Ruka 20
20
Emaa a Yesu asaa kuni?
(Mat 21.23-27; Mar 11.27-33)
1Otu ruma, Yesu wabesenga uhanange n'ihubiri ebea eMwasi Wakonda kumunda n'eNumba ya Ongo. Ebakwakare b'ebakuhani n'ebahani b'eMyomba hima n'ebakungu b'eBayuta bamusaire nsisu, 2bamushisha mbu: «Ebinwa bino, twiri inye ngwakukutuma karonja byo, abe inye ngwakukuninka emaa erironja byo?»
3Yesu wasako bo mbu: «Nani nibushishange kinwa kima. Muniiri ke, 4mbeni Yohana wakutonga emaa erirubika kuni? Kwa Ongo abe kuri ebea?» 5Nampo, babucha ihakanyana mbu: «Kuba twamwire mbu emaa ae asaange kwa Ongo, wasetushisha mbu: ‹Bushwa nki ke ntĂmukumusimira?› 6Kuba twamwire tu mbu emaa a Yohana asaa kuri ebea, ebea bati basetushura na makoi, bushwa mbu ebati basimira mbu Yohana wabesenga mutahwa wa Ongo.»
7Nampo bamusako ke mbu: «Bate ntĂtosi kwakianga Yohana wakuto emaa erirubika ebea.» 8Yesu nae were bo mbu: «Nani hotu ntabwiri mbu mu maa anye nge aronjange mo ani ebinwa mbi.»
Mushinga w'ebakori bema
(Mat 21.33-46; Mar 12.1-12)
9Kuruma nampo, Yesu wakere ebea emushinga uno mbu: «Kwarikanga wabume uma ngu wahinganga ishwa ra misabibu. Wasombya ro bahingi bima kongo benda bamuninkange muhango mu mirime, nae wenda mu chuo cha kore matu mingi. 10Emirime yakianga yamase, emwea ngo watuma mukori wae uma kuri ebahingi mbu bamuninke emuhango wae mu mirime. Ina ebahingi mbo bahumba emukori ngo n'imuhensa, n'imukurucha kobokobo. 11Mine erishwa watumire tu bo umpe mukori, ina bamuhumba hotu n'imukambaa, n'imukurucha kobokobo. 12Watumire tu bo mukori wa meta ashatu, nae hotu bamubabaya n'imutaa kumushi n'erishwa. 13Nampo ke, minerishwa weba mbu: ‹Nasekia ke buni? Mbo! Nasetuma ke musikyani, kitwana chani, munantambi basemusubaha.› 14Ina ebakori mbo barekia basunga emwana ngo weyange, bamwende rwanko, beba mbu: ‹Uno nge mine emwandu w'erishwa rino, kai tumushure kongo twasia na ro.› 15Bamutinge, bamutaa kumushi n'erishwa n'imushura.
«Nampo Yesu washisha ebea mbu: Ebahingi mbi, mbeni minerishwa wamuronja bo buni? 16Waseya kashiria ebahingi mbo n'ininka ro bampe bahingi.» Ebea barekia barukira mbo, beba mbu: «Ebinwa buri mbyo, kiro byatuhiereyo rotu!» 17Ina Yesu wasindera bo n'iere bo mbu: «Muniri kuba eMitiro Yashurukara ino yeba buni!
‹Erikoi ratawanga n'ebimbi,
iro nge ramabese ikoi rikiri r'enkuso y'enumba.›#20.17 Soma Sab 118.22.
18Kinsi mwea ngu wasekireyo mu rikoi ndo wasenechaayo,
nangu wasehukirwayo na ro risemubunguraayo.»
19 Ebahani b'eMyomba n'ebakwakare b'ebakuhani barekia bamarukira mbo, basiba mbu Yesu wamakera emushinga ngo bushwa nabo. Hiha-hiha basonda imutinge, ina bakwa boba bushwa n'ebwingi bw'ebea.
Eritua ehoro ya Kaisari
(Mat 22.15-22; Mar 12.13-17)
20Ebakwakare mbo b'eBayuta babucha ikairire Yesu kongo bashee kinwa chimusongere kuri emukwakare w'eBaroma. Nampo ke basonda bea, batuma bo kuri Yesu. Ebea mbo bironjanga buri bea baombokara, kai babesenga basondange itingire Yesu mu binwa byae kongo bamusibura kuri ebakwakare b'echuo. 21Ebea mbo bamwire mbu: «eMuhani, bate twosi mbu ebinwa byebangǎ ǒngo n'ebihananga ǒngo ebea birikanga b'iira. Utwiraenga rabe mu birira bya bea, ina ǒngo uhananga bo binwa byaombokara by'ense ya Ongo. 22Eo twiiri ke, mbeni eMyomba yitu yarisia ituwa ehoro kuri Kaisari abe anga?»
23Ina Yesu warekia wamakengura ebwamamutea bo ebinwa mbyo, were bo mbu: 24«Munishee kasa kikoroto kima.» Nampo ke washisha bo mbu: «Mbeni ensusanya ino yanye? N'erina rino raandikwa hano mbeni ranye?» Nabo basako mbu: «Bya Kaisari.» 25Nampo ke Yesu were bo mbu: «Kai mwendi muninka Kaisari ebikai mbi byae, na Ongo nae mbi byae.»
26Ebea mbo ntĂbakochanga imushee mo kinwa echamumutingire bo mu mbi ebyabesenga byebange we munkati n'ebea. Ina bashisharanga mu kinwa nchi chasakonga we, bakoba!
Mbeni ebakwire basefukayo?
(Mat 22.23-33; Mar 12.18-27)
27Kuruma nampo, Basandukayo bima beyere Yesu. (eBasandukayo nge bebangÇŽ mbu ebakwire batafukiyo.) 28Bamushisha mbu: «eMuhani, Musa watwandikirenga mu kitabo ch'eMyomba buno mbu: ‹Kuba mwea wabinga na wamakwa usira mwana, munachabo wahwa ibinga emushumbakari kongo wabutire ingu warikwa bana.› 29Ngebumbo, kwarikanga misike irinda ya bura buma. Entangi yabinga mumina, ina yakwa nti tĂyasia mwana. 30W'emeta abi nae watinge emushumbakari ngo, ina nae wakwa nti tĂwabuta n'emushumbakari. 31Kuruma nampo, w'emeta ashatu nae hotu bubo. Rabesenga bumbo-bumbo mu bati barinda. Ebati bakwanga nti tĂbaributa nae anga na mwana uma. 32Kuruma nampo emushumbakari ngo nae wakwa. 33Mbeni ke, erotu rw'erifuka, emumina ngo wasebeseyo wanye, bushwa mbu emisike irinda iti yamubinganga?»
34Yesu wasako bo mbu: «Mu chuo kino, ebea babingananga. 35Ina ebea mbi ebasungwa mu makako a Ongo mbu bakomenwa ifuka mu rikime mu Bwami ebuseyayo, batabingiyo abe ibingwa. 36Batakwiyo tu. Bushwa mbu basebeseyo buri bamaraika. Ibo nge bana ba Ongo bushwa barifuka. 37Musa washeanga shu-shu mbu ebakwire basefukayo, ekwaandikanga we itukana n'ekitundi ch'ekasha.#20.37 Soma Ituk 3.1-6. Hiha nge habikira we Nyere Kuritu mbu Ongo wa Iburahimu, Ongo wa Isake na Ongo wa Yakobo.» 38Yesu weba tu mbu: «Ongo ntà Ongo w'ebakwire, ina iwe Ongo w'ebariho; ebea bati bari ho bushwa na we.»
39 Bahani bima b'eMyomba bamwire mbu: «eMuhani, umasubya shu.» 40Kuruma nampo, kusira mwea ingu werekanga imushisha tu kinwa kiti-kiti.
Kirisitu mukiri irenga Ndauti
(Mat 22.41-46; Mar 12.35-37)
41Kuruma n'ebinwa mbyo, Yesu washisha ebea mbu: «Bushwa nki ebea bebange mbu Kirisitu nge Mwana wa Ndauti? 42Ntà Ndauti wisine ke ngwebanga mu kitabo ch'eSaburi mbu:
‹Nyere Kuritu Ongo wakwere Nyere Kuritu mbu:
"Rika mu kuboko kwani kw'ekwabume,
43ieya n'erotu ndu rusekia ebarenda babe babese kikai ch'eritereke mo ebisando byabe#20.43 Soma Sab 110.1.."›
44«Kuba Ndauti wakubikira Kirisitu mbu ‹Nyere kurwabo›, buni ke tu Kirisitu ngo ngwamubese musike wa Ndauti?»
Mukohyanga kuri ebahani b'eMyomba
(Mat 23.1-36; Mar 12.38-40)
45Ebea bati bakianga bakiri bateange Yesu emate, were ebanafunsi bae mbu: 46«Mukohyanga n'ebahani b'eMyomba! Ibo bashimangǎ ietana-etana na nchangi sareha-reha. Na bashimangǎ tu ikeiwa munkati n'ebea n'irika mu bitumbi bya kubusondori by'emasinangoki nanku kuriwanga ebio. 47Banyakangǎ ebashumbakari ebikai byabo biti. Na bahemangǎ tu mahemo a mundiendie kongo basungwa n'ebea. Bushwa nancho, Ongo wasehukumuyo bo nguru!»
Currently Selected:
Ruka 20: nyj
Highlight
Share
Copy
Want to have your highlights saved across all your devices? Sign up or sign in
2025 GAPLCDI, Group of Associations for the Promotion of Languages, Cultures for Integral Development
