Efesiɛ́ŋ 5

Gual gá band bányá agá gise

1Nunyɛ baan bá Gɔdányá, ugúnúbíléne, ánubɛ́gɛ́ndɛ́naán ká nubá anɛ uwɔ́. 2Agá buanda gidigid ubú nualaná, énubílené bɔsɔ́gɔ́ gɔɔ́gɔ anɛ́ Kilíse méedíbílén, uwéŋin gusɔ́d gág gás góbusió. Uméeŋín gusɔ́d gág ká ugú anɛ bunyam bésigené gá bibiág bá Gɔdányá, ubuasɛmɛdɛn Gɔdányá. 3Nunyɛ band bá Gɔdányá, anyɛ́ búnyá anaány, nudigúbianan ká núbídɔ́bɔ, nudialá anama yá manda yóndodi yá nyá anaány, nudiágaán eŋís gá manda má bɔsɔ́gɔ́, agá manda amaány gidigid, tá guɔyɛd nudigúbianan ká nuɔ́yɔ mɔ́. 4Búdíbá sɔ́n bese ká nugála biád bá gugál na manda má buál na dufid dúnyá bɔbɛ. Númágala, nsɛ́ gugál gán bá gá guéŋeen Gɔdányá giod gá bese. 5Ánulɛ́ns ká, ebe bɔ́bídɔ́bɔnɔ́ na ebe bálaná anama yá manda anyɛ ayány, digabia niaf agá bufuŋ bá Gɔdányá na Kilíse, ta ebe báganá eŋís gá manda má bɔsɔ́gɔ́, bádigabia niáf iniány gágual ká guágaan eŋís gá manda má bɔsɔ́gɔ́ nyɛ anyɛ gubúlígenyi bágɔdányá bóndodi. 6Mɔnd dinúnéŋ ná gugál gá kand mfí. Góbúsió bá manda amaány gidigid ilób yá Gɔdányá guánɛná band bénené gualaan wɔ́ nŋɔ́bɛnɔ. 7Nudialá anɛ bɔ́bɔ́. 8Nsua núgubá agá mbíne, nɛ́nuán, anɛ́ núnyá agá nɛlad na Ɔgúnɔ́, nunyɛ gise. Ɔ́nusɔ́dɔɔ́n anɛ band bányá bá gise. 9Bielínyélínyé gidigid bínyá bese, bínyá osi, bínyá meliŋítas guúlenin agá gise. 10Ánubɛ́gɛ́ndɛ́naán ká núlɛ́ns manda ɔmɔ́ Ɔgúnɔ́ wasɔ lɛ́ganá. 11Nudiág ɔmbɔ́g agá buol bá ebe bálaná manda má mbíne mányá kandɛ mfí, ánudambɔ́ná bɔ́. 12Buanda ubú band abaány álaná agá niɔs, gúdiála ɔduɔ́ gɔnɔ́ ká diɔ́yɔ. 13Gigúl ɛgɛ́ gual gɔ́b bɛ́dámbɔnaná, bielínyélínyé bɔ́b guánɛ́gaan agá gise, 14Búnyɛ ká ubú buánɛ́ganá agá gise nyɛ gise. Ány gugál guɔ́yɔnɔ́ ká:

Anyɔ́g, aŋuá abɛ́dɛ́maná,

anyɔ́g aga ebeguén

ká Kilíse gufá gise.

15Anɛ́ búnyá anaány, ánubɛ́nyáŋanyáŋ na bielínyé línyé bán. Nudɛsɔ́dɔɔ́n kandɛ guanɔn, ɔ́nusɔ́dɔɔ́n anɛ bensíŋinsíŋ. 16Númábia nŋili ya gual bese, nudibísódígí yɛ́ gágual ká mɔɔ́s eme dinyá gá mɔ́ nyɛ mabɛ. 17Buál dɛnuádɛ́gɛ́n, ánubɛ́gɛ́ndɛ́naán nubɛ́dɔ́lɛ́gɛn ká nusɔ́ŋɔ́n buanda ubú Ɔgúnɔ́ wasɔ ámbaná ká nuál. 18Nudiguénén magɛ́b, máguála ká gusɔ́d sɛŋɛg, ánubá gɔ́g bofuógón na Ɛsámb yá Mefúny. 19Énuéŋénín makányá banuá na banuá, nudɔ́ŋɔ ɛsak sá gibúligie na anama yá ɛsak gidigid Ɛsámb yá Mefúny éŋené. Ɔ́nudɔ́ŋɔɔ́n Ɔgúnɔ́ wasɔ ɛsak, nuéŋen wɔ́ gibúligie na ɔdɛm wán gidigid. 20Énueŋeén Baba Gɔdányá nukany giod bɛsɛgɛl gidigid gá buanda gidgid agá ɔfɛ́n wá Ɔgúnɔ́ wasɔ Yésu Kilíse.

Na banɛ́m na bagany

21Banuá nualaná Yésu Kilíse nŋɔ́bɛnɔ, ánubá bebísélény banuá na banuá. 22Banuá bagánd, énubísélí ogóbusió bá banɛ́m bán gɔɔ́gɔ anyɛ́ nubísélenyé ogóbusió bá Ɔgúnɔ́. 23Gágual ká ɔnɛ́m nyɛ ɔgɔn wa agánd gɔɔ́gɔ anyɛ́ Kilíse nyá ɔgɔ́n wa giɔ́b gá beédéb. Kilíse muát unyá osód, giɔ́b gá beédéb gínyá nuɔ́l nág. 24Anyɛ́ búnyá anaány, bagánd gúbianan ká bébíséli ogóbusió bá banɛ́m bɔ́b gá buanda gidigid, gɔɔ́gɔ anyɛ́ giɔ́b gá beédéb bísélenyé ogóbusió bá Kilíse.

25Banuá banɛ́m, ánulɛ́gá bagány bán gɔɔ́gɔ anɛ́ Kilíse máalɛ́g giɔ́b gá beédéb uwéŋin gusɔ́d gág góbusió bá gɛ́. 26Umáal anaány ká, giɔ́b gá beédéb bá gá Gɔdányá busió buum. Umabá umámán gusɔga gɛ́ na gugál gág gúnyá anyɛ madɛ́ga ká gɛ́bá begubeg. 27Anaány ká, giɔ́b gá beédéb igiány oól agág gá busió uwɔ́ muát na nugúm, gɛ́bá begubeg na bunɔ́g, na ká buanda bá bɔbɛ diál gá gɛ́, gɛ́bá gág, gɛ́bá kandɛ gɛbɔ́liɔ́. 28Anaány ɔnɛ́m biananá ká úlɛ́ga agany waga, anyɛ nuɔ́l nág na muát. Ewe ulɛ́ganá agany waga, gúbɛ́lɛ́ga uwɔ́ muát. 29Mɔnd ufɛmaná nuɔ́l nág ná muát dɛbá, uguáfɛnaan nú, ugɔ́lɔɔn gɛsɛgɛl na nú, gɔɔ́gɔ anyɛ́ Yésu Kilíse gɔ́lɔnɔ́ gɛsɛgɛl na giɔ́b gá beédéb. 30Gágual ká basuá gidigid dinyɛ maláŋ má nuɔ́l nág. 31Gɔɔ́gɔ anyɛ́ búnyá buɔ́ŋɔ́n agá Musamb má Imbɔbɔnɔ ká: Buád buanda anɔ́mandɔ ganuádɔg aga sié na inyod, wabɛ́gɔ́dɛ́n agany, bɔ́bɔ́ bem bándɛ bónd anɛ́ mɔnd omoóm#5.31 Alɛ́ŋɛ́d, Gen 2.4 (Mat 19.5; Mál 10.7-8; 1Ko 6.16).. 32Gianta gá meliŋítas nyɛ giɔsɛ́gɔ́n agá gugál egue. Yaŋuá nŋuɔ́yɔ ká gígúbɛ́lɛ́ŋan Kilíse na giɔ́b gá beédéb. 33Banuá gɔg nɛ́nuán, mɔnd gidigid gúbianan ká úlɛ́gá agany waga anɛ́ úbɛ́lɛ́ganá uwɔ́ muát na ká agany ála ɔnɛ́m waga nŋɔ́bɛnɔ.

Currently Selected:

Efesiɛ́ŋ 5: MMU2

Highlight

Copy