Luka 1
1
Enyanjula
1Abantu baingi bagezereku okuwandiika oku bintu oKanca byeyabazire obwakarai era byaikiriirye omwiswe. 2Babiwandiikire nkʼabakaiso nibaabitukobeire. Abakaiso abo baali nʼoYesu okuluga oku kwekeera era baabbaire bakutambulya ekigambo kya Kanca. 3Njeena olwakubba mmaare okweteja ebigambo bini okuluga oku kwekeera, nkiboine nikisemeire okubikuwandiikira nimbisorongere kusai, owa kitiinisya oTewofiiro, 4leke weeteje nti bye wayegeseibwe bituufu.
Okubyalibwa kwa Yokaana oMubatiza kukulangibwa
5Omu biro oKerode niyaali nga niye mukama wa Buyudaaya, waalowo okabona eyayetebwanga Zaakaliya. OZaakaliya yaali wa mu kitongole kya bwakabona ekya Abbiya,#1:5a Kyali kimwei oku bitongole ebya bwakabona abiri nʼebinai ebya Luk 24:1-20. nʼomukali wa Zaakaliya eyayetebwanga Elizaabeeti yaali mwizukulu wa Alooni.#1:5b Yaali muganda wa Musa, niye omuntu oKanca gweyeekereire okukomya okubba okabona. 6Bani bakali babiri baali baikiririire omu maiso ga Kanca, nibakukwatanga amateeka nʼebiragiro byamwe byona byona, 7baitu tibaalina baana olwakubba Elizaabeeti yaali ngumba yete bakali babiri nibakairikire.
8Ekiro kimwei, olubu lwakukola omwiramyo nilwali olwa kitongole kya Abbiya, oZaakaliya niyaali nakukola nkʼokabona omu maiso ga Kanca, 9ni bamukomya nʼakalulu, nkʼenkola ya bwakabona niyaali, okwingira omu kifo ekyeru omwiramyo lya Mukama, okucuukiirya obubbaani. 10Ekiseera ekya kucuukiirya obubbaani nikyaikire abantu boona boona baali nzai nibakusaba.
11Omalaikawa Mukama nʼabonekera oZaakaliya. Omalaika oni yaali nayemerereire oku gulyo gwa kicuukiiryo kya bubbaani. 12OZaakaliya niyamuboine, ni yeerinduka nʼatiina. 13Omalaika nʼamukoba ati, “Zaakaliya, otatiina olwakubba oKanca awuliire okusaba kwamu. Omukali waamu Elizaabeeti alikubyara omwana wa bwojo. Omwana oyo olimwalika eibara Yokaana. 14Alikuleetera okusemereerwa nʼokusagaaruka era nʼabantu abandi baingi balisemereerwa olwa kubyalibwa kwamwe, 15olwakubba alibba mukulu omu maiso ga Mukama. Atalinywa ku mwenge gwa Zabbibbu gonze ekitamiirya ekindi kyona kyona. Okuligira kimwei oku kubyalibwa kwamwe alibba naizwire oMwoyo Akwera. 16Aliirya abantu ba Isirairi baingi egiri Mukama oKanca waabwe. 17Nali omu mwoyo nʼamaani, nkʼEriya#1:17 Eriya yaali mulangi wa Kanca. Yakoore ebyamaano bingi. Yaloowo emyaka 700 oYesu atakabyaliibwe. Omulangi oMalaki yalagwire nti omuntu aisana Eriya aliiza oMucunguli atakaizire. Mal 4:5-6. byeyaali nabyo, niye alyekeera oku Mukama okwiza, leke amuteekanirize abantu okumulindiirya. Aliirya emitima gya baite ba baana egiri abaana baabwe nʼokucaamula abantu abacaacuki leke balowoozenge nkʼabalina amagezi.”
18OZaakaliya nʼabuulya omalaika, “Nje nkairikire nʼomukali wange akairikire, ati namanyira ku kiki nti ebyo bituufu?”
19Omalaika nʼairamu, “Ninje Gabulyeri. Nnyemeera omu maiso ga Kanca era ati ntumiibwe okubaza naawe, okukusubiira Amawuro Agasai gani. 20Olwa kubba toikiriize bigambo byenkobere, ebyaliikiira omu biro byabyo ebituufu, ati okwaba kubba kibbubbu, notokubaza okwica ekiro ebigambo bini nibiribbaawo.”
21Omu bwire obwo abantu baali nibacalindiirya oZaakaliya,#1:21 Zaakaliya yaali Kabona oMuyudaaya, oMuleevi. nibakwebuulya lwaki akeerereirwe omwiramyo. 22OZaakaliya niyawulukire yaali atakusobola kubasubiira kyaboine baitu abantu ni beeteja nti abbaire nʼokubonekerwa. Nasumiryangambe abantu natakusobola kubaza.
23Ebiro byamwe ebyakuweereza nibyaweireku, oZaakaliya nʼairayo e waamwe. 24Bini nibimaare okubbaawo Elizaabeeti, omukali wa Zaakaliya nʼatoola enda era ni yeesoroora okumala emyezi etaanu, 25nʼakoba ati, “OMukama anjunire okutoola enda. Leero andangire nindi nganzi gyali, antoireku ensoni omu maiso ga bantu.”
Okubyalibwa kwa Yesu kukulangibwa
26Okwezi kwamukaaga, oKanca nʼatuma omalaika oGabulyeri e Nazaaleesi,#1:26 Kyali kibuga emairo 60 oba ekilomita 100 oku mukono ogumoso ogwa Yerusaalemu, oYesu gyeyakuliire. ekibuga kya mu Galiraaya. 27Yamutumire e wa mwala onteeka, oYusufu omwizukulu wa Dawudi gweyaragaanisirye okubandula. Omwala oni baamwetanga Malyamu. 28Omalaika nʼaiza e wa Malyamu, nʼamukoba ati, “Nkulamucirye, we oKanca gwe yawaire omukisa! OMukama ali naawe.”
29OMalyamu nʼatuntura muno olwa kiramuco kya malaika, ni yeebuulya, “Ekiramuco kini kikumanyisya ki?” 30Omalaika nʼamukoba, “Malyamu ototuntura, oKanca akuwaire omukisa. 31Okwiza okutoola enda, obyale omwana wa bwojo, omwalike eibara Yesu. 32Omwana oni alibba mukulu era aliyetebwa Mwana wa Kanca Akira byona. OMukama oKanca alimuwa entebe ya aizewaamwe oDawudi. 33Alifuga enyumba ya Yakobo#1:33 Yaali mwizukulu wa Ibbulaimu, oKanca gwe yaalikire oIsirairi. Nʼolwʼekyo enyumba oba enda ya Yakobo emanyisya iyanga lya Isirairi lyonalyona. emirembe nʼemirembe, obukama bwamwe tibuliwaawo.”
34OMalyamu nʼakoba, “Ekyakutoola enda kyaikiira kityai? Nje timaite musaiza.”
35Omalaika nʼamukoba, “OMwoyo Akwera yakwizaku, amaani ga Kanca Akira byona gakwiza okubba naawe, omwana alibyalibwa nikyo balimwetera Akwera, oMwana wa Kanca, 36nʼElizaabeeti omugandaawo, eyayetebwanga ongumba era ati nakairikire akwiza okubyala omwana wa bwojo. Kuni okwezi kwamukaaga natoire enda. 37Omu maiso ga Kanca ekikiikiraine kyayi.”
38OMalyamu nʼairamu, “Nje ndi muzyana wa Mukama, ekyombazireku kiikiire.” Omalaika nʼaliga oMalyamu we yaali nʼayaba.
OMalyamu akucaara Elizaabeeti
39Omu biro ebyo oMalyamu ni yeeteekaniza, nʼayaba mangu omu kibuga ekya mu nsozi za Buyudaaya, 40nʼaika e wa Zaakaliya. Niyaingiire omu nyumba nʼalamuca Elizaabeeti. 41Elizaabeeti niyawuliire ekiramuco kya Malyamu, ekya munda ni kizeenya nʼElizaabeeti nʼaizula oMwoyo Akwera. 42Elizaabeeti nʼabaza omwiraka erya aiguru nʼakoba, “Oweereibwe omukisa okukira abakali abandi boona boona nʼomwana gwʼolibyala aweereibwe omukisa. 43Baitu lwaki mpeereibwe ekitiinisya kini ekikooto, onyina Mukama wange okwiza okuncaara? 44Ninkawuliirembe ekiramuco kyamu, ekya munda ni kizeenya olwa kusemereerwa. 45Oli wa mukisa we noikiriize nti oMukama aliikiirya bye yakobere.”
Ekyembo kya Malyamu
46OMalyamu yeena nʼakoba ati,
“OMwoyo gwange gukuwaisya oMukama,
47nʼobwomi bwange bukusemereerwa oKanca oMujuni wange,
48olwa kulowooza oku muzyana waamwe omuculeeri.
Okuzwa ereero abantu aba mirembe gyona gyona baakunyetanga wa mukisa;
49Kubba oMunyamaani
ankoleire ebikulu nʼeibara lyamwe lyeru.
50Emirembe nʼemirembe akwatirwa ekisa
boona boona abamutiina.
51Akoore ebikulu nʼomukono gwamwe ogwa maani,
ararangirye abeewaisya omu mitima gyabwe!
52Anagire abakama abʼamaani okuluga oku ngoma,
nʼaimula abaculeeri.
53Aikutisirye abazala nʼebisai,
baitu abaguuda abapekere banyambula kantu.
54Ajunire omwiru waamwe oIsirairi,
aizukiire ekisa kye yamuragaanisirye,
55omu ndagaano gyeyakoore
nʼoIbbulaimu#1:55 Niye zeiza wa iyanga lya Isirairi. ABayudaaya boona boona baizukulu ba Ibbulaimu. nʼabaizukulu ebiro byona.”
56OMalyamu nʼamalayo emyezi esatu nʼairayo e waamwe.
Okubyalibwa kwa Yokaana oMubatiza
57Ebiro byʼElizaabeeti okusandabuka nibyaikire, nʼabyala omwana mwojo. 58Abaganda baamwe nʼabantu abandi abaamaite Elizaabeeti nʼoZaakaliya ni bawura ekisa ekingi oMukama kyakwatiirwe Elizaabeeti, ni basemereerwa amwei naye.
59Ekiro kyamunaanai ni baiza okusaliira omwana, ni bayendya okumwalika Zaakaliya, eibara lya itewaamwe. 60Elizaabeeti nʼakoba, “Bbe, ayalikibwe Yokaana.”
61Ni bamukoba, “Omu kika kyamu ndooyo alina eibara eryo.”
62Ni bakolesya emikono okubuulya oZaakaliya eibara lyakwendya bayalike omwana. 63OZaakaliya nʼasaba ekyakuwandiikaku, nʼawandiika, “Omwana ayalikibwe Yokaana.” Kini kyewuunyisize buli omwei. 64Amangu ago omunwa gwa Zaakaliya ni gwiguka, olulimi ni lutaisya, nʼatandika okubaza nakuwaisya oKanca. 65Abantu boona boona abaali beerereire oZaakaliya ni baizula okutiina nʼokwewuunya. E Buyudaaya omu nsozi woona woona, abantu ni babaza oku bintu bini byona byona. 66Buli muntu eyawuliire kini yeewuunyanga era nakwebuulya omwana kyakwaba okubba anti omukono gwa Mukama gwamuluku.
Obulangi bwa Zaakaliya
67OZaakaliya, oitewamwana, nʼaizula oMwoyo Akwera nʼatandika okubaza oKanca byeyaali nataire oku mwoyo gwamwe nʼakoba ati,
68“OMukama oKanca wa Isirairi awaisibwe,
olwakubba aizire egiri bantu baamwe era abacungwire.
69Atuteereirewo omujuni owa maani
okuliga omu nyumba ya mwiru waamwe oDawudi,
70(Nka niyaragaanisirye omu balangi baamwe abakwera abairai budi),
71okutujuna okuluga omu banyanzugu baiswe
nʼomu mikono gyʼabo boona boona abaatunobere —
72OKanca akoore kini okulanga abazeiza baiswe ekisa kyeyaragaanisirye
nʼokwizukira endagaano ekwera gyeyakoore nabo,
73nʼalayiriira aizewaiswe oIbbulaimu
74okutucungura okuzwa omu mukono gwa banyanzugu,
leke tumuweerezenge nitutakutiina,
75nitukwera, era nitwikiriire ebiro bya bwomi bwaiswe byona byona.
76We omwana wange, okwiza kwetebwa mulangi wa Kanca Akira byona,
olwakubba niiwe oliteekaniza abantu okutangiira oMukama.
77Olimanyisya abantu baamwe nti balicungurwa
nibasaasiirwe ebibbi byabwe.
78Olwa kisa kya Kanca ekinyamwingi,
nkʼokibbambya nasala nʼamoleka onsi nʼoMukama akwiza okuluga omwiguru aize gyetuli,
79amoleke abaikaara omu kiiruma nʼomu kiituuru kya kufa,
aturunguure okwika omu muwanda gwa mirembe.”
80Omwana nʼakula era nʼafooka wʼamaani omu mwoyo nʼaikalanga omwirungu okwica niyatandikire okubonekaku omu baingi, omu Isirairi.
Currently Selected:
Luka 1: RUULI-NYALA
Highlight
Share
Copy
Want to have your highlights saved across all your devices? Sign up or sign in
