ᔪᐊᓇᓯᐅᑉ ᐊᒡᓚᖏᑦ 3
3
ᔩᓱᓯᓗ ᓂᑯᑎᒨᓯᓗ
1ᐊᖑᑎᑕᖃᓚᐅᖅᐳᖅ ᐹᕆᓯᐅᖃᑕᐅᔪᒥᒃ, ᓂᑯᑎᒨᓯᒥᒃ ᐊᑎᓕᖕᒥᒃ, ᔫᑎᓄᑦ ᐊᖓᔪᖅᑲᐅᖃᑕᐅᔪᖅ. 2ᑖᓐᓇ ᐅᓐᓄᐊᒃᑯᑦ ᔩᓱᓯᒧᐊᖅᐳᖅ ᐅᖃᐅᑎᓪᓗᒍ, “ᐊᔪᕆᖅᑐᐃᔩ, ᖃᐅᔨᒪᕗᒍᑦ ᒎᑎᒥᑦ ᐱᓯᒪᓪᓗᑎᑦ ᐊᔪᕆᖅᑐᐃᔨᐅᒐᕕᑦ; ᐃᓕᒃᑐᑦ ᑕᑕᓐᓇᖅᑐᓂᒃ ᐱᔪᖃᕈᓐᓇᖏᒻᒪᑦ, ᒎᑎᐅᑉ ᓇᔪᖏᑉᐸᒍ.”
3ᔩᓱᓯᐅᑉ ᑭᐅᕚ, “ᓱᓕᑦᓯᐊᖅᑐᒥᒃ ᐅᖃᐅᑎᕙᒋᑦ, ᓄᑖᒥᒃ ᐃᕐᖕᓂᐊᖑᖏᑦᑑᑉ, ᒎᑎᐅᑉ ᐊᑕᓂᐅᕕᖓ ᑕᑯᔪᓐᓇᓐᖏᓛ.”
4ᓂᑯᑎᒨᓯᐅᑉ ᐅᖃᐅᑎᕚ, “ᖃᓄᖅ ᐃᓄᒃ ᐱᕈᕇᖅᓯᒪᓕᕐᓗᓂ ᐃᕐᖕᓂᐊᖑᒃᑲᓐᓂᕈᓐᓇᖅᐹ? ᐊᓈᓇᒥ ᐃᒡᓕᐊᖓᓄᑦ ᐃᑎᒃᑲᓐᓂᕈᓐᓇᖅᐹ ᐃᕐᖕᓂᐊᖑᒃᑲᓐᓂᕐᓗᓂᓗ?” 5ᔩᓱᓯᐅᑉ ᑭᐅᕚ, “ᓱᓕᑦᓯᐊᖅᑐᒥᒃ ᐅᖃᐅᑎᕙᒋᑦ, ᓄᑖᒥᒃ ᐃᕐᖕᓂᐊᖑᖏᑦᑐᖅ ᐃᒪᕐᖕᒧᑦ ᐊᓂᕐᖕᓂᕐᖕᒧᓪᓗ ᐃᑦᔪᕐᖕᓁᑦᑐᒧᑦ, ᒎᑎᐅᑉ ᐊᑕᓂᐅᕕᖓᓄᑦ ᐃᑎᕈᓐᓇᓐᖏᓚᖅ. 6ᑎᒥᒥᑦ ᐃᕐᖕᓂᐊᖑᔪᖅ ᐃᓄᑐᐃᓐᓇᐅᕗᖅ ᑎᒥᖃᕐᓗᓂ, ᐊᓂᕐᖕᓂᕐᖕᒥᓪᓕ ᐃᕐᖕᓂᐊᖑᔪᖅ ᐊᓂᕐᖕᓂᒃᑯᑦ ᐃᓅᓕᖅᐳᖅ. 7ᑲᒪᓂᐊᕈᑎᒋᓇᒍ ᐅᖃᐅᑎᒐᒃᑭᑦ, ᐃᓘᓐᓇᓯ ᐃᕐᖕᓂᐊᖑᒃᑲᓐᓂᕆᐊᖃᖅᐳᓯ. 8ᐊᓄᕆ ᓇᒧᑐᐃᓐᓇᖅ ᐊᓄᕌᕐᕕᒋᔪᒪᔭᒥᓄᑦ ᐊᓄᕌᖅᐸᒃᐳᖅ; ᓱᓗᒃᓱᕐᖕᓂᖓ ᑐᓵᒐᓗᐊᖅᐸᑦ, ᖃᐅᔨᒪᓐᖏᓚᑎᓪᓕ ᓇᑭᑦ ᐱᖕᒪᖔᑦ ᓇᒧᓪᓗ ᐂᖕᒪᖔᑦ; ᑍᒤᒃᑭᕗᑦᑕᐅᖅ ᐊᓂᕐᖕᓂᕐᖕᒥᑦ ᐃᕐᖕᓂᐊᖑᔪᑦ.”
9ᓂᑯᑎᒨᓯᐅᑉ ᐅᖃᐅᑎᕚ, “ᖃᓄᕐᓕ ᑕᒪᓐᓇ ᑍᒤᒍᓐᓇᖅᐹ?”
10ᔩᓱᓯᐅᑉ ᑭᐅᕚ, “ᐃᓴᕆᐊᓔᑎᓂ ᐊᔪᕆᖅᑐᐃᔨᐅᕖᑦ, ᑕᒪᓐᓇᓗ ᖃᐅᔨᒪᓇᒍ? 11ᓱᓕᑦᓯᐊᖅᑐᒥᒃ ᐅᖃᐅᑎᕙᒋᑦ, ᖃᐅᔨᒪᔭᑦᑎᓐᓂᒃ ᐅᖃᓲᖑᕗᒍᑦ, ᑕᑯᓚᐅᖅᑕᑦᑎᓐᓂᒡᓗ ᐅᓂᒃᑳᕐᓗᑕ; ᐅᖃᐅᓯᕆᔭᑦᑎᓐᓂᒡᓕ ᐅᒃᐱᓐᖏᓚᓯ.
12“ᓄᓇᐅᑉ ᐱᖏᓐᓂᒃ ᐅᖃᐅᓯᖃᖅᑎᓪᓗᖓ ᐅᒃᐱᕈᓱᖏᒃᑯᕕᑦ; ᖃᓄᕐᓕ ᐅᒃᐱᕈᓱᒃᑲᔭᖅᐲᑦ ᕿᓚᐅᑉ ᐱᖏᓐᓂᒃ ᐅᖃᐅᑎᒐᔭᕈᒃᑭᑦ? 13ᕿᓚᓕᐊᖅᑐᖃᓚᐅᖅᓯᒪᓐᖏᓚᖅ, ᕿᓚᖕᒥᑦ ᐊᖅᑲᖅᑐᖅ ᑭᓯᒥ, ᑕᕝᕙ ᐃᓅᑉ ᐃᕐᖕᓂᖓ.
14 #
ᒨᓯᓯ ᓯᑕᒪᖏᑦ 21:9. “ᓲᕐᓗ ᒨᓯᓯᐅᑉ ᖁᒡᓗᒋᐊᓐᖑᐊᖅ ᓇᑉᐸᖅᑎᓚᐅᕐᖕᒪᒍ ᐃᓄᖃᖏᑦᑐᒥ, ᑍᒫᒃᑕᐅᖅ ᐃᓅᑉ ᐃᕐᖕᓂᖓ ᓇᑉᐸᖅᑕᐅᔭᕆᐊᖃᖅᐳᖅ, 15ᑭᓇᑐᐃᓐᓇᖅ ᐅᒃᐱᖅᑐᖅ ᑖᑦᓱᒧᖓ ᐃᓅᓯᖃᓕᖁᓪᓗᒍ ᓄᖑᓱᐃᑦᑐᒥᒃ. 16ᒎᑎᐅᑉ ᓯᓚᕐᔪᐊᕐᖕᒥᐅᑦ ᓇᒡᓕᒋᓪᓚᕆᒃᑲᒥᒋᑦ ᐃᕐᖕᓂᑐᐊᓂ ᑐᓂᓚᐅᖅᐹ, ᑕᒪᕐᖕᒥᒃ ᑖᑦᓱᒧᖓ ᐅᒃᐱᖅᑐᑦ ᐊᓯᐅᖁᓇᒋᑦ ᓄᖑᓱᐃᑦᑐᒥᒡᓕ ᐃᓅᓯᖃᖁᓪᓗᒋᑦ. 17ᒎᑎᐅᑉ ᐃᕐᖕᓂᓂ ᑎᓕᓚᐅᖏᒻᒪᒍ ᓯᓚᕐᔪᐊᕐᖕᒧᑦ, ᓯᓚᕐᔪᐊᕐᖕᒥᐅᓂᒃ ᐃᒋᑕᒃᓴᓐᖑᖅᑎᑦᓯᖁᓗᒍ, ᓯᓚᕐᔪᐊᕐᖕᒥᐅᓪᓕ ᐱᐅᓕᔭᐅᖁᓪᓗᒋᑦ ᑖᑦᓱᒨᓇ.
18“ᓇᓪᓕᐊᑦ ᑖᑦᓱᒧᖓ ᐅᒃᐱᖅᑐᑦ ᐃᖅᑲᖅᑐᖅᑕᐅᓐᖏᓚᑦ; ᓇᓪᓕᐊᓪᓕ ᑖᑦᓱᒧᖓ ᐅᒃᐱᖏᑦᑐᑦ ᐃᖅᑲᖅᑐᖅᑕᐅᓕᕇᖅᐳᑦ, ᒎᑎᐅᑉ ᐃᕐᖕᓂᑐᐊᖓᑕ ᐊᑎᖓᓄᑦ ᐅᒃᐱᖏᓐᓇᒥᒃ. 19ᐃᖅᑲᖅᑐᖅᑕᐅᓂᖅ ᐃᒤᓕᖓᕗᖅ, ᖃᐅᒪᔪᖅ ᓯᓚᕐᔪᐊᕐᖕᒧᑦ ᑎᑭᓯᒪᕗᖅ, ᐃᓄᐃᑦ ᑖᕐᔪᐊᖅ ᐅᖓᒋᓂᖅᓴᕆᕚᑦ ᖃᐅᒪᔪᒥᑦ, ᐱᓂᐊᕐᖕᓂᖏᑦ ᐱᐅᖏᑦᑐᓕᓂᐅᖕᒪᑕ. 20ᐱᐅᖏᑦᑐᓕᔫᑉ ᖃᐅᒪᔪᖅ ᐆᒥᒋᕚ, ᖃᐅᒪᔪᒧᐊᕈᒪᓇᓂᓗ, ᐱᐅᖏᑦᑐᓕᓂᖏᑦ ᓴᖅᑭᑎᑕᐅᖁᓇᒋᑦ ᖃᐅᒪᔪᒧᑦ. 21ᓱᓕᔪᒥᒡᓕ ᐱᓂᐊᕐᖕᓂᖃᖅᑐᖅ ᖃᐅᒪᔪᒧᐊᖅᐳᖅ, ᐱᓂᐊᕐᖕᓂᖏᑦ ᓴᖅᑭᑎᑕᐅᑦᓯᐊᖁᓪᓗᒋᑦ ᖃᐅᒪᔪᒧᑦ ᒎᑎᒥᑦ ᐱᓯᒪᖕᒪᑕ.”
ᔪᐊᓇᓯ ᐹᑉᑎᑎᕆᔨᐅᑉ ᓇᓗᓁᖅᓯᓂᖓ ᔩᓱᓯᒥᒃ
22ᑕᒪᑐᒪ ᑭᖑᕐᖓᒍᑦ ᔩᓱᓯ ᐃᓕᓐᓂᐊᖅᑎᖏᓪᓗ ᔫᑎᐊᒧᐊᖅᐳᑦ; ᑕᕝᕙᓂ ᐱᓇᓱᐊᖃᑎᒋᕔᑦ ᐹᑉᑎᑦᓯᓪᓗᓂᓗ. 23ᔪᐊᓇᓯᑦᑕᐅᖅ ᐹᑉᑎᑦᓯᕗᖅ ᓄᓇᒥ ᐂᓇᓂᒥ ᓴᓕᒻᒥᐅᑉ ᖃᓂᒋᔭᖓᓃᑦᑐᒥ, ᑕᕝᕙᓂ ᐃᒪᖃᕐᖕᒪᑦ ᐊᒥᒐᖏᑦᑐᒥᒃ; ᐃᓄᐃᓪᓗ ᑕᕝᕗᓐᖓᖅᐳᑦ ᐹᑉᑎᑕᐅᓪᓗᑎᒡᓗ. 24#ᒫᑎᐅᓯ 14:3; ᒫᑯᓯ 6:17; ᓘᑲᓯ 3:19,20.ᔪᐊᓇᓯ ᓱᓕ ᑎᒍᔭᐅᓚᐅᖅᑎᓐᓇᒍ.
25ᔫᑎᓪᓕ ᐃᓚᖓᑦ ᔪᐊᓇᓯᐅᑉ ᐃᓕᓐᓂᐊᖅᑎᖏᓐᓂᒃ ᐂᕙᖃᑎᖃᓕᖅᐳᖅ ᐅᒃᐱᕐᖕᓂᒃᑯᑦ ᓴᓗᒻᒪᖅᑕᐅᓂᕐᖕᒥᒃ ᐱᑦᔪᑎᖃᕐᓗᑎᒃ. 26ᑕᕝᕙ ᐃᓕᓐᓂᐊᖅᑎᖏᑕ ᔪᐊᓇᓯ ᐅᐸᒃᐹᑦ ᐅᖃᐅᑎᓪᓗᒍᓗ, “ᐊᔪᕆᖅᑐᐃᔩ, ᐊᖑᑦ ᔪᐊᕐᑕᓂᐅᑉ ᑰᖓᑕ ᐊᑭᐊᓂ ᐃᓕᖕᓄᐊᓚᐅᖅᑐᖅ, ᐅᖃᐅᓯᕆᖃᑦᑕᖅᑍᑦ, ᑖᓐᓇ ᐹᑉᑎᑦᓯᖃᑦᑕᓕᖅᐳᖅ, ᐃᓄᓕᒫᓪᓗ ᑖᑦᓱᒧᓐᖓᖃᑦᑕᓕᖅᐳᑦ.”
27ᔪᐊᓇᓯᐅᑉ ᑭᐅᕔᑦ, “ᐃᓄᒃ ᓇᓪᓕᐊᑦ ᐃᒻᒥᓃᓐᓇᖅ ᐱᑖᕈᓐᓇᓐᖏᓚᖅ ᒎᑎᐅᑉ ᑐᓂᓯᕕᒋᒃᐸᒍ ᑭᓯᐊᓂ ᐱᓂᐊᕈᓐᓇᖅᐳᖅ. 28#ᔪᐊᓇᓯ 1:20.ᐃᓕᑦᓯ ᓇᖕᒥᓂᖅ ᖃᐅᔨᒪᔨᒋᕙᑦᓯ ᐅᖃᓚᐅᕋᒪ, ‘᙭ᔅᑑᓯᐅᓐᖏᓚᖓ, ᑎᓕᔭᐅᓯᒪᕗᖓᓕ ᑖᑦᓱᒪᓐᖓᑦ ᓯᕗᓕᐅᖁᓪᓗᖓ.’ 29ᐅᐃᒃᓴᖅ ᑖᓐᓇᐅᕗᖅ ᓄᓕᐊᒃᓴᒥᒃ ᓇᖕᒥᓂᓕᒃ; ᐅᐃᒃᓴᐅᓪᓕ ᐱᖃᓐᓇᕆᔭᖓᑕ, ᓴᓂᐊᓂ ᓇᖏᖅᑑᑉ ᑐᓴᖅᑑᓪᓗ, ᖁᕕᐊᓱᒍᑎᒋᕚ ᐅᐃᒃᓴᐅᑉ ᓂᐱᖓᓂᒃ ᑐᓴᕋᒥ; ᑍᒫᒃ ᑕᕝᕙ ᐅᕙᖓ ᓇᖕᒥᓂᖅ ᖁᕕᐊᓱᖕᓂᕋ ᓈᒻᒪᒃᓯᑦᓯᐊᖅᐳᖅ. 30ᑖᓐᓇ ᐊᖏᒃᓕᕙᓪᓕᐊᔭᕆᐊᖃᖅᐳᖅ, ᐅᕙᖓᓕ ᒥᑭᒡᓕᕙᓪᓕᐊᔭᕆᐊᖃᖅᐳᖓ.”
ᑖᓐᓇ ᑕᕝᕙ ᕿᓚᖕᒥᑦ ᑎᑭᑦᑐᖅ
31ᑕᑉᐹᓐᖓᑦ ᑎᑭᑦᑐᖅ ᑕᒤᓐᓂᒃ ᐱᓪᓚᕆᐅᓂᖅᐸᐅᕗᖅ; ᓄᓇᒥᑦ ᐱᔪᖅ ᓄᓇᒥᐅᑕᐅᕗᖅ, ᓄᓇᐅᓪᓗ ᐱᖏᓐᓂᒃ ᐅᖃᐅᓯᖃᕐᓗᓂ, ᕿᓚᖕᒥᓪᓕ ᑎᑭᑦᑐᖅ ᑕᒤᓐᓂᑦ ᐱᓪᓚᕆᐅᓂᖅᐸᐅᕗᖅ. 32ᑕᑯᓚᐅᖅᑕᒥᓂᒃ ᑐᓴᓚᐅᖅᑕᒥᓂᒡᓗ ᐅᖃᐅᓯᖃᖅᐳᖅ, ᓇᓪᓕᐊᑦᑕᓘᓐᓃᓪᓕ ᑖᑦᓱᒪ ᐅᖃᐅᓯᕆᔭᖏᑦ ᐃᓚᓕᐅᓐᖏᓔᑦ. 33ᓇᓪᓕᐊᑦ ᑖᑦᓱᒪ ᐅᖃᐅᓯᖏᓐᓂᒃ ᐃᓚᓕᐅᖅᓯᔪᖅ ᖁᓚᕐᖕᓇᖏᑦᑐᒥᒃ ᖃᐅᔨᕗᖅ, ᒎᑎᐅᑉ ᓱᓕᑦᓯᐊᕐᖕᓂᖓᓂᒃ. 34ᒎᑎᐅᑉ ᑎᓕᓯᒪᔭᖓ ᒎᑎᐅᑉ ᐅᖃᐅᓯᖏᓐᓂᒃ ᐅᖃᐅᓯᖃᖅᐳᖅ, ᒎᑎᐅᑉ ᐊᓂᕐᖕᓂᕐᖕᒥᓂᒃ ᑐᓂᓯᕕᒋᖕᒪᒍ ᐊᒥᒐᖏᑦᑐᒥᒃ; 35#ᒫᑎᐅᓯ 11:27; ᓘᑲᓯ 10:22.ᐊᑖᑕᐅᑉ ᐃᕐᖕᓂᓂ ᓇᒡᓕᒋᕚ, ᑕᒤᑦᑕᓗ ᑐᓂᓚᐅᖅᐰᑦ ᑖᑦᓱᒪ ᐱᔪᓐᓇᕐᖕᓂᖓᓄᑦ. 36ᓇᓪᓕᐊᑦ ᑖᑦᓱᒪ ᐃᕐᖕᓂᖓᓄᑦ ᐅᒃᐱᖅᑐᖅ ᐃᓅᓯᕐᖕᒥᒃ ᓄᖑᓱᐃᑦᑐᒥᒃ ᐱᖃᖅᐳᖅ; ᓇᓪᓕᐊᓪᓕ ᑖᑦᓱᒪ ᐃᕐᖕᓂᖓᓂᒃ ᐃᓚᓕᐅᖅᓯᖏᑦᑐᖅ ᐃᓅᓯᕐᖕᒥᒃ ᑕᑯᓂᐊᓐᖏᓚᖅ, ᒎᑎᐅᓪᓕ ᓂᓐᖓᐅᓯᖓᑕ ᖁᓚᖏᐊᖏᓐᓇᖅᐹ.
Currently Selected:
ᔪᐊᓇᓯᐅᑉ ᐊᒡᓚᖏᑦ 3: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.