San Mateo 6

Jesuska yachachin yanapanamanta

1Kuyrariychi ruranaykichiwa tarawahu alitashina runakuna rikunankunallapa. Chasna rurashpaykichika, Yayaykichi silupi kahukka manami kunkachu nima shuk kushikkunata.

2Kan imata kushpaykika, ama llankaychu trunpitata kanpa puntaykipi, imashnami chay llullachikkuna chay tantarina wasikunapi ñanpikunapipas ruranahun, runakunaka kushichinanpa paykunata. Shutipata rimaykichi chayllawami ña ganashkakuna kushikunankunata.

3Ashwan kan suk imata kuhushpaykika kuyrariy lluki makiki mana yachananpa maykantami ruran kuska makikika.

4Chasna chay ima kushkaykika kanka pakalla; Yayayki maykanmi rikun pakallapi kanta kushichinka achkapi.

Jesuska yachachin mañanamanta

(Lc 11.2-4)

5Mañahushpaykika, ama kaychu chay llullachiysikikunashina, paykunataka gustan mañana shayarishpa tantarina wasikunapi, kinray ñanpikunapipas, runakuna paykunata rikunanpa. Shutipata rimaykichi chayllami kanka kushikunankunata ganashkankunaka.

6Ashwan kan, mañahuspaykika, yaykuy kwartuykipi, punku taparishkawa mañay Yayaykita maykanmi kahu pakallapi, Yayayki maykanmi rikun pakallapi kanta kushichinka achkakunapi.

7Kankuna mañahushpaykichi, ama chay shimikunallata rimaychichu, mana kirikkunashina. Paykuna yuyarinahun achkata rimashpanchimi uyay tukunkakuna.

8Ama kaychichu paykunashina, Yayaykichika ñami yachan kankuna munahushkaykichita, nimara kankuna tapuhushpaykichira.

9Chayrayku, kankuna mañanaykichi tiyan kasna:

“Silupi cahuk Yayanchi,

atunyachirishka kachun kanpa shutiki.

10Shamuchun kanpa munashkayki.

Munashkaykita ruray kay allpapi imashnami kan silupipas ruranki.

11Karan puncha mikuna panta, kunan ñukanchita kuy.

12Llakichiy ñukanchita pishishkanchimanta,

imashnami ñukanchipas llakichinchi ñukanchita pishikkunata.

13Mana sakiychu ñukanchita mana alikunata rurananchipa,

ashwan anchuchi mana alikunamanta.”

[Kanpami kan ali kamachinaka, kay allpapi silupipas, ñawpamanta pacha kunankama. Chasna kachun.]

14Kankuna llakichishpaykichika shukkunata mana alita rurashkankunamanta, kankunatapas Yayaykichi awa silupi kawasakka llakichinkami.

15Kankuna mana llakichishpaykichika shukkunata mana alita rurashkankunamanta, kankunatapas manami Yayaykichika llakichinkachu.

Jesús yachachin sasinamanta

16Kankuna sasihushpaykichika, ama rikuriychichu llakirishka, chay llullachikkunashina; paykunaka uyankunata llakirishka churanahun rikuchinankunapa runakunata sasihushkankunata; shutipata rimaykichi chayllami kanka kushikunankunaka.

17Ashwan kan, sasihushpaykika, perfumiwa kakuy umaykita uyaykitapas mayllay,

18mana rikuchinaykichipa shukkunata sasihushkaykichita, ashwan Yayaykita maykanmi pakallapi kahukta, Yayayki maykanmi rikun pakallapi kanta kushichinka achka runakunapi.

Jesuska yachachin imanchi silupi tiyananpa

(Lc 12.33-34)

19Ama tantachiychichu imakunata kay allpapi, maypimi kumihinka mikun, imakunapas ismunahun, maypimi shuwakunaka yaykunahun shuwanahunpas.

20Ashwan, tantachiychi imakunata silupi, maypimi nima kumihin mikunchu, nima ima ismunchu, maypimi nima shuwakuna yaykunahunchu nima shuwanahunchu.

21Maypimi kahun imaykika, chaypimi kanka shunkuykipas.

Jesuska yachachin punchashina kananchipa

(Lc 11.34-36)

22Aychapa lanparinka kanmi ñawi; chayrayku, ñawiki ali kashpanka, tukuy aychayki kanka punchahlla.

23Ñawiki mana ali kashpanka, tukuy aychayki kanka amsapi. Chay puncha kanpi amsa kashpanka, ¡Yapa atun amsa kanka kanpi!

Jesuska yachachin mana ishkay amuta kasunanchipa

(Lc 16.13)

24Nima maykan atipanchu sirvinata ishkay amuta, shuktaka chikninka shuktaka yuyanka; mana kashpaka shuktaka alita rikunka shuktaka mana alitachu rikunka. Kankunaka mana atipankichichu sirvinata Diosta chaymanta imaykikunatapas.

Dioska wawankunata kuyran

(Lc 12.22-31)

25Chayrayku kankunata rimani: Ama muspariychichu kawsaykichirayku, nima imatashi mikunkichi imatashi upyankichi; nima imatashi churarisha. ¿Manachu ashwan valin kawsay mikunamanta, chaymanta aychapas churarinamanta?

26Rikuychi pishkukunata silumanta, mana tarpunahunchu, nima pallanahunchu, nima pallashkankunata tantana tiyanchu, Yayanchi silupi kawsakka paykunata kun mikunankunapa. ¿Manachu valinkichi ashwan kankuna paykunamanta?

27¿Pitaya kankunamanta, achkata yuyarishpanpas, atipama mirachinata shuk urastuta kawsayninta?

28¿Imaraykutaya musparinkichi churarinaykichirayku? Rikuychi imashnami wiñanahun sisakunaka chakrapi: Mana tarawanahunchu nima puchkanahunchu,

29nima chasna kikin Salomón, tukuy tiyapushkanwa, churarirkachu shuk paykunashina.

30Yaya Dioska chasna sumayachin kiwata, kunan kahun chakrapi kayantimaka rupan ninapi, ¿Mana ashwanta rurankachu kankunarayku, sanpa kirinayu runakuna?

31Chayrayku, ama muspariychichu nima kan kikinta tapuriychu: “¿Imatata mikushunchi, mana kashpaka imatata upyashunchi, manapika imatata churarishunchi?”

32Runakunaka purinahun maskashpa tukuy kaykunata, Yayaykichi awa silupi kawsakka yachan kankunaka munahushkaykichita tukuy kay imakunata.

33Ashwan, maskaychi Yaya Diospa ali kamachinanta tukuy alikunatapas, chasna tukuy kay imakuna kankunarayku miranka.

34Chasna kashpan, ama yuyariychichu kaya puncharayku, kayaka apamuhunmi pay kikin yuyarinankunata. ¡Yuyariychi ñami tiyanchi achka mana alikkuna karan puncha!

Currently Selected:

San Mateo 6: QUP_B

Highlight

Copy