Mariko 5

Yesu Awonia Omunju wali nende Evisieno

(Mat. 8.28-34; Lk. 6.26-39)

1Vola engerekha wenyanja, musialo sia Gerasenesi. 2Nolu kachula muliacho, kawukanana nomusacha nachula muvirindwa owali nevisieno, 3kali kamenya muvirindwa, sikalikhoo owakhanyalire okhumuwoya, ata neminyololo ta. 4Esikira vamuwoanga neminyololo nende epingo. Eminyololo akikitula, nachio epingo achikhalakamo evitonye. Awumao owali namaani kokhumukhira ta. 5Esiro nesiteche kaonganga muvirindwa nende musikulu nalira nundi nikekhenga namakina. 6Olu kawona Yesu nasiri esinao, kamutimira ne kamwinamira. 7Kayula nawola, “Wenya sina ninange Yesu, Omwana wa Nyasaye Owamukulu Muno? Ekhusava nusima emberi wa Nyasaye ochanyasa ta.” 8Esikira kali asiwoleye, “Chula mumunju ono ewe sisieno simayanu!” 9Ne Yesu kamucheva, “Elicha lilio niwe anu?” Nasio siamuchipa, “Nise Legioni! Sikira khuli avangi.” 10Ne siamwesaya nisiekalikhira achavichusa musialo omwo tawe. 11Khanu etuli liengurwe liali linalianga musikulu, 12ne viamusava, “chuchume mungurwe, lekha khuchingiremo.” 13Kho kavisiwula. Nevisieno viachula mumusacha oyo viengira mungurwe. Engurwe, echiali nichiola eelefu chiviri, chiakholomokha khumwikha khulukuku chiakwa munyanja chieyinikha. 14Avayi vatima, vawola mwitookho nende mulukongo. Navanju vacha okhuwona esiali nisiekholekhire. 15Vacha khu Yesu, vawona omusacha oyo kekhaye, afwaye enguo, oyowali nende roho mumayanu, nasosise mana varia. 16Navo avawona valandaasa esiali nisiekholekhanire khuwali nevisieno nende engurwe. 17Avanju vanja okhwekalikhira Yesu mbo achule mulukongo lwawe. 18Olu kali ni kengira muliacho, Omunju oyu evisieno viali nivichuliremo kamusava ave naye. 19Nausa Yesu kalova, kamuwolera, “Chia engo khuvecha vavo, ovawolere esikali esi Omwami akhukholeye, ngakhuwoneye esisa.” 20Ne kachekukha kachia kachanikha okhuwola mu Dekapoli esikali esi Yesu kali namukholeye, navanju vosi vawuka.

Omukhana wa Yairo Nomukhasi Watira khunguo ya Yesu.

(Mat. 9.18-26; Lk. 8.40-56)

21Olu Yesu kambukha nundi muliacho engerekha wundi, esituma esikali siakhung'ana khuniye, kali khulukuku lwenyanja. 22Mana kacha mulala khuvachuki vesinagogi, elicha lilie mbo Jairo. Olu kawona Yesu, kamukwa mumakulu, 23kamwesaya nawola, “Omukhana wange omutiti aliwuvi aambi okhufwa, yicha omuchekho amakhono, awone nundi amenye.” 24Kachia ninaye.

Nesituma esikali siavanju vamulondakho ni veminirisa aakali. 25Kaliwo omukhasi owatachanga amalasire khumiaka ekhumi nakiviri, 26owali nikawumiya olukali mumikhono kiavasirikhi avangi, kekhonyera wulisinju esikali nasio, nausa sikasosa tawe kachiririra wusa okhutacha. 27Kali kawulira amakhuwa okhulondekhana ni Yesu, ne kachia enyuma wuwe musituma katira khunguo yiye. 28Kewolera mumwoyo, “Mana natirakho wusa khunguo yiye nesosa.” 29Evise evio okhutacha khwema, kewulira mumuviri nawonire khumalwaye kake. 30Yesu, kamanyirisa mumwene mbo owunyali wumuchuliremo kakalukhana musituma, kawola, “Njanu otiye khunguo yange?” 31Navalondi vave vamuwolera, “Owona esituma sino nga sieminirisa khwiwe, mana owole, ‘Njanu owundiyekho?’” 32Kalengera nikenya amanye owali namutiyekho. 33Nausa omukhasi oyo, namanyire esimwekholekheye, kacha nowuchi nende okhuchenga kakwa emberi wuwe, kamuwolera owung'ali wosi. 34Yesu kamuwolera, “Mukhana wange, esuvira lilio likhuwonisie. Chia nomulembe, nowulwaye wuwo wuwone.” 35Olu kali nasilomaloma, vacha okhuchula munju yomuchuki vawola, “omukhana wuwo afwiye, osinyasira sina omwekesi ono?” 36Nausa kekalirisa akavawola, Yesu kawolera omuchuki wesinagogi, “Ocharia tawe, Suvira wusa.” 37Yesu kalovera omunju yesiyesi okhumulondakho nichali Petero ni Yakopo nende Yohana omusoliri wawe. 38Olu vola munju yomuchuki wesinagogi, kawona owukoyanu, avanju nivalira navandi nivakhupa embungu. 39Olu kali nikakhengira kavawolera, “Mukoyana muchie nokhulira? Omwana ono siafwiye tawe, ali mundoolo.” 40Navo vamuchekha. Nausa niye kavachusa erwanyi, kawukula papa ni mayi vomwana nende avo avali naye vachia aamwana kali.

41Katira omukhono kwomukhana oyo, kawola, “Talitha koum”, eliwola mbo, “Omukhana mutiti, ekhuwolera, yinyokha.” 42Ne aonao omukhana kenyokha kakenda (kali nemiaka ekhumi nakiviri), mana avanju vawuka muno. 43Naye kavakania mbo omunju achamanyakho amakhuwa ako tawe, ne kavawolera vamuwe khusinju alie.

Currently Selected:

Mariko 5: LNTPP

Highlight

Copy