Luka 2

Okubyalibwa kwa Yesu

(Mat 1:18-25)

1Omu biro ebyo, oKaisaali#2:1 Kini kitiinisya ekyaweebwanga abakama ba bukama bwa Rooma, okugeza: Kaisaali Agusito. Agusito,#2:1 Kaisaali Agusito omukulu, niye yaali omukama wa Rooma oYesu weyabyaliibwe. Abalwani ba Rooma baali basingwire amanga gaingi nʼerya Isirairi nʼaBayudaaya, era ni bakubafugisya maani. omukama wa bukama bwa Rooma, yalagiire okubala abantu ba mu bukama obwo bwona bwona. 2Kuni nikwo okubala abantu okwekereire okubbaawo omu bukama bwa Rooma. Era omu biro ebyo oKuliniyo niye yaali akukuura eitwale lya Siriya. 3Buli muntu yaireyo omu kibuga kya waabwe yewandiikisye olwa kubalibwa. 4NʼoYusufu yaligire e Nazaaleesi, omu Galiraaya nʼayaba e Beserekemu, ekibuga kya mukama oDaudi omu Buyudaaya, olwakubba yaali wa mu nyumba ya Dawudi. 5Yayabire nʼoMalyamu, omukali gweyaali naragaanisirye okubandula. Baitu oMalyamu yaali nakulize. 6Nibaali bacaali eyo, oMalyamu nayindukwa. 7Nʼabyala omuzigaijo waamwe wa bwojo, nʼamuziringa omu bugoye, nʼamuta omu kigungiro#2:7 Kini nikyo ekyato ente mweziriira. olwakubba omu kiraaro kya bagenyi timwalumu kifo.

Abaliisya ba ntaama nʼabamalaika

8Ekiro ekyo obwire, ampi nʼe Beserekemu waaliyo abaliisya ba ntaama abaalindanga ekisibo kyaabwe omu mbu. 9Omalaika#2:9 Gini myoyo egya mwiguru egikola nkʼabakwenda ba Kanca. wa Mukama yabonekere gyebali, nʼokuseryaserya kwa kitiinisya kya Mukama ni kubeeruguurya, ni batiina muno. 10Omalaika nʼabakoba, “Mutatiina olwakubba mbaleeteire Amawuro Agasai agakwiza okuleeta okusemereerwa egiri abantu boona boona! 11Ekiro kyaleero oMujuni oMukama oKurisito#2:11 Kini kitiinisya kya Yesu ekimanyisya nti “Eyasukiibweku amafuta.” abyaliibwe omu Beserekemu ekibuga kya Dawudi 12Kini nikyo mwamwetejeryaku: mukwiza okubona omwana aziringiibwe omu bugoye bwa bankeremba nibamutaire omu kigungiro.” 13Amangu ago abamalaika abandi baingi baaligire omwiguru ni beeyimbya nʼomalaika oyo ni bawaisya oKanca ni bakukoba bati,

14“Ekitiinisya kibbe omwiguru egiri oKanca, nʼemirembe gibbe oku nsi omu bantu basiima.”

15Abamalaika nibaamaare okwirayo omwiguru, abaliisya ba ntaama ni bakoba, “Twabe e Beserekemu tubone ekigambo kini oKanca kyatuswekuliire.”

16Ni balabukaku okwaba, ni baaja oYusufu, oMalyamu nʼomwana onkeremba nibamubbasisirye omu kigungiro. 17Nibaaboine omwana, ni basubiira abantu ebigambo omalaika byeyamubazireku. 18Abaabiwuliire ni babyewuunya. 19OMalyamu nʼaizukiranga ebigambo ebyo era nʼabirowoozangaku. 20Abaliisya ba ntaama ni bairayo nibakuwaisya oKanca nʼokumuwa ekitiinisya, olwa bigambo omalaika byeyabakobeire nʼebyebaboine. Ebyebaboine, byalimbe nkʼomalaika niyabibakobeire.

OYesu akuweebwayo omwiramyo

21Ekiro kyamunaani okuliga oku kubyalibwa kwamwe, omwana baamusaliliire,#2:21 Kini kikumanyisya okusalaku ekisusu oku mubiri gwa kisaiza ogwa kyama. Kaali kabonero oKanca keyalagiire kakolebwenge oku baana aboojo okulanga endagaano gye yaali nakoore nʼabantu baamwe. ni bamwalika eibara Yesu. Eibara rini niryo omalaika lye yamuwaire nacaali na kugwa munda ya mawaamwe. 22Ebiro bya kweyerya#2:22 Kuni kwabbanga kwesaayiirya oluvanyuma lwa muntu okwakala omu mbeera eyatwalibwanga okubba eya muzizo, okugeza: okusensa omusaayi, okukwata oku kifiire, nʼebindi. Kyakolebwanga omuntu ngʼakunaaba nʼamaizi era ngʼakuweeryayo ebyakuweeryayo. kwabwe nibiweireku, oYusufu nʼoMalyamu baayabire e Yerusaalemu okuweeryayo ebyakweyerya nkʼeiteeka lya Musa nilyalagiranga abaakabyala. Baatwalaine omwana okumuwayo omwiramyo egiri oMukama, 23olwakubba eiteeka lya Mukama lyali rikoba, “Buli muzigaijo omwojo yaakuwongebwangayo#2:23 Kini nikyo kikolwa ekyakolebwanga okuweryayo omuzigaijo okuweereza oKanca. Kuz 13:2,12. egiri Mukama.” 24Nibaweeryayo ebyakuweeryayo ebiragirwa omwiteeka lya Mukama: “enkaiba ibiri oba enjiibwa ibiri.”#Lev 12:8

Obulangi bwa Simyoni

25Ebiro ebyo omu Yerusaalemu mwalumu omusaiza eyayetebwanga oSimyoni. Omusaiza oyo yaali naikiririire era yekendekekanga omu maiso ga Kanca. OSimyoni yaikaire nalindiriirye okwiza kwa mukomye wa Kanca, eyaali nakwiza okucungura eiyanga lya Isirairi. Yaaliku oMwoyo wa Kanca 26nʼoMwoyo oni yaali nakobeireku oSimyoni nti ye oSimyoni talifa atakaboine Kurisito wa Mukama. 27Ekiro oMalyamu nʼoYusufu kwe baayabiire okuweeryayo omwana egiri Mukama nka bweyaali empisa ya mateeka, oMwoyo yaali natwaire oSimyoni omwiramyo. 28OSimyoni nʼaginga omwana, nʼawaisya oKanca nʼakoba ati,

29“Ati Mukama wange, leka omwiru waamu afeere omu mirembe, nka niwaragaanisirye;

30kubanga amaiso gange gaboine omujuni

31ogwewateekaniriize abantu boona.

32Niye lumole olwamoleka oKanca amanga goona goona gamweteje,

era akwiza kubba kitiinisya kya bantu baIsirairi.”

33OYusufu nʼoMalyamu beewuunyize ebigambo oSimyoni byeyabazire oku mwana. 34OSimyoni nʼabasabira omukisa era nʼakoba omawamwana ati, “Omwana oni atumiibwe Kanca era akwiza kuleetera baingi omu Isirairi okugwa nʼokwimuka, baitu egiri abandi akwiza kubba akabonero akalizumiirwa. 35Olwʼekyo ebigambo ebiri omunda omu mitima gya bantu bikwiza kumanyibwa. We omawamwana enaku gyalikwizula omu mwoyo gwamu.”

Obulangi bwa Ana

36Omwiramyo mwalumu omulangi omukali ogwebaayetanga Ana. Ana yaali mwara wa Fanweri eyaali omu lubu olwa Aseeri. 37Yaali namwandu, oibawaamwe yafiire niyaakamala okubba naye emyaka musanju namubandwire. OYesu okubyalibwa Ana nakairikire, naicirye emyaka kinaanai nenai. Ebiro byona yaabbanga mwiramyo nakuramya oKanca emisana nobwire, nasabanga era nasiibanga. 38OSimyoni niyaali akubaza nʼoYusufu, Ana yeena nʼaiza nʼatandika okuwaisya oKanca. Yabazire oku mwana egiri bantu boona abalindiiryanga nʼesuubi okubona oKanca nakucungura oYerusaalemu. 39Nibaamaliliirye emirwa egiragirwa omu mateeka ga Mukama, oYusufu nʼoMalyamu baireyo e waabwe e Nazaaleesi omu Galiraaya. 40Omwana niyeeyongera okukula nʼokubba nʼamaani. OKanca nʼamwizulya amagezi era nʼamutaaku nʼekisa kyamwe.

OYesu akubaza nʼabeegesya ba diini

41Buli mwaka oYusufu nʼoMalyamu baayabanga e Yerusaalemu oku bugenyi bwa Kwakalibwaku.#2:41 Buni bugenyi obwakwatibwanga okwizukira okuzwa kwa baIsirairi omu Misiri era nʼokwizukira okwakalibwaku oMalaika owa kufa nataitire bazigaijo ba baIsirairi nibaali e Misiri. 42Nʼomwaka ogwo, oYesu naikirye emyaka ikumi nebiri egya bukulu, baayabire oku bugenyi obwo nka nibaakolanga. 43Obugenyi nibuweire baatandikire okutambula okwira e Naazaleesi, baitu oYesu yamaite gasigala e Yerusaalemu, oYusufu nʼoMalyamu nibateetejerye. 44Baali bakulowooza nti akutambuura amwei nʼabairabaabwe. Eigolo igolo nataabonekere, ni batandika okumutooleerya omu ba nganda zaabwe nʼabanywi ba mukago. 45Niyababuureyo ni bairayo e Yerusaalemu okumutoolya. 46Niwaakaire ebiro bisatu baamwajirye omwiramyo naikaire amwei nʼabeegesya ba diini,#2:46 Gini nkola ya bya mwoyo omuntu gyabba nakwikiririzaamu. nakubawuliirya era nakubabuulya ebibuulyo. 47Boona boona abaali bamuwuliriirye beewuunyize amagezi gaamwe nʼengeri gyeyairangamu ebibuulyo. 48OYusufu nʼoMalyamu ni bawuniikiira. OMalyamu nʼamukoba ati, “Mwana wange, kiki ekikukoleserye kini? Nje nʼoiteewo tubbaire tukukutoolya, nitutuntwire.”

49OYesu nʼamwiramu, “Nimukuntoorya ki? Timumaite nindina okubba omu nyumba ya itewange?” 50Baitu bo ni bateeteja kyeyaali nakukoba.

51Nʼairayo nabo e Nazaaleesi era ni yeeyongera okubba omworobi gyebali. Omalyamu nata ebigambo bini byona byona oku mwoyo gwamwe. 52OYesu ni yeeyongera okukula omu mubiri nʼomu magezi, nʼokwendebwa oKanca nʼabantu.

Currently Selected:

Luka 2: RUULI-NYALA

Highlight

Copy