Mlk 5

Yeesu wafuula mundu gubwa nangi na misimbusimbu

(Mat 8.28-34; Luk 8.26-39)

1Yeesu na mitangi* yaayi haba yabu'a mugela wa bubidi wa Iziba, mu issi kya Wagelasi. 2Yeesu bobwa bwebu huma ye, mundu mwa mutumbu hanga hanha, yumu gubwa nangi na misimbusimbu gubu huma ubi jyaami; kukuu udi Yeesu. 3Mundu yuugu gubwa nangi mu yaana ubi jyaami, mukyee ihindi kyooso ndobwa nangi mundu gubwa nangi na butangala boo mu ganga muyololo. 4Babu mu ganga na muyololo na haba mu ganga na byeela, gubwa nangi mu temba goo wa muyololo na unoŋa byeebya byeela; ndobwa nangi mundu na butananga boo mu kutila. 5Mweena lusu, bufu'u na munyinya, gubu yaana ubi jyaami muu kalakala kuu'u na kuu'u mubi banjwa, muu yabaŋana na muu yi bongogola mu tubu. 6Bweebu mu mona Yeesu uula, haya weena mu lubilu, haya vunga manyu mabusu gayi. 7Na haya dila na mu huuya watagadi na haya boya; «Kyoobe kyaayi kwandi mimi, bebe Yeesu Mwaana wa Kabejya didi hegulu u lububi? Naku haajya mabusu ga Kabejya tii, nangu ni suvya.» 8Yuugu mundu gubwa nangi muu sagula biibi, manee Yeesu gubwa nangi muu sawiila musimbusimbu gubwa nangi munda mwaayi; «Huma munda mwa yuugu mundu, beebe muhehe gubigubi!» 9Ihani Yeesu haya mu yuujya yoo mundu: «Zina ndyoobe ni naani?» Na eyu haya mulunga: «Zina dyaami ‹Ngigandu›#5.9 Igandu: au Titi dya bandu: Zina diidi dibu teena bungi bwa igandu kya balonga-buvuadi 6000 na bwa babu sagula biibi ngu monesha bungi bwa guugu muhehe gubigubi. , manee tuluyaana babutu.» 10Yugu mundu hekilu yigaya udi Yeesu ti: «Ndijyanganga misimbusimbu ula mukyee Issi».

11Mukyee ibanjwa ubwa nangi muyolo watagadi wa ngulubi#5.11 Ngulubi u Bayahudi bwina nyama buubu bubwa nangi halamu au yibiyibi ukidila diini (Lawi 11.7); na umona kwa muyolo wa ngulubi udi muu monesha tii, babu yaani mu diidi buga ndaba bwa nangi Bayahudi. muudya. 12Ihani yiiyi misimbusimbu haya mu haajya Yeesu tii, «Utushwejyi munda mwa guugu muyolo wa ngulubi.»#5.12 Utushweejyi mundu mwa guugu muyolo wa ngulubi: Nda tuluyu'a indu ibu tinda yiiyi misimbusimbu uhaajya ushweela munda mwa ngulubi. Babu vula byga dya mubidi haboobwa ndababu sheeha indu manee ngulubi yooso yibu gulumu'a na uyi taasha mu iziba na yooso ha yoofwa munda mwa meema. 13Na Yeesu haya yi tabwiila. Hanga hanha, misimbusimbu haya huma munda mwa yoo mundu na ushweela munda mwa muyolo wa ngulubi. Haya gulumu'a yooso haasi wa lubanjwa na yooso haya yikasha mu Iziba, haya yoofwa. Ngulubi yibwa nangi elufu yi bidi. 14Ihani, baaba babwa nangi muu dindijya ngulubi haba weena mu lubilu. Haba weena kuu sawiila bandu babwa nangi u moola na baaba babwa nangi u bisogolo. Bandu haba vueya kuu mona biibi bibu ba sawiila baaba babwa nangi muu dindijya ngulubi, bamoni bibu teebwa. 15Bandu baaba haba weena udi Yeesu. Haba mona yoowa mundu gubwa nangi na misimbusimbu, wa yaana haasi, wa vuala ngubu na ndidi na nyinyi yilegela. Hababu mona biibi haba telegejya mooyo! 16Baaba booso babu mona biibi byooso bibu fuu'a yuugu mundu gubwa nangi na misimbusimbu na ngulubi, na haba sawiila baaba babu vueya manyuma. 17Ihani haba mugaa yidila Yeesu wabagadi mu Issi nyaabu.

18Yeesu, eyu mu boya tii wa shweedi munda mwa Mutumbu, mundu yoowa weebu fuula gubwa nangi na misimbusimbu, haya musawila Yeesu tii; tabu'a na kukumbi. 19Yeesu haya keezema uweena hamonga nayi, haboobwa haya mu sawiila: «Inanga u yendi kyoobe, kwiinu koo butote'a, waaba sawiidi bandu byeebya Kabejya#5.19 Vidi-nyambi: ni Kabejya (1.3; 11.9; 12.11,29-30,36; 13.20). Zina dya mbunda Vidi-nyambi, diidi zina balu mu teena Yeesu. Balu mu teena Yeesu biibi koo monesha mbunda na butangala bwa Yeesu. Lola 11.3. byeebu ku fuula na uku mweena lusa.» 20Ihani Yuugu mundu haya weena u dekapoli#5.20 Dekapoli ni uboya ti, kisi kya mikola kumi, haya somba usawiila bindu bya butu bibu muteela Yeesu, na bandu booso haba hanunu'a.

Yeesu wagalusha buumi udi musi'a gubu fwa na wafuula wa mwaazi gubwa nangi na lufu

(Mat 9.18-26; Luk 8.40-56)

21Ihani Yeesu haya yabu'a lungi mu mutumbu mugela wa bubidi wa Iziba#5.21 Mugela wa bubidi wa iziba, i uboya tii, ni mugele wa koo'a ulu sadila yuba wee ziba kya Galilaya. kya Galilaya. Koo'a igandu kyatakyata kya bandu hakya mu nyungalala. 22Na koo'o, haba heta yumu ngana wa sinagogi*#5.22 Mundu yumu gulu vuba munda mwa sinagogi. I ebu babwa nangi na mwambu goo sadisha bandu na u longa sinagogi. Lola Luka 13.14; Mdo 13.15; 18.8, 17., zina dyaayi Yailo, haya fi'a mu kyee'a igandu. Hanha hebu mumona Yeesu, haya vunga manyu babusu gayi. 23Yailo haya yi gaaya udi Yeesu, haya boya: «Musi'a waani wa mulengi gudi muukala tuuzi. Nayi gaaya koodi! Fi'a u yende kyaami weene waamu hajyidi, wa fuu'i na wa yani muumi».

24Ihani Yeesu haya weena hamonga nayu. Na kyee'a igandu kyaata hakya mu kumba Yeesu tutuu haba mufinga. 25Mu kyee'a igandu ubwa nangi wa mwaazi yumu walufu lwa sangi mu misha umi na yibidi. 26Yuugu wa mwaazi gubu suba kwa butu, balu vuba bihonya babutu haba muvuba. Haboobwa dibu fuu'a, haya tula bindu byeebwa nangi nabyu byooso, lufu waayi halwa mu neemena ukila mabusu. 27Yuugu wa mwaazi bwebu telegejya tii, Yeesu gudi munda mwa kyee'a igandu, haya shweela na eyu mukyee igandu, haya weena manyuma ga Yeesu, munda mwa kyee igandu, haya kwa lengela ngubu ya Yeesu. 28Manee gubwa nangi musagula munda mwa tima dyaayi: «Itu na lengela ye, ngubu yaayi, na fu'anga».

29Hanga hanha, goowa muloha waayi hawa kama, lufu lwayi looso halwa fuu'a. 30Hanga hanha, Yeesu haya yu'a tii, butangala bwayi bwaheela. Haya fululu'a manyuma na haya yujya: «Inani gubu lengela ngubu yaami?» 31Mitongi yaayi haya musawiila: «Gudi mumona kii'i igandu idi mukufinga, na beebe gudi muyujya tii, ni nani waku lengela?» 32Haboobwa Yeesu hekilu lola gungi mu igandu tii, wamoni yoowa gubuta bibi. 33Habobwa, yoowa wamwaazi hekilu zeeza na utelegejya mooyo na uyu'a byeebya byamufi'ila, haya weena, haya kwahona u magulu ga Yeesu, haya mu sawiila hululu bye byooso bibukila. 34Ihani Yeesu haya mu sawiila: «Musi'a waami ulungidila koobe kwandi mimi kwa kufuula. Inanga bilegela na lufu loobe lwafu'i!» 35Gubwa nangi ndikyewa usagula, bandu babu vueya uhumina u yende kyayi habafi'a. Haba mu sawiila Yailo: «Musi'a woobe wakala tima! Sama umu suvya mulangidijyi?» 36Yeesu gubu telegejya byeebya bya babwa nangi mu sagula ndibu bikumba na haya mu sawiila Yailo: «Nangutina, lungidila ye.» 37Yeesu ndibu vula gungi tii, baaba bandu booso bamu kumbi, ila ye Petelo, Yakobo na Yohane muwaayi na Yakobo.

38Haba bufi'a kwa Yailo, Yeesu haya kwa heta vunda na bandu badi muu yabaŋana na mudila. 39Yeesu haya shweela munda mwa yende na haya ba sawiila: «Diidi vunda dyooso dyamudi muuta ndya ayi? Kyamudi muudila ngyaayi? Musi'a yuugu ndi kyee mota; wanoko'a mutulu ye.» 40Ihani bandu babwa nangi munda mwa yende haba kilu museha Yeesu! Yeesu haya balosha booso hajya, haya bugula shaayi na musi'a na najyaayi na musi'a, na baba bebu vueya nabu, haba shweela u buga ndya babu mubii'a musi'a, 41Yeesu haya waata musi'a kuu bo'o na haya musawiila: «Talitha koum!» I uboya tii: «Musi'a mushoo, naku sawiila, talu'a»!

42Hanga hanha, yoowa musi'a haya talu'a na hekilu sumu'a. Musi'a gubwa nangi na misha umi na yibidi. Na bandu booso bwababu mona bibi haba hanunu'a. 43Yeesu haya ba nyajya tii, ndaba sawiilanga mundu nangi yumu huya didi. Ihani haya basawiila tii, bamu gabidi yugu musi'a biyazi waadi.

Currently Selected:

Mlk 5: bnx

Highlight

Copy