Roma 9

Mboʼmvé kɛ tsɔʼ pɛ Issayɛ

1No yɛ́ mə ndzɔŋɔ ntsɔ nɛ́, mə tsɔ̌ mbwɔ pó. Ŋkyé ŋgâ psi Kristo tə̌b, ŋkhú taʼ ye. Zhʉye Yáŋmé po ŋgyɛ́ ŋgâ ndzɔʼɔ ya tsɔ ne mo ŋgâ, no yɛ́ mə tsɔ nɛ́ a no sísíŋ. No yéré pe noŋ: 2Mə tsé mbʉ́ʉ́ ŋgyé kaʼatɛ ndzɔʼ ya tsé ndzuʼ ya, tɛ́ fwóne pe pé pó. 3Ɔ́ŋɔ́! mbɛ a pɛ́ɛ́ ŋgâ pe niŋi ndɔ́ŋ tó mo, mbó tubɔ yá mbəb Kristo, ŋgâ pɔ́ŋmɛ́ páá pɛ́, psi pɔ́b tséʼé taʼ tsə nɛ́, pé sʉ́ʼʉ, cyó fiʼ pe pé pó. 4Pɔ́b pɛ́ pɔ́b pɔ́ŋ Issayɛ nɛ́, pɔ́b pɛ́ Mboʼmvé kɛ kpɛ́ɛ́ wɔ́b ne pɔ́ŋ pé, nyoʼ ghɛ́ɛ́ yé ne pɔ́b, pwɛ pɔ́b gbɛ́d pɛ́ kaŋ, a po fɛ́ kaŋ Mǔsê né pɔ́b, ntsɔ́ ne pɔ́b mbziʼe yɛ́ pɔ́b kɛ ghɛ́ faʼa pwó yé nɛ́, pɔ́b pɛ́ a kɛ kaʼ pɛ́ meno ne pɔ́b nɛ́. 5A pɔ́b mbé pɔ́ŋ tɛd kəkwéʼe, pɔ́b pɛ́ Kristo kɛ twɔ́ ndzó ndǎndáb yɔ́b, njʉ́ ŋumesɔŋ nɛ́. Kristo wéré wɛ́ a tsɛ́ɛ́ ŋkɔŋɔ yɔ́b náá nɛ́, á yé mbé Mboʼmvé wɛ́ pe fɛ́ ŋgúʼune pwó yé ne ŋgǒʼ ne ŋgôʼ nɛ́. Á pé néré!

6A pe nɛ́ pe ŋgâ nsó Mboʼmvé kɛ shaŋa shaŋa pó. Ŋkye ŋgâ á sísíŋ, ŋkɔŋɔ pɔŋ pɛ́ pɔ́b ne ndǎndáb Issayɛ náá nɛ́, pɔ́b ndâ pɔ́ŋ Issayɛ pó. 7Mbó ŋkhú ne ndǎndáb Ábraham, a ŋkɔŋɔ wɔ́b náá mbé ndâ pɔ́ŋ pé pó, ŋgáŋ! A ŋweʼéme ŋgâ: «A ŋkʉyó mbɛ pɔ́ŋ Izaʼ mbɛ ndǎndáb Ábraham.» 8Yéré nyoʼo nɛ́ ŋgâ, a pɔ́ŋ pɛ́ pe pfɛ́ wɔ́b, njʉ́ pe ndɛ mvɛ́ pɛ mɔ́ŋ nɛ́, mbé pɔ́ŋ Mboʼmvé pó. A ndaʼ pɛ́ Mboʼmvé kɛ kaʼ nɛ́ mbé pɔ́ŋ pé péré. 9Ŋkyé ŋgâ, nsó wɔŋ kɛ pe taʼ kaʼ: «Mə́ náʼá ŋgɛ́ ŋkʉ́yó ndúŋú ŋgábmvé yɔŋ ne yiŋ ŋgǒʼmvé, Sara tséʼé taʼ Mɔ́ŋ ŋumbzí.» 10A ke mbé zəə kɛ́ʼɛ́ pó, mbɛ Lepeka ke mbɛ yé yoʼo. A kɛ ké tséʼé mɔ́ŋ pé ndaʼ pú Izaʼ, tɛd tɛd wíŋi. 11Ntsʉʼŋgɛmbɛ́ néré, a pe kɛ pfɛ́ pɔ́ŋ pé pó, pɔ́b pe kɛ zhyɛ no sʉ́ʼʉ kii ŋgâ ye kəpɔŋ pó, ne ŋgyɛne ŋgâ no yɛ́ Mboʼmvé kɛ tíí nɛ́, yúŋú. A kɛ ghɛ́ ntii néré, a pe tsiŋɛ ŋɔŋ tsiŋɛ wé nɛ́ pó. 12Yéré no pe pé ŋkyé tswee faʼ ŋɔŋ pó, ntsʉʼ mbé yéré tiŋɛ́ pé yé, wɛ́ a fú pɔŋ nɛ́. A kɛ zhyɛ́ yéré a tsɔ́ pwó Lepeka ŋgâ: «Tsʉʼnzəb naʼ sáʼá mkpɛ́ɛ́ ssó.» 13Mbziʼe njʉ́ a ŋweʼéme nɛ́ ŋgâ: «Mo Mboʼmvé, mə kɛ kʉye Yakɔb ntsɛɛ Ezaya.»

14Yéré zɔŋɔ ntsɔ̂ ŋgâ kɔ́? Mboʼmvé ndɛ ŋgyɛ no yɛ́ a nsé nɛ́ pɔɔ? Ngáŋ! Tɛɛmbɛ a pé pe néré po! 15A pó nɛ́ ntsɔ pwó Mǔsê ŋgâ: «Mə ŋkʉyó ntsɛʼɛ tsaaghəghəŋ, mbəb ŋɔŋ wɛ́ mə kʉ́yé ŋgâ mə ntsɛʼɛ nɛ́, mbɔ́rɔ́ tsɛʼɛ pǔpfob mbəb ŋɔŋ wɛ́ mə kʉ́yé ŋgâ mə ntsɛʼɛ nɛ́.» 16Yéré tse nɛ́ mbé náá ŋkʉyene ŋumesɔŋ pó, ki ŋgâ tʉ̌ŋ mɛ́ a sáʼá nɛ́ pó. Ntsʉ́ʼmbé yéré twɔ̌ ndaʼ pwó tsaaghəghəŋ yɛ́ Mboʼmvé tséʼé nɛ́. 17Yɔŋ pe nɛ́ njʉ́ ŋweʼe kɛ tsɔ pwó Farahɔŋ, fɔŋ Egibto nɛ́: «Mo Mboʼmvé, Mə kɛ tíí wo njʉ́ fɔŋ nɛ́, pe ne nyoʼne tʉ̌ŋ máá mbəb wo. Yânéré kɛ́ʼɛ́ ŋgâ pe cʉrí tíí ya, ndzó ŋkɔŋɔ mbaʼ mvé náá.» 18Néré kɛ́ʼɛ́, a tséʼé tsaaghəghəŋ mbəb ŋɔŋ wɛ́ a kʉye nɛ́, mbó fɛ́ tʉŋɔ́ndzɔʼ pwó ŋɔŋ wɛ́ a kʉye ŋgâ ndzɔʼ ye tʉŋɔ nɛ́.

Mboʼmvé tsɔʼɔ ŋɔŋ pe njʉ́ a kʉyě nɛ́

19Tsʉ́ʼ mbé, wo mbɔ́rɔ́ tsɔ́ ŋgâ, Mboʼmvé pó ndzuʼɔ ŋgyé mbəb pumésɔŋ ŋkʉ́rʉ́ ŋkyě kɔ́? Ŋkye ŋgâ tɛɛmbɛ́ a tʉ́ŋ wɔ ntʉ́ŋ ntswee ne no yɛ́ á zɔŋɔ ŋgyɛ nɛ́? 20Ŋumesɔŋ, wo wɔ́, kaʼatɛ mǐ tó siŋ Mboʼmvé? Tɛɛmbɛ káŋ psirɛ́ ŋɔŋ wɛ́ a tɛŋɛ wé nɛ́ ŋgâ: «Wo tɛŋɛ ya kaʼa ŋkyé kɔ́?» 21A zé mbwɔ́tsáʼ njʉ́, a yɔ́ɔ taʼ zhǐ tsetsáʼ, mbwɔ káŋ tʉŋɔndɔŋ nuŋ, pú yɛ́ a tséʼé ghebe zááme nɛ́ pó. 22Mboʼmvé kɛ zɔŋɔ nyoʼo pʉ̌ŋgye yé, mbɔ́rɔ́ ŋgyɛ pe zé tʉ̌ŋ mé, á tséʼé gbǎndzɔʼ zááme ŋkyé pɛ káŋ pɛ́ ŋgyé mé kɛ́ tse ndzuʼɔ wé ŋkyé wɔ́b, ŋgɛ́mbɛ́ pɔ́b tsɛɛ mɛndɔ́b pwó nɛ́. 23Néré kɛ́ʼɛ́ ne ŋgyɛne pe zé ghɛ́ɛ́ yé wɛ́, a wé kəkwéʼe, ŋkyé pɛ káŋ pɛ́ a tséʼé tsaaghəghəŋ kyé wɔ́b nɛ́, pɔ́b pɛ́ a kɛ pě tsuŋɔ wɔ́b ne mbéne ndzɔʼɔ ghɛ́ɛ́ yé nɛ́. 24Káŋ péré, á piŋi pɛ́ nɛ́ a kɛ fú wíŋi nɛ́. Ntsʉʼ ke mbé pɛ́ɛ́ ndaʼ ndzɔʼ pɛ Yúda pó, mbɛ ndzɔʼɔ pɔŋ pɛ́ pɔ́b pɛ́ Yúda nɛ́ pó. 25A kpaʼ no yɛ́ Mboʼmvé tsɔ ndzó ŋweʼe Óze, ŋgaŋatsɔ́kpaŋató Mboʼmvé nɛ́, ŋgâ: «Pɔŋ pɛ pɔ́b kɛ pe pú páá nɛ́ pó, mə ŋkʉyó fú wɔ́b ne pú paa. Wɛ́ mə kɛ pe tsɔ́ pwó yé ŋgâ, mə ŋkʉye wé kaʼatɛ nɛ́ pó, mə kʉyo ntsɔ́ pwó yé ŋgâ: “Mə kʉye wo”. 26Mbɛ ywoʼ yɛ́ pe kɛ tsɔ ne pɔ́b ŋgâ: “puŋ pú páá nɛ́ pó”, pe ké ŋkʉyó fú wɔ́b pe ne pɔ́ŋ Mboʼmvé, yé wɛ́ a mɔ́b nɛ́.» 27Ezaya ŋgaŋatsɔ́kpaŋató Mboʼmvé kɛ ke ntsɔ́ yé, ŋkyé pɔ́ŋ Issayɛ ŋgâ: «Mbɛ́ pɔ́ŋ Issayɛ kʉ́yó ndzáá záá njʉ́ səsé yɛ́ a ne gháánse nɛ́, mbǒ a ŋkʉ́yó ke ntsɛ́ʼɛ́ ndaʼ ndíndii pɔŋ tsetsɛrɛ pɔ́b, ntsɛʼɛ ndzǔne. 28Ŋkyé ŋgâ no yɛ́ Ntsɛɛpɔŋ kɛ nsó nɛ́, a ŋkʉ́yó ke ndúŋɔ ŋkɔŋɔ yé náá, pe kpaʼ zǎŋazâŋa ndúŋú tsetsáʼ.» 29A ke mbó mbé no yɛ́ Ezaya wéré kɛ pě nsó nɛ́, ŋgâ: «A kɛ ghɛmbɛ Ntsɛɛpɔŋ, yé wɛ́ a ntsɛ́ssó ghaŋámaʼántsɔ̂ nɛ́, pe tee taʼ ndǎ ŋumesɔŋ ne piŋi pó, mbǒ piŋi kɛ syɛ cʉ́ʼɔ́ njʉ́ mbɛ́lʉ́ŋ Sodɔmə nɛ́, mbó syɛ fwɛ́ɛ́ yiŋi pe mbɛ́lʉ́ŋ Gomɔɔ.»

30Tɛ piŋi tsɔ́ɔ́ ŋgâ kɔ́ nɛ́? Pɔŋ pɛ pɔ́b pɛ́ Yúda nɛ́ pó, pɔ́b pɛ́ pɔ́b kɛ pe tse ntaʼa ne mbéne puŋgerɛ́ŋged síŋ Mboʼmvé nɛ́ pó, psyɛ́ndzɔʼ kɛ zhyɛ́, a zhʉ́ wɔ́b njʉ́ puŋgerɛ́ŋged nɛ́. 31Ŋgɛ́mbɛ́ pɔ́ŋ Issayɛ pɛ́ pɔ́b kɛ pó ntaʼa ŋgâ a zhyɛ́ kaŋ, pɔ́b pe ŋgerɛ́ŋged siŋ Mboʼmvé nɛ́, pɔ́b kɛ pó mbé nyí mbáŋa ndzó ywoʼ yɛ́ kaŋ kɛ zɔŋɔ nɛ́, pó. 32Néré kɛ́ʼɛ́ ŋkyé kɔ́? Ŋkyé ŋgâ pɔ́b kɛ pe taʼa ne mbéne ŋgerɛ́ŋged siŋ Mboʼmvé, pe ne psyɛ́ndzɔʼ pó. Ntsʉ́ʼmbé pɔ́b kɛ kpaŋa ŋgâ tɛɛmbɛ́ a zhyɛ́ pwófaʼ yɔ́b. Pɔ́b kɛ tɔ́ kpee yɔ́b ndúŋú ŋgɔʼ yɛ́ a zhyɛ́ pe vɔ́ syé nɛ́. 33Mbziʼe njʉ́ a ŋweʼéme ŋgâ: «Puŋ zhʉ́, mə nuŋu taʼ ŋgɔʼ yɛ́ a zhyɛ́ pe tɔ́ kpee nɛ́, mbɛ́lʉ́ŋ Syɔŋ. Taʼ yɛ́b yɛ́ tɛɛmbɛ́ a zhyɛ́ pɔŋ vɔ syé nɛ́. Ntsʉʼ mbé ŋɔŋ wɛ́ a tséʼé psyɛ́ndzɔʼ ndúŋú ŋgɔʼ yéré nɛ́, a naʼ tséʼé pfɔ́shʉ́ŋ pó.»

Currently Selected:

Roma 9: XMG

Highlight

Copy