ᔪᐊᓇᓯᐅᑉ ᐊᒡᓚᖏᑦ 5
5
ᔩᓱᓯᐅᑉ ᐋᖅᑭᒃᓯᓂᖓ ᐱᓱᒍᓐᓇᖏᑦᑐᒥᒃ
1ᑕᒪᑐᒪ ᑭᖑᓂᖓᒍᑦ ᔩᓱᓯ ᔨᕉᓴᓕᒻᒧᐊᖅᐳᖅ, ᔫᑎᑦ ᓇᓪᓕᐅᓐᓂᖅᓯᐅᕐᖕᒪᑕ. 2ᔨᕉᓴᓕᐅᓪᓕ ᐃᑎᖅᑕᕐᕕᖓᓂ ᑍᔭᐅᔪᒥ “ᓰᐲᑦ ᐃᑎᖅᑕᕐᕕᖓᓂᒃ” ᖃᓂᒋᔮᓂ ᑕᓯᑯᓗᒃᑕᖃᖅᐳᖅ, ᑕᓪᓕᒪᓂᒃ ᐃᒡᓗᕈᓯᓕᖕᒥᒃ; ᐄᑉᕉᑎᑐᑦ ᑍᔭᐅᔪᖅ ᐱᑎᔅᑕᒥᒃ. 3ᑖᒃᑯᓇᓂ ᐃᒡᓗᕈᓯᕐᖕᓂ ᐃᓄᐃᑦ ᑎᒥᒥᒍᑦ ᐊᔪᕈᑎᓖᑦ ᐊᒥᓱᑦ ᓇᓚᕗᑦ, ᑕᐅᑐᖏᑦᑐᑦ, ᑐᓯᐊᑦᑐᑦ, ᓄᑭᖃᖏᑦᑐᓪᓗ. [ᑖᒃᑯᐊᓗ ᐅᑕᖅᑭᕗᑦ ᐃᒪᐅᑉ ᐊᐅᓚᑎᑕᐅᓂᐊᕐᖕᓂᖓᓂᒃ. 4ᐊᑕᓂᐅᑉ ᐂᖏᓖᖓ ᑕᓯᕐᖕᒧᐊᖅᐸᖕᒪᑦ ᐃᒪᖓᓂᒃ ᐊᐅᓚᑎᑦᓯᔭᖅᑐᕐᓗᓂ. ᓇᓪᓕᐊᓪᓗ ᓯᕗᓪᓕᖅᐸᐅᓪᓗᓂ ᐃᒫᓄᐊᖅᑐᖅ ᐊᐅᓚᑎᑕᐅᕋᑖᖅᑎᓪᓗᒍ ᐋᖅᑭᒃᑕᐅᕙᓚᐅᖅᐳᑦ ᖃᓄᐃᑦᑐᑐᐃᓐᓇᕐᖕᒥᒃ ᖃᓂᒻᒪᓯᖃᕋᓗᐊᖅᐸᑦ.]#5:4 ᐃᑦᔪᔪᑐᖃᐃᑦ ᐃᓚᖏᓐᓂ ᐱᑕᖃᖏᓪᓗᓂ ᐃᓚᖏᓐᓂ ᐃᓕᔭᐅᓯᒪᓪᓗᓂ 5ᑕᕝᕙᓂᓕ ᐊᖑᑎᑕᖃᖅᐳᖅ, ᐊᕐᕌᒍᓂᒃ 38ᓂᒃ ᖃᓂᒻᒪᓯᓕᖕᒥᒃ. 6ᔩᓱᓯᐅᑉ ᓇᓚᔪᖅ ᑕᑯᒐᒥᐅᒃ, ᖃᐅᔨᒪᒐᒥᐅᒡᓗ ᐊᑯᓂᐊᓗᒃ ᖃᓂᒪᓪᓗᓂ ᑕᕝᕙᓂ ᓇᓚᖕᒪᑦ, ᐅᖃᐅᑎᕚ, “ᐋᖅᑭᒃᑕᐅᔪᒪᕖᑦ?”
7ᖃᓂᒪᔫᑉ ᑭᐅᕚ, “ᐊᑕᓃᖅ, ᐃᑲᔪᖅᑎᒃᓴᖃᖃᑦᑕᖏᓐᓇᒪ ᐃᒫᓄᐊᖅᑎᑦᓯᔨᒃᓴᓐᓂᒃ ᐃᒪᖅ ᐊᐅᓚᑎᑕᐅᔭᕌᖓᑦ, ᐃᒫᓄᐊᕋᓱᓕᖅᑎᓪᓗᖓ ᓯᕗᓕᐅᖅᑕᐅᖃᑦᑕᖅᐳᖓ.”
8ᔩᓱᓯᐅᑉ ᐅᖃᐅᑎᕚ, “ᒪᑭᒋᑦ, ᓇᓚᕖᑦ ᑎᒍᓗᒍ, ᐱᓱᓕᕆᑦ.” 9ᑕᕝᕙᑦᓮᓐᓇᖅ ᐊᖑᑦ ᐋᖅᑭᒃᑕᐅᕗᖅ, ᓇᓚᕝᕕᓂ ᑎᒍᓪᓗᓂᐅᒃ, ᐱᓱᓕᖅᐳᖅ.
ᐅᓪᓗᕐᓕ ᑖᓐᓇ ᓴᐸᑎᐅᕗᖅ. 10#ᓂᕼᐃᒤᐊ 13:19; ᔨᕆᒤᐊ 17:21.ᑕᕝᕙ ᔫᑎᑦ ᐊᖓᔪᖅᑳᖏᑕ ᐊᖑᑦ ᐋᖅᑭᒃᑕᐅᕋᑖᖅᑐᖅ ᐅᖃᐅᑎᕚᑦ, “ᐅᓪᓗᒥ ᓴᐸᑎᐅᕗᖅ, ᐱᖁᔭᑦᑎᓐᓂᒃ ᓈᓚᓐᖏᓚᑎᑦ ᓇᓚᕖᑦ ᐊᒡᔭᕋᕕᐅᒃ.”
11ᑖᓐᓇᓕ ᑖᒃᑯᓄᖓ ᑭᐅᕗᖅ, “ᐊᖑᑎᐅᑉ ᐋᖅᑭᒃᑲᒥᖓ ᐅᖃᐅᑎᖅᑲᐅᕚᖓ, ‘ᓇᓚᕖᑦ ᑎᒍᓗᒍ ᐱᓱᓕᕆᑦ.’”
12ᑖᒃᑯᐊ ᐊᐱᕆᕚᑦ, “ᑭᓇ ᐃᓕᖕᓄᑦ ᑍᒫᒃ ᐅᖃᖅᐸ, ‘ᓇᓚᕖᑦ ᑎᒍᓗᒍ ᐱᓱᓕᕆᑦ’?”
13ᐋᖅᑭᒃᑕᐅᔫᓪᓕ ᔩᓱᓯ ᖃᐅᔨᒪᓚᐅᓐᖏᓛ ᑭᓇᐅᖕᒪᖔᑦ, ᑕᕝᕙᓂ ᐃᓄᓕᐊᓘᓚᐅᕐᖕᒪᑦ, ᔩᓱᓯ ᑕᕝᕙᓐᖓᑦ ᓅᒌᓚᐅᕐᖕᒪᑦ.
14ᑭᖑᓂᖓᒍᑦ, ᔩᓱᓯᐅᑉ ᑲᑎᒐᒥᐅᒃ ᑐᒃᓯᐊᕐᕕᒡᔪᐊᕐᖕᒥ, ᐅᖃᐅᑎᕚ, “ᑕᑯᒋᑦ, ᒫᓐᓇ ᖃᓄᐃᖏᑦᓯᐊᓕᖅᐳᑎᑦ! ᐊᔪᖅᑐᓕᒃᑲᓐᓂᕈᓐᓃᕆᑦ, ᐱᐅᖏᓐᓂᖅᓴᒧᑦ ᑎᑭᑕᐅᖁᓇᒃ.”
15ᐊᖑᑦ ᑕᕝᕙᓐᖓᑦ ᕿᒪᕉᑎᒐᒥ ᔫᑎᑦ ᐊᖓᔪᖅᑳᖏᑦ ᐅᖃᐅᑎᕔᑦ, ᐋᖅᑭᒃᓯᓚᐅᖅᑐᖅ ᔩᓱᓯᐅᓂᖓᓂᒃ. 16ᑍᒤᒻᒪᑦ ᔫᑎᑦ ᔩᓱᓯ ᐊᑭᕋᖅᑐᓕᖅᐹᑦ, ᐋᖅᑭᒃᓯᓚᐅᕐᖕᒪᑦ ᓴᐸᑎᐅᑎᓪᓗᒍ. 17ᔩᓱᓯᐅᑉ ᑭᐅᕔᑦ, “ᐊᑖᑕᒐ ᑍᒪᓐᖓᑦ ᒫᓐᓇᒧᑦ ᐱᓇᓱᐊᖅᐳᖅ, ᐅᕙᖓᓗ ᐱᓇᓱᐊᕆᕗᖓ.”
18ᑍᒤᒻᒪᑦ ᔫᑎᑦ ᐊᖓᔪᖅᑳᖏᑕ ᔩᓱᓯ ᑐᖁᑕᐅᕕᒃᓴᖅᓯᐅᒃᑲᓐᓂᓕᖅᐹᑦ, ᓴᐸᑎᒥ ᐱᖁᔭᒥᒃ ᓈᓚᓚᐅᖏᓐᓂᖓ ᐱᑦᔪᑎᒋᑐᐃᓐᓇᕐᖕᓇᒍ, ᐅᖃᖅᓯᒪᓂᖓᓄᓪᓕ ᒎᑎᒥᒃ ᓇᖕᒥᓂᕆᓪᓗᒍ ᐊᑖᑕᖃᕐᖕᓂᕋᕐᖕᒪᑦ, ᒎᑎᒥᒃ ᐃᒻᒥᓂᒃ ᑍᒤᓪᓗᐊᖃᖅᑎᖃᕋᓱᖕᓂᕋᖅᖢᓂᑦᔪᒃ.
ᐃᕐᖕᓂᐅᑉ ᐱᔪᓐᓇᕐᖕᓂᖃᖅᑎᑕᐅᓂᖓ
19ᔩᓱᓯᐅᑉ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᐃᕐᖕᓂᖅ ᐃᒥᓃᓐᓇᖅ ᐱᓇᓱᐊᕈᓐᓇᓐᖏᓚᖅ, ᐱᓇᓱᐊᖅᐳᕐᓕ ᐊᑖᑕᐅᑉ ᐱᓇᓱᐊᖅᑕᖏᓐᓂᒃ ᑕᑯᔭᒥᓂᒃ, ᐊᑖᑕᐅᑉ ᐱᓇᓱᐊᖅᑕᖓ ᐃᕐᖕᓂᖓᑕᑦᑕᐅᖅ ᐱᓇᓱᐊᕆᕚ. 20ᐊᑖᑕᐅᑉ ᐃᕐᖕᓂᓂ ᓇᒡᓕᒋᕚ, ᓇᖕᒥᓂᕐᓗ ᐱᓂᐊᕐᖕᓂᓕᒫᓂ ᖃᐅᔨᒪᔭᐅᑎᑉᐰᑦ ᑖᑦᓱᒧᖓ; ᓱᓕᓗ ᐱᓂᐊᕐᖕᓂᕐᖕᓂᒃ ᐱᓪᓚᕆᐅᓂᖅᓴᓂᒃ ᑕᒪᒃᑯᓇᖓᑦ ᖃᐅᔨᑎᓐᓂᐊᖅᐹ, ᐃᓕᑦᓯᓗ ᑲᒪᓂᐊᕈᑎᒋᓂᐊᖅᐸᓯ. 21ᓲᕐᓗᑦᑕᐅᖅ ᐊᑖᑕᐅᑉ ᑐᖁᖓᔪᑦ ᒪᑭᑎᒻᒪᒋᑦ ᐆᒻᒪᖅᑎᓪᓗᒋᓪᓗ, ᑍᒫᒃᑕᐅᖅ ᐃᕐᖕᓂᖅ ᐆᒻᒪᖅᑎᑦᓯᕗᖅ ᐆᒻᒪᖅᑎᑦᓱᒪᔭᒥᓂᒃ. 22ᐊᑖᑕ ᐃᖅᑲᖅᑐᐃᓐᖏᓚᖅ ᑭᓇᒥᒡᓘᓐᓃᑦ, ᐃᕐᖕᓂᓂᓕ ᐃᖅᑲᖅᑐᐃᔪᓐᓇᕐᖕᓂᕐᒥᒃ ᑐᓂᓯᕕᒋᓯᒪᕚ. 23ᐃᕐᖕᓂᖅ ᑕᒤᓐᓄᑦ ᐅᐱᒋᔭᐅᑦᓯᐊᖁᓪᓗᒍ, ᓲᕐᓗ ᐊᑖᑕ ᐅᐱᒋᔭᐅᑦᓯᐊᕐᖕᒪᑦ. ᐃᕐᖕᓂᕐᖕᒥᒃ ᐅᐱᒍᓱᖏᑦᑐᖅ ᐊᑖᑕᒥᒃᑕᐅᖅ ᐅᐱᒍᓱᓐᖏᓚᖅ ᑎᓕᔨᖓᓂᒃ.
24“ᓱᓕᔪᒥᒃ ᐅᖃᐅᑎᕙᑦᓯ, ᐅᖃᐅᓯᓐᓂᒃ ᑐᓴᖅᑐᖅ ᐅᒃᐱᕆᓗᒍᓗ ᑎᓕᔨᒐ, ᑖᓐᓇ ᐃᓅᓯᖃᖅᐳᖅ ᓄᖑᓱᐃᑦᑐᒥᒃ; ᐃᖅᑲᖅᑐᖅᑕᐅᑦᔮᓇᓂᓗ, ᑐᖁᒥᓪᓕ ᓄᒃᑎᖅᓯᒪᓕᖅᐳᖅ ᐃᓅᓯᕐᖕᒧᑦ. 25ᓱᓕᔪᒥᒃ ᐅᖃᐅᑎᕙᑦᓯ, ᐃᑲᕐᕋᖅ ᓇᓪᓕᐅᑎᓂᐊᖅᓯᒪᔪᖅ ᓇᓪᓕᐅᑎᔭᕇᖅᐳᖅ, ᑐᖁᖓᔪᑦ ᒎᑎᐅᑉ ᐃᕐᖕᓂᖓᑕ ᓂᐱᖓᓂᒃ ᑐᓴᕐᕕᖓᑦ, ᑐᓴᖅᑐᑦ ᑖᒃᑯᐊ ᐃᓅᓂᐊᖅᐳᑦ. 26ᓲᕐᓗ ᐊᑖᑕ ᓇᖕᒥᓂᖅ ᐃᓅᓯᖃᕐᖕᒪᑦ ᐃᒻᒥᒃᑯᑦ, ᑍᒫᒃᑕᐅᖅ ᐃᕐᖕᓂᓂ ᑐᓂᓯᕕᒋᕚ ᐃᓅᓯᖃᖁᓪᓗᒍ ᐃᒻᒥᒃᑯᑦ. 27ᐃᕐᖕᓂᓂ ᑐᓂᓯᕕᒋᕚ ᐱᔪᓐᓇᕐᖕᓂᕐᖕᒥᒃ ᐃᖅᑲᖅᑐᐃᔪᓐᓇᖁᓪᓗᒍ, ᐃᓅᑉ ᐃᕐᖕᓂᕆᖕᒪᒍ. 28ᑕᒪᓐᓇ ᑲᒪᓂᐊᕈᑎᒋᓇᓯᐅᒃ; ᐃᑲᕐᕋᖅ ᓇᓪᓕᐅᑎᔪᒫᕐᖕᒪᑦ ᑐᖁᖓᔪᑦ ᐃᓗᕕᕐᖕᒦᑦᑐᑦ ᐃᓘᓐᓇᑎᒃ ᓂᐱᖓᓂᒃ ᑐᓴᕈᒫᕐᖕᒪᑕ. 29#ᑖᓂᐊᓕ 12:2.ᐃᓗᕕᕐᖕᒥᑦ ᐊᓂᓗᑎᒃ, ᐱᐅᔪᒥᒃ ᐃᓅᓯᖃᓚᐅᖅᑐᑦ, ᒪᑭᑦᓱᒫᖅᐳᑦ ᐃᓅᓂᐊᓕᕐᓗᑎᒃ, ᐱᐅᖏᑦᑐᒥᒡᓕ ᐃᓅᓯᖃᓚᐅᖅᑐᑦ, ᒪᑭᑦᓱᒫᖅᐳᑦ ᐃᖅᑲᑐᖅᑕᐅᓂᐊᓕᕐᓗᑎᒃ.”
ᔩᓱᓯᒥᒃ ᓇᓗᓁᖅᓯᓂᖅ
30“ᐅᕙᓐᓃᓐᓇᖅ ᐱᔪᓐᓇᕐᖕᓂᓐᓄᑦ ᓱᓇᒥᒡᓘᓐᓃᑦ ᐱᓇᓱᐊᕈᓐᓇᓐᖏᓚᖓ; ᒎᑎᒥᑦ ᑐᓴᖅᑕᒃᑲ ᒪᓕᒃᓗᒋᑦ ᐃᖅᑲᖅᑐᐃᕗᖓ; ᑍᒤᒻᒪᑦ ᐃᖅᑲᖅᑐᐃᓂᕋ ᐊᑦᔨᒌᒃᑎᑦᓯᕗᖅ, ᓇᖕᒥᓂᖅ ᐱᔪᒪᔭᓐᓂᒃ ᐱᓇᓱᐊᖏᓐᓇᒪ ᑎᓕᔨᒪᓕ ᐱᔪᒪᔭᖓᓂᒃ ᐱᓇᓱᐊᖅᐳᖓ.
31“ᐅᕙᖓ ᓇᖕᒥᓂᓐᓂᒃ ᓇᓗᓁᕋᓱᐊᕈᒪ, ᓇᓗᓁᖅᓯᓂᕋ ᓱᓕᒐᔭᓐᖏᓚᖅ; 32ᐊᓯᒐᓕ ᐅᕙᓐᓂᒃ ᓇᓗᓁᖅᓯᕗᖅ, ᖃᐅᔨᒪᕗᖓᓗ ᐅᖃᐅᓯᖃᕐᖕᓂᖓ ᐅᕙᓐᓂᒃ ᓱᓕᑦᓯᐊᕐᖕᒪᑦ. 33#ᔪᐊᓇᓯ 1:19-27; 3:27-30.ᐊᐱᕆᔭᖅᑐᖅᑎᑦᓯᓚᐅᖅᐳᓯ ᔪᐊᓇᓯᒧᑦ, ᑖᓐᓇ ᓇᓗᓁᖅᓯᓚᐅᖅᐳᖅ ᓱᓕᔪᒥᒃ. 34ᓇᓗᓁᖅᑕᐅᓂᕋ ᐃᓄᖕᒥᑦ ᐱᓐᖏᓚᖅ; ᑕᒪᓐᓇᓕ ᐅᖃᐅᓯᕆᕙᕋ ᐱᐅᓕᔭᐅᖁᓪᓗᓯ. 35ᑖᓐᓇ ᓇᓂᕈᐊᑎᑐᑦ ᐃᑯᒪᓪᓗᓂ ᖃᐅᒪᔪᑎᑐᑦ ᑍᒤᑉᐳᖅ, ᐃᓕᑦᓯ ᓯᕕᑭᑦᑐᒥᒃ ᖁᕕᐊᓲᑎᖃᕈᒪᓚᐅᖅᐳᓯ ᑖᑦᓱᒪ ᖃᐅᒪᓂᖓᓂᒃ. 36ᐅᕙᖓᓕ ᓇᓗᓁᖅᓯᓂᖃᖅᐳᖓ ᔪᐊᓇᓯᐅᑉ ᓇᓗᓁᖅᓯᓂᖓᓂᑦ ᐊᖏᓂᖅᓴᒥᒃ; ᐱᓂᐊᕐᖕᓃᑦ ᐱᓂᐊᕐᖕᓂᕆᔭᒃᑲ, ᐊᑖᑕᒪ ᕾᓚᐅᖅᐰᑦ ᐅᕙᓐᓄᑦ ᐱᓇᓱᐊᖅᑕᐅᖁᓪᓗᒋᑦ, ᑕᒪᒃᑯᐊ ᐱᓇᓱᐊᕐᖕᓃᑦ ᐅᕙᓐᓂᒃ ᓇᓗᓁᖅᓯᕗᑦ ᓴᖅᑭᑎᑦᓯᓪᓗᑎᒡᓗ ᐊᑖᑕᒧᑦ ᑎᓕᔭᐅᓯᒪᓂᓐᓂᒃ. 37#ᒫᑎᐅᓯ 3:17; ᒫᑯᓯ 1:11; ᓘᑲᓯ 3:22.ᐊᑖᑕᓗ ᑎᓕᔨᒐ ᐅᕙᓐᓂᒃ ᓇᓗᓁᖅᓯᕗᖅ. ᑖᑦᓱᒪ ᓂᐱᖓ ᑐᓴᓚᐅᖅᓯᒪᓐᖏᑕᓯ, ᖃᓄᐃᑦᑑᓂᖓᓗ ᑕᑯᓚᐅᖅᓯᒪᓇᒍ; 38ᐅᖃᐅᓯᖓᓘᓐᓃᑦ ᐃᓗᒥᐅᑕᕆᓐᖏᓚᓯ, ᑖᑦᓱᒪ ᑎᓕᓚᐅᖅᑕᖓ ᐅᒃᐱᕆᖏᓐᓇᑦᓯᐅᒃ. 39ᐊᒡᓚᖕᓂᒃ ᕿᓂᖅᐳᓯ, ᐃᓅᓯᕐᖕᒥᒃ ᓄᖑᓱᐃᑦᑐᒥᒃ ᐱᓂᐊᕋᓱᒋᓪᓗᓯ ᑖᒃᑯᓇᖓᑦ; ᑖᒃᑯᐊᓕ ᐅᕙᓐᓂᒃ ᓇᓗᓁᖅᓯᕗᑦ; 40ᐅᕙᓐᓄᓪᓕ ᕾᔪᒪᓐᖏᓚᓯ ᐃᓅᓯᖅᑖᕐᕕᒋᔪᓐᓇᖅᑕᑦᓯᓐᓄᑦ.
41“ᐃᓄᖕᓄᑦ ᓂᖅᑐᖅᑕᐅᓇᓱᐊᓐᖏᓚᖓ. 42ᖃᐅᔨᒪᕗᖓᓕ ᒎᑎᐅᑉ ᓇᒡᓕᖕᓂᖓᓂᒃ ᐃᓗᒥᐅᑕᖃᖏᓐᓇᑦᓯ. 43ᐊᑖᑕᒪ ᐊᑎᖓᒍᑦ ᑎᑭᓚᐅᖅᐳᖓ, ᐃᓕᑦᓯᓕ ᐃᓚᓕᐅᓐᖏᓚᑦᓯᓐᖓ; ᐊᓯᒐᓕ ᑎᑭᑉᐸᑦ ᓇᖕᒥᓂᖅ ᐱᔪᓐᓇᕐᖕᓂᕐᖕᒥᒍᑦ, ᑖᓐᓇ ᐃᓚᓕᐅᕋᔭᖅᐸᓯ. 44ᖃᓄᖅ ᐅᒃᐱᕈᓐᓇᖅᐱᓰ? ᐃᓅᖃᑎᑦᓯᓐᓄᑦ ᓂᖅᑐᖅᑕᐅᔪᒪᓂᕐᖕᒥᒃ ᐱᓇᓱᐊᖃᑦᑕᕐᓗᓯ ᒎᑎᒧᓪᓗ ᓂᖅᑐᖅᑕᐅᓂᒃᓴᑐᐊᖅ ᕿᓂᕐᖕᓇᒍ. 45ᐃᓱᒪᓂᐊᕋᓯ ᐊᑖᑕᐅᑉ ᓵᖓᓂ ᐸᓯᒃᓯᕐᖕᓂᐊᕋᓱᒋᓗᖓ ᐃᓕᑦᓯᓐᓂᒃ; ᒨᓯᓯᐅᓪᓕ ᓂᕆᐅᖕᓂᕐᖕᒥᒃ ᑐᓐᖓᕕᖃᕐᕕᒋᓇᓱᐊᖅᑕᑦᓯ, ᑖᑦᓱᒪ ᐸᓯᔪᒫᖅᐹᓯ. 46ᒨᓯᓯ ᐅᒃᐱᕆᒍᑦᓯᐅᒃ, ᐅᕙᓐᓂᒃ ᐅᒃᐱᕋᔭᖅᐳᓯ, ᑖᓐᓇ ᐅᕙᓐᓂᒃ ᑎᑎᕋᐅᓯᖃᓚᐅᕐᖕᒪᑦ. 47ᑖᑦᓱᒪᓕ ᑎᑎᕋᓚᐅᖅᑕᖏᑦ ᐅᒃᐱᕆᖏᒃᑯᑦᓯᐅᒃ, ᖃᓄᕐᓕ ᐅᖃᐅᓯᕆᔭᓐᓂᒃ ᐅᒃᐱᕈᓱᒐᔭᖅᐱᓰ?”
Currently Selected:
ᔪᐊᓇᓯᐅᑉ ᐊᒡᓚᖏᑦ 5: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.