Sang’hano za Wasenga 18

Paulo uko Kolinto

1Vigamalile gago, Paulo kalawa kae ya Asene kaita Kolinto. 2Uko Kolinto kamvika Myahudi imwe yokemigwa Akila, mleligwa wa Ponto. Akila hamwe na mwehe wake yokemigwa Pilisikila, wabwela kulawa Italia mmazua gao kwa vija Kaisali Klaudio kakala yalagize Wayahudi wose wasegele kae ya Loma. Paulo kaita kuwatembelela, 3na kwa vija wao wakala wanhu wa kusona mahema kama iyo Paulo, baho Paulo kakala nao na kusona mahema hamwe nao. 4Chila Zua da kuhumula Paulo kakala yolongelela nao Wayahudi na Wayunani Muing'anda ya kuiting'hanila Wayahudi ili wamtogole Yesu.

5Sila na Timoteo viwavikile Makedonia, Paulo kailava chipindi chake chose kwa mbuli ya kuwaligulila Wayahudi na kuwalagusila kua Yesu iyo Kilisito. 6Mbali viwalemile na kumliga, kakung'husa timbwisi da vivalo vake kulagusa kua, “Mwahaga, iyo mbuli yenu wenyego, niye silaumigwa kwambuli iyo. Na kulawa vino sambi na kugendelela nowawinza wanhu waja haweli Wayahudi.” 7Ivo, kalawa baho kaita na kakala muing'anda ya munhu imwe yokemigwa Tito Yusto yomfugamila Mulungu. Ng'anda yake ikalabehi na ng'anda ya kuiting'hanila Wayahudi. 8Kilisipo, mkulu wa iyo ng'anda ya kuiting'hanila Wayahudi, kamtogola Mndewa iyo hamwe na mbwiga zake wose, wanhu wengi Wakolinto wautegeleza usenga huo, watogola na kubatizigwa.

9Zua dimwe ichilo, Mndewa kamlongela Paulo mgamaloleso, “Sekeudumbe, gendelela kuligula tu na sekeuleke, 10manake niye na hamwe na gweye. Habule munhu yonda yageze kukutoa maana hano muikae hana wanhu wengi weli ubanzi wangu.” 11Baho, Paulo kakala uko kuno yofunda usenga wa Mulungu kwa chipindi cha mlao umwe na nusu.

12Mbali Galio viyakalile mkulu wa isi ya Akaya, Wayahudi wamvamila Paulo na kumgala mchitala, 13walonga, “Munhu ino kowaswangiza wanhu wamfugamile Mulungu bila kuwinza ndagizi viilonda!”

14Paulo viyakalile yang'hali hanalonga, Galio kawalongela Wayahudi, “Tegelezeni mweye Wayahudi, kama kweli mbuli ino yahawile yakumtoa munhu hebu ya ubananzi nihawategelezeni. 15Mbali kwavija kwambuli ya ulonzi na mazina hebu ndagizi zenu lamuleni wenyego. Niye silonda kuwa mlamuzi wa mbuli izo!” 16Baho kawawinga kulawa mchitala.

17Nao wose wamgela mmakono Sosetene ija chilongozi wa ng'anda ya kuiting'hanila Wayahudi, na wamtoa haulongozi wa chitala. Mbali Galio hatongile mbuli iyo hata chidodo.

Paulo kobwela kaidi uko Antiokia ya Silia

18Paulo viyakalile yang'hali uko Kolinto na waja ndugu kwa mazua mengi. Amala kawalaga na kakwela ngalawa kaita uko Silia hamwe na Pilisikila na Akila. Paulo viwavikile uko Kenikelea kabeya mvili zake kwa vija kakala kakomeleza chiyailalike kwa Mulungu. 19Viwavikile Efeso Paulo kawaleka Pilisikila na Akila, nayo kaita Muing'anda ya kuiting'hanila Wayahudi na kulongelela mbuli na Wayahudi. 20Wanhu wampula yakale nao kwa chipindi chitali ng'hani, mbali hatogole. 21Baho viyakalile yosegela kalonga, “Mulungu yahalonda nobwela kumwenu kaidi.” Kasegela baho Efeso kwa ngalawa.

22Ngalawa ivika Kaisalea, nayo Paulo kaita Yelusalemu kuwalamusa bumbila da wanhu wamtogole Kilisito, amala kaita Antiokia. 23Kakala uko kwa mazua madodo, labaho kagendelela na mwanza wake kwa kubitila ubanzi wa Galatia na Flugia na kawagela moyo wajalusona wose.

Apolo koligula usenga wa Mulungu uko Efeso na Kolinto

24Chipindi icho hakala na Myahudi imwe yokemigwa Apolo, mleligwa wa Alekisandilia, kavika Efeso. Iyo kakala munhu yeli na ugalu wa kulonga na yeli na udaho mkulu wa Mayandiko ga Mulungu. 25Kakala yafundigwe mbuli ya iyo nzila ya Mndewa, nayo kakala yoiyoha mmoyo kakala yofunda goya mbuli za Yesu hata kama kakala yovimanya ubatizo wa Yohana uiyeka. 26Apolo kasonga kufunda bila kudumba Muing'anda ya kuiting'hanila Wayahudi, Pilisikila na Akila viwamhulike wamsola na waita nayo kumwao na kumuongezela vinhu vimwenga vija havimanyile kwa nzila ya Mndewa. 27Amala Apolo viyaitile uko Akaya, waja wanhu wamtogole Kilisito wamgela moyo kwa kuwandikila wajalusona wa kuja Akaya ili wambokele. Viyavikile uko kawataza ng'hani waja kwa unovu wa Mulungu wamtogola Kilisito, 28Manake kakala yoibishila na Wayahudi kwa ugalu haulongozi wa wanhu kwa kugangamiza kubitila Mayandiko ga Mulungu kua Yesu ni Kilisito.

Currently Selected:

Sang’hano za Wasenga 18: KBV

Highlight

Copy