Gálatas 3

Jesucristore wedewõrẽ earemena wadora cametʉoyorere bʉare ña; Moisécã dotire cũriguere tiremenapere cametʉoyore mani

1¡Mʉjã Galacia macãrã nocãrõ tʉomasĩrugaherijomocãrã bira eara yari! ¿Noãno mʉjãrẽ ñañarõ tira poseti mawisiocõãmocãrĩ? Mʉjã cʉ̃jã ĩritoribasoca buerere tʉonirã Jesucristoye queti diamacã maquẽrẽ wedewõrẽrẽ pitira ya. ¡Merẽ ʉ̃sã mʉjã watoapʉ nirã eara Jesucristocã mʉjãye wapara curusapʉ cõwõãbosariguerena ñurõ tʉomasĩrĩwãmerã mʉjãrẽ wedewʉta no! Mʉjã tierena ñurõ tʉowʉ quena.#Ga 5:7; 1Co 1:23; 2:2; Lc 24:25; Ro 1:14; 1Tm 6:9; Tit 3:3. 2Tairo tira mʉjã yʉre ĩcãwãme wedeya: ¿Moisécã dotire cũriguere ñurõ tire wapamenape o Jesucristoye quetire tʉo tiere queoro wedewõrã eanirãpe mʉjã Espíritu Santore ñerã eari? Mʉjã Moĩsére dotire cũriguere tiremenape Espíritu Santore ñerã eaheriwʉ; Jesucristoye queti ñurẽ quetire tʉo cʉ̃rẽ wedewõsocora eanirãpe Espíritu Santore ñerã eawʉ.#Hch 2:38; Ro 10:16-17. 3Buri topʉare atiecã anorã abiro wariasiro nicapetacãrã ¿mʉjã nocãrõ tʉomasĩrugaherijomocãrã bira yari? Mʉjã mamarõpʉre Jesúre wedewõsocora eara Espíritu Santocã titamurẽmenarã mʉjãcã ñañarẽ tirecʉtirere wasoara ea mama wãmepe nirẽcʉtira eawʉ. Buri mʉjã anorã abiro tisocoriara nicaperacãrã ¿dairo tira topʉare marĩcʉoropere mʉjãbasurupera mʉjãye tutuaremenape basocacã tʉoiñarĩwãmepe tinirã tiere tituwanʉcõrã earugara yari?#Ga 4:9. 4Mʉjã mamarõ Jesucristore wedewõsocora eara ãpẽrãcã mʉjãrẽ ñañarõ tirere bʉtoro posara eariara niwʉ̃. Tairo tira mʉjã tiecã tora abiro mʉjãrẽ biriasiro niñerõcã cʉ̃rẽ wedewõdura earemena ¿ʉ̃sãcã cʉ̃rẽ wedewõrẽwapa burijoro ʉ̃sã posara eayu ĩrã yari? Tairo niheri. Yʉcã tʉoiñañerõcãpʉare mʉjã burijoro ñañarõ cametʉa posara earamerã tigatiyu.#1Co 15:2. 5Manigʉ̃ mʉjãrẽ Moisécã dotire cũriguere queoro yʉquetatu tiñerõcãmerẽna Espíritu Santore nʉniwĩ; tiwãmerã tiere tairo tiñerõcãmerẽna mʉjãrẽ mʉjã watoapʉre paje tiẽñorẽrẽ tiẽñomocã tiheriwi. Buripe mʉjãcã Jesucristoye ñurẽ quetire tʉo; tiere wedewõrã eañerõcãpe doca mʉjãrẽ tairo yawí.#Ro 10:17; 15:18-19; 1Co 12:10; 2Co 12:12.

6Mʉjã marĩ ñecʉ̃ Abraham nirigʉre wãcũña. Cʉ̃mañu Manigʉ̃rẽ wedewõrẽ cʉogʉ earigʉ niwĩ. Cʉ̃cã tairo tiñerõcãrã Manigʉ̃ cʉ̃rẽ ĩcʉ̃ ñugʉ̃ ñeno wapa cʉohegʉra abiro ĩñagʉ̃ earigʉ niwĩ. #Gn 15:6; Ro 4:3; Stg 2:23. 7Tairo tira mʉjã “Abrahamcã Manigʉ̃rẽ wedewõriarora abirora Manigʉ̃rẽna wedewõrẽ cʉorara ñawã queorojoropʉare Abraham pãrãmerã nitutiara nijomocãrã” ĩ masĩña.#Jn 8:31, 33, 39, 53; Lc 3:8; Hch 7:2; Ro 4:11-12; Heb 2:16. 8Merẽ sʉgueripʉjorora Manigʉ̃ye wederucũrẽrẽ ojayoriapũpʉra judío basoca niheracãrẽ cʉ̃jãcã Manigʉ̃rẽ wedewõrẽ cʉora eañerõcã Manigʉ̃cã cʉ̃jãrẽ “mʉjã ñurã ñeno wapa cʉohera ña” ĩ cʉ̃cã ĩñatere ojayosiariaro niwʉ̃. Manigʉ̃ Abrahamrẽ tie ñurẽ quetire wedegʉ abiro ĩrigʉ niwĩ: «Yʉ mʉmenarã nipetira basocaburimacãrãrẽ ñurõ wañerõcã tigʉacu» ĩrigʉ niwĩ.#Gn 12:3; Hch 3:25; 1Ts 5:18. 9Tairo tigʉ Manigʉ̃ Abrahamrẽ cʉ̃rẽ wedewõñerõcã cʉ̃cã ñurõ tiriarora abirora marĩcʉoropʉcãrẽ cʉ̃cã tairo tigʉda ĩriaronorã nipetira cʉ̃rẽ wedewõrẽ cʉora earanorẽ ñurõ wañerõcã yawí.#Ro 4:16; Heb 11:8-19. 10“Manigʉ̃ marĩrẽ marĩcã Moisécã dotire cũriguere queoro nirĩwãmerã tiñerõcãrã ‘ñurã ñeno wapa cʉohera ñawã’ ĩ ĩñagʉagawi” ĩ wãcũ tiere tiquetaturucũrãnorẽ Manigʉ̃ ñañacametʉaro cametʉañerõcã tigʉagawi. Merẽ tie maquẽrã Manigʉ̃ye wederucũrẽrẽ ojayoriapũpʉ abiro ojayore ña: «Moisécã dotire cũriguere nipetirepʉrena tipetiherano ñañacametʉaro tiyoroagawa» ĩ ojayorigue ña.#Dt 27:26; Hch 15:10; Stg 2:10. 11Nirõrã Manigʉ̃ ĩcʉ̃norẽ Moĩsécã dotirere cũriguere tigʉnorẽ “ñugʉ̃ ñeno wapa cʉohegʉ ñawĩ” ĩmasĩherigawi. Mʉjãrẽ anorã abiro wede merẽ Manigʉ̃ye wederucũrẽrẽ ojayoriapũpʉ abiro ojayorigue ña: «Manigʉ̃rẽ wedewõrẽ cʉogʉ eagʉ wadore cʉ̃rẽ “ñugʉ̃ ñeno wapa cʉohegʉ ñawĩ” ĩ ĩñayogʉagawi; tairo tigʉ cʉ̃ ñugʉ̃ tie cʉ̃cã wedewõrẽ cʉoremenarã catire petiherere cʉogʉagawi» ĩ ojayorigue ña.#Hab 2:4; Ro 1:17; 3:20; Ga 2:16; Heb 10:38. 12Moisécã dotire cũriguere tiquetaturucũrẽ Manigʉ̃rẽ wedewõrẽ cʉore earera abiro niheri. Merẽ tiecã ĩriwãmepe tirugarano tiepe wadorena wãcũnʉnʉ biwa. Tie maquẽrẽna abiro ojayoriaro niwʉ̃: «Dotire cũriguere tiecã ĩrõrã abiro cʉ̃ya catiribʉrecoricãrõ tairo tirucũmocãgʉagawi» ĩ ojayoriaro niwʉ̃. Tairo ĩriasiro nicapetacãrã icãta ĩcʉ̃no tiere yʉcũtiheririgʉ niwĩ.#Lv 18:5; Ro 10:5. 13Tairo biñerõcã marĩ nipetiracã Moisécã dotire cũriguere tipetiherinirã wapa cʉora eanirã Manigʉ̃rẽ ñañarõ tiyora eaboriguere Jesucristope marĩye wapare wapatuanigʉ̃ wapa cʉogʉra abiro ñañarõ tiyogʉ curusapʉ papatuyo cõwõgʉ̃ earigʉ niwĩ; Manigʉ̃ye wederucũrẽrẽ ojayoriapũpʉ ojariguecã ĩrõrã abirora. Abiro ojayorigue ña: «Manigʉ̃cã ñañarõ tiyogʉ niãro ĩcʉ̃no yucʉgʉpʉ papatuyo cõwõãgʉ̃no»#Dt 21:22. ĩ ojayorigue ña. Tairo tigʉ Jesucristo cʉ̃cã marĩrẽ cõwõãbosariguemenarã marĩcã tie dotire doca ninirã ñañarẽ tirigue wapare cametʉogʉ earigʉ niwĩ.#Hch 5:30; 10:39; Ro 3:24; 8:3; Ga 4:5; 1Pe 2:24. 14Tora abiro cʉ̃ Jesucristo marĩrẽ cametʉoribasocʉcã marĩcã ñañarẽ tirigue wapare cõwõãbosa marĩrẽ wapatibosariguemenarã Manigʉ̃ cʉ̃cã Abrahamrẽ “mʉmenarã ñurõ wañerõcã tigʉda” ĩriarora abirora judío basoca niheracãrẽ ñurõ wañerõcã tigʉ tirigʉ niwĩ. Tairo tigʉ cʉ̃cã ĩriarora abirora marĩ nipetirare Jesucristore wedewõrẽ cʉora eañerõcã “mʉjã ñurã ñeno wapa cʉohera ña” ĩ ĩñanigʉ̃ Espíritu Santore ñerã eañerõcã yawí; cʉ̃cã cʉ̃rẽ mʉjãrẽ ticogʉacu ĩriarora abirora.#Is 32:15; 44:3; Jer 31:33; 32:40; Ez 36:26-27; 37:14; 39:29; Jl 2:28-29; Hch 2:33; Ro 4:9; Jn 14:16; Ef 1:13.

Moisére dotire cũrigue ĩñerõcã Manigʉ̃cã Abrahamrẽ “abiro tigʉda” ĩrigue

15Yara yʉ marĩcʉorore mʉjãrẽ basocacã tirenomenarã ĩcãrõ queoremena nobogʉra tʉomasĩboriwãmerã abiro ĩ wedegʉda: Ĩcʉ̃ basocʉ ãpĩmena “abiro tigʉda” ĩpʉtʉa cʉ̃ya wãmemena ojatuariasiro ĩcʉ̃nopera tiere wapamaniñerõcã timasĩherigawi tairora apewãmepe sonenemo icãta wasoamasĩherigawi. Tiwãmerã Manigʉ̃cã Abrahamrẽ “abiro tigʉda” ĩriguemenacãrẽ bi.#Heb 9:17. 16Manigʉ̃ Abrahamrẽ “abiro tigʉda” ĩgʉ̃ cʉ̃ye maquẽrẽna ĩñerõcã cʉ̃ pãrãmi nitutiagʉye maquẽrẽna “abiro tigʉda” ĩgʉ̃ tirigʉ niwĩ. Manigʉ̃ye wederucũrẽpʉre cʉ̃rẽ nitutiara pajʉpere “abiro tigʉda” ĩheri. Buripe cʉ̃rẽ nitutiagʉ icʉ̃menapere “abiro tigʉda” ĩ; cʉ̃rã ñawĩ Jesucristo.#Gn 12:3; 13:15; Hch 3:25; Ro 4:13; 9:4. 17Yʉ mʉjãrẽ abiro ĩgʉ̃ anorã abiro ĩrugagʉ ya: Manigʉ̃ Abrahamrẽ “mʉpãrãmi nitutiagʉmena abiro tigʉda” cʉ̃cã ĩcũriasiro cuatrocientos treinta cʉmarĩ cametʉarosirope Manigʉ̃ Moisére cʉ̃ye dotirere cũrĩgʉ niwĩ. Tairo tiro Manigʉ̃cã Moisére dotire cũrigue cʉ̃cã Abrahamrẽ “abiro tigʉda” ĩcũsocoriguere peotimasĩheriga.#Gn 15:13; Ex 12:40-41; Ro 4:13; Hch 7:6. 18Buri Manigʉ̃cã Moisére dotire cũriguere queoro tiremena wadora cʉ̃cã Abrahamrẽ “abiro tigʉda” ĩriguere nʉniñerõcã; topʉare cʉ̃cã “abiro tigʉda” ĩriguere cʉ̃cã ĩriarora abirora tiere tituwanʉcõgʉ̃ nʉniheribogatiyi. Tairo tiro cʉ̃cã “abiro tigʉda” ĩrigue wapamanirẽ pʉtʉamocãbogatiyu. Buri queorojoropʉare Manigʉ̃ tiere Abrahamrẽ ñeno wapa boro manirõ nʉnigʉ̃da ĩsiarigʉ ninigʉ̃ queoro tirigʉ niwĩ; nipetirare cʉ̃cã tirora abiro cʉ̃rẽ wedewõrẽ cʉora earare cʉ̃mena ñurõ nirã earo ĩgʉ̃.#Ro 4:14; 8:17; 11:5-6; Heb 9:15. 19Topʉare ¿ñenorẽ tirodaro tie dotire cũyoyuri? Manigʉ̃cã Abrahamrẽ “abiro tigʉda” ĩcũriasirope tie dotire cũyoriaro niwʉ̃ tiemena basocacã ñañarẽ tirecʉtirere wapa cʉora nirẽrẽ eñoãtora abiro. Tie dotire Abrahamrẽ nitutiagʉcã watiriwatoapʉ ñutʉocoriaro niwʉ̃; cʉ̃rã Manigʉ̃cã Abrahamrẽ “abiro tigʉda” ĩriguera nimocãgʉ̃ eagʉ tirigʉ niwĩ. Tairo tiro Jesucristocã earemena Manigʉ̃cã Abrahamrẽ “mʉpãrãmi nitutiagʉmena nipetira basocaburimacãrãrẽ ñurõ tigʉda” ĩrigue queoro wariaro niwʉ̃. Tie dotirepʉa Manigʉ̃rẽ wedecoteribasocamenarã Moisére nʉniyoriaro niwʉ̃; cʉ̃ Moisépʉ marĩrẽ wedetutia wiyoatora abiro.#Dt 5:5; Hch 7:53; Ro 5:13, 20; 7:7-13; Heb 2:2. 20Manigʉ̃ Abraham pãrãmi nitutiagʉmena basocare ñurõ wañerõcã tiatere ãpẽrãmenapʉ tiere Abrahampʉre wededoticoheririgʉ niwĩ; buripe cʉ̃basurupera tiere tairo tigʉda ĩ wederigʉ niwĩ. Tairo tiro Abrahamrẽ cʉ̃cã wederiguepe Moisére cʉ̃cã dotire cũriguesotoape nirẽ bi.#Heb 8:6; 9:15; 12:24; Dt 6:4.

Pablocã Moisére dotire cũriguere wedere

21Marĩ atiere wedecoteribasocapʉmena Moisére dotire nʉniyoriaro niwʉ̃ ĩrã; buri Abrahampʉare Manigʉ̃basurupera tiere tairo tigʉda ĩ wederigʉ niwĩ ĩrã Moisére dotire cũrigue Abrahamrẽ “abiro tigʉda” ĩriguemena came queoro niheri ĩrã merã ya. ¡Icãta tairo niheri! Tie pʉaropʉra merĩã wado tiecã tiatere cʉore eate biriaro niwʉ̃. Merẽ Moisére dotire Abrahamrẽ “abiro tigʉda” ĩcũriasirope tie dotire cũyorigue nicaperocãrã Manigʉ̃rẽ catire petiherere nʉnimasĩgʉ̃ niñerõcã tiheririaro niwʉ̃. Tairo tiro tie dotire ĩcʉ̃ basocʉnorẽ cʉ̃cã tie dotirere tipetirugagʉ nicapetacãrã cʉ̃cã tipetimasĩheriñerõcãrã Manigʉ̃cã ĩñacorore ñugʉ̃ ñeno wapa cʉohegʉ nigʉ̃ eamasĩñerõcã tiheririaro niwʉ̃.#Ga 2:17, 21. 22Tiecã tairo tiheriñerõcãrã Manigʉ̃ye wederucũrẽrẽ ojayoriapũpʉ tie maquẽrẽ abiro ĩrẽ ña: “Nipetira basoca ñañarẽrẽ siatuyoariarara abiro ninirã icãta tie ñañarẽrẽ tidumasĩherijomocãwã; buri tie tairo bi nipetira Jesucristore wedewõrẽ cʉora earemenape Manigʉ̃cã Abrahamrẽ ‘abiro tigʉda’ ĩriguere ñerã eatora abiro” ĩ ojayore ña.#3:14; Ro 3:9-19; 11:32. 23Buri marĩcʉ̃ ʉ̃sã judío basoca Manigʉ̃cã Moisére dotire cũrigue wadorena masĩriara niwʉ̃; tairo tiro tie dotire ʉ̃sãrẽ peresupʉ biadopo cʉorora abiro tie wadora ʉ̃sãrẽ doti niriaro niwʉ̃. Pʉ Manigʉ̃cã “Jesucristoye quetire tʉo, tiere wedewõrã earano wadora catire petiherere cʉora earagawa” ĩ eñogʉ̃ eariwatoapʉ tie ʉ̃sãrẽ tairo tiduro eawʉ.#Ro 7:8; 11:32; Col 2:20. 24Marĩrẽ Manigʉ̃cã Moisére dotire cũrigue ĩcʉ̃ dotieperibasocʉcã wĩmarãrẽ ñurõ ĩñanʉõrõrã abiro niriaro niwʉ̃. Tairo tiro tiera marĩrẽ ñurõ siosʉgue Jesucristocã watiriwatoare cʉ̃pʉre marĩrẽ newariaro niwʉ̃; cʉ̃ Jesucristore marĩcã wedewõrã earemenarã Manigʉ̃cã ĩñacorore ñurã ñeno wapa cʉohera nirã eamasĩñerõcã tiro.#3:24 Anorẽ dotieperibasocʉra niyugʉ ĩcʉ̃ wĩmarãrẽ ĩñanʉõrĩbasocʉ, cʉ̃jãrẽ bueropʉ neãrĩbasocʉ, cʉ̃jãrẽ ñañarõ tiherimocãro ĩgʉ̃ ĩñanʉõrĩbasocʉ ĩñerõcã cʉ̃jãcã queoro tiheriñerõcã ñañarõ tigʉ niyugʉ (Ro 10:4; 1Co 4:15; Ga 2:16; 4:1-7). 25Tairo tiro marĩcʉorore sua marĩrẽ Jesucristore wedewõrẽ cʉora eamasĩrĩwatoa eañerõcãrã marĩ sua tie dotire docapʉ nimiriara ĩcʉ̃ dotiepeyoribasocʉra abiro marĩrẽ ĩñanʉõ, bue, siosʉguemiriguere boheri sua. 26Tairo tira mʉjã nipetira marĩrẽ cametʉoribasocʉ Jesucristore mʉjãcã cʉ̃rẽ wedewõrẽ cʉora earemena wadora mʉjã Manigʉ̃pũna nirã eara ya.#Jn 1:12; Ro 8:14-17. 27Merẽ mʉjã nipetirapʉra Jesucristoya wãmemenarã cʉ̃yara nirẽrẽ eñorã ocomena wãmeõtiyoriara niwʉ̃; tairo tiremenarã cʉ̃mena ĩcãrõ nirã eara. Tairo tira mʉjã cʉ̃yara ninirã marĩcʉorore cʉ̃cã nirẽcʉtiriarora abiro nirẽcʉtira eara ya.#Ro 6:3-11; 13:12-14; 1Co 12:13; Ef 4:22-25; Col 3:8-12. 28Tairo tiro judío basocʉ nigʉ̃ ña ĩrẽ maquẽ o judío basocʉ nihegʉ ña ĩrẽ maquẽ, dotiepeyoribasocʉ nigʉ̃ ña ĩrẽ maquẽ o dotiepeyoribasocʉ nihegʉ ña ĩrẽ maquẽ tairora ʉmʉ nigʉ̃ ña ĩrẽ maquẽ o nomiõ nigõ ña ĩrẽ maquẽ icãta wapamanirẽ nirõ ea. Marĩ nipetira cʉ̃yara nirã eariarapʉa cʉ̃ ĩcʉ̃yarara nirã eara ya. Ĩñerõcã cʉ̃cã ĩcãrõpe ĩñayorara nirã eara ya.#Jn 10:16; Ro 10:12; 1Co 12:13; Ef 2:14-16; Col 3:11. 29Mʉjã nirõrã Jesucristomena ĩcãrõ nirã eariarapʉa; todocare mʉjãrã Abraham pãrãmerã nitutiara cʉ̃ pũnajoro nirã ya. Ĩñerõcã Manigʉ̃cã Abrahamrẽ “mʉmena abiro tigʉda” ĩriguere tiemena mʉjã ñurõ wañerõcã tiyora tiere ñerã eanarã nirã eara ya.#Ro 4:13; 8:17; 1Co 3:21-23; Ga 4:28; 1Pe 1:4.

Currently Selected:

Gálatas 3: yui

Highlight

Copy