, “Akukozya nanje omu lucuba, niye yandiirana.#Zab 41:9 24OMwana wa Muntu akwaba okwitibwa, nkʼebyawandiikiibwe nibimubazaku. Baitu omuntu oyo eyamuliirana, wa kubonaabona, kyakuli kisai nataakubyaliibwe.”
25OYuda eyaali akwaba okumuliirana nʼamukoba ati, “Labbi, omuntu oyo niye nje?”
OYesu nʼairamu ati, “Kyokabazirembe nikyo.”
Ekyaigolo kya Mukama waiswe
(Mak 14:22-26; Luk 22:14-20; 1Kol 11:23-25)
26OYesu nʼabeegesebwa baamwe ni baali bakulya, oYesu nʼakwata omugaati, ni yeebalya, nʼaguyendayenda nʼaweerya abeegesebwa baamwe, nakukoba ati, “Mutoole mulye, guni nigwo mubiri gwange.”
27Nʼaira nʼakwata ekikopo, ni yeebalya, nʼaweerya abeegesebwa nakukoba ati, “Munywe oku kini nywena nywena, 28kubba guni nigwo musaayi gwange, ogukakatya endagaano ya Kanca egiyaaka, era ogusensekere oku lwʼabaingi okusaasirwa ebibbi. 29Baitu nkubakoba nti okuzwa ati tindinywa viini ya mizabbibbu, okwica nindinywa eviini omu ngeri egiyaaka amwei naanywe, omu bukama bwa Ite wange.”
30Nibaamaare okwemba ekyembo ekikuwaisya oKanca, ni bawuluka, ni baaba oku Lusozi olwa Misaale egyebeeta Oliva.
OYesu akulanga nti oPeetero yamwegaana
(Mak 14:27-31; Luk 22:31-34; Yok 13:36-38)
31Awo oYesu nʼakoba abeegesebwa baamwe ati, “Ereero obwire, nywena nywena mukwiza kwiruka mundekewo, kubba kyawandiikiibwe kiti, #Zek 13:7‘Ndiita omuliisya, entaama zirarange.’ 32Baitu nindimala okuyimbooka, ndibeekeera okwaba e Galiraaya.”
33OPeetero nʼamwiramu ati, “Abandi boona boona nibairuka ni bakulekawo, nje tinakulekewo nʼakadooli.”
34OYesu nʼamukoba ati, “Kankukobere amananu; ekiro kyaleero obwire, onkoko atakakookere, waneegaana emirundi esatu.”
35OPeetero nʼamwiramu ati, “Gonze nikwabba kufeera amwei naawe, tinakwegaane.” Nʼabeegesebwa abandi boona boona ni babaza batyo.
OYesu omu Gesusemani
(Mak 14:32-42; Luk 22:39-46)
36Awo oYesu nʼabeegesebwa baamwe ni baika omu kifo ekyetebwa Gesusemani. OYesu nʼabakoba ati, “Mwikaare ani, nje nyabe edi nsabe.” 37Nʼatwalana opeetero nʼabataani ba Zebbedaayo bakali babiri. Nʼawura obujune nʼokutuntura. 38Nʼakoba ati, “Omwoyo gwange gwizwire obujune obusobola nʼokunnyita! Mubbe ani, mubonerye amwei nanje.”
39Ni yeeyongerayo omu maiso kadooli, nʼakubba amajwi nʼata empumi okwitakali nʼasaba ati, “Ite wange, nikyabba kikusoboka, ekikopo kini ekya kubonaaboona kinnyiyibweku! Ti nka ninkwendya, baitu nka nokwendya.”
40Awo nʼaira egiri abeegesebwa, nʼabasanga nibawungukire, nʼakoba oPeetero ati, “Timusoboire kubonerya amwei nanje gonze essawa emwei? 41Mubonie era musabe, okwoyeerwa nimwo kutaabaizire. Kubba emyoyo gyanywe gikwendya, baitu emibiri ginaki.”
42Nʼayaba omulundi ogwakabiri, nʼasaba ati, “Ite wange, ekikopo kini ekya kubonaabona nikyabba kitakusoboka kunnyiyibwaku, okutoolaku ninkinywire, kyokwendya kikolebwe.”
43Niyaire, bwona pai nʼasanga abeegesebwa nibawungukire, kubba amaiso gaabwe gaali gaizwire obulo. 44OYesu era nʼabaleka, nʼayaba, nʼasaba omulundi ogwakasatu, omu ngeri nigyo gimwei nka niyasabire omu kwekeera.
45Awo nʼairayo egiri abeegesebwa, nʼabakoba ati, “Mucaabbasirye era mucaawumwire? Mubone esaawa eikire OMwana wa Muntu okuweebwayo omu mikono gyʼabakoli ba bibbi. 46Mwimuke twabe! Omuntu andiiraine aikire.”
Okukwatibwa kwa Yesu
(Mak 14:43-50; Luk 22:47-53; Yok 18:3-12)
47Awo oYesu niyaali acaabaza, oYuda, omwei oku beegesebwa eikumi nʼababiri, nʼaiza nʼekibiina kyʼabantu ekikooto abakwaite empirima nʼagaigo, nibatumiibwe abakabona abakulu, nʼabantu abakulu omwiyanga. 48Eyamuliiraine yaali awaire ekibiina kyʼabantu akabonero nakukoba ati, “Omuntu gwenaagwa omu kisubba niye oyo, mumukwate.” 49Amangu ago oYuda nʼayaba egiri oYesu, nʼakoba ati, “Mirembe, Labbi!” Awo nʼamugwa omu kisubba.
50OYesu nʼamukoba ati, “Mukaagwa, kola kyoiziriire.” Awo abasaiza ni baiza ni babbukuura oYesu ni bamugumya. 51Omwei okwabo abaali nʼoYesu nʼaiyayo empirima, nʼatema omwiru wa Saabakabona, nʼamutiicaaku okutwi.
52OYesu nʼamukoba ati, “Empirima yaamu giiryeyo omu kiraato kyayo, kubba abakwata empirima boona boona balifa mpirima. 53Okulowooza tinnyinza okusaba oIte wange nʼampeererezawo ebibinja byʼabamalaika ebikusoba omwikumi nʼebibiri? 54Baitute ninsaba ni babimpeereza obwo ebyawandiikiibwe ebikoba nti kini kiteekwa okumbaaku bibba byaikiira bityai?”
55Omu kaire ako oYesu nʼakoba ekibiina kyʼabantu nti, “Mwizire okunkwata nimulina empirima nʼagaigo nkʼabaiziriire omunyagi? Buli kiro mbaire nkwikaaranga omwiramyo ni nyegesya ni mutankwata. 56Baitu bini byona bikoleibwe, ebyawandiikiibwe abalangi leke biikiire.” Awo abeegesebwa baamwe boona boona ni bamulekawo ni bairuka.
OYesu omu maiso ga Lukiiko lwʼaBayudaaya
(Mak 14:53-65; Luk 22:54-55,63-71; Yok 18:13-14,19-24)
57Awo abaakwaite oYesu ni bamutwala ewa Kayaafa, oSaabakabona, abeegesya bʼamateeka nʼabantu abakulu omwiyanga gyebaali bakumbaaniire. 58OPeetero nʼasengeerya oYesu okwikira kimwei omu lubuga lwa Saabakabona, baitu namwenagireku eibbanga. Nʼaingira omu lubuga, nʼaikaara nʼabalindi, abone ebyabbaawo.
59Abakabona abakulu nʼabalukiiko lwʼaBayudaaya abandi boona boona, ni batoolya obujuurwa obwa bubeyegi bwebaasigikiraku okwita oYesu 60baitu ni batabufuna gonze ngʼabajuurwa ababubeyegi baingi baizire ni bamuwangiirya. Oluzwannyuma ni waizawo abasaiza babiri, 61ni bakoba bati, “Omuntu oni yakobere ati, ‘Nyinza okuyendawo eiramyo rya Kanca ni nyira ni ndyomboka omu biro bisatu.’”
62Awo oSaabakabona nʼayemeera, nʼabuulya oYesu ati, “Tolina kyakwiramu omwebyo byebakukulumiirya?” 63Baitu oYesu nʼasirika. Osaabakabona nʼaira nʼamukoba ati, “Nkukulayiriira omwibara rya Kanca omwomi; tukobere niwaabba niiwe Kurisito, oMwana wa Kanca.”
64OYesu nʼairamu ati, “Ekyokoberembe nikyo. Baitu kambakobere; okuzwa ati mukwiza kubona oMwana wa Muntu naikaire oku rubaju olwa gulyo gwa Kanca Omunyamaani, era nakwizira oku bicu ebya iguru.”#Dan 7:13-14
65Awo oSaabakabona olwa kugongera nʼatemula ebizwalibwa byamwe, era nʼakoba ati, “Atyobboire oKanca! Ati tucaayenderyaki abajuurwa abandi? Muwuliire nka nkʼanatyobboire oKanca. 66Nywe mukulowooza mutyai?” Ni bairamu bati, “Asemeire kwitibwa.”
67Awo ni bamucwanta omu busyo ni bamudukula ebitomi nʼabandi ni bamupaaya, 68nibakukoba bati, “Kurisito, tukobere. Naani akukubbire?”
OPeetero akwegaana oYesu
(Mak 14:66-72; Luk 22:56-62; Yok 18:15-18,25-27)
69OPeetero niyaali aikaire enzai omu lubuga, omwala omuweereza nʼaiza waali, nʼamukoba ati, “Naawe waali nʼoYesu oMugaliraaya.”
70Baitu oPeetero ni yeegaana omu maiso gaabwe boona boona, nakukoba ati, “Kyokukoba tinkimaite.”
71Niyaalite oku mulyango nakuwuluka olubuga, omwala omuweereza owondi nʼamubona, nʼakoba abantu abaali awo ati, “Nʼoni yaali amwei nʼoYesu oMunazaaleesi.”
72OPeetero nʼairamu okwegaana nakulayira ati, “Omusaiza oyo timmumaite!”
73Niwaakairewo akaseera kadooli, abaali beemereire awo ni baiza egiri oPeetero ni bakoba bati, “Mananu weena oli omwei oku bo, kubba nʼembazo yaamu ekulanga.”
74Awo oPeetero nʼakoba ati, “Ninaabba nkubeyega nceenwe.” Era nʼalayira ati, “Omusaiza oyo timmumaite.”
Amangu ago onkoko nʼakooka. 75OPeetero nʼaizukira oYesu byeyamukobere nti, “Onkoko atakakookere waneegaana emirundi esatu.” Nʼawuluka nakukunga muno!
Currently Selected:
Matayo 26: RUULI-NYALA
Highlight
Share
Copy
Want to have your highlights saved across all your devices? Sign up or sign in
