ᒤᑲᐅᑉ ᐊᒡᓚᖏᑦ 1
1
1 #
ᐊᑕᓃᑦ ᐂᑉᐸᖏᑦ 15:32-38; ᑯᕉᓂᑲ ᐂᑉᐸᖏᑦ 27:1-7;
ᐊᑕᓃᑦ ᐂᑉᐸᖏᑦ 16:1-20; ᑯᕉᓂᑲ ᐂᑉᐸᖏᑦ 28:1-27;
ᐊᑕᓃᑦ ᐂᑉᐸᖏᑦ 18:1—20:21; ᑯᕉᓂᑲ ᐂᑉᐸᖏᑦ 29:1—32:33. ᒎᑎᐅᑉ ᐅᖃᐅᓯᖏᑦ ᒤᑲᒧᑦ ᒧᕆᓯᑎᒥᐅᑕᕐᖕᒧᑦ ᔫᑕᒻ, ᐊᕼᐊᔅᓗ, ᕼᐃᓯᑬᐊᓗ ᐊᖓᔪᖅᑳᕐᔪᐊᖑᑎᓪᓗᒋᑦ ᑭᖑᓕᕇᒃᓗᑎᒃ ᔫᑕᒥᐅᓄᑦ. ᑐᑭᓯᑎᑕᐅᓚᐅᖅᐳᖅ ᓴᒥᐊᕆᐊᒥᐅᑦ ᔨᕉᓴᓕᒥᐅᓪᓗ ᐱᓪᓗᒋᑦ.
ᕿᒃᓵᖕᓃᑦ ᓴᒥᐊᕆᐊ ᔨᕉᓴᓕᓗ ᐱᓪᓗᒋᑦ
2ᑐᓴᕆᑦᓯ ᐃᓄᓕᒫᖑᔪᓯ! ᓈᓚᒋᑦᓯ ᐃᓘᓐᓇᓯ ᓄᓇᖃᖅᑐᓕᒫᖑᔪᓯ ᓄᓇᕐᔪᐊᒥ! ᐊᑕᓂᐅᑉ ᒎᑎᐅᑉ ᐊᑭᕋᖅᑐᕐᖕᓂᕐᖕᒥᓂᒃ ᓇᓗᓁᖅᓯᕕᒋᓂᐊᖅᐹᓯ, ᐊᑕᓂᖅ ᐅᖃᖅᐳᖅ ᐃᓂᒥᓂ ᐃᑦᔪᕐᖕᓁᑦᑐᒥ ᑐᒃᓯᐊᕐᕕᒡᔪᐊᖁᑎᒥᓂᑦ. 3ᑕᑯᒋᑦ, ᐊᑕᓂᖅ ᑎᑭᓐᓂᐊᖅᐳᖅ ᐃᓂᒋᔭᒥᓂᑦ; ᐊᖅᑲᕐᖕᓂᐊᖅᐳᖅ ᐱᓱᖕᓂᐊᖅᓗᓂᓗ ᓄᓇᕐᔪᐊᑉ ᐳᖅᑐᓂᖏᑕ ᖄᖏᑎᒍᑦ. 4ᖃᖅᑬᑦ ᐊᐅᒍᒫᖅᐳᑦ, ᐳᓐᓂᖅᑎᑐᑦ ᐃᑯᒪᒧᑦ ᐊᐅᒃᑐᑎᑐᑦ ᓇᖅᓮᓪᓗ ᐊᕕᒡᓗᑎᒃ, ᑰᒍᒫᖅᐳᖅ ᐃᒪᖅᑎᑐᑦ ᓯᕕᖓᔪᒃᑯᑦ ᑰᒃᑐᑎᑐᑦ.
5ᑕᒪᓐᓇ ᑍᒤᓐᓂᐊᖅᐳᖅ ᐃᓴᕆᐊᓕᐅᑉ ᐊᔪᖅᑐᓕᓂᖓ ᐱᓪᓗᒍ, ᔧᑰᑉ ᑭᖑᕚᖏᓐᓄᑦ. ᑭᓈ ᐸᓯᔭᒃᓴᐅᕚ ᐃᓴᕆᐊᓕᐅᑉ ᐊᔪᖅᑐᓕᓂᖏᑦ ᐱᓪᓗᒌᑦ? ᓴᒥᐊᕆᐊᒥᐅᑦ ᐸᓯᔭᒃᓴᐅᕗᑦ! ᓴᒥᐊᕆᐊ ᑭᓈ ᐸᓯᔭᒃᓴᐅᕚ ᔫᑕᐅᑉ ᒎᑎᓐᖑᐊᖃᕐᖕᓂᖏᓐᓅᑦ? ᔨᕉᓴᓕᒻ ᐸᓯᔭᒃᓴᐅᕗᖅ! 6“ᑍᒤᒻᒪᑦ ᓴᒥᐊᕆᐊ ᓯᖁᑦᑎᕈᒫᖅᐸᕋ, ᐱᕈᖅᓰᕕᐅᓕᖅᓗᓂ ᕔᓂᒃᓴᓂᒃ, ᐅᔭᕋᖏᓪᓗ ᑎᓲᒃᑎᑦᓱᒫᖅᐸᒃᑲ ᓇᖅᓴᒧᑦ, ᑐᓐᖓᕕᖏᑦ ᑭᓯᐊᓂ ᐊᒥᐊᒃᑰᓗᑎᒃ. 7ᓴᓇᓐᖑᐊᖅᓯᒪᔪᑦ ᒎᑎᓐᖑᐊᖏᑦ ᓯᖁᒥᑦᓱᒫᖅᐸᒃᑲ, ᐊᑭᓕᐅᑎᒋᓚᐅᖅᑕᖏᓪᓗ ᐊᕐᖕᓇᓄᑦ ᐊᑐᒐᕐᖕᓄᑦ ᐃᑯᐊᓪᓚᒃᑎᓐᓂᐊᖅᐸᒃᑲ. ᒎᑎᓐᖑᐊᓕᒫᖏᑦ ᐊᓯᕈᕈᒫᖅᐸᒃᑲ, ᑲᑎᖅᓱᓚᐅᕐᖕᒪᒋᑦ ᐊᑭᓕᖅᑕᐅᓂᒃᑯᑦ ᐊᕐᖕᓇᓄᑦ ᐊᑐᒐᕐᖕᓄᑦ, ᑖᒃᑯᓄᖓᑦᓮᓐᓇᖅ ᐊᕐᖕᓇᓄᑦ ᐊᑐᒐᕐᖕᓄᑦ ᐊᑐᖅᑕᐅᓂᐊᖅᐳᑦ.”
8ᑕᒪᓐᓇ ᐱᑦᔪᒋᓗᒍ ᓂᐹᖅᓗᖓ ᕿᐊᔪᒫᖅᐳᖓ, ᐱᓱᒍᒫᖅᐳᖓ ᐊᓐᓄᕌᖃᖏᓪᓗᖓ ᑲᒥᓪᓛᖅᓗᖓᓗ ᐱᓱᒍᒫᖅᐳᖓ ᓂᐹᖅᓗᖓ ᕿᒻᒥᖓᔪᑎᑐᑦ, ᕿᒃᓵᒡᓗᖓᓗ ᑎᖕᒥᐊᕐᔪᐊᑎᑐᑦ ᐋᔅᑐᕆᓯᑎᑐᑦ. 9ᔫᑕᐅᑉ ᑭᓪᓕᖏᑦ ᒪᒥᑎᑕᐅᔪᓐᓇᓐᖏᓚᑦ; ᐊᓯᕈᖅᑕᐅᓂᖅ ᔨᕉᓴᓕᐅᑉ ᐃᑎᖅᑕᕐᕕᖓᓃᓕᖅᐳᑦ, ᐃᓄᖁᑎᒪ ᓄᓇᖓᓂ.
ᐊᑭᕅᑦ ᔨᕉᓴᓕᒧᐊᕐᖕᓂᖏᑦ
10ᒑᑎ ᐅᖃᐅᑦᔭᐅᑦᑍᓕᓕ, ᕿᐊᓂᐊᕋᓯᓗ; ᐱᑦ-ᓕᐊᐸᕋᒥᐅᑕᐅᔪᓯ ᓄᓇᒥ ᐳᔪᕋᕐᖕᒥ ᐊᒃᓴᑳᖃᑦᑕᓕᕆᑦᓯ. 11ᐊᐅᓪᓚᓕᕆᑦᓯ ᑲᓐᖑᓱᒡᓗᓯ ᐊᓐᓄᕌᖃᖏᓪᓗᓯ ᐃᓕᑦᓯ ᓴᐱᕆᒥᐅᖑᔪᓯ; ᔮᓇᓐᒥᐅᖑᔪᓯ ᑖᒃᑯᓇᓐᖓᑦ ᐊᓂᓇᓱᐊᖅᑍᓕᒋᑦᓯ; ᐱᑦ-ᐃᔨᐅᓪᒥᐅᑦ ᕿᒃᓵᖕᓂᖏᓐᓄᑦ ᖃᐅᔨᓂᐊᕋᑦᓯ ᐃᓂᒃᓴᖅᑕᖃᕈᓐᓃᕐᖕᓂᖓᓂᒃ. 12ᐃᓕᑦᓯ ᒪᕉᑎᒥ ᓄᓇᖃᖅᑐᓯ ᐃᓱᒫᓗᒡᓗᓯ ᐅᑕᖅᑭᓕᕆᑦᓯ ᐱᐅᔪᒥᒃ, ᑲᑉᐱᐊᓇᖅᑐᖅ ᐊᑕᓂᕐᖕᒥᑦ ᐱᔪᖅ ᔨᕉᓴᓕᐅᑉ ᐃᑎᖅᑕᕐᕕᖓᓄᑦ ᑎᑭᐅᑎᖕᒪᑦ. 13ᓚᑮᓯᒥᐅᖑᔪᓯ ᐊᒃᓴᓗᐊᓖᑦ ᐅᓇᑕᐅᑏᑦ ᐊᑐᐃᓐᓇᕈᓕᖅᓯᒋᑦ, ᐊᔪᖅᑐᓕᓂᕐᖕᒥᒃ ᐱᒋᐊᖅᑎᑦᓯᓚᐅᕋᑦᓯ ᓮᐅᓂᐅᑉ ᐸᓂᖓᓂᒃ ᐃᓴᕆᐊᓕᒥᐅᓪᓗ ᐱᐅᖏᓐᓂᖏᑦ ᓇᓂᔭᐅᓯᒪᖕᒪᑕ ᐃᓕᑦᓯᓐᓂ. 14ᑍᒤᒻᒪᑦ ᑐᓂᔭᒃᓴᑦᓯᓐᓂᒃ ᑐᓂᓯᓕᕆᑦᓯ ᒧᕆᓯᑦ-ᒑᑎᒧᑦ, ᐊᑲᔨᒥᐅᓪᓗ ᑕᑎᒋᔭᒃᓴᐅᓐᖏᓚᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᓐᓄᑦ.
15ᒪᕇᓴᒥᐅᖑᔪᓯ ᓵᓚᐅᓂᕐᖕᒧᑦ ᑎᑭᑕᐅᑎᑦᓱᒫᖅᐸᑦᓯ. ᐃᓴᕆᐊᓕᒥᐅᓪᓗ ᐱᓐᓇᕐᖕᓇᕐᖕᓂᖓ ᐊᑑᓚᒻ ᕾᕈᓱᐊᓄᐊᕈᒫᖅᐳᖅ. 16ᓄᔧᔭᓕᕆᑦᓯ ᓂᐊᖁᓯ ᓄᔧᕈᑎᓗᒍ ᕿᒃᓵᖕᓂᕐᖕᒧᑦ, ᓄᔧᕈᑎᓕᕆᑦᓯ ᑎᖕᒥᐊᑎᑐᑦ ᑎᒥᕕᓂᖅᑐᓲᑎᑐᑦ, ᕿᑐᕐᖓᓯ ᓇᒡᓕᒋᔭᓯ ᐱᓪᓗᒋᑦ, ᐊᐅᓪᓚᐅᑦᔭᐅᔪᒫᕐᖕᒪᑕ ᑎᒍᔭᐅᓗᑎᒃ.
Currently Selected:
ᒤᑲᐅᑉ ᐊᒡᓚᖏᑦ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.