Esaburi 7
7
Esala lia Owukhalaki Wang'ali
Amaliro aka Daudi aka kembera OMWAMI okhulondana nende Kushi owekholo ya Benyamini.
1Ewe OMWAMI Nyasaye wange, ese nekisanga mwiwe;
mbonie okhuchula khwavo vosi avandakhatakha mana wunanule.
2Nausa vali okhunjosulamo ngetalang'i,
Nivakhwesulula okhuchia nange, nimbuma owokhumbonia.
3Ewe OMWAMI Nyasaye wange, niva mbo nakholire kano,
niva mbo ndi nowuvi mumakhono kange,
4niva mbo nakoseye omusale wange,
namwe nengiriye omusiku wange nimbuma esifune,
5lekha khanu omusiku kanyongekho mana kandire;
nundi lekha asenakirire owulamu wange khwilova,
mana asikhe omwoyo kwange mwilova. Selah
6Yinyokha, Ewe OMWAMI, mwichima lilio,
yekingula wikalire echima liavasiku vange.
Yinyokha, Ewe Nyasaye wange, ewe wamwene wawuye esikhalako.
7Langa emikhung'ano kiavanju kiewuse aoli;
nawe ovamiye okhuchula amukulu.
8OMWAMI akhalakiranga avanju,
khalakire, Ewe OMWAMI, okhulondana nowulungi wange,
nundi okhulondana nowulungi wulimwise.
9Chusao owumayanu wavanju vavi,
mana otinyirise avo avalungi.
Ewe otemanga enganakani nende emioyo,
Ewe Nyasaye mulungi.
10Ekhumba yange yiri mu Nyasaye,
owonianga avakololofu mumioyo.
11Nyasaye mukhalaki mulungi,
nundi aalaviranga avamayanu musialo.
12Omunju nachekanira ta, Nyasaye achiakhuwakala olung'esi lulwe;
akotie oluyingo lulwe mana kaluyinga.
13Kakhachekekha evimanulwa vivie evilulu,
nokhumemia amaolofu kake mumuliro.
14Wona, omunju mumayanu aparanga wusa okhukhola amavi,
nundi kechulamo owuvacha,
mana awolanga wusa akowuveyi.
15Ayavanga elina achusamo elova,
nundi amala akwa mulina eli ayavire omwene.
16Owuvacha wuwe wumukooleranga omwene,
ne owuchasi wuwe wuwumisanga omwene.
17Engoosera OMWAMI ochio muno eyiri engali eyolana nowulungi wuwe,
nundi nemba efuma khulicha lia OMWAMI wa Amukulu Muno.
Currently Selected:
Esaburi 7: LNTPP
Highlight
Share
Copy
Want to have your highlights saved across all your devices? Sign up or sign in
©The Bible Society of Kenya, 2024
