Genesis 31

Yakobo anyilika kulawa kwa Labani

1Yakobo keva kugamba wana Labani wagamba, “Yakobo kaguha kila kint'hu cha tati yetu kanda mgoli kwa vint'hu va tati yetu.” 2Naho aonaga kugamba Labani handile na lukunde enga ivo andaga nk'hongo. 3Niyo Zumbe amgamba Yakobo, “Uya kaya kwa waiso na wanduguzo. Neninde hamwenga na weye.” 4Ivo Yakobo awatumilaga ulosi na kuwetanga, Laheli na Lea wambwiile kwo kudima ukwo idifyo dyakwe dyandaga. 5Niyo awagamba, “Hibunk'hula kugamba tati yenyu hakuniunga enga hadya nk'hongo mna Mnungu ywa tate kanda hamwenga na miye. 6Nyuwe nyose mmanya kugamba himdamanyila ndima kwa ludole lwangu lwose. 7Naho tati yenyu kanihujila nk'hanana mlongo mwo kuniliha mna Mnungu hamlekele anilumize. 8Kila aho tati yenyu agambile, mbuzi za maoleole nezinde nizo maliho yako, fyo dyose dyelekaga maoleole. Eze agambe zinde ne misilimbo nayo amaliho yako, zose niyo zeleka zina misilimbo. 9Ivo Mnungu kaisamiza mifugwa kwa tati yenyu niyo anink'ha miye.”

10“Mwo lupisi lwe mifugwa kusimika, nalotaga sozi kugamba mavulata yandaga yakaozela yandaga na Misilimbo na maoleole na mabalobalo. 11Mtumigwa ywa kwe mbingu alongaga mwe zisozi akanigamba, ‘Yakobo!’ Niyo netika, ‘woe.’ 12Niyo anigamba, ‘Kaula, mavulata yose yakuozela mwe difyo dyako yana misilimbo naho yana maoleole na mabalobalo kwaviya hiona yose Labani akukutendela. 13Ni miye Mnungu nakulailaga Beseli hadya wadiikaga diiwe dyo lukumbusa kwa kuditiila mavuta niyo waika kilapi na miye. Haluse waungwa kukeika lumwe uuye kwa isi kudya welekelagwa.’”

14Laheli na Lea wamhituilaga Yakobo kugamba, “Suwe elo hakina chochose kisigale enga ukipe wetu kulawa kwa tate. 15Akiona suwe enga watakwiza kakitaga, naho haluse adya ugoli udya enk'higwe kwajili yetu. 16Kila kiya Mnungu aguhile kwa tati yetu icho ni chetu hamwenga na wana wetu. Kwaivo damanya kiya Mnungu akusigiile.”

17Yakobo enukaga niyo awakweza wanawe hamwenga na wakaziwe mwe zingamia, 18aduganyaga mifugwa yakwe yose na vint'hu vakwe vose ivo apataga, ukwo Padanialam no kuita kwa Isaka kwe isi ya Kaanani. 19Labani agendaga kukant'ha zingoto zakwe amazoya, niyo Laheli anda kapata luneka lwa kubawa milungu midodo ya kwa ise umwo hawanati kuita. 20Iviyaiviya Yokobo ahalawaga kwa kumdant'hiliza Labani wa Asilia kwa kuhalawa haheina kulaga. 21Aguhaga kila kint'hu kiya chandaga chakwe niyo anyilika niyo awomboka mto wa Efulate na kuita kwe isi ye vigulu va Gileadi.

Labani amtimila Yakobo

22Yeze yomboke mazuwa matatu, Labani agambilagwa kugamba Yakobo kanyilika. 23Labani awaguhaga wanduguze niyo wamzungula kwa mazuwa mfungate niyo wakumbwiila mwe isi ye vingulu va Giliadi. 24Mnungu amwiziilaga Labani wa Asilia mwe zisozi akamgamba, “Ukaulise, usekumtenda dyodyose.” 25Labani ambwiilaga Yakobo kaika nk'hambi kwe isi ye vigulu va Giliadi niyo yehe na wanduguze waika nk'hambi kwe vigulu va Giliadi.

26Labani amuuzaga Yakobo, “Kudamanyai? Kunidant'hiliza niyo wawaguwa wanangu enga want'hu watahigwe kwe nk'hondo! 27Nii ukenuka kwa kinyele na kunidant'hiliza niyo hunigambile? Hegu nehikusindikiza kwa kinyemi na ukemi na kwa ngoma na mazeze. 28Nii hunink'hile luneka lwa kuwalaga wanangu na kuwanonela wezukulu wangu? Ikindedi mbuli udamanye hiyo yedi. 29Nehadaha kukutenda vihile mna Mnungu ywa watati zako nakanilaila kilo cha dielo niyo anikanya kugamba, nise kukulonga chochose kiihile. 30Hata uneva nokuhalawa kwaviya una nk'hwina za kwenyu kaya, mna nii ukabawa mahili ya milungu yangu?”

31Yakobo niyo ahitula Labani akagamba, “Hikugambile kwaviya nehyogoha kugamba waunga unihoke wanao. 32Mna unamuona yeyose ana mahili yako, akomigwe. Kilagise ha hameso ya want'hu wako, chako chochose ukiguhe.” Yakobo hamanyaga kugamba Laheli niye abawaga mahili.

33Labani agendaga kusank'hula kwe dihema dya Yakobo niyo aita kwe dihema dya Lea niyo naho aita kwe dihema dya wadya watumwa waidi mna haone mahili ya babakwe. Akajika naho aitaga kwe dihema dya Laheli. 34Laheli aguhaga mahili ayo niyo ayafisa hasi ye ditandiko dye ngamia niyo ekala mnanga. Labani asank'hulaga mwe dihema dyose mna hayaonaga mahili ayo. 35Laheli niyo amgamba ise, “Tate usekuniihiya kugamba hikudaha kukimaala ha meso hako kwa viya ni mwa mazuwa ye kivele.” Labani asank'hulaga mna haonaga mahili yakwe.

36Niho Yakobo aihiwagwa no kumbasa kwa maya Labani, “Masa yangu ni yahi?” “Hidamanya wavu wani, vikuleka ukaniziila kwa ivi? 37Ivo usank'hule sank'hule mwe vint'hu vangu vose, kuona kibwai ichako? Kiike aha hameso ya want'hu wako na wakwangu vileke walamule mwa suwe waidi. 38Hikala na weye miaka milongo miidi. Zimbuzi ne zingoto zako hazidunduke kweleka, naho hinati kudya ndolome na mavulata yako. 39Hikwigaile kint'hu kikomigwe ni makala, kuhungukilwa uko nokunda kwangu mwenye. Naho nehiungwa kuvuza chochose kibaigwe nomsi hegu nekilo. 40Nahasulumila kwa mengi. Msi zuwa nedisiila mwangu, nekilo mp'heho. Nt'hongo nehinda hina mwa meso yangu. 41Miyaka ino milongo miidi nehinda mwana ywa mwe nyumba yako, hikudamanyila ndima miyaka mlongo na mine kwa wanawo awa waidi we kivele, miyaka mtandatu nayo kwajili ya madimo yako. Hamwenga na ayo kwa nk'hanana mlongo kunihujila mwo kuniliha. 42Wandile Mnungu ywa watate, ywa Ibulahimu na Mnungu ywa Isaka handile na miye hegu nokunigulusa hiina kint'hu, mna Mnungu kayaona makunt'ho yangu ne ndima nidamanye. Mwe kilo cha gulo Mnungu kakukanya.”

Mwivano wa Yakobo na Labani

43Labani niyo ahitula, “Wandele awa wanangu, wana awa wakwangu naho mifugwa ino ya kwangu na vose ukuviona aha vakwangu. Elo neniwatendeleni mbwani mwa awa wanangu na wana wawe? 44Haluse kiike Ndagano miye na weye inde uwona mwa miye na weye.”

45Ivo Yakobo aikaga iwe niyo adikimalisa enga mnala. 46Yakobo niyo awagamba want'hu wakwe, “Duganyeni maiwe.” Wayaguhaga maiwe ayo niyo wayatenda nunda. Niyo wadiila nk'hande aaho he nunda ya maiwe. 47Labani ahetangaga aho hant'hu, Jegashaduta. Mna Yakobo ahetangaga Galeedi. 48Labani niyo amgamba yakobo, “Dielo nunda ino ni uwona mwa miye na weye.” Nivo vikuleta yetangwa Gilaedi. 49Labani agendeelaga kulonga, “Zumbe akikaule umwo kikapangana.” Iviya iviya “hant'hu aho hetangangwa Mizipa.” 50Niyo agendeela kulonga, “Una watendela wanangu vihile hegu una lomba mvele mtuhu, hata uneva hikumanya, manya kugamba Mnungu ni muwona mwa miye na weye. 51Kaula nunda ino ya maiwe no mkimailo uno niikile hagati ya weye na miye. 52Inunda ino no mkimailo uno ni uwona kugamba hikudaha kujink'ha inunda ino kwiza kwako na kukukump'hukila. Nawe hukudaha kujink'ha mkimailo uno kwiza kwangu kunikump'hukila. 53Mnungu nywa Ibulahimu na Mnungu ywa Naholi, naalamule mwa suwe.” Yakobo aikaga kilapi kwa zina dya Mnungu uyo akuvikwa na Isaka ise, kutoza kiya alagane. 54Yakobo atambikaga kwo mnima naho alalikaga want'hu kwo ludyo. Weze wabinde kudya wasigalaga uuko kwo mnima kilo chose. 55Mtotondo Labani enukaga niyo awanonela wezukuluwe na kuwalaga wanawe we kike. No kuwaavikila. Ahalawaga niyo auya kaya.

Currently Selected:

Genesis 31: NguuBV

Highlight

Copy

Compare