Ruka 1
1
Ntangiro y'emyasi ya Yesu Kirisitu
1Emukwakare Teofire, bea bingi bakwereka iandika emyasi y'ebinwa byetanga munkati nitu. 2Bakuandika yo imbu bwaturirwanga bate yo nambi barukiranga yo raroso, na nge baninkwanga emurimo weritura emwasi wa Ongo. 3Ngyasingwa nani hotu nakukianga namasibirira emwasi shu-shu, nasunga nti rakomenwa nikuandikiri ǒngo mukwakare Teofire. 4Namaronja mbo kongo usiba eriira r'ebinwa byahanwanga ǒngo.
Maraika watura ebusebutwa Yohana
5Mu matu abesenga Herote mubake w'echuo cha ku Yundea, kwabesenga kuhani uma nt'ubikirwange mbu Sakaria, wa mu kikembe ch'ebakuhani ba Abiya#1.5 Abiya wabesenga mukwakare wa meta munani mu kikembe ch'ekuhani Sakaria. Soma 1Bir 24.7-18. na mukari Risabeti nti wa muruanda rw'ekuhani mukiri Aroni. 6Ebati babi babesenga bea baombokara mu makako a Ongo. Babesenga nti bamisa shu emyomba iti ya Nyere Kuritu. 7Ina nti basira mwana, bushwa mbu Risabeti nti ngumba nabo babi nti bamakunguha nguru. 8Otu ruma, Sakaria wabesenga ukorange emurimo wae mu makako a Ongo, bushwa mbu erotu ndo rwabesenga ukoro rw'ekikembe chabo. 9Itukana n'emwenjo w'ebakuhani, Sakaria ngwarondorwa mu mishari murikime mu Numba ya Ongo isacha mo emwaka. 10Mu ntambi Sakaria wabesenga usachange emwaka, ebea bati basia habutara bahemange. 11Nampo maraika wa Nyere Kuritu wasaire Sakaria, wasimana muruharo rw'ekwabume rw'ebutanda bwerisachie emwaka. 12Sakaria, murimusunga wisarima, watingirwa na boba. 13Ina emaraika wamwire mbu: «Sakaria, ang'isubaha, Ongo wamarukira emahemo abe. Mukari wabe Risabeti wasekubute mwana wabume na ukumuninka rina ra Yohana. 14Ukubese na ngoa hima n'imoa ringi, na bea bingi basemoere eributwa rae. 15Bushwa mbu wasebese mukwakare mu makako a Nyere Kuritu. Watomuyo ndifai abe mau ati-ati. Waserisayo Mutima Washurukara itukire mu bura bwa nina. 16Wasekuruchayo bingi b'ebana ba Isiraeri kuri Ongo wabo. 17Wasesondore erieya ra Nyere Kuritu na nti uri n'emutima hima n'emaa buri emutahwa Eria, kongo waronganya tu ebana na bishe babo. Wasebutwa hotu kongo wabindura ebakwemi ebatinangǎ ebinwa bya Ongo,#1.17 Soma Mara 3.23-24. kongo babese na bwenge buri bea bakomenwa mu makako a Ongo. Nampo wasetunganyieyo Nyere Kuritu uanda rwakonda indu rwamurindira.»
18Ina Sakaria washisha emaraika mbu: «Kinki chasenisheayo mbu ebinwa bino b'iira? Bushwa mbu ani na mukari'ani twamakunguha nguru.» 19Maraika wamusako mbu: «Ani nge Kaburieri,#1.19 Soma Ndan 8.16; 9.21; Ruk 1.26. ani nge nisimananga mu makako a Ongo! Iwe ng'wanituma ikuture emwasi uno wakonda. 20Ebinwa mbyo biseberererayo mu matu abyo, ina bushwa mbu nt'ukusimira byo, ukubese karumbu. Utukochiyo ieba ieya n'erotu indu rusekiayo ebinwa bino byabererera.»
21Mu ntambi njo, ebea mbi babesenga barindira Sakaria hambuka bashishara bushwa n'erɨsɨa rawe mu Numba ya Ongo. 22Warekia wasaa mo, wafundwa ieba nabo. Ina bushwa mbu iwe ngie karumbu, wabucha ieba nabo na mine, basiba mbu wakusunga kiasha kumunda n'eNumba ya Ongo.
23N'ematu a Sakaria erikora arekia asira, wakuruka kukwae. 24Kuruma na matu makeke, mukari Risabeti wabese murito. Wámana myeri isanu ntwatasaa-saanga ekumbuka, ntwebange mbu: 25«Mukai byakonda ebyamanikore Nyere Kuritu! Wamanikuto nkene munkati n'emeso ebea.»
Maraika watura ebusebutwa Yesu
26Ebukure bwa Risabeti bwarekia bwarengeka myeri mutuba, Ongo watuma maraika Kaburieri ku Nasareti, ubungu ruma rwa ku Ngariraya. 27Wamutuma kuri kitasa kima nge Maria. Ekitasa ncho chabesenga nti nge muchumba wa Yosefu, mushukira uma w'ekisasa ch'emubake Ndauti. 28Emaraika ngo weyere Maria mu mwabo n'imwire mbu: «Nakukea, ǒngo urishee nchumo ya Ongo! Nyere Kuritu uri hima nabe.»
29Maria washishara mu kinwa ncho, waanikira mu mutima wae mbu: «Nkei ya buni ino?» 30Maraika wamwire mbu: «Usubahi, eMaria, bushwa mbu umashee nchumo kwa Ongo. 31Ukuria bukure, ukubuta mwana wabume, na ukumuninka rina nge Yesu. 32Wasebese mukwakare, wǎbikirwa Mwana wa Ongo ingu uri hiyo n'ebiti. Nyere Kuritu Ongo wasemuninkayo ekitumbi ch'ishiku Ndauti. 33Iwe nge usesimanireyo ebea ba ku Isiraeri ematu ati, n'ebwami bwae butabesiyo na ngendero.» 34Maria washisha emaraika mbu: «Ekinwa kino chasebese buni na ntínosi wabume?» 35Emaraika wamusako mbu: «eMutima Washurukara usekuhite, n'emaa a Ongo ingu uri hiyo n'ebiti asekubumbe buri kirumbirumbi. Ngyasingwa, emwana wasebuta ǒngo wasebese Washurukara, wasebikirwa mbu Mwana wa Ongo. 36Rukira! Risabeti w'eruanda rwabe nae ngie murito, wasebuta mwana wabume nakiro mbu wamakunguha nguru. Iwe ngu wabeseyo ubikirwange mbu ngumba ngie uri na bukure bwa myeri mutuba. 37Bushwa mbu kusira kinwa kihundusangǎ Ongo.» 38Nampo Maria weba mbu: «Ani mukobe wa Nyere Kuritu, kai bibesi imbu bwameba ǒngo!» Kuruma nampo, maraika wenda rae.
Maria wenda katangura Risabeti
39Mu matu a, Maria wasimana n'ienda tete mu chuo ch'esangu, murubungu ruma rwa ku Yundea. 40Wakime mwa Sakaria n'ikea Risabeti. 41Entambi Risabeti warukiranga enkei ya Maria, emwana witenja-tenja mu bura bwa Risabeti, nampo warisiwa n'eMutima Washurukara. 42Weba mu murenge mukiri mbu: «Ongo wamakukasane irenga ebamina bati, n'emwana wasebuta ǒngo nae hotu wakasanirwa! 43Ani inye murihierwa na nina wa Nyere Kuritu mu mwani? 44Bushwa nakukia narukira emurenge w'enkei yabe mu mate ani, emwana witenja-tenja na ngoa kumunda n'ebura bwani. 45Ukasanirwa ǒngo bushwa umarisia mbu ebinwa byakweba Nyere Kuritu bisebererera!»
Erumbo rwa Maria
46Ngerikia Maria weba mbu:
«Emutima wani watatirisa Nyere Kuritu,
47Namoere Ongo,
Muramya wani.
48Bushwa wamanikwire bonso ani mukori wae.
Muriira, itukire enompena, ebea bati basembikira mbu nakasanirwa,
49bushwa mbu Ongo Mine Maa wamanikore binwa bikiri.
Erina rae rashurukara ho!
50Na wasenda ukwirengi bonso
ebamusubaha b'esankiso siti.
51Wamakoresha emaa ae murikoresha ebunkangwe bw'emombo wae,
wamansansabanya ebari n'emutima w'engari.
52Wamakuto ebami mu bitumbi byabo,
n'itumbia ebihohea.#1.52 Soma Yub 5.11; 12.19.
53Wakusukucha ebakwa rwaka,
ina wakukurucha ebatumba kobokobo.
54Wakweya kasake emukori wae Isiraeri
na ntíwakobya imukwire bonso,
55imbu bwarananga we na batitanku bitu, ietere
kuri Iburahimu n'erubuto rwae ematu ati.»
56Maria wamana kwa Risabeti myeri ishatu, kuruma nampo wakuruka ku kwabo.
Eributwa ra Yohana Murubiki
57Entambi ya Risabeti y'eributa yakia yarumira, wabuta mwana wabume. 58Ebanunsane na banachabo, barekia barukirǎ bwakukwire Nyere Kuritu Risabeti bonso, bamoa hima nae. 59Kuruma na matu munani, banachabo beya kamonesha#1.59 Soma Bar 12.3. emwana. Bahuna imuninka erina r'ishe Sakaria. 60Ina nina watina mbu: «Ntímbo, erina rae nge Yohana.» 61Bamwire mbu: «Ina kusira mwea muruanda rwabe uri n'erina ndo!»
62Basime ishe w'emwana mu rimushisha watiku erina rashimae kuri emwana e. 63Sakaria wakonga bo kisai, na waandika mu cho mbu: «Erina rae nge Yohana.» Ebati bisarima. 64Hiha-hiha ebunu bwa Sakaria bwoboka, wabucha tu ieba n'itata Ongo. 65Ebea bati imbi babesenga nko batingirwa na boba. Emwasi ngo wansansabana mu sangu siti s'echuo cha ku Yundea. 66Ebati mbi barukiranga emwasi ngo banikira na kwishishirisha mu mitima mbu: «Emwana uno wǎbeseyo buni?» Bushwa, muriira, emaa a Nyere Kuritu abesenga hima nae.
Erumbo rwa Sakaria
67Sakaria ishe w'emwana warisiwa n'eMutima Washurukara, n'ibucha ihurukwa, n'ieba mbu:
68«Watatwe Nyere Kuritu, Ongo wa Baisiraeri,
bushwa mbu wamasake ebea bae n'ishukaya bo.
69Wamaturishie Rukombora mine bunkangwe,
itukire muruanda rw'emukori wae Ndauti.
70Nge bwebanga we kare-kare mu mǎnu ebatahwa bae bashurukara mbu
71wasetutumireyo ingu usetushukayayo mu mine y'ebarenda bitu
na mu mine yambi ebatubaangǎ.
72Waraanga mbu wasekwireyo batitanku bitu bonso;
n'isubukia erirai rae rashurukara,
73nge chaserenga we kuri titanku witu Iburahimu mbu
74wasetushukaya mu mine y'ebarenda bitu,
kongo twamukore na nti tusira boba,
75na tushurukare n'ibese n'iombokara mu makako ae
ematu itu ati.#1.75 Soma Ntan 22.16-17.
76N'ongo, mwanani, ukubikirwa mutahwa wa Ongo ingu uri hiyo n'ebiti,
bushwa ukusondore Nyere Kuritu murimutunganyie ense,
77na kongo usubukia ebea bae mbu waseshukaya bo
n'isasira esansambi sabo.
78Iira, Ongo witu urisere nchime na burongu,
waturebeki chaka ituka ko kwiyo.
79Washei bo chaka imbi barerika mu mwirimya n'ebahendwange n'eroku,
kongo watushea imisa ense y'ebuhoro.»
80Emwana ngo wabesenga woshukange na maa emutima. Wenda karika inku ekusira bea ieya n'erotu rw'isheanga we kuri Baisiraeri.
Currently Selected:
Ruka 1: nyj
Highlight
Share
Copy
Want to have your highlights saved across all your devices? Sign up or sign in
2025 GAPLCDI, Group of Associations for the Promotion of Languages, Cultures for Integral Development
