ᐂᓮᐊᓯᐅᑉ ᐊᒡᓚᖏᑦ 1
1
1 #
ᐊᑕᓃᑦ ᐂᑉᐸᖏᑦ 15:1-7; ᑯᕉᓂᑲ ᐂᑉᐸᖏᑦ 26:1-23;
ᐊᑕᓃᑦ ᐂᑉᐸᖏᑦ 15:32-38; ᑯᕉᓂᑲ ᐂᑉᐸᖏᑦ 27:1-9;
ᐊᑕᓃᑦ ᐂᑉᐸᖏᑦ 16:1-20; ᑯᕉᓂᑲ ᐂᑉᐸᖏᑦ 28:1-27;
ᐊᑕᓃᑦ ᐂᑉᐸᖏᑦ 18:1—20:21; ᑯᕉᓂᑲ ᐂᑉᐸᖏᑦ 29:1—32:33. ᐅᑯᐊ ᐅᖃᐅᓰᑦ ᐂᓮᐊᓯᐅᑉ ᐂᒨᓯᐅᑉ ᐃᕐᖕᓂᖓᑕ ᑕᑯᑎᑦᔪᑎᒃᑯᑦ ᑕᑯᓚᐅᖅᑕᖏᑦ ᔫᑕᒻ ᔨᕉᓴᓕᒻᓗ ᐱᑦᔪᑎᒋᓪᓗᒋᑦ ᐅᑯᐊ ᐊᖓᔪᖅᑳᕐᔪᐊᕆᔭᐅᑎᓪᓗᒋᑦ ᐅᓮᐊ, ᔫᑕᒪᓗ, ᐂᕼᐊᔅᓗ, ᕼᐃᓯᑬᐊᓗ ᔫᑕᐅᑉ ᐊᖓᔪᖅᑳᕐᔪᐊᖏᑦ.
ᒎᑎᐅᑉ ᓱᐊᒃᓯᓂᖓ ᐃᓄᖁᑎᒥᓂᒃ
2ᐊᑕᓂᖅ ᐅᖃᖅᐳᖅ, “ᑐᓴᕆᑦᓯ ᕿᓚᐅᔪᓯ, ᓈᓚᒋᓪᓗ ᓄᓇᕐᔪᐊᖑᔪᑎᑦ; ᕿᑐᕐᖓᒃᑲ ᐱᕈᖅᓴᓚᐅᖅᐸᒃᑲ ᓂᕆᑎᖃᑦᑕᖅᓗᒋᓪᓗ ᐅᕙᓐᓂᒡᓕ ᐊᑭᕋᖅᑐᓕᖅᐳᑦ. 3ᐃᒻᒧᒃᓯᐅᒊᑦ ᖃᐅᔨᒪᕗᑦ ᐃᓄᖕᒥᖕᓂᒃ, ᓯᐅᑎᖅᑯᖅᑐᔪᓪᓗ ᖃᐅᔨᒪᒋᕗᑦ ᑲᒪᔨᒥᖕᓄᑦ ᓂᕆᑎᑕᐅᕕᒋᕙᒃᑕᒥᖕᓂᒃ; ᐃᓴᕆᐊᓕᒥᐅᓪᓕ ᖃᐅᔨᒪᓐᖏᓚᑦ, ᐃᓄᖁᑎᒃᑲᓗ ᑐᑭᓯᐅᒪᓐᖏᓚᑦ.
4“ᓈᓚᒋᑦᓯ, ᐃᓅᖃᑎᒌᒡᔪᐊᖑᔪᓯ ᐊᔪᖅᑐᓕᔪᓯ, ᐃᓄᐃᑦ ᐊᔪᕐᖕᓂᕐᖕᒥᒃ ᑕᑕᑦᑐᑦ, ᐱᐅᖏᑦᑐᐊᓗᖕᓂᒃ ᐱᓇᓱᐊᖅᑏᑦ ᕿᑐᕐᖓᖏᑦ, ᕿᑐᕐᖎᑦ ᐱᓂᐊᕐᖕᓂᖃᖅᑐᑦ ᐅᐃᕕᕆᒃᓯᓂᕐᖕᒥᒃ! ᐊᑕᓂᖅ ᑲᒪᒋᔪᓐᓃᖅᐹᑦ, ᐃᓴᕆᐊᓕᒥᐅᑦ ᐃᑦᔪᕐᖕᓁᑦᑐᖁᑎᖓᑦ ᓇᕐᕈᒋᕚᑦ, ᐃᒻᒥᖕᓂᒃ ᐊᕕᑕᐅᑎᓯᒪᒻᒪᕆᒃᐳᑦ. 5ᓱᖕᒪᑦ ᓱᒋᐊᖅᑕᐅᔪᒤᓐᓇᖅᐱᓰ? ᐊᑭᕋᖅᑐᐃᓐᓇᕐᖕᓂᑦᓯᓐᓄᑦ? ᓂᐊᖁᓯ ᐊᑕᖏᖅᓗᑎᒃ ᖃᓂᒪᕗᑦ, ᐆᒻᒪᑎᓯᓗ ᐊᑕᖏᖅᓗᑎᒃ ᓄᑭᑮᑦᑑᓪᓗᑎᒃ. 6ᐃᑎᒐᑦᓯ ᐊᓗᖏᓐᓂᑦ ᓂᐊᖁᑦᓯ ᑎᑭᓪᓗᒋᑦ, ᖃᓄᐃᖏᑦᑐᖃᓐᖏᓚᑦ, ᐃᓘᓐᓇᑦᓯᒍᑦ ᑎᒡᓘᔭᖅᐳᓯ ᐊᒥᖅᓗᒃᓗᓯᓗ ᑭᓪᓕᐊᓯᒪᕗᓯ ᐊᐅᓈᖅᓗᓯ. ᑭᓪᓕᓯᓗ ᓴᓗᒻᒪᖅᓴᖅᑕᐅᓯᒪᓐᖏᓚᑦ ᒪᑦᑐᓯᖅᓯᒪᓇᑎᒡᓗ ᐃᓅᓕᓴᐅᓯᖅᓯᒪᓇᑎᒡᓘᓐᓃᑦ ᐅᖅᓱᒧᑦ.
7“ᓄᓇᓯ ᐃᓄᖃᕋᓂ ᐊᓯᕈᖅᑕᐅᓯᒪᕗᖅ, ᐃᒡᓗᒐᓴᖁᑎᓯᓗ ᐃᑯᒪᒧᑦ ᓄᖑᑕᐅᓯᒪᕗᑦ; ᑕᑯᓐᓈᖅᑎᓪᓗᓯ ᓄᓇᓕᑐᖃᐅᖏᑦᑐᓄᑦ ᓄᓇᑦᓯᓐᓂᒃ ᐊᖅᓵᖅᑕᐅᓯᒪᕗᓯ; ᐃᓄᖃᕈᓐᓃᖅᑎᑕᐅᓯᒪᕗᖅ, ᓵᓚᐅᓯᒪᓪᓗᓂᓗ ᓄᓇᖃᑎᒋᓐᖏᑕᑦᓯᓐᓄᑦ. 8ᓮᐅᓂᐅᑉ ᐸᓂᖓ ᑭᓯᒥ ᐊᒥᐊᒃᑯᑑᕗᖅ, ᐃᒡᓗᕋᓛᑎᑐᑦ ᕔᓂᒃᓮᑦ ᐱᕈᕐᕕᖓᓃᑦᑐᑎᑐᑦ, ᐃᒡᓗᕋᓛᑐᓪᓗ ᑍᒤᑉᐳᖅ ᐱᕈᖅᓰᕕᖕᒥ, ᐃᒡᓗᒐᓴᒡᔪᐊᑦ ᐊᕙᓗᔭᐅᓯᒪᓪᓗᑎᒃ ᐊᑭᕋᖅᑐᖅᑎᒥᓄᑦ. 9#ᒨᓯᓯ ᓯᕗᓪᓖᑦ 19:24; ᕉᒪᒥᐅᓄᑦ 9:29.ᐊᑕᓂᐅᑉ ᐊᔪᒐᖃᖏᑦᑑᑉ ᐃᓄᐃᑦ ᐃᓚᖏᓐᓂᒃ ᐊᒥᐊᒃᑯᖃᖅᑎᓚᐅᖏᑉᐸᑎᒍᑦ, ᓄᖑᑕᐅᓇᔭᓚᐅᖅᐳᒍᑦ ᓱᑑᒪᑐᑦ ᒍᒨᕋᒥᐅᑎᑐᓪᓗ. 10ᑐᓴᓚᐅᕆᑦᓯ ᐊᑕᓂᐅᑉ ᐅᖃᐅᓯᖓᓂᒃ ᐃᓕᑦᓯᓐᓄᑦ, ᐃᓕᑦᓯ ᓱᑑᒪᒥ ᐊᖓᔪᖅᑳᖑᔪᓯ! ᐃᓱᒪᒋᑦᓯᐊᓚᐅᖅᓯᐅᒃ ᒎᑎᑦᑕ ᐃᓕᑦᓯᓐᓂᒃ ᐊᔪᕆᖅᑐᐃᓂᖓ ᒍᒨᕋᒥᐅᖑᔪᓯ! 11#ᐂᒨᓯ 5:21,22.ᓱᓇᐅᕙᑦ ᐅᓄᖅᑐᑦ ᐆᒪᔪᑦ ᑐᓂᕐᕈᑎᒋᖃᑦᑕᖅᑕᑦᓯ ᐅᕙᓐᓄᑦ? ᐊᑕᓂᖅ ᐅᖃᖅᐳᖅ; ᐊᕆᐅᑉᐸᒃᑲ ᑐᓂᕐᕈᑎᒋᖃᑦᑕᖅᑕᓯ ᓰᐲᑦ ᐊᖑᓴᓪᓗᖏᑕ ᑐᓐᓄᖏᑦ, ᐃᒻᒧᒃᓯᐅᒊᓪᓗ ᐊᖑᓴᓪᓗᖏᑕ ᐊᐅᖏᑦ ᓄᕐᕋᐅᔧᓪᓗ ᒎᑦᓰᓪᓗᑦᑕᐅᖅ ᑐᓂᕐᕈᑕᐅᓂᖏᑦ ᖁᕕᐊᒋᓐᖏᓚᒃᑲ. 12ᐅᕙᓐᓄᑦ ᑐᒃᓯᐊᕐᕕᖃᕆᐊᖅᑐᓕᕌᖓᑦᓯ ᑭᐊ ᑕᒪᒃᑯᓂᖓ ᓇᒃᓴᖃᑦᑕᖁᕚᓰ ᐱᓱᑲᑕᒋᐊᖅᑐᑐᐃᓐᓇᖅᐱᓰ ᑐᒃᓯᐊᕐᕕᒡᔪᐊᖁᑎᒪ ᑐᖅᓲᖑᔭᖓᓂ? 13ᑐᓂᕐᕈᑎᒃᓴᓯ ᐊᑑᑎᖃᖏᑦᑐᑦ ᕾᑎᖃᑦᑕᕈᓐᓃᖅᓯᐅᒃ; ᐃᓯᖅᓗᐊᕐᖕᓂᑎᑦᓯᑦᔪᑏᓪᓗ ᑎᐱᖏᑦ ᐱᐅᒋᓐᖏᓚᒃᑲ, ᑕᖅᑭᓂᕋᑖᕐᖕᓂᖓᓂ ᓇᓪᓕᐅᓐᓂᖅᓯᐅᕈᑎᓯ ᓴᐸᑎᒥᓗ ᑲᑎᒪᓂᕆᕙᒃᑕᓯ ᐊᕆᐅᑉᐸᒃᑲ ᐊᔪᕐᖕᓂᑦᓯᓐᓄᑦ ᐱᐅᔪᓐᓃᖅᑎᑕᐅᓯᒪᖕᒪᑕ. 14ᑕᖅᑭᓂᕋᑖᕐᖕᓂᖓᓂ ᐅᓪᓗᓄᓪᓗ ᐃᑦᔪᕐᖕᓁᑦᑐᓄᑦ ᓇᓪᓕᐅᓐᓂᖅᓯᐅᕐᖕᓂᕆᕙᒃᑕᓯ ᑕᕐᖕᓂᕐᖕᒪ ᐆᒥᒋᕔᑦ; ᐅᕙᓐᓄᑦ ᐅᖁᒤᒃᓴᕐᖕᓇᖅᓯᖕᒪᑕ, ᐃᕿᐊᓐᖒᑎᕙᒃᑲ ᐊᒡᔭᕆᐊᖏᑦ.
15“ᐊᒡᒐᓯ ᐃᓵᒃᑲᓗᐊᕋᑦᓯᐅᒃ ᐅᕙᓐᓄᑦ, ᑕᑯᓐᓇᕐᖕᓂᐊᕈᓐᓃᖅᐸᑦᓯ; ᐅᓄᖅᑐᓂᒃ ᑐᒃᓯᐊᕐᖕᓂᓕᐅᕋᓗᐊᕈᑦᓯ ᓈᓚᖕᓂᐊᓐᖏᓚᖓ, ᐊᒡᒐᓯ ᐊᐅᖏᓐᓇᐅᖕᒪᑕ. 16ᐃᓕᑦᓯᓐᓂᒃ ᐅᐊᓴᓚᐅᕆᑦᓯ; ᓴᓗᒻᒪᑦᓯᐊᖅᓗᓯ; ᐱᐅᖏᑦᑐᖅ ᐲᓚᐅᖅᓯᐅᒃ ᐱᓂᐊᕐᖕᓂᑦᓯᓐᓂᑦ ᐃᔨᒪ ᓵᖓᓂᑦ; ᐊᑏ ᐱᐅᖏᑦᑐᓕᐅᕈᓐᓃᕆᑦᓯ. 17ᐊᑲᐅᔪᒥᒃ ᐃᓕᓐᓂᐊᓕᕆᑦᓯ, ᐸᓯᔭᐅᓐᓇᖏᑦᑐᒥᒃ ᕿᓂᕆᑦᓯ, ᓵᓚᓯᐊᖃᕐᖕᓂᖅ ᐋᖅᑭᒋᐊᖅᓗᒍ; ᐃᓕᐊᕐᔪᐃᑦ ᓴᐳᓐᓂᐊᖅᓗᒋᑦ, ᐅᐃᒡᒐᕐᖕᓃᓪᓗ ᐃᑲᔪᖅᓗᒋᑦ.
18“ᐊᑕᓂᖅ ᐅᖃᖅᐳᖅ, ᕾᒋᑦᓯ ᐃᓱᒪᓕᐅᖃᑎᒌᓚᐅᖅᑕ ᑕᒪᑐᒥᖓ, ᐊᔪᕐᖕᓂᓯ ᐊᐅᑉᐸᕆᒃᑐᑐᑦ ᑍᒤᒃᑲᓗᐊᖅᐸᑕ, ᐊᐳᑎᑐᑦ ᖃᑯᖅᓯᑎᑕᐅᔪᒫᖅᐳᑦ; ᐊᐅᐸᓪᓚᕆᒃᑐᑐᓪᓗ ᑍᒤᒐᓗᐊᖅᐸᑕ, ᓰᐱᐅᑉ ᒥᖅᑯᖏᑎᑐᑦ ᖃᑯᖅᓯᑎᒋᔪᒫᖅᐳᑦ. 19ᐱᔪᒪᓂᖃᑦᓯᐊᖅᓗᓯ ᓈᓚᑦᓯᐊᕈᑦᓯ, ᓂᕿᒃᓴᖃᕈᒫᖅᐳᓯ ᐱᐅᔪᓂᒃ ᓄᓇᐅᑉ ᐱᕈᖅᑎᑕᖏᓐᓂᒃ. 20ᓈᓚᖏᓪᓗᓯᓕ ᐊᑭᕋᖅᑐᕈᑦᓯ, ᑐᖁᑕᐅᔪᒫᖅᐳᓯ ᓴᕕᒡᔪᐊᒧᑦ; ᐊᑕᓂᖅ ᓇᖕᒥᓂᖅ ᐅᖃᖅᐳᖅ.”
ᐃᒡᓗᒐᓮᑦ ᐊᔪᖅᑐᓕᕕᐅᔪᑦ
21ᐃᒡᓗᒐᓮᑦ ᑲᔪᓯᑦᓯᐊᖅᑐᒥᒃ ᐱᓇᓱᐊᖅᑐᑦ ᐊᖑᓐᓂᐊᖅᑎᐅᓕᖅᐳᑦ! ᐸᓯᔭᒃᓴᐅᖏᑦᑐᒥᒃ ᐱᓇᓱᐊᓚᐅᖅᑐᑦ ᓇᓛᒎᕐᖕᓂᕐᖕᒥᓪᓗ ᐃᓂᒋᔭᐅᓚᐅᖅᑐᑦ, ᒫᓐᓇᓕ ᐃᓄᐊᖅᑎᐅᓕᖅᐳᑦ. 22ᓯᐅᓪᕕᕆᖁᑎᓯ ᐊᑭᖃᕈᓐᓃᖅᐳᑦ, ᕔᓂᖁᑎᓯᓗ ᐃᒥᕐᖕᒥᒃ ᐃᓚᖃᓕᖅᓗᑎᒃ. 23ᐊᖓᔪᖅᑳᖁᑎᓯᓗ ᐊᑭᕋᖅᑐᖅᑎᐅᓕᖅᐳᑦ ᑎᒡᓕᒃᑎᓄᓪᓗ ᐃᓚᒋᔭᐅᓕᖅᓗᑎᒃ; ᐅᐃᕕᕐᕆᒃᓯᓂᕐᖕᒥᒃ ᖁᕕᐊᒋᔭᖃᖅᑐᐃᓐᓇᐅᓕᖅᐳᑦ ᑐᓂᓯᕕᐅᔪᒪᓂᕐᖕᒥᒡᓗ ᐱᓇᓱᐊᒐᖃᖅᓗᑎᒃ. ᐃᓕᐊᕐᔪᖕᓂᒃ ᓴᐳᓐᓂᐊᓐᖏᓚᑦ, ᐅᐃᒡᒐᕐᖕᓂᕐᖕᓂᒡᓗ ᐃᑲᔪᕈᒪᓂᕐᖕᒥᒃ ᐃᓱᒪᖃᕋᑎᒃ. 24ᑍᒤᒻᒪᑦ ᐊᑕᓂᖅ ᐅᖃᖅᐳᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ, ᐃᓴᕆᐊᓕᒥᐅᑦ ᐊᔪᒐᖃᖏᑦᑐᕐᔪᐊᖁᑎᖓ: ᐊᑭᕋᒃᑲ ᐱᒋᐊᕐᖕᓂᐊᖅᐸᒃᑲ ᓂᓐᖓᐅᓯᓐᓄᑦ, ᓇᖕᒥᓂᕐᓗ ᐊᑭᓂᐊᕐᕕᒋᓂᐊᖅᐸᒃᑲ ᐊᑭᕋᖅᑐᖅᑎᒃᑲ. 25ᐊᒡᒐᒃᑲ ᐃᓕᑦᓯᓐᓄᑦ ᓵᑎᓪᓗᒋᑦ ᐱᒋᐊᕐᖕᓂᐊᖅᓕᖅᐸᑦᓯ ᓴᓗᒪᖏᓐᓃᑦ ᐊᐅᒃᑎᑦᓱᒪᕙᒃᑲ, ᐅᐊᓴᐅᑎᑎᑐᑦ, ᓴᕕᕋᔭᒃᓴᐅᖏᑦᑐᓪᓗ ᐃᓕᑦᓯᓐᓂᑦ ᐲᔭᕈᒪᕙᒃᑲ. 26ᐃᖅᑲᖅᑐᐃᑦᓯᐊᖅᑐᓂᒡᓗ ᓯᕗᓪᓕᖅᑎᓂᒃ ᐅᑎᖅᑎᑦᓯᓂᐊᖅᐳᖓ, ᐅᖃᐅᑦᔪᐃᔨᓂᒡᓗ ᓯᕗᓪᓕᖅᑎᑐᑦ ᑍᒤᑦᑐᓂᒃ. ᑕᒪᑐᒪ ᑭᖑᓂᖓᒍᑦ ᐅᖃᐅᓯᐅᓕᕈᒫᖅᐳᓯ ᐃᒡᓗᒐᓴᒡᔪᐊᓂᒃ ᓇᓛᒎᑦᓯᐊᖅᑐᓂᒃ, ᐃᒡᓗᒐᓴᒡᔪᐊᓂᒃ ᐱᓂᐊᕐᖕᓂᕐᖕᒥᖕᓂᒃ ᓴᖑᓂᐊᖏᑦᑐᓂᒃ.
27ᓮᐅᓂ ᐱᐅᓕᔭᐅᔪᒫᖅᐳᖅ ᐸᓯᔭᒃᓴᐅᖏᓐᓂᕐᖕᒧᑦ, ᑕᕝᕙᓃᑦᑐᓪᓗ ᖃᕿᐊᓕᖅᑐᑦ ᓇᓛᒎᕐᖕᓂᕐᖕᒧᑦ. 28ᐊᑭᕋᖅᑐᖅᑐᓪᓕ ᐊᔪᖅᑐᓕᔪᓪᓗ ᑕᒪᕐᖕᒥᒃ ᐊᑕᐅᑦᓯᒃᑯᑦ ᓄᖑᑎᑕᐅᔪᒫᖅᐳᑦ, ᐊᑕᓂᕐᖕᒥᒡᓗ ᕿᒤᔪᑦ ᓄᖑᑕᐅᓗᑎᒃ.
29ᑲᓐᖑᓱᒃᑎᑕᐅᔪᒫᖅᐳᓯ ᓇᐹᖅᑐᓂᑦ ᑍᔭᐅᔪᓂᑦ ᐆᒃᒥᒃ#1:29 ᓇᐹᖅᑐᓂᑦ ᑐᑭᓕᒃ ᒎᑎᓐᖑᐊᓄᑦ ᑐᒃᓯᐊᖃᑦᑕᖅᑐᑦ ᖁᕕᐊᒋᓚᐅᖅᑕᑦᓯᓐᓂᑦ; ᐊᐅᐸᓪᓕᖅᑎᑕᐅᓗᓯᓗ ᐱᕈᖅᓰᕖᑦ ᓂᕈᐊᕆᓚᐅᖅᑕᑦᓯ ᐱᓪᓗᒋᑦ. 30ᐃᓕᑦᓯ ᓇᐹᖅᑐᑎᑐᑦ ᐆᒃᒥᒃ ᑍᔭᐅᔪᑎᑐᑦ ᑍᒤᑦᓱᒫᖅᐳᓯ ᑐᖁᓕᖓᔪᓂᒃ ᐅᖃᐅᔭᓕᒃᑎᑐᑦ, ᐱᕈᖅᓰᕕᒃᑎᑐᓪᓗ ᓴᓗᐊᖅᓯᒪᔪᑐᑦ. 31ᓴᓐᖏᔪᑦ ᐃᑯᐊᓪᓚᒃᓴᐅᑎᐅᔪᒫᖅᐳᑦ, ᐱᓇᓱᐊᕐᖕᓂᖏᓪᓗ ᐊᐅᒫᒡᒋᖅᑐᑎᑐᑦ ᑍᒤᓕᖅᓗᑎᒃ, ᑕᒪᕐᖕᒥᒃ ᑖᒃᑯᐊᒃ ᐃᑯᐊᓚᔪᒫᖅᐴᒃ, ᑭᓇᒧᓪᓘᓐᓃᑦ ᖃᒥᑕᐅᔪᓐᓇᖏᓪᓗᑎᒃ.
Currently Selected:
ᐂᓮᐊᓯᐅᑉ ᐊᒡᓚᖏᑦ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.