Luka 9

Oburume bwabeechi ekhumi nababili

(Mat. 10.5-15; Mk. 6.7-13)

1Mana yalanga abo Ekhumi-nababili halala, nabaheelesia amaani nende obunyali khumadimoni kosi, khandi nende okhuhonia obulwale. 2Nabaruma okhwilwatsa akobwami bwaNyasaye nokhuhonia abalwale. 3Nababoolela mbu Murabukulakhwo eshindu shiosi shioluchendo Iweenywe ta, kata indabushi, kata omufuuko, kata omukaate, kata amapeesa; kata omundu araba netsingubo tsiomukari tsibili tawe. 4Ne munzu yosi eya muleenjilamwo, mumenye mubwenomwo, murule mubwenomwo nimwinyokha. 5Nabo bosi abaramwinjisia ta, olwa murula mwitookho omwo muteng'ulule olufu olwokhubilenje bieenywe, khube oburumbusi khubo okhubafukula. 6Nibatsia, nibabira mumataala kosi, nibeelwatsanga Injiili, nibahoninjia abandu hosi hosi.

Okhufwa khwaYohana Omubatisii

(Mat. 14.1-12; Mk. 6.14-29)

7Ne Herode omuruchi yahulila khukosi akali nikeekholanga; nanyakhana muno mumwoyo, shichila abandi bali nibaboolanga mbu Yohana walamuushe mubafu; 8nabandi, mbu Eliya waloleeshe; nabandi, mbu mulala khubalakusi bakhale walamuushe khandi. 9Naye Herode naboola mbu Yohana ndamurema omurwe; ne uno niye wina, owa embulilangakhwo amakhuwa akafwana kario? Nakhaaba okhumulola.

Yesu yaliisia abandu ebikhumila biraano

(Mat. 14.13-21; Mk. 6.30-44; Yoh. 6.1-14)

10Abarume nabo, olwa bali nibakaluushe, bamurumbulila Yesu amakhuwa aka bali nibakholile. Nababukula, narulaho ninabo bonyene natsia mwitaala elilangwa mbu Betsesaida. 11Nabemikanda olwa bamanya bario, bamulondakhwo; nabeenjisia, nasungana ninabo khumakhuwa kobwami bwaNyasaye; nabo abali nibakhoyile okhuhonibwa, yabahonia. 12Mana eshialo shiali nishiilukhana; nabo Ekhumi-nababili nibeetsa, nibamusunjila bari Obaseebule abemikanda batsie mumataala nende mubisoma ebirondokhana banyoole obukono nende ebiokhulia; shichila aha khuli hano neshitsiimi. 13Ne yabasunjila mbu Inywe mubaheelesie eshiokhulia. Nibasunga bari Shikhulikhwo nende eshindu ta, habula emikaate chiraano nende tsinyeeni tsibili, nikhurakhatsia okhubakulila abandu bano bosi ebiliibwa. 14Shichila bali abasaatsa shinga ebikhumila biraano. Nababoolela abeechibe ari Mubeekhasie ebituma ebituma, buli shituma abandu shinga amakhumi karaano. 15Nibakhola bario, nibabeekhasia bosi. 16Naye nabukula emikaate echio chiraano netsinyeeni tsibili, nahenga mwikulu nabisabila ikhabi, nabisonyola; nakabila abeechibe mbu babarenjeshele abemikanda. 17Nibalia nibeekura bosi; ebisonye ebiabatong'ela nibikhung'aasibwa, ebimwelo ekhumi nabibili.

Aka Petero yarumbula khukaYesu

(Mat. 16.13-19; Mk. 8.27-29)

18Olwa yali nalaamanga yenyene, yali nali nende abeechi abo; nabareeba ari Abemikanda baboolanga barie khwisie, mbu nisie wina? 19Nibakalusia nibasunga bari Yohana Omubatisii; ne abandi baboola mbu Eliya; nabandi, mbu mulala khubalakusi bakhale alamuushe khandi. 20Nabareeba mbu Neenyu muboolanga murie, mbu nisie wina? Petero nakalusia, nasunga mbu Niwe Kristo waNyasaye.

Yesu yaboola akokhufwakhwe

(Mat. 16.20-28; Mk. 8.30—9.1)

21Naye nabakaaria nabalaka butinyu oburamuboolelakhwo omundu yesi likhuwa elo ta; 22naboola mbu Kamukhoyeele Omwana wOmundu okhwifwila amakhuwa amanji, nokhulobwa nende abakofu nabakuhani abakhulundu nabahandiichi, nokhwirwa, nokhulamusibwa khunyanga yakhataru.

23Nababoolela bosi ari Omundu yesi naba niyeenya okhuba omulondi wanje, yeekaanie omwene, yeetuushe omusalabakwe buli nyanga, yanondenjekhwo. 24Okhuba owenya okhuhonia obulamubwe, alabukosia; ne oubukosia obulamubwe khulwanje, omwenoyo alabuhonia. 25Shichila kamukaasila shiina omundu, naba niyeenyooleia eshialo eshilamba, ne obulamubwe nibukora kata okhumubukulwakhwo? 26Shichila omundu yesi oufwimbilwa isie nende amakhuwa kanje omurwe, neniye owa Omwana wOmundu alamufwimbilwa omurwe olwa yeetsa muluyali lulwe omwene nende oluyali lwaSamwana, nende olwabamalaika abatakatifu. 27Ne emuboolela tieeli, mbu baliho khubasinjiile hano bano, abaraiikoonyelelakhwo khukhufwa nibarashialolakhwo Obwami bwaNyasaye tawe.

Okhukalulwa khwelikondo liaYesu

(Mat. 17.1-8; Mk. 9.2-8)

28Mana olunyuma lwetsindaalo shinga munaane okhurula khumakhuwa ako, yabukula Petero nende Yakobo nende Yohana natsia ninabo mushikulu okhusaaya. 29Ne olwa yali nasaayanga, obukondo bwomumonimwe bwakalukhana, tsingubotsie nitsikwa tsindafu, nitsihenukha. 30Ne lola, abasaatsa babili bali nibasungananga ninaye; bali Musa nende Eliya; 31nibaloleshela muluyali, nibasunga khukhwinyokhakhwe okhwa yali nali okhuusilia eYerusalemu. 32Ne tsimoni tsiaPetero nende aba yali ninabo tsiali nitsisitoohe khulwa tsindoolo; ne olwa bamala babe meeso, balola oluyalilwe, nende abasaatsa abo babili abasinjiile ninaye. 33Ne olwa yabo bali nibali okhulekhana nunaye, Petero namusunjila Yesu ari Omwechesia, nobulayi ifwe okhuba hano; lekha khuumbashe amatili kataru, elala elilio, elindi liaMusa, nelindi liaEliya; ne naramanya eshia aboola tawe. 34Ne olwa yali nashiboolanga amakhuwa ako, lileesi niliitsa nilibafwimba; nibaria olwa beenjila mwileesi. 35Omwoyo nikurula mwileesi, nikusunga kuri Uno niye Omwana wanje, omulobole wanje; mumuhulilenje. 36Ne olwa omwoyo okwo kwali nikwakhahuliilikha, Yesu yanyoolekha yenyene. Nabo nibaholeela butswa, nibaraboolela omundu yesi mundaalo etsio khumakhuwa aka bali nibaluutsi tawe.

Yesu yahonia omwana owali nelidimoni

(Mat. 17.14-21; Mk. 9.14-29)

37Ne khunyanga yakhabili, olwa bali nibeeshile okhurula mushikulu, omukanda omukali nikumubukaanila. 38Ne lola, omusaatsa undi khubomukanda yalanga ari Omwechesia, ekhusaaya mbu omulolekhwo omusiani wanje; shichila nomwana wanje omuteelwa; 39ne lola, roho undi amuhambanga, ne nonoho ayiibanga; ne amubahasinjia, okhuula olwa lifilo lifwitukha mumunwakwe, naramulekha bwangu ta, namusaalisia muno. 40Nimbasaaya abeechibo mbu bamurusie; ne bakhayilwe. 41Yesu nakalusia nasunga ari Inywe abolwibulo olurambatsanu, olurasuubila ta, ndalabeetsanga nineenywe okhuula liina, nimwisimilisilia? Leera omwanawo hano. 42Ne olwa yali nashiitsanga, lidimoni nilimukhupa hasi, nilimubahasia muno. Ne Yesu yakondeshela roho weshifwabwi, nahonia omwana, namukalusilia samwana. 43Bosi nibang'ang'aala olwa balola obukhulundu bwaNyasaye.

Yesu yaboola khandi akokhufwakhwe

(Mat. 17.22-23; Mk. 9.30-32)

Ne olwa bosi bali nibachenyanga khumakhuwa kosi aka yakholanga, yasunjila abeechibe ari 44Amakhuwa kano mukatiile mumarwi keenywe; okhuba Omwana wOmundu alahaanwa mumakhono kabandu. 45Ne shibatiila khushisina shiamakhuwa ako ta; kababiswa, baleshe okhukamanya; nibaria okhumureeba khumakhuwa ako.

Niwina ouli omukhongo?

(Mat. 18.1-5; Mk. 9.33-37)

46Nibachaaka okhukanakania, mbu niwina khubo oukhoyile okhuba omukhongo? 47Ne olwa Yesu yalola obukanakanii obwomumioyo chiabwe, yabukula omwana omutuutu namura aha yali, 48nabasunjila ari Omundu yesi owinjisia omwana omutuutu uno khulwa eliira lianje, yanzinjisia isie; ne ounzinjisia isie amwinjisia oyo owanduma; okhuba ouli omutuutu mwinywe mwesi, omwenoyo nomukhongo.

Ouramufukula ta nowolubeka Iweenywe

(Mk. 9.38-40)

49Yohana nakalusia, nasunga mbu Omwechesia, khwaluutsi oundi narusinjia amadimoni khulwa eliiralio, nikhumukaania, shichila shialondananga nineefwe ta. 50Ne Yesu namuboolela ari Muramukaaninjia tawe; shichila ouramufukula ta nowolubeka lweenywe.

Abelitaala liabaSamaria abaramwinjisia Yesu ta

51Mana olwa tsindaalo tsiokhukulusibwakhwe tsiali nitsili okhuula, yasaabila okhutsia eYerusalemu, 52naruma abarume imbeliwe; nabo nibatsia, nibeenjila mwitaala lindi liabaSamaria, mbu bamurecheshele amakhuwa. 53Ne abayo shibamwinjisia ta, shichila yeengana outsia eYerusalemu. 54Mana olwa abeechibe Yakobo nende Yohana balola, basunga bari Omwami, wenya mbu khulache omulilo kwishe kurule mwikulu, kubamulule? 55Ne yashiukhana, nabakondeshela. 56Mana nibatsia mwitaala lindi.

Abandi beenya okhulonda khuYesu

(Mat. 8.19-22)

57Ne olwa bali nibali khunjila nibatsutsanga, omundu undi yamusunjila ari Ndalakhulondakhwo hosi hosi aha otsia. 58Yesu namukalusia mbu Amabwe kali nende ameena kako, amanyonyi akokhwikulu nako kali nebitsu biako; ne Omwana wOmundu shialikhwo nende ewa akonia omurwekwe ta. 59Ne yasunjila oundi ari Nondakhwo. Naye nasunga mbu Omwami, chama enzie mbeli emuyabile papa. 60Namusunjila mbu Lekha abafu beene bayabile abafu babwe; nawe, tsia otswanie akobwami bwaNyasaye. 61Oundi khandi naboola mbu Nasi ndalakhulondakhwo, Omwami; ne chama enzie mbeli eseebulane nende abeweefwe. 62Nebutswa Yesu namusunjila mbu Omundu yesi ouba natiilile amakhono khumbako yetsing'ombe mana nakhupa amashemo inyuma, shiakwanile obwami bwaNyasaye tawe.

Currently Selected:

Luka 9: OUV

Highlight

Copy