ᔪᐊᓇᓯᐅᑉ ᐊᒡᓚᖏᑦ 16
16
1“ᑕᒪᒃᑯᓂᖓ ᐅᖃᐅᑎᕙᑦᓯ ᐹᓪᓚᖁᓇᓯ. 2ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖏᓐᓂᑦ ᐊᓂᑎᑕᐅᔪᒫᖅᐳᓯ; ᓇᓪᓕᐅᑎᔪᒫᖅᐳᖅ ᓇᓪᓕᐊᑦ ᐃᓕᑦᓯᓐᓂᒃ ᑐᖁᑦᓯᓗᑎᒃ ᒎᑎᒥᒃ ᐱᔨᑦᓯᕋᓱᒋᔪᒫᕐᖕᓂᖓᑦ. 3ᑍᒤᓕᐅᕐᕕᐅᔪᒫᖅᐳᓯ ᐊᑖᑕᒐᓗ ᐅᕙᒍᒃ ᖃᐅᔨᒪᖏᓐᓇᒥᑎᒃᑯᒃ. 4aᑕᒪᒃᑯᓂᖓᓕ ᐅᖃᐅᑎᓚᐅᖅᐸᑦᓯ, ᑕᒪᓐᓇ ᐱᕕᒃᓴᖓᑦ ᓇᓪᓕᐅᑎᒃᐸᑦ ᐃᖅᑬᓕᖁᓪᓗᓯ ᑖᒃᑯᓂᖓ ᐅᖃᐅᓯᖃᓚᐅᕐᖕᓂᓐᓂᒃ ᐃᓕᑦᓯᓐᓄᑦ.”
ᐊᓂᕐᖕᓂᐅᑉ ᐃᑦᔪᕐᖕᓁᑦᑑᑉ ᐱᓇᓱᐊᕐᖕᓂᖓ
4b“ᑕᒪᒃᑯᓂᖓ ᐱᒋᐊᕐᖕᓂᖓᓂᑦ ᐅᖃᐅᑎᓚᐅᓐᖏᓚᑦᓯ, ᓇᔪᓚᐅᕋᑦᓯ. 5ᒫᓐᓇᓕ ᑎᓕᔨᓐᓄᑦ ᐂᓂᐊᖅᐳᖓ; ᐊᐱᕆᔪᖃᓐᖏᓚᓯᓕ ᓇᒧᖓᕐᖕᓂᐊᕐᖕᒪᖔᕐᖕᒪ. 6ᑕᒪᒃᑯᓂᖓᓕ ᐅᖃᐅᑎᒐᑦᓯ, ᐆᒻᒪᑎᑦᓯᒍᑦ ᕿᒃᓵᓕᖅᐳᓯ. 7ᓱᓕᔪᒥᒃ ᐅᖃᐅᑎᕙᑦᓯ: ᐃᓕᑦᓯᓐᓄᑦ ᐱᕙᓪᓕᕐᖕᓇᕐᖕᓂᖅᓴᐅᕗᖅ ᐊᐅᓪᓚᕈᒪ, ᐊᐅᓪᓚᖏᒃᑯᒪ, ᐃᑲᔪᖅᑎᐅᑉ ᑎᑭᓐᓂᐊᖏᒻᒪᓯ; ᐊᐅᓪᓚᕈᒪᓕ, ᐃᓕᑦᓯᓐᓄᑦ ᑎᓕᓛᖅᐸᕋ. 8ᑎᑭᒍᓂᓗ, ᓯᓚᕐᔪᐊᕐᖕᒥᐅᑦ ᑐᑭᓯᑎᓛᖅᐰᑦ ᐊᔪᕐᖕᓂᕐᖕᒥᒃ ᓇᓛᒎᕐᖕᓂᕐᖕᒥᒡᓗ ᐃᖅᑲᖅᑐᖅᑕᐅᓂᕐᖕᒥᒡᓗ. 9ᐊᔪᕐᖕᓂᖅ ᐱᑦᔪᑎᒋᓪᓗᒍ, ᐅᕙᓐᓄᑦ ᐅᒃᐱᖏᒻᒪᑕ; 10ᓇᓛᒎᕐᖕᓂᖅ ᐱᑦᔪᑎᒋᓪᓗᒍ, ᐊᑖᑕᒧᐊᕐᖕᓂᐊᖅᐳᖓ, ᑕᑯᓂᐊᕈᓐᓃᖅᐸᑦᓯᓐᖓᓗ; 11ᐃᖅᑲᖅᑐᐃᓂᖅ ᐱᑦᔪᑎᒋᓪᓗᒍ, ᓯᓚᕐᔪᐊᑉ ᒪᑐᒪ ᐊᐅᓚᑦᓯᔨᖓ ᐃᖅᑲᖅᑐᖅᑕᐅᖕᒪᑦ.
12“ᓱᓕ ᐊᒥᓱᓂᒃ ᐅᖃᐅᓯᒃᓴᖃᕋᓗᐊᖅᐳᖓ ᐃᓕᑦᓯᓐᓄᑦ, ᒫᓐᓇᓕ ᑐᓴᕈᑦᓯᐅᒃ ᓇᓗᓇᓗᐊᖅᐳᑦ ᐃᓕᑦᓯᓐᓄᑦ. 13ᓱᓕᔫᓪᓕ ᐊᓂᕐᖕᓂᖓ ᑎᑭᒃᑯᓂ, ᓱᓕᓂᕐᖕᓄᑦ ᑕᒤᓐᓄᑦ ᑕᓯᐅᓛᖅᐹᓯ; ᓇᖕᒥᓂᖅ ᐱᔪᓐᓇᕐᖕᓂᓂ ᒪᓕᒡᓗᒍ ᐅᖃᓪᓚᓛᖏᒻᒪᑦ, ᑐᓴᖅᑕᒥᓂᒡᓕ ᐅᖃᐅᑦᔨᔪᒫᖅᐳᖅ, ᓇᓪᓕᐅᑎᔪᒫᖅᑐᓂᒡᓗ ᐅᖃᐅᑎᔪᒫᖅᐹᓯ. 14ᑖᑦᓱᒪ ᓂᖅᑐᕐᖕᓇᖅᑎᑦᑐᒫᖅᐹᖓ, ᑖᓐᓇ ᐅᖃᐅᓯᓐᓂᒃ ᐅᖃᐅᓯᖃᕐᖕᓂᐊᕐᖕᒪᑦ ᐃᓕᑦᓯᓐᓄᑦ. 15ᐊᑖᑕᒪ ᐱᖏᑦ ᐱᒋᕙᒃᑲ; ᑍᒤᒻᒪᑦ ᐅᖃᖅᐳᖓ ᑖᓐᓇ ᐅᖃᐅᓯᓐᓂᒃ ᐅᖃᐅᓯᖃᕈᒫᖅᐳᖅ ᐃᓕᑦᓯᓐᓄᑦ.”
ᕿᒃᓵᒃᑎᑕᐅᓂᖅ ᖁᕕᐊᓱᒃᑎᑕᐅᓂᕐᓗ
16“ᐊᑯᓂᐅᖏᑦᑐᖅ ᑕᑯᖃᑦᑕᕐᖕᓂᐊᕈᓐᓃᖅᐸᑦᓯᓐᖓ; ᐊᑯᓂᐅᖏᑦᑐᕐᓗ ᑕᑯᓂᐊᕆᕙᑦᓯᓐᖓ.”
17ᑕᕝᕙ ᐃᓕᓐᓂᐊᖅᑎᖏᑕ ᐃᓚᖏᑦ ᐃᒻᒥᖕᓄᑦ ᐅᖃᖃᑦᑕᐅᑎᓕᖅᐳᑦ, “ᖃᓄᕐᖑᓇ ᑐᑭᓕᖕᓂᒃ ᐅᖃᓪᓚᓕᖅᑐᖅ, ᐅᖃᐅᑎᖕᒪᑎᒍᑦ, ‘ᐊᑯᓂᐅᖏᑦᑐᖅ ᑕᑯᖃᑦᑕᕐᖕᓂᐊᕈᓐᓃᖅᐸᑦᓯᓐᖓ ᐊᑯᓂᐅᖏᑦᑐᕐᓗ ᑕᑯᓂᐊᕆᕙᑦᓯᓐᖓ’; ᐅᖃᕆᓪᓗᓂᓗ, ‘ᐊᑖᑕᒧᑦ ᐂᓂᐊᕋᒪ.’ 18ᖃᓄᕐᖑᓈ ᑐᑭᓕᒃ ‘ᐊᑯᓂᐅᖏᑦᑐᖅ’? ᖃᓄᖅ ᐅᖃᕋᓱᐊᕐᖕᒪᖔᑦ ᑐᑭᓯᓐᖏᓚᕗᑦ.”
19ᔩᓱᓯᐅᓪᓕ ᖃᐅᔨᒪᒐᒥᒋᑦ ᐊᐱᖅᓱᕈᒪᓂᖏᑦ; ᐅᖃᐅᑎᕔᑦ, “ᐅᖃᕋᒪ, ‘ᐊᑯᓂᐅᖏᑦᑐᖅ ᑕᑯᖃᑦᑕᕐᖕᓂᐊᕈᓐᓃᖅᐸᑦᓯᓐᖓ, ᐊᑯᓂᐅᖏᑦᑐᕐᓗ ᑕᑯᓂᐊᕆᕙᑦᓯᓐᖓ’ ᑕᒪᓐᓇ ᑕᕝᕙ ᐃᓕᑦᓯᓐᓄᑦ ᐊᐱᖅᓲᑎᒋᔭᓰ? 20ᓱᓕᔪᒥᒃ ᐅᖃᐅᑎᕙᑦᓯ, ᕿᐊᓗᓯᓗ ᐅᒡᒍᐊᓛᖅᐳᓯ, ᓯᓚᕐᔪᐊᕐᖕᒥᐅᓪᓕ ᖁᕕᐊᓱᓛᖅᐳᑦ; ᐃᓕᑦᓯᓕ ᕿᒃᓵᒍᒫᖅᐳᓯ, ᕿᒃᓵᖕᓂᓯᓕ ᖁᕕᐊᓱᓂᖑᖅᑎᑕᐅᓛᕆᕗᖅ. 21ᐊᕐᖕᓇᖅ ᓄᑕᕋᖅᑖᕋᓱᒃᑯᓂ ᕿᒃᓵᓕᖅᐳᖅ, ᓇᓪᓕᐅᓐᓂᖓ ᓇᓪᓕᐅᑎᖕᒪᑦ; ᓄᑕᕋᑯᓗᒡᓕ ᐃᕐᖕᓂᐊᕆᔭᕇᕈᓂᐅᒃ, ᐃᓗᖏᖅᓱᕐᖕᓂᕆᖅᑲᐅᔭᓂ ᐳᐃᒍᖅᐹ, ᖁᕕᐊᓱᓕᖅᐳᖅ ᓄᑕᕋᑯᓗᒃ ᐃᕐᖕᓂᐊᖑᖕᒪᑦ ᓯᓚᕐᔪᐊᕐᖕᒧᑦ. 22ᑍᒤᓐᓂᕗᓯᑦᑕᐅᖅ ᒫᓐᓇ ᕿᒃᓵᒃᐳᓯ, ᑕᑯᓛᕆᕙᑦᓯᓕ ᐆᒻᒪᑎᑦᓯᒍᑦ ᖁᕕᐊᓱᒻᒪᕆᓕᓛᖅᐳᓯ, ᖁᕕᐊᓱᖕᓂᕆᔭᓯᓗ ᑭᓇᒧᓪᓘᓐᓃᑦ ᐲᖅᑕᐅᓂᐊᓐᖏᓚᖅ ᐃᓕᑦᓯᓐᓂᑦ.
23“ᐅᓪᓗᖅ ᓇᓪᓕᐅᑎᒃᐸᑦ ᐅᕙᓐᓂᒃ ᐊᐱᖅᓲᕈᓐᓃᕈᒫᖅᐳᓯ. ᓱᓕᔪᒥᒃ ᐅᖃᐅᑎᕙᑦᓯ, ᐊᑖᑕ ᑐᒃᓯᐊᕐᕕᒋᒍᑦᓯᐅᒃ ᓱᓇᑐᐃᓐᓇᕐᖕᒥᒃ, ᑖᑦᓱᒪ ᑐᓂᓯᕕᒋᓂᐊᖅᐹᓯ ᐊᑎᓐᓂ. 24ᒫᓐᓇᒧᑦ ᑎᑭᓪᓗᒍ ᑐᒃᓯᐊᓚᐅᓐᖏᓚᓯ ᓱᓇᑐᐃᓐᓇᕐᖕᒥᒃ ᐊᑎᓐᓂ; ᑐᒃᓯᐊᕆᑦᓯ, ᑐᓂᓯᕕᐅᓂᐊᖅᐳᓯ ᑕᕝᕙ, ᖁᕕᐊᓱᖕᓂᓯ ᓈᒻᒪᒃᓯᑦᓯᐊᖁᓪᓗᒍ.”
ᓯᓚᕐᔪᐊᕐᖕᒥᒃ ᓵᓚᖃᕐᖕᓂᖅ
25“ᐊᑦᔨᐅᔪᓂᒃ ᐊᑐᕐᓗᖓ ᑕᒪᒃᑯᓂᖓ ᐅᖃᐅᑎᖃᑦᑕᓚᐅᖅᐸᑦᓯ; ᓇᓪᓕᐅᑎᔪᒫᖅᐳᕐᓕ ᐊᑦᔨᐅᔪᓂᒃ ᐊᑐᕐᓗᖓ ᐃᓕᑦᓯᓐᓄᑦ ᐅᖃᖃᑦᑕᕈᓐᓃᕐᕕᒃᓴᕋ ᑐᑭᓯᓇᑦᓯᐊᖅᑐᓂᒡᓕ ᐅᖃᕐᕕᒋᖃᑦᑕᓛᖅᐸᑦᓯ ᐊᑖᑕᒥᒃ. 26ᑕᒪᓐᓇ ᐅᓪᓗᖅ ᓇᓪᓕᐅᑎᒃᐸᑦ ᑐᒃᓯᐊᕈᒫᖅᐳᓯ ᐊᑎᓐᓂ; ᐅᖃᓐᖏᓚᖓᓕ ᐊᑖᑕ ᑐᒃᓯᐊᕐᕕᒋᔪᒪᓂᕋᕐᓗᒍ ᐱᑦᔪᑎᒋᓗᓯ; 27ᐊᑖᑕᐅᑉ ᓇᖕᒥᓂᖅ ᓇᒡᓕᒋᖕᒪᓯ, ᓇᒡᓕᒋᒐᑦᓯᓐᖓ ᐅᒃᐱᕐᓗᓯᓗ ᒎᑎᒥᑦ ᐱᓚᐅᕋᒪ. 28ᐊᑖᑕᒥᑦ ᐱᓯᒪᕗᖓ ᓯᓚᕐᔪᐊᕐᖕᒧᐊᕐᓗᖓᓗ; ᒫᓐᓇᓕ ᓯᓚᕐᔪᐊᖅ ᕿᒪᖕᓂᐊᖅᐸᕋ ᐊᑖᑕᒧᑦ ᐂᓗᖓ.”
29ᐃᓕᓐᓂᐊᖅᑎᖏᑕ ᐅᖃᐅᑎᕚᑦ, “ᒫᓐᓇ ᑐᑭᓯᓇᑦᓯᐊᖅᑐᓂᒃ ᐅᖃᐅᓯᖃᓕᖅᐳᑎᑦ, ᐊᑦᔨᐅᔪᓂᒡᓗ ᐅᖃᐅᓯᖃᕐᖕᓇᒃ. 30ᒫᓐᓇ ᑐᑭᓯᕗᒍᑦ ᓱᓇᓕᒫᑦ ᖃᐅᔨᒪᒐᕕᒋᑦ, ᐊᐱᕆᔭᐅᔭᕆᐊᖃᓐᖏᓚᑎᓪᓗ; ᑕᒪᓐᓇ ᐱᑦᔪᑎᒋᓪᓗᒍ ᐅᒃᐱᕈᓱᒃᐳᒍᑦ ᒎᑎᒥᑦ ᐱᓯᒪᓂᕐᖕᓂᒃ.”
31ᔩᓱᓯᐅᑉ ᑭᐅᕔᑦ, “ᒫᓐᓈ ᐅᒃᐱᓕᖅᐱᓰ? 32ᓇᓪᓕᐅᑦᑐᒃᓴᖅ ᓇᓪᓕᐅᑎᔪᒫᖅᐳᖅ, ᒫᓐᓇᓗ ᐊᑐᓕᖅᐸᕗᑦ, ᓇᒧᑐᐃᓐᓇᖅ ᓯᐊᒻᒪᖅᑎᑕᐅᕕᒃᓴᓯ, ᐊᑐᓂᑦ ᐊᖏᕐᕋᑦᓯᓐᓄᐊᕐᓗᓯ, ᐅᕙᖓᓗ ᐃᓄᑑᑎᓪᓗᖓ ᕿᒪᒃᑕᐅᓛᖅᐳᖓ; ᑭᓯᐊᓂᓕ ᐃᓄᑑᓐᖏᓚᖓ, ᐊᑖᑕᐅᑉ ᓇᔪᕐᖕᒪᖓ. 33ᑕᒪᒃᑯᓂᖓ ᐅᖃᐅᑎᓚᐅᖅᐸᑦᓯ, ᐅᕙᓐᓃᓪᓗᓯ ᐃᓱᒪᔮᖁᓇᓯ. ᓯᓚᕐᔪᐊᕐᖕᒥ ᐅᖁᒤᒃᓴᕐᖕᓇᖅᑐᒦᑉᐳᓯ; ᓯᕘᕋᓇᓯᓕ, ᓯᓚᕐᔪᐊᖅ ᓵᓚᒋᓯᒪᒐᒃᑯ.”
Currently Selected:
ᔪᐊᓇᓯᐅᑉ ᐊᒡᓚᖏᑦ 16: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.