Gálatas 6
6
Jesucristore wedewõrã came titamu nirẽcʉtire
1Yara mʉjã Jesúre wedewõrã ĩcʉ̃no Jesúre wedewõgʉ̃nocã ñañarẽrẽ tiñerõcã ĩñarã mʉjã Espíritu Santocã boriwãmerã siosʉgueyora cʉ̃rẽ titamuña cʉ̃cã ñañarẽ tirere pitigʉ earo ĩrã. Mʉjã cʉ̃rẽ “mʉcã ñañarẽ tirere Manigʉ̃ boherigawi; tairo tigʉ tiere wãcũpasʉti wasoaya” ĩ wedera ñurĩʉseromena cʉ̃rẽ wedeya. Buri mʉjã cʉ̃rẽ tora abiro titamurã ñurõ tʉomasĩña; ñañarẽrẽ ĩdocasãyora apewatoa tira mʉjãcã cʉ̃cã tirora abiro ñañarẽrẽ tira eaboga ĩrã.#Mt 18:15; Stg 5:19-20. 2Mʉjã mʉjãbasurupe wisiore biranorẽ, wãcũpasʉtire biranorẽ, wãcũtutuaheranorẽ, ñañarẽ ʉgaripearere camewitimasĩheranorẽ titamuña. Mʉjã tairiwãme tira Jesucristocã dotiriarora abirora queoro yʉquetatura tiroacu.#Jn 13:34; 15:12, 17; Ro 15:1-3; 1Co 9:21; Stg 2:8; 1Jn 3:23. 3Ĩcʉ̃no ñurẽrẽ tihericapeicãrã “yʉ ñurẽrẽ tigʉ ña” ĩ wãcũgʉ̃no; queorojoropʉare cʉ̃cã ĩriwãmerã abiro nihericapeicãrã tairo ĩpãmagʉ̃ cʉ̃ cʉ̃basurupe ĩritogʉ yawí.#Ro 12:3; 1Co 8:2; 2Co 3:5. 4Mʉjã mʉjãcãrõ mʉjãcã tirecʉti nirĩwãmerĩrẽ ĩñabeseya “yʉ ñurẽrẽ tirecʉtigʉra ñarĩ; o ñañarẽrẽ tirecʉtigʉpe ñarĩ” ĩ masĩrãdara. Tairo tirosirope mʉjãcã tirecʉti nirĩwãmerẽ ñurẽ niñerõcã mʉjãbasurupe tiemena ʉsea “abiro nirã ña ʉ̃sã” ĩmasĩrã nirã eaya; mʉjãcã nirĩwãmerĩmenarã ãpẽrãcã nirĩwãmerĩpʉmena ĩñawede tiro manirõrã.#1Co 11:28; 2Co 13:5; Flp 1:26. 5Mʉjãrẽ anorã abiro ĩgʉ̃ ya merẽ marĩcãrõrẽna marĩya catiribʉrecore maricã tirecʉti nirigue Manigʉ̃cã ĩñacoropʉre marĩye wapara nirõ earo tiroacu.#Ro 14:12-13; 2Co 5:10. 6Mʉjãrẽ Jesucristoye quetire bueribasocare titamuña. Mʉjãrẽ cʉ̃jãcã buere wapa cʉ̃jãrẽ niyerunomena, yarenomena o dairo nirẽ apeyeno mʉjãcã cʉorenomena titamu tiya; cʉ̃jãcã borere cʉoaro ĩrã.#Ro 15:27; 1Co 9:11; Flp 4:14-19; 1Tm 5:17-18. 7Mʉjã ñurõ tiya. “Ʉ̃sãcã ñañarẽrẽ tiñerõcã Manigʉ̃ ʉ̃sãrẽ tairo ĩñamocãgʉagawi; cʉ̃ ʉ̃sãrẽ ñañarõ tiherigawi” ĩ wãcũmiga mʉjã. Buri cʉ̃pe mʉjãcã tairo tiriguere tairora cũmocã tiherigawi. Mʉjã tora abiro Manigʉ̃rẽ ʉ̃sã ĩritomasimocãboga ĩ wãcũrã mʉjãbasurupera ĩritora tiroacu. Merẽ Manigʉ̃rẽ daigʉnopera icãta buiepemasĩheriwi. ¡Mʉjãrẽ wede! Ĩcʉ̃ oteribasocʉ cʉ̃cã oteriguecarõrẽna tie dicare serora abirora mʉjãcã tiwãmerã mʉjãcã tiriguewãmerĩcãrõrẽna dica sera earoacu.#Job 13:9; Pr 22:8; Os 8:7; 1Co 6:9-10. 8Ĩcʉ ñañarẽ ʉgaripearere tirucũgʉ̃no cʉ̃cã ñañarẽrẽ tirigue wapa ñañarẽrẽ dica segʉra abiro ñañarẽrẽ bʉagʉagawi; cʉ̃cã tairo tirigue dicara cʉ̃rẽ pecamepʉ ñañarõ ticõãyogʉ nigʉ̃ eañerõcã tiroacu. Buri Espíritu Santocã tiñerõcã borepere tigʉnope cʉ̃cã tiere tirigue wapa ñurẽ dicare segʉra abiro ñurẽrẽ bʉagʉagawi; cʉ̃cã tairo tirigue dicara cʉ̃rẽ Manigʉ̃ cʉtiropʉ catire petiherere cʉogʉ eañerõcã tiroacu.#Os 8:7; Ro 8:13; Stg 3:18. 9Tairo tira marĩ ñurẽrẽna Espíritu Santocã tiñerõcã borerena sʉtiro manirõrã tairo tirucũmocãrãda. Marĩcã tiere tairo sʉtiro manirõ tirucũñerõcãrã Manigʉ̃ marĩrẽ cʉ̃ya bʉreco eañerõcã marĩrẽ queoro wapatare ñurẽrẽ nʉnigʉagawi.#Mt 24:13; 1Co 15:58; 2Ts 3:13; Heb 3:6; Ap 2:10. 10Atiere birara marĩ marĩcã tiro eatuarocãrõ marĩcã titamumasĩboriwatoano niñerõcã nipetirapʉrena ñurẽrẽ tirada; buri bʉtorojoropʉare marĩyara Jesucristore wedewõrãpere bʉtoro ñurẽrẽ tijomocãrãda.#Jn 9:4; Ef 2:19; 1Ts 5:15; 1Tm 5:8; Tit 3:8.
Pablocã wedetʉocorigue
11¡Mʉjã ĩñaña! Yʉcã anomenarã atie wedere nitʉorere yʉbasurupera ya wãmo diamacãmenarã paca ojaremena yʉcã mʉjãrẽ ojacorere. 12Cʉ̃jã mʉjãrẽ conerigʉ yapa macã caserore widetacõãrẽrẽ tidotirugaribasoca ãpẽrã judío basocamena ñurõ pʉtʉarugara ninirã tiere tairo tirugaribasoca ñawã. Cʉ̃jã tiepere tairo tirugaribasoca ñawã Jesucristocã curusapʉ cõwõã basocare cʉ̃cã cametʉogʉ earigue quetire buere wapamenapere basocacã quetatu ñañarõ tirere ñañarõ cametʉara earugahera ninirã.#Mt 23:27-28; Hch 15:1; Ga 5:11. 13Cʉ̃jã cʉ̃jãya conerigʉ yapa macã caserore widecõãdotirere tiriara nicaperacãrã Moisécã dotire cũriguere icãta queoro yʉhera ñawã. Tie dotirere queoro yʉhericaperacãrã mʉjãpere conerigʉ yapa macã caserore widetacõãrẽrẽ cʉ̃jãcã tidotiriwãme mʉjãrẽ tiere tira eañerõcã bowa. Cʉ̃jãcã tairo tidotirere mʉjãcã yʉra earemenape ãpẽrã judío basoca ĩñacoropʉ “ʉ̃sã doca cʉ̃jã Galacia dita macãrãrẽ tiere tiñerõcã timocãwʉ̃” ĩboyera nirã eamocãruganirã.#Ro 2:25; Ga 5:11; Flp 3:3-4. 14Yʉpʉa yʉbasurupera yʉcã tirerena “abiro timocãgʉ̃ ña yʉ” ĩ wederucũboyerugaherijomocãrugagʉ cati. Marĩ Nirũpʉ̃ Jesucristocã curusapʉ marĩrẽ cõwõãbosa marĩcã ñañarẽ tirecʉtirigue wapare wapatibosarigue quetire yʉcã wedewõgʉ̃ earigue wadorena doca “abiro ña” ĩ wedeboyemocãgʉ̃ nirugagʉ cati. Merẽ tiera cʉ̃cã yʉre tairo cõwõãbosariguera ñucametʉasu. Tiemenarã yʉpere sua atibʉreco macãrãcã wapacʉtire ña ĩrẽnope wapamanijomocãrẽrã pʉtʉaro ea. Tairo tigʉ atibʉreco maquẽ ñañarẽpʉare cõwõweoarigʉra abiro pʉtʉagʉ earigʉ ña.#Ro 6:2, 6; 1Co 1:31; 2:2, 12; Ga 2:19-20; Stg 4:4; 1Jn 2:15. 15Queorojoropʉare marĩcã Jesucristoyara niñerõcã conerigʉ yapa macã caserore widetacõãyore nirẽ o widetacõãyoyamanirẽ nirẽcã icãta wapamani. Manigʉ̃cã ĩñacorore Jesucristore marĩcã wedewõrã earemenarã bʉcʉ wãmepe nirẽcʉtimirigueniguẽrẽ tuwecõãmocã mama wãmemenape merĩãwãmepe marĩcã nirẽcʉtirepere eare doca wapacʉtijomocã.#2Co 5:17. 16Manigʉ̃ nipetirare yʉcã ano wededisuarere queoro yʉquetatu tiwãmerã nirẽcʉtiranorẽ cʉ̃ye bopacaĩñarẽmena ĩñaro ĩñerõcã cʉ̃ye ñurõ came nirẽcʉtiñerõcã tiremenarã nirẽcʉtiñerõcã tiaro. Tairora Manigʉ̃ nipetira cʉ̃yamacã macãrã nirõrã nijomocãrãrẽ tiwãmerã tiaro.#Sal 125:5; 128:6; 1Co 10:18; Flp 3:3. 17Tairo tigʉ marĩcʉoromenarã yʉ sua ĩcʉ̃norẽ yʉre “cʉ̃cã buere queoro niheri” ĩ yʉre ñañarõ wederucũpãma quẽsõã biro eañerõcã tigʉnorẽ icãta boherijomocãgʉ̃ cati. Merẽ yʉ Jesucristoye quetire wedere wapamenarã cʉ̃jãcã yʉre camiturere cami ũma. Tiera ña yʉcã Jesucristore queorora padedecotegʉ nirẽrẽ cʉ̃cã posariarora abirora posanigʉ̃ masĩñerõcã tire.#2Co 1:5. 18Yara Jesucristore wedewõrã marĩ Nirũpʉ̃ Jesucristo mʉjã nipetirare ñurõ wañerõcã tiaro. Tairora tiaro.
Tocãrõrã ña.
Pablo.
Currently Selected:
Gálatas 6: yui
Highlight
Share
Copy
Want to have your highlights saved across all your devices? Sign up or sign in
© 2026, SIL Global. All rights reserved.
