LUKA 10

Yesu alomi batingami tuku saambo na babae

(Hokea koko Mat 10, 7-16)

1Ngɔngɔ djia, Kumu ahɔɔ batingami bakina tuku saambo na babae ko abaloma babae na babae boso ba nde ta mabonga masusu ko na bisika bisusu baboanaka boo yo mɛɛnɛ akɛɛ 2Abala na bu boo: «Mosala ma obuka mbuma modii monɛnɛ, endolo basali badii bakɛkɛ. Na bea ongɔɔnɔni moswa gue alome basali ta obuka mbuma dja nde. 3Kɛɛni! Naolomini elengɛ bana ba bhata ta ndanda ɛ swa. 4Pɛpɛ otombani na falanga, na tɔmbi, na ipapa, ko pɛpɛ oemani na ndjia tina ɛ oisea noko moto omɔti. 5Ta ndako esusu eingialea no, balani boso boo: “Yɛɛ Ndjambe apɛ ogoo ta ndako ena.” 6Ekada boo moto ɔ bogoo adii ena, bogoo ba boono bodalea odii yo; emiti daa bea, bogoo ba boono bosɔmbɔlea odii no. 7Yeyoani ta ndako ena, yakani ko mwani lua lopaleani bo ena, tina ɛ boo mosali abɔngi na iputi la nde. Pɛpɛ okinani ndako ena boo oingeeni ta ekina. 8Ta ibonga isusu ilingialea no ko bakaosɔleani, yakani losusu loopaleani bo; 9heledjani bato ba bipeko ibatanealea no ena ko balani na bu boo: “okumu ba Ndjambe bodii mbuti na nu.” 10Endolo ibonga isusu ilingealea no ko bamiti osɔɔni ena, kɛɛni ta matilinga ma ndjia ko balani boo: 11“Noko mobumbu ma ibonga la boono imokatimeaki ta bigbota ba booso lomopupoli tina ɛ okiniani mo. Endolo djebani boo okumu ba Ndjambe bodii mbuti na nu.” 12Nabali na nu sooti boo: ta busa ba esambi ɛ Ndjambe bato ba ibonga dia badabi na etumbu epipo onɔdja bato ba Sodɔmɔ.»

Mabonga imalona odima

(Hokea koko Mat 11, 21-23)

13«Ndjokwa ɛ wɛ, Kolazine! Ndjokwa ɛ wɛ, Betesaida! Tina ekadaa boo bimbete baokamoa ibakɔmɔkɔ odii no bakɔmɔ ta Tula na Sidona, bato ba ngando djii bakɔkɔ sɔmbɔtɔnɔ mida ma bobo donga ehele, eke bainɛdja na olwa ngɔtɔ ko osahua na mihulu. 14Ta tina hee, ta busa ba esambi ɛ Ndjambe etumbu ɛ boono edabi epipo onɔ Tula na Sidona. 15Ko wɛ, Kapalanauma, ɔlɛdjaka boo Ndjambe oihwedjabi mbunoko ta busa? Pɛpɛ, odumbamabi mbunoko ta esika ɛ bago.» 16Abala koko na batingami ba nde boo: «Moto ona ɔɔkakani aokini; ona odumbini adumbini; ko ona odumbini, adumbi ona ɔlomani.»

Ihule la batingami tuku saambo na babae

17Ehole ehula batingami tuku saambo na babae badaka na sepi enɛnɛ ko babala boo: «Kumu, noko miembo mibe milosumi na kombe ɛ wɛ!» 18Yesu abasɔmbɛdja boo: «Naenɛki Satana okwa donga busa elengɛ mokaikai. 19Okani! Naopani kpati ɛ odala diko la ndjɔ na koto ko obedja na osusu ngulu ɛ moloni, ko pɛpɛ eka ehɔni okɔɔni obe. 20Na bea, pɛpɛ osepani tina ɛ boo miembo mibe miosumini; sepani tina ɛ boo Ndjambe akoma kombe dja boono ta busa.»

Sepi ɛ Yesu

(Hokea koko Mat 11, 25-27; 13, 16-17)

21Oko ta ehole ena, Yesu aluma na sepi na ndjia ɛ Mwembo Mosɛnɔke. Abala boo: «Tata, Kumu ɔ busa na kpɔtɔ, naokumedjai tina ɛ oenɛmɛdja wɛ odii bana bakɛkɛ midjɔ imabombea wɛ bato ba owɛi na ba esipoli. Edii bea, Tata, ɔpala bea. 22Tata apani midjɔ misusu. Moto omɔti atadjeba kaoko Mwana adii ndani dongedja oko Tata, ko moto omɔti atadjeba kaoko Tata adii ndani dongedja oko Mwana, ko odii ona opali Mwana boo amoinɛdjae Tata ɔ nde.»

23Bea Yesu ahombana odii batingami ba nde ko abala oko na bu mɛɛnɛ boo: «Odini bato ba sepi oenɛ midjɔ midii no oenɛ! 24Sooti, nabali na nu boo, batɛli bike na bakumu badaka na posa oenɛ midjɔ mii maenɛkɛ no, endolo baimienɛ, baoke midjɔ mii maokaka no, endolo baimioka.»

Indjɛ la Mosamalia mopele

(Hokea koko Mat 22, 34-40; Mal 12, 28-34)

25Bea, moto ɔ edjebeli ɛ mibeko aema ko abala na Yesu tina ɛ omomeka: «Molehi, eboani mbai okɔ ye tina ɛ odiha mohelo ma kɔbili?» 26Yesu amosɔmbɛdja boo: «Ɛkomama ta Mobeko ma boso ye? Ekalange wɛ ena nde?» 27Amosɔmbɛdja boo: «“Opalalea Kumu Ndjambe ɔ wɛ, na molema ma wɛ mosusu, na omoto ba wɛ bosusu, na ngulu ɛ wɛ esusu ko na malɛi ma wɛ masusu.” Koko boo: “Pala mina wɛ elengɛɛ okasapale wɛ mɛɛnɛ.”» 28Bea Yesu abala na nde boo: «Osɔmbɛdjai opele. Kɔɔ oko bea ko ohelalea.» 29Endolo moto ona ɔ edjebeli ɛ mibeko apalaka asalongedjae. Bea ahɔdja Yesu boo: «Ko odii mina mbai nda?» 30Yesu amosɔmbɛjda boo: «Moto omɔti adonga ta Yelusalema ko akɛkɛ ta Yeliko, asaka na bapundji, baona na nde, bamokatoa leka losusu ladaka na nde, bamoboma, bakɛɛ ko bamokina mbuti na ogwa. 31Nganga ɔ Ndjambe omɔti anɔkɔ ta ndjia ena, amoeni ko amobambea ta dɔngɔ ikina la ndjia ko asasua ohali na nde. 32Moda momɔti, molewi aiemea ta esika ena, aeni moto ona ɔbena pola, amobambea, apenda dɔngɔ ikina la ndjia ko asasua na nde. 33Endolo Mosamalia ona ɔdaka na mwɛngo oko ta ndjia ena aimea mbuti na moto ona ɔbenedja bo. Ɔmoenɛ yo, amookea ndjokwa enɛnɛ. 34Abatama mbuti na nde mɛɛnɛ, asopa munɛ na vino diko la pola dja nde ko adjidinga na bisendja. Ngɔngɔ djia amobakea ta diko la punda ɔ nde mɛɛnɛ ko akɛɛ na nde ta ndako ɛ bakɛndɛli ko amosaboa opele. 35Ngɔngɔ dja iswi imɔti, aihwi falanga djike, adjipi odii mobanei ɔ ndako ɛ bakendeli ko abala na nde boo: “Mokɔmɛdja opele; ta ihule la mbai, naosɔmbɛdjalea makondja imabakelea wɛ diko la mii masaopa mbai.”»

36Yesu abakea boo: «Ta ndanda ɛ ibo basato, oboanaki oda mina nde nda?» 37Moto ɔ edjebeli ɛ mibeko asɔmbejda boo: «Edii ona ɔmokea ndjokwa.» Ko Yesu abala na nde boo: «Wɛ kɛɛ akɔɔ bea.»

Yesu aosɔmɔ odii Malata nɔbɔ Malia

38Ehole ɛdaka Yesu na batingami ba nde badale ta ndjia, aingea ta ngando emɔti, ko mwali omɔti, kombe ɛ nde Malata, amosɔ ta ndako ɛ nde. 39Malata adaka na ngɛnɛ ɔ nde mwali, kombe ɛ nde Malia, adaa ta mako ma Kumu ko ahokamedjaka ebaeli ɛ nde. 40Malata, asatungea obuke na mosala ma okalea mia. Adoa odii Yesu ko abala na nde boo: «Kumu, oditi oenɛ obe boo ngɛnɛ ɔ mbai mwali akineini mosala mosusu? Bala na nde boo adoe akɔmɛdjani.» 41Kumu amosɔmbɛdja boo: «Malata, Malata, odii osatungea diko la midjɔ mia misusu, 42endolo modjɔ momɔti monɔi na kito. Malia ahɔi ibondo ipele, likatoametebi odii yo.»

Currently Selected:

LUKA 10: ngc

Highlight

Copy