Genesis 29
29
Yakobo abula he nyumba ya Labani
1Yakobo agendeelaga ne nt'hambo niyo ahinga nt'hendelo ya Uailo wa zuwa. 2Uuko aonaga sima dya mazi umwo mwe nyika na mafyo matatu ya ngoto zichumile kuzunguluka disima. Zingoto nezikanyweswa he disima idyo dyagubikagwa ni iwe kulu kwo mnomo wakwe. 3Mwe kihendo chawe, mafyo yose yakanda yadugana yakanyweswa, wadimi nawakaditongolosa diiwe nokuzinywesa zingoto. Naho wakabinda nawakadivuza diiwe hant'hu hakwe.
4Yakobo awauzaga awadimi akagamba, “Wambuya zangu, mwalawa nahi?”
Wamhitulaga kugamba, “Chalawa Halani.”
5Niyo awauza, “Mummanya Labani mwezukulu ywa Naholi?”
Niyo wahitula, “Heiye, kimmanya.”
6Niyo awauza, “Mgima? Niyo wamhitula, Kaula, Laheli, mwanawe we kivele eza ne zingoto.”
7Yakobo niyo agamba, “Kwaviya zuwa dikei msi, naho hakei mpaka hokwigala zingoto kwe kaya, nii hamkuzinywesa niyo mwazivuza kwo kokudya?”
8Niyo wahitula, “Hakikudaha kudamanya ivo mpaka mafyo yose yande aaha niyo diiwe ditongoloswe, niho nekinywese zingoto.”
9Umwo Yakobo andile akalonga nawo, Laheli niyo engila ne difyo dye zingoto. 10Ivo Yakobo eze amuone Laheli mwana kike ywa Labani mtumbawe, lumbudye dya ise ne zingoto za Labani, aitaga kwe disima, no kuditongolosa diiwe niyo azinywesa zingoto. 11Amkumbatilaga niyo akonga kuila kwa kinyemi. 12Niho Yakobo akamgamba, “Miye ni nduguye dya iso, mwana Labeka.”
Labeka agulukaga kugenda kumgambila ise, 13Labani eze eve zimbuli za mwihwawe Yakobo, amgulukilaga kumsingila, amkumbatilaga no kumnonela no kuita naye kwe nyumba yakwe. Yakobo eze amgambile Labani kila kint'hu icho kilaile, 14Labani niyo agamba, “Kindedi, weye uywangu ne sakame yangu.” Yakobo ekalaga hadya kwa mwezi mgima.
Yakobo awalomba Laheli na Lea
15Zuwa dimwenga Labani niyo amgamba Yakobo, “Weye mhwangu mna haikuungwa unidamanyile ndima bule. Nigambile waunga maliho yakwinga vihi?” 16Labani andaga na wana kike waidi, umkulu etangagwa niye Lea, no umdodo etangagwa Laheli. 17Lea andaga na meso yahombweele, mna Laheli andaga mndele ywedi ivo aumbigwe vedi.
18Yakobo andaga kambwedesa Laheli, ivo amgambaga Labani, “Neni damanye ndima kwa miaka mfungate, uneva nounink'he nimlombe Laheli.”
19Labani niyo ahitula, “Nivedi kukuloza weye kujink'ha kuloza mnt'hu mtuhu yeyose. Weye kikalanye aaha.” 20Yakobo adamanyaga ndima miaka mfungate vileke amlombe Laheli, lupisi ulu lwaonekaga kunda luguhi kwa Yakobo, kwaviya amuungisaga Laheli.
21Akajika aho Yakobo amgambaga Labani, “Lupisi lubula, niloze mkazangu.” 22Ivo Labani afunganyaga wila we ndoza no kulalika kila yumwenga. 23Mna ikilo kiya, Yakobo hant'hu ha kwigailwa Laheli, niyo egailwa Lea, Yakobo niyo agona naye. 24Labani amwink'hizaga mndima ywakwe Zilipa kwa Lea, vileke ande mndima ywakwe. 25Kwize kuche, Yakobo nakabunk'hula kugamba yudya andaga ni Lea. Amwiitilaga Labani akanda kaihiwa na kumgamba, “Weye! Nii ukanitendela ivi? Hidamanya ndima vileke unink'he Laheli. Nii ukanidant'hiliza?”
26Labani niyo ahitula, “Hiyo kihendo chetu aha kumloza mdodo umwo mkulu akanda akei. 27Binda amazuwa mfungate ye ndoza kwa Lea, niho nenikwink'he uyo Laheli uneva noudamanye ndima kwa miaka mfungate mituhu.”
28Yakobo azumilaga, naho mazuwa mfungate ye ndoza yeze yasile, Labani niyo amwink'hiza Laheli kwa Yakobo kunda mkaziwe. 29(Labani amwikizaga mndima ywakwe ywe kike uyo Biliha kwa Laheli mwanawe.) 30Yakobo agonaga na Laheli iviya iviya naho nakamuungisa Laheli kujink'ha Lea. Ivo amdamanyilaga Labani ndima miaka mfungate mithu.
Cheleko cha Yakobo
31Umwo Mnungu aonaga kugamba Lea haakabwedeswa kujink'ha Laheli, amtendaga Lea ande na cheleko, mna Laheli amtendaga mgumba. 32Lea enulaga ubovu, elekaga mwana kilume uyo amwink'ha zina niye Lubeni. Niyo agamba, “Zumbe kayaona masulumizo yangu, haluse Mnumangu naanibwede.” 33Enulaga ubovu mtuhu no kweleka mwana kilume naho. Niyo agamba, “Zumbe kanink'ha mwana kilume mtuhu, kwaviya keva kugamba miye hikubwedigwa.” Ivo Lea amwink'haga uyo mwana zina niye Simioni. Kwa Kiibulania nuko kugamba, “Kanitegeleza.” 34Naho niyo enula ubovu mtuhu no kweleka mwana kilume mtuhu. Niyo agamba, “Haluse mgosi nenimtoze kwaviya himwelekela wana kilume watatu.” Ivo niyo amwitanga zina dyakwe Lawi. Nuko kugamba “Tozeleza.”
35Lea enulaga ubovu mtuhu. Amwelekaga mwana kilume, niho agambaga, “Haluse neni mtunye Zumbe.” Ivo niyo amwitanga zina dyakwe Yuda. Nuko kugamba “Tunya.” Niyo cheleko chakwe chaheleza.
Currently Selected:
Genesis 29: NguuBV
Highlight
Copy
Compare
Share
Want to have your highlights saved across all your devices? Sign up or sign in
The Old Testament in Nguu @The Word for The World International and the Nguu Language translation, 2025. All rights reserved.
