Matiu 28
28
Enye Emeset!
1Ke Sabat ama ekebe, ke ñkpọusen, ke akpa usen urua emi edide Ederi, Meri Makdalin ye Meri eken ema eka ndise udi.
2Ndo ndo oro, akwa unyek isọñ otibe, koro enjel Ọbọñ Abasi ọkọsuhọrede oto ke enyọñ edi ke isọñ edikpat itiat efep ke inua udi, onyuñ ọsuhọde etetie ke enyọñ esie. 3Iso Esie akayama nte emireñ mireñ, edisine ñkpọ esie afia nte sno (snow). 4Mme ekpeme ukpeme ema ekop ndik eti eti, tutu mmọ ema ekabade etie nte mme akpaña ñkpa.
5Enjel ama ọdọhọ mme iban oro ete, “Ekuyak ndik anam mbufo, sia ami mmọfiọk nte ke mbufo eyom Jisọs emi ekekọñde ke eto. 6Enye idughe mi; Enye eset, kpasuk nte Enye ọkọdọhọde mbufo. Eduk edise ebiet emi okpo Esie akanade. 7Ndien idahaemi, esọp eka ekedọhọ mbet Esie ete, ke Enye ama eset ke ñkpa ndien Enye ebem iso aka ke Kalili. Do ke mbufo edikut Enye. Se ñkenyenede nditiñ nnọ mbufo edi oro.”
8Ke ntre iban emi ema ekpọñ udi usọp usọp ke ndik, edi ema eyọhọ ye akwa idara, ndien efeñe eka nditiñ nnọ mbet Esie. 9Nte mmọ ekefeñede eka, ke unana idorenyin Jisọs ama osobo ye mmọ, onyuñ ọkọm mmọ ete, “Emem odu ye mbufo.” Ndien kpukpru mmọ eduọñọ ke isọñ ke iso Esie enyuñ emum Enye ukot, ndien etuak ibuot enọ Enye.
10Do ke Jisọs ọkọdọhọ mmọ, ete, “Ekufehe ndik, eka ekedọhọ nditọ Ete Mi ete yak mmọ eka ke Kalili, ke ebiet emi mmọ edikutde Mi.”
11Adaña ini emi iban oro ekesuk edude ke usuñ, ubak mmọ emi ekekpemede udi ema esọp eduk ke obio eketiñ enọ mme ikpọ oku kpukpru se iketibede. 12Mme ikpọ oku ema ekesobo ye mme ikpọ owo, ndien mmọ ema ebọp uduak mmọ; mmọ ema enọ mme mbon ekọñ ata ediwak okuk, 13ndien edọhọ mmọ ete, “Mbufo enyene ndidọhọ ete, ke mme mbet esie ekedi ke okoneyo ediyip okpo Esie ke adaña ini emi mmimọ ikedede idap.
14Ndien edieke ada ibuot ukara okopde ikọ emi, ñnyin iyeyuhọ enye inyuñ isioño mbufo ke afanikọñ ifep.”
15Ntre ke mme mbon ekọñ ekebọ okuk oro enyuñ enam nte eketemede mmọ. Ndien mbuk emi ama atara ọyọhọ ke otu mme Ju tutu osim idem mfin emi.
16Mme mbet duopekiet eken ema eka Kalili, ke obot emi Jisọs eketemede mmọ ndika. 17Ke ini mmọ ekekutde Enye, mmọ ema etuak ibuot enọ Enye, okposuk edi emi ndusuk mmọ ekeyikde.
18Jisọs ama asaña ekpere mmọ, onyuñ ọdọhọ ete, “Enọ Mi kpukpru odudu ke enyọñ ye ke isọñ. 19Mbufo eka ndien ebine kpukpru owo ke kpukpru ebiet, enyuñ enam mmọ edi mme mbet Mi: enim mmọ babtisim ke enyiñ Ete, ye ke enyiñ Eyen, ye ke enyiñ Edisana Spirit, 20ndien ekpep mmọ esuk ibuot enọ kpukpru mme ñkpọ emi Ami ñkewukde mbufo enam. Ndien Ami ñyedu ye mbufo kpukpru ini, tutu esim utit ini.”
Currently Selected:
Matiu 28: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
