MALAKO 15

Yesu ta boso bo Pilato

(Endja pongono ta Mat 27, 1-2; Luk 23, 1-5; Yoa 18, 28-38)

1Ehuma mɛnɛ, bakumu ba banganga ba Ndjakomba babolamaka ta ibolea inɛnɛ i basuku ba bayuda, na balehi ba mobeko ko na esambi esusu e Bayuda. Ngɔngɔ ibonanga Yesu mbɔti, bakɛɛ na nde amokina ta mɔmɔ ma Pilato. 2Pilato amohɔdjɔkɔ: «Wɛ odi mokondji o Bayuda?» Yesu amosɔmbedjaka: «Edi wɛ moto obali#15, 2 Wɛ moto obali Endja pongono ta Mat 27, 11 ko ta molɔngɔ..» 3Bakumu ba banganga ba Ndjakomba bapundaka Yesu na midjɔ minɛnɛ. 4Na bea, Pilato ahɔdjɔkɔ Yesu naikina: «Otasɔmbedjaka nongo kɔpi? Otokaka midjɔ minɛnɛ mopundaka bo!» 5Endolo Yesu aisɔmbedjaka nongo kɔpi, ekamodjaka Pilato.

Yesu alomami ta bogwa

(Endja pongono ta Mat 27, 15-26; Luk 23, 13-25; Yoa 18, 39; 19, 16)

6Engi tɛkɛ e pasika, Pilato adaka aimedja mobɔlɔkɔ omɔti, yona ohɔdjɔkɔ bato. 7Enakobea, momi omɔti kombe e nde Balabase adaka ta bɔlɔkɔ engbanga na bato ibalemoaka, ta bolemo bo bobo moto omɔti agwaka. 8Emumu e bato baduaka ta ndako e Pilato ko bamohɔdjɔkɔ akɔe tina e bobo elenge elama yo bokɔ. 9Pilato abasɔmbedjaka: «Opalini notingoeni Mokondji o Bayuda?» 10Endolo adjebaka bopele mɛnɛ boo, bakumu ba banganga ba Ndjakomba batɛkɛkɛ Yesu na swɛ. 11Endolo bakumu ba banganga ba Ndjakomba basumedjaka emumu e bato, boo bahɔdje adi Pilato abatingoe Balabase. 12Pilato abahɔdjɔkɔ naikina: «Apalaka no nakɔe na yona okabe no Mokondji o Bayuda nde?» 13Bamosɔmbedjaka na bogama: «Mobaka ta ekulusu!» 14Pilato abahɔdjɔkɔ: «Bobe bokɔi yo nda?» Endolo bo basusu bagamaka naikina na ngulu: «Mobaka ta ekulusu!» 15Pilato adimaka bosepedja bato ko abatingoaka Balabase; ngɔngɔ alomaka boo bakɛsɛkɛke Yesu mbalake ko amopaka ta mɔmɔ ma bobo, bɛngi bamobake ta ekulusu.

Basoda basɛki Yesu

(Endja pongono ta Mat 27, 27-31; Yoa 19, 2-3)

16Basoda bakɛkɛ na Yesu ta ikanga i ndako e gupɛnɛlɛ ta polo ekasambedje bo midjɔ ko abeaka ebole e basoda. 17Bamolwoadjaka esendja ekpetu#15, 17 Esendja ekpetu Edako oko tine bakumu ko na bato ba gala. ko bayoaka egbala e ndjubɛ bamobakeaka ta molo. 18Ngɔngɔ badaka bamoisea: «Mokondji o Bayuda, bwanda!» 19Bamokɛsɛkɛkɛ na mososongo, bamotwiyaka masɔi ko bakwaka magbundɔ ta boso bo nde na bomota elenge adi kumu. 20Ngɔngɔ ibomosɛkɛ, bamoiwaka esendja ekpetu ko bamolwoadjaka bisendja bi nde. Ngɔngɔ baimaka na nde sokolu bɛngi bamobake ta ekulusu.

Yesu abakami ta ekulusu

(Endja pongono ta Mat 27, 32-44; Luk 23, 26-43; Yoa 19, 17-27)

21Momi omɔti kombe nde Simo o ibonga i Kulɛnɛ, sange e Alekidjandele na Lupusu#15, 21 Endja pongono ta Bal 16, 13., anɔkɔ ena adaka ahule ta gbie. Basoda bamopeaka na ngulu bɛngi atombe ekulusu e Yesu. 22Bakɛkɛ na Yesu ta polo ekabe bo Gologota, etingodjaka: «Polo e egɔgɔlɔ e molo». 23Bamopaka mana ma vino mabongoanedjabo na kasa i boyo, endolo Yesu aimwaka. 24Ngɔngɔ bamobakaka ta ekulusu ko bakabanaka bisendja bi nde, na boboma djonga, bɛngi badjebe eka adiake moto#15, 24 Endja pongono ta Ndj 2, 19.. 25Edaka ehole e ibwa ehuma, emobakaka bo ta ekulusu. 26Ikomi inedjaka tina ebogwa bo nde, edaka na makomi mi: «Mokondji o Bayuda». 27Bamobakaka engbanga na batɔmbi babae ta ekulusu: omɔti ta ebɔ e bami okina ta ebɔ e bali. 28[Edi ekokedjeli e ikomi ibalaka: «Alangamaka ta molɔngɔ mo boawoi ba bato#15, 28 Molɔngɔ mu moditi ta makomi makina mayou..»] 29Bato ibanɔkɔ ena badaka bomosinga ko bogbɔkea melo; ko babalaka na nde: «E! Wɛ moto okabuke tepelo ko botokangaka ngɔngɔ i masu masato#15, 29 Endja pongono ta 14, 58; Ndj 22, 8; Yoa 2, 19., 30saheledja ko tita ta ekulusu!» 31Bakumu ba banganga ba Ndjakomba ko na balehi ba mobeko basɛkɛkɛ Yesu babalaka: «Aheledja bakina ko aboaniti bosaheledja yo mɛnɛ! 32Kina boo Kilito, Mokondji o Isalɛlɛ, atite edɛdi ta ekulusu! Lokenɛdea bea, yana lamodimeake!» Bato ibabakakabo na Yesu ta ekulusu bo pongono badaka bamosinga.

Bogwa bo Yesu

(Endja pongono ta Mat 27, 45-56; Luk 23, 44-49; Yoa 19, 28-30)

33Ta ehole e midi, modidi mokɔmɔkɔ ta ngondo esusu ko moyeyoaka mbunoko bihole bisato ngɔngɔ i midi. 34Ta ehole e basato, Yesu agamaka na ngulu: «Eloyi, Eloyi, lamasabakatani?» –

Etingodji: «Ndjakomba o mbi, Ndjakomba o mbi, okinini tina nda?#15, 34 Ndj 22, 2. Elangamaka ta kɔpi e Alameyɛ.» 35Bato ibadaka ena bamokaka ko bagamaka: «Okani, abei Elia!» 36Omɔti o bobo apotaka ko abokeaka imbusu ta vino e ngayi ko anangaka na ekenge e mososongo. Aepaka Yesu bɛngi amwake#15, 36 Endja pongono ta Ndj 69, 22. ko abalaka: «Ambani, loendje kaoko Elia aduake amotitedja ta ekulusu!» 37Endolo Yesu agamaka na ngulu ko atsweaka molema.

38Esendja yena edaka esɛpi ta tepelo#15, 38 Endja pongono ta Boi 26, 31-33. ealeaka bipasa bibae donga o diko mbunoko nase. 39Kapitɛni o basoda ba Loma, yona oemaka boso bo Yesu, aenɛkɛ moda motsweaka Yesu molema#15, 39 Agwa mondumba nda Makomi makina mabakea Na bogama Bea.. Abalaka: «Moto iyo adaki soti mɛnɛ Mwana o Ndjakomba!» 40Bali badaka ena, badaka baendja bohali. Ta ndanda e bobo, edaka Malia Magadala, Malia nange Djake, mwange Djodje, ko na Salome. 41Badaka basalea Yesu misala ta ehole edaka yo ta ibonga i Galilea. Edaka oho pongono bali banɛnɛ ibakɛkɛ na nde ta Yelusalɛmɛ.

Yesu apuseami

(Endja pongono ta Mat 27, 57-61; Luk 23, 50-56; Yoa 19, 38-42)

42Mɔmɔkɔ moimeaka, elenge edaka busa bo bosabɔngedja, etingodjaka busa bo boso bo sabata eime; 43Esepu o Alimatayo#15, 43 Alimatayo Endja pongono ta Mat 27, 57 ko molɔngɔ., adaka moto o gala enɛnɛ ta ikita inɛnɛ i Bayuda aduaka, yo pongono ambaka bokumu bo Ndjakomba. Adiaka kaso e bokɛ adi Pilato tine bohɔdjɔ mokuku mo Yesu. 44Endolo Pilato akamoaka boka boo Yesu agwi ehele. Abeaka Kapitɛni o basoda ko amohɔdjɔkɔ ekada soti Yesu agwi ehele. 45Ngɔngɔ iboka misɔmbedja mi Kapitɛni o basoda, Pilato apaka Esepu enɔli e botomba mokuku mo Yesu. 46Esepu asombaka mbendja, atitedjaka mokuku mo Yesu ta ekulusu, amohuaka na mbendja ko bamoisaka ta ikila itɔkɔ bo ta ibanga. Ngɔngimina ahilingondjaka ibanga igbɔgbɔ tine bodipa ipose i ikila. 47Malia Magadala ko Malia nange Djodje baenɛkɛ polo esambeaka bo mokuku mo Yesu.

Currently Selected:

MALAKO 15: ngc

Highlight

Copy