Marɨko 6

Abandʉ b'iNasareti abathɨnda Yesʉ

(Mat 13:53-58; Luk 4:16-30)

1Yesʉ mwathoka eyo, mwaya mo muyi ɨshʉkɨragamo, n'abɨga bʉwe mobamʉkwama. 2Ekɨro ky'eSabato kyabere kyahika, mwathanga ɨkangɨrɨtsya mo sinakoki. Bangɨ mo bo bagenda abamʉhʉlɨkɨrɨtsya mobashweka kʉtsɨbʉ n'ibutsania bathɨ: «Oyu amathokya ebɨnwa byoshi ebi byo hayi? Nɨ bwenge mʉhanda ki obo ahabawa, ihika ko kɨka ky'ɨkola bɨthɨko-thɨko bɨrɨnga ebi? 3Oyu ndɨ nɨ omʉsapate, Mʉgala wa Marɨa! Na mʉgalabo Yakobo, na Yose, na Yuta na Simoni! Na balɨ babo ndɨ thunikere nabo kʉno!» Na bʉshana n'ekyo mobathamwɨkɨrɨtsya. 4Nɨmo Yesʉ abwɨrabo athɨ: «Omʉmɨnyeretsɨ anashikibwa ahoshi, hewethuwe athalɨ anashikibwa kowabo, mo kathi ka bagala babo na mo kathi k'olʉganda lʉwe.» 5Bʉshana n'ekyo, Yesʉ mwathakola iNasareti yo kɨthɨko-thɨko n'ekɨgʉma, ɨthalɨ erihira eminwe kʉ bakoni bake n'ilamyabo. 6Naye mwashweka kʉtsɨbʉ bʉshana n'obʉthɨkɨrɨtsya bwabo.

Yesʉ athʉma abɨga ikumi na babɨrɨ

(Mat 10:5-15; Luk 9:1-6)

Honyuma kw'aho Yesʉ agenda athimba-thimba mo mɨrongo ya mo ndambɨ-ndambɨ w'omuyi w'iNasareti alɨ akangɨrɨtsya abandʉ. 7Mwabɨrɨkɨra abɨga bʉwe ikumi na babɨrɨ. Mwathanga ɨthʉmabo babɨrɨ babɨrɨ n'ɨhabo maka w'ɨbɨnga emɨtsɨmʉ mɨbɨ. 8Yesʉ mwahamʉlabo athɨ: «Mʉthahekaga kɨndʉ kyoshi-kyoshi mo lʉgendo lwenyu, ɨthalɨ kɨkoma kuroshi. Mʉthahekaga mʉlamo kʉtse shaho, kʉtse faranga mo mɨfʉko enyu. 9Mwambale bɨrato, hewethuwe mʉthambalaga koti ibiri ibiri.» 10Mwashʉbabwɨrabo athɨ: «Na mwamakokibwa mʉ nyʉmba nyɨrebe, mubye omo ihika ko kɨro mwandathoka mo muyi oyo. 11Na bandʉ ba mʉ mʉrongo mʉlebe bamathɨnda ibakokya n'ɨbahʉlɨkɨrɨtsya, mʉthokeko na mʉkʉngʉthe oluthuthu lwa ko bɨshando bwenyu#6:11 mʉkʉngʉthe oluthuthu: Soma Luk 10:1; Mɨkolano13:51 na 18:6: N'ɨnegena mbʉ yo ʉthakʉngʉtha ebɨshando bɨwe athakɨhwere abo athakʉngʉthɨra bo kɨndʉ. butimoMat 8:4; 10:18; Mar 1:44; 13:9; Luk 5:14.. Ekɨnwa eki kyabya butimo kw'ɨbo.»

12Aho abɨga mobahongoka, mobagenda abakangɨrɨtsya abandʉ mbʉ babɨndʉke bathoke mo bɨtsɨbʉ byabo. 13Mobagenda ababɨnga emɨtsɨmʉ mɨbɨ mɨngɨ, na mobahaka bakoni bangɨ bo mafʉtha n'ilamyabo.

Herote ɨthɨsa Yoani Mubatisya

(Mat 14:1-12; Luk 9:7-9)

14oMwamɨ Herote mwonvwa omwatsɨ wa Yesʉ, kʉshangwa erɨtsɨna lɨwe lyabyaga nilyayire ngʉlʉ. Bandʉ bagʉma bagenda abanegena bathɨ: «Oyu nɨ Yoani Mubatisya yo walubukire! Kyo kɨreka niabya na maka w'ɨkola bɨthɨko-thɨko.» 15Hewethuwe abandɨ bagenda abanegena bathɨ: «Oyu nɨ mʉmɨnyeretsɨ Elia.» Abandɨ bagenda abanegena bathɨ: «Ɨye nɨ mʉmɨnyeretsɨ nga mʉgʉma wa ko bamɨnyeretsɨ ba kera.»

16Hewethuwe Herote abere onvwa omwatsɨ oyo mwanegena athɨ: «Nɨ Yoani Mubatisya yo nyahamʉlaga nyɨthɨ bamʉtseko omuthwe yo wamalubuka!» 17Kʉshangwa nɨ Herote yowene-wene yo wahamʉlaga athɨ Yoani atsɨmbwe na ahirwe mo biriso. Byabyaga bithyo kʉshangwa Herote mwahikya Herotia, mʉka Filipo mʉgala abo. 18Yoani agenda abwɨra Herote athɨ: «Bithahamulirwe kw'ɨwe ihikya mʉka mʉgala enyu.»

19Bʉshana n'ekyo, Herotia mwabaga Yoani na agenda ashondya imwitha, hewethuwe mwathakotsya. 20Herote agendaga ʉbaha Yoani, kʉshangwa abyaga nietsi ko Yoani nɨ mʉthʉnganene na mubuyirire. Bʉshana n'ekyo mwamutheya. Agenda atsɨɨra ɨhʉlɨkɨrɨtsya ebɨnwa bya Yoani, namo byanagenda ebimuthabagania kʉtsɨbʉ mo bʉlɨ ndambi agenda ahʉlɨkɨrɨtsyabyo.

21Kɨro kɨgʉma Herotia mwabona mwanya w'itha Yoani. Kyabyaga kɨro kɨkʉlʉ ky'erɨbʉthwa lya Herote. Mo kɨro ekyo Herote mwakolera abakʉlʉ b'abashirikani bo linye n'abo lʉkengerwa b'iNgalilaya n'abimanitsi b'obuthegeki bʉwe.

22Babere banalɨ mw'ebyo, mwalɨ wa Herotia mwɨngɨra n'ɨthanga ɨshatha. Erɨshatha lɨwe eryo molyamoya omwamɨ Herote n'abo balalɨkawa. Bʉshana n'ekyo mwabwɨra omʉthasha oyo athɨ: «Ʉnyɨshabe ekɨndʉ kyoshi-kyoshi ushashire, nangye nyakʉhakyo.»

23Honyuma kw'aho mwalahɨtsya n'ɨnegena athɨ: «Nyakʉha ekɨndʉ kyoshi-kyoshi wanyɨshaba, na mo kyangabya kɨtse ky'obwamɨ bwaye.» 24Omʉthasha oyo mwahʉlʉka n'ɨya bʉtsya nyinya ʉwe athɨ: «Nyɨshabe ki no malɨ?» Nyinya ʉwe mwamʉshʉbɨtsya athɨ: «Shaba omuthwe wa Yoani Mubatisya.»

25Aho n'aho omʉthasha oyo mwashʉba tsʉba ahalɨ omwamɨ n'ɨmʉshaba athɨ: «Enyishondya ʉnyɨhe ko kathambi kano omuthwe wa Yoani Mubatisya kʉ mbale.»

26Omwamɨ abere onvwa athyo, mwagalɨrwa kʉtsɨbʉ, hewethuwe bʉshana n'erɨlahɨtsya akolaga, na bʉshana n'abo bathalalɨkwa, mwabʉsha nga ko amʉthɨndɨra ekyo amashaba. 27Aho n'aho omwamɨ mwathʉma mʉgʉma wa ko bashirikani bʉwe bo bagenda abamutheya n'ɨmʉhamʉla athɨ ayalethe omuthwe wa Yoani Mubatisya.

Omushirikani oyo mwaya mo biriso n'ɨyatsa Yoani y'omuthwe. 28Honyuma kw'aho mwalethawo kʉ mbale, mwahawo omʉthasha oyo, naye mwahawo nyinya ʉwe.

29Abɨga ba Yoani babere bonvwa omwatsɨ oyo, mobaya heka ekinda kɨwe n'ɨyathakyo mw'ɨsɨnda.

Yesʉ alɨsa bandʉ bɨhʉmbɨ bɨthano

(Mat 14:13-21; Luk 9:10-17; Yoa 6:1-14)

30Abathʉmwa ba Yesʉ babere bashʉba aho abyaga, mobamʉbwɨra ebyoshi bathakola n'ebyoshi bathakangɨrɨtsya abandʉ. 31Abandʉ bo bagenda abahikira Yesʉ n'abo bagenda abashʉbʉla, babyaga bangɨ kʉtsɨbʉ ihika ko kɨka ɨye n'abɨga bʉwe mobathabona ndambi y'erirya. Bʉshana n'ekyo Yesʉ mwabwɨra abɨga bʉwe athɨ: «Thʉgende ithwe bene handʉ hathalɨ bandʉ, bʉshana mʉlʉhʉke hake.» 32Aho mobagenda ɨbo bene mʉ bwatho, handʉ hathalɨ bandʉ.

33Hewethuwe bandʉ bangɨ mobashʉngabo balɨ abagenda, mobamɨnya eyo bamaya. Bʉshana n'ekyo mobahuthuka mo bɨshando ɨthoka mo miyi yoshi, abandʉ abo mobathanga Yesʉ n'abɨga bʉwe bw'eyo. 34Yesʉ abere athoka mo bwatho, mwashʉnga muhindano mʉnene wa bandʉ. Mwafwɨrawo shashi, kʉshangwa babyaga nga mbuli sithawithe mulishya. Aho mwathanga ɨkangɨrɨtsyabo bɨnwa bɨngɨ.

35Bwabere bwagoroba, abɨga ba Yesʉ mobayɨfʉnda hofɨ naye n'ɨmʉbwɨra bathɨ: «Hano nɨ mbwarara, n'obuthuku bo bʉno bwamahika igolo. 36Shʉbʉtsya abandʉ aba bagende mo thʉnzalɨ na mo mɨrongo ya hofɨ-hofɨ bʉshana bayayɨgʉlɨre kalyo.»

37Yesʉ mwashʉbɨtsyabo athɨ: «Imwe bene mʉhebo kalyo.» Nabo mobamʉbʉtsya bathɨ: «Ushondya thʉyagʉle mikati ya bɨtsere magana abɨrɨ#6:37 Kɨtsere kya faranga: Mo kikiriki ni tinari. Etinari ngʉma yabyaga n'ɨyɨrɨngene na lʉhembo lwa buhingi bwa mʉthobero mʉgʉma. bya faranga bʉshana thʉherobo balyero?» 38Yesʉ mwabʉtsyabo athɨ: «Muwithe kʉ mikati ɨngahɨ? Mwathayalola!» Babere bamamala ɨmɨnya, mobamʉbwɨra bathɨ: «Thuwithe kʉ mikati ithano na mahere abɨrɨ.»

39Aho Yesʉ mwahamʉla abɨga bʉwe athɨ bikatsye abandʉ boshi bo ahishi ko bɨthɨ mo bithutho bithutho. 40Mobikala bithutho bya bandʉ igana igana, na makumi athano athano. 41Honyuma kw'aho, Yesʉ mwatsɨmba emikati ithano eyo n'amahere abɨrɨ. Mwashʉmba amesho w'elʉbʉla, mwasɨma Gongo. Mwatsitsanga emikati eyo, mwaharo abɨga bʉwe bʉshana bagabɨrero abandʉ. Na kuthyo mwagabɨra amahere abɨrɨ ayo w'oko boshi. 42Abandʉ boshi mobalya na mobugutha. 43Abɨga babere bashongya-shongya ebɨtse-bɨtse by'emikati na by'amahere byashibaga, mobyotsutsya bɨthonga ikumi na bɨbɨrɨ. 44Abandʉ bo balyaga babyaga bayira bɨhʉmbɨ bɨthano.

Yesʉ athandayɨra ko metsi

(Mat 14:22-33; Yoa 6:16-21)

45Aho n'aho, Yesʉ mwahamʉla abɨga bʉwe bashambɨre mo bwatho n'ɨmʉthanga ko ʉndɨ mwishirya w'engetsɨ ko lʉhande lw'omuyi w'iBetesaita. Mo ndambi eyo, ɨye mwashiba alɨalaga omuhindano w'abandʉ. 46Honyuma w'erɨlagabo, mwɨrʉkɨra ko kɨthwa bʉshana n'ɨya shaba Gongo. 47Bwabere bwabya kɨro, obwatho bwabyaga nɨ bwahera mo kathi k'engetsɨ, na Yesʉ yowene ɨye abyaga nɨakɨnalɨ emʉsɨke ko kɨthaka. 48Mwashʉnga kw'abɨga bʉwe abagalwa mw'ɨkʉba engahya kʉshangwa erɨhʉnga lyagenda erishubyabo enyuma. Bwabere bwashondya ikya, Yesʉ mwahikirabo nɨagendera elʉgʉlʉ ko metsi, na mwashondya ɨtsʉka kʉbo. 49Nabo babere bamʉshʉnga alɨ agenda elʉgʉlʉ w'engetsɨ, mobaganɨtsya bathɨ nɨ kɨhɨndɨ, mobathanga ɨhambala, 50kʉshangwa aboshi mobamʉshʉnga n'ɨʉbaha kʉtsɨbʉ.

Hewethuwe aho n'aho, Yesʉ mwanegena nabo athɨ: «Mʉtsɨbʉhe, n'ingye mʉthʉbahaga!» 51Honyuma kw'aho, mwashambɨra mo bwatho bo abɨga babyagamo, n'erɨhʉnga eryo molyabombera. Bʉshana n'ekyo abɨga mobashweka kʉtsɨbʉ, 52kʉshangwa mobathamɨnya ekɨthɨko-thɨko ky'eriluya emikati nga kinegenire kithi ki, bʉshana n'emɨthɨma yabo mɨtsɨbʉ.

Yesʉ alamya bakoni mo kɨhʉgo ky'iNgenesareti

(Mat 14:34-36)

53Yesʉ n'abɨga bʉwe babere bashabʉka engetsɨ, mobahika mo kɨhʉgo ky'iNgenesareti. Mobagobeka obwatho bw'emʉsɨke w'engetsɨ. 54Babere bathoka mo bwatho, aho n'aho abandʉ mobamɨnya Yesʉ. 55Mobatsʉka mo kɨhʉgo kyoshi ekyo, mobathanga ɨrethera Yesʉ yo bakoni bahekirwe kʉ bipoyi ahoshi bagenda abonvwa mbʉ alɨ. 56Bʉlɨ handʉ ho Yesʉ agenda atsʉka, mo miyi na mo mɨrongo, kʉtse mo thʉnzalɨ, abandʉ bagenda abahira abakoni mo bɨbʉga by'emihindano n'ɨmʉshaba bathɨ ahamʉle abakoni bakole ko pindo y'olʉkɨmba lʉwe kuroshi. N'aboshi bo bagenda abakola kʉlo, bagenda abalama.

Currently Selected:

Marɨko 6: ver

Highlight

Copy