Ọbọsuru 14
14
1Ukem ñkpọ oro ama etibe ke Aikoniọm: Pọl ye Banabas ema eka ke ufọk ukpepñkpọ mme Ju enyuñ etiñ ikọ ke usuñ emi akanamde ata ediwak mme Ju ye mme mmọ emi midighe mme Ju ekabade edi mme andinim ke akpanikọ.
2Edi mme Ju emi mikenyimeke ndinim ke akpanikọ ema enam mme mmọ emi midighe mme Ju etọñọ ntime enyuñ ekabade esua mme nditọ ete. 3Pọl ye Banabas ema edu do ebighi, enyuñ eka iso nditiñ ikọ uko uko ebaña Ọbọñ, emi ọkọsọñọde etop mmọ emi akabañade mfọn Esie ke edinọ mmọ odudu ndinam mme utibe ñkpọ ye mme ñkpọ ñkpaidem. 4Otu owo ke obio emi ema ebahade eda, ubak owo eda enọ mbon Ju, mme mmọ eken eda enọ mme Ọbọsuru.
Ekọk Owo Mbuñọ
5Ndien mme mmọ emi midighe mme Ju ediana ye mme Ju ye mme mbuot mmọ enyuñ ebiere ndisin ntime ye mme Ọbọsuru ñnyuñ ntọñọ mmọ ke itiat. 6Ke ini mme Ọbọsuru ekenyenede ifiọk ebaña uduak mmọ emi, mmọ ema efeñe eka Listra ye Derbe, mme ikpọ obio ke Likaonia, ye ke mme obio emi ekanarede ekuk do. 7Do ke mmọ ekekwọrọ Eti Mbuk emi.
8Owo kiet ama odu ke Listra emi ekedide mbuñọ toto ke emana esie, ndien enye ikekemeke ndisaña isañ. 9Enye eketie do akpañ utọñ okop mme ikọ Pọl. Pọl ama okut ete ke enye enim ke akpanikọ ke ekeme ndikọk enye udọñọ esie, do ke Pọl okowuk enyin ese enye, 10ndien ọdọhọ ke ọkpọsọñ uyo ete, “Dahada ke enyọñ da ke ikpat fo!” Owo emi ama ọfrọ adaha ke enyọñ onyuñ, ọtọñọ ndisaña ñkanade.
11Kadaña emi otu owo emi ekekutde se Pọl akanamde, mmọ ema efiori ke usem Listra mmọ ete, “Mme Abasi esuhọde edi ebine ñnyin ke mbiet owo!” 12Mmọ ema ekot Banabas, Seus, ndien Pọl mmọ ekot Ermis, koro ekedi enye edi enye emi eketiñde ikọ. 13Oku ekpri abasi emi ekotde Seus, emi itie uwa esie akadade ke edem obio ama ada mme enañ ye ndiye ikọñ aka ke inua otop obio, koro enye ye mme otu owo ekeyomde ndiwa uwa nnọ mme Ọbọsuru.
14Ke ini Banabas ye Pọl ekekopde se mmọ ekeyomde ndinam, mmọ ema ewai ọfọñ idem mmọ enyuñ efeñe eduk ke otu owo oro ke efefiori ete, 15“Mme ufan, ntaha mbufo eyomde ndinam utọ ñkpọ eke etiede ntem-e? Ñnyin idi mme owo, ikpuikpu owo nte mbufo! Ñnyin idu mi ndikwọrọ Eti Mbuk, ndinam mbufo ediañade ekpọñ mme ikpuikpu ñkpọ emi, etiene oduuwem Abasi emi akanamde enyọñ ye isọñ ye inyañ, ye kpukpru se idọñọde ke esit. 16Ke eyo oko Enye ama ayak kpukpru owo eka ke usuñ mmọ. 17Edi Enye ke akayarade idem esie owut kpukpru ini ke mme nti ñkpọ emi Enye anamde: Enye ọnọ mbufo edim oto ke enyọñ ye mfri iñwañ ke ekem ini; Enye ọnọ mbufo udia, onyuñ ọyọhọ esit mbufo ye inemesit.”
18Kpa ye mme ikọ emi, ekedi ata ọkpọsọñ ñkpọ mme Ọbọsuru ndikeme ndibiọñọ otu owo ndinam uwa nnọ mmọ.
19Ubak mme Ju ema eto ke Antiọk ye ke Aikoniọm enyuñ edep esit otu owo emi enọ ñkañ mmọ; mmọ ema etọñọ Pọl ke itiat enyuñ eduri enye ekeduọk ke edem obio, ekere ete ke enye akpa. 20Edi ke ini emi mme andinim ke akpanikọ ekedade, ekanade enye ekuk esin, enye ama adaha ada onyuñ afiak oduk esit obio. Ke ndañ nsiere enye ye Banabas ema eka Derbe.
21Pọl ye Banabas ema ekwọrọ Eti Mbuk emi ke Derbe ndien ediwak owo ema etiene mmọ. Do ke mmọ ekefiak eka Listra, ndien ebe do eka Aikoniọm, ye Antiọk, ke Pisidia. 22Mmọ ema esọñọ mme andinim ke akpanikọ idem enyuñ ewuk mmọ esọñọ eda ke akpanikọ ke mbuọtidem. Mmọ ekekpep ete, “Ñnyin inyene ndisaña mbe ke ediwak afanikọñ mbemiso ñnyin ikoduk obio Ubọñ Abasi.” 23Ke ufọk Abasi kiet kiet mmọ ema emek mme ada usuñ enọ mmọ, ndien ke akam ye utreudia mmọ ema eyak mmọ oro esin Ọbọñ emi mmọ ebuọtde idem ye Enye ke ubọk.
24Ke mmọ ema ekekanade ofuri isọñ Pisidia, mmọ ema ekesim obio emi ekotde Pamfilia. 25Mmọ ema ekwọrọ ikọ Abasi ke Peka ndien mmọ ekesuhọde eka obio emi ekotde Atalia, 26ndien eto do esio efiak ekebehe ke Antiọk, ke ebiet emi ekeyakde mmọ esin Abasi ke ubọk kabaña mfọn Esie ke utom emi mmọ ema ekenam ema idahaemi.
27Ke ini mmọ ema ekesim Antiọk mmọ ema ekot kpukpru owo ke ufọk Abasi ebok ọtọ kiet ndien ema etiñ enọ mmọ ebaña kpukpru se Abasi akanamde ye mmọ, ye nte Enye ekeberede usuñ mbuọtidem ọnọ mme mmọ emi midighe mme Ju ke akpanikọ. 28Ndien mmọ ema edu do ebighi ye ikọt Abasi ke Antiọk.
Currently Selected:
Ọbọsuru 14: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
