Genesis 20

Aburahamu nende Abimelekhu

1Naye Aburahamu narula ewa yali, nachooma okhutsia khushibala shiaNegebu namenya hakari weKadeshi nende Shuri; namenya shinga omucheni mushibala shiaGerari. 2Aburahamu naboola khukaSara omukhasiwe ari Nomukhaana weefwe; kho Abimelekhu omuruchi waGerari naruma abandu nibamuyila Sara ewuwe. 3Ne Nyasaye namwitsila Abimelekhu mwilooro mushilo, namusunjila mbu Lola, oli okhufwa khulwa omukhasi oyo owa obukuule; okhuba nomukhasi wabeene. 4Ne Abimelekhu yali nashili okhuba ninaye; naboola ari Omwami, nawire kata nende lihanga lilunji? 5Shiali ye omwene owayasunjiile mbu Nomukhaana weefwe? Kata omukhasi mwene nasunga ari Uno nomusiani weefwe. Likhuwa lino ndakholile mushiilongoole shiomwoyo kwanje, amakhono kanje nikahumakhwo eshikha. 6Nyasaye namuboolela mwilooro tsana mbu Toto, emanyile endio mbu okholile lino mushiilongoole shiomwoyokwo; nasi nisie oukhuyinjiile oburanzonoonela tawe; khulwa ako shikhufuchiiliile okhumutiilakhwo tawe. 7Ne bulaano omukalusilie omusaatsa oyo omukhasiwe; okhuba ye nomunabii, ne alakhusaayila iwe, nawe olaba omulamu; ne noba noramukalusia tawe, omanye mbu olafwa toto, iwe, nende bosi aba oli ninabo.

8Kho Abimelekhu nahuuna mumabwibwi tsi, nalanga abakholibe bosi, nabatoonyelal amakhuwa ako kosi, nabo nibahulila; abandu abo nibaria muno. 9Mana Abimelekhu namulanga Aburahamu, namusunjila ari Okhukholeele orie? Ndakhukholeele obubii shi, kho nawe nochila isie nende obwami bwanje nikhukhola obwonooni obukhongo burio? Wayakholeele ebikhole ebirakhoyeele ta. 10Abimelekhu nasunjila Aburahamu khandi, ari Waluutsi orie, kho mana nokhola likhuwa lino? 11Aburahamu nasunga mbu Okhuba ndapaaranga mbu Toto, habundu hano Nyasaye shiariibungwa ta; fwana bakhanzira isie khulwa omukhasi wanje. 12Neliatoto, nomukhaana weefwe, shichila nomwana wapapa, ne ali nende nyina; naba omukhasi wanje; 13mana olwa Nyasaye yanjesia niyarusia eweefwe, kho nimusunjila mbu Shino nishio eshisa eshia olakholelanga, mbu buli habundu aha khuloolanga, olasunganga khwisie mbu Uno nimbootswa. 14Kho Abimelekhu narusia amakondi nende tsing'ombe, nende abakholi abeshisaatsa nende abeshikhasi, namumanusia Aburahamu, khandi namukalusilia Sara omukhasiwe. 15Abimelekhu naboola mbu Lola, eshibala shianje shieshino imbeliwo; menya aha wenyile. 16Nasunjila Sara mbu Lola, emuheelesiye omusiani weenywe tsifeetsa eshikhumila khululwo iwe, mbu tsibafwimbe tsimoni abeenabo aba oli ninabo; kho olalolekha noli omulunji imbeli wabandu bosi. 17Aburahamu nasaaya Nyasaye; Nyasaye nahonia Abimelekhu, nende omukhasiwe, nende abakholibe abakhasi; nabo nibeebula abaana. 18Okhuba OMWAMI yali niyabeekala tsimbeleshelo abomwitaala liaAbimelekhu bosi, khulwa Sara omukhasi waAburahamu.

Currently Selected:

Genesis 20: OUV

Highlight

Copy