BaGalatiya 1
1
1Pawulu mutumwa, peepe uzwa kubantu nikuba mukwiinda kumuntu, pesi mukwiinda muli Jesu Kkirisitu aLeza Taata, wakamubusya kuzwa kubafu, 2aboonse bakwesu mbindilaabo,
kumbungano zyaku Galatiya:
3Luzyalo kulindinywe aluumuno luzwa kuli Leza Taata aMwami wesu Jesu Kkirisitu, 4ooyo wakalyaaba nkaambo kazibi zyesu kuti atuvune kuzwa kububi bwachiindi eechino, mukwiinda kuluyando lwaLeza wesu aTaata; 5kuli Leza kukabe bulemu kwalyoonse alyoonse. Ameni.
Kuleya Kuzwa Kumakani Mabotu
6Ndagamba loko kuti mwafwambana kumuchija ooyo wakamwiita muluzyalo lwaKkirisitu mpawo mwatobela makani aambi. 7Peepe kuti kuli aambi makani, pesi kuli bamwi bamupenzya alimwi bayanda kuleeyesya makani mabotu aKkirisitu. 8Pesi nikuba ndiswe, naba mungelo uzwa kujulu, taakwe weelede kumukambawukila makani asiyene ayaayo ngitwakamukambawukila, ngatukwe. 9Mbuli mbutwakaamba kale, aboobo lino ndaamba lubo, kuti umwi kamukambawukila makani asiyene kuli aayo ngimwakatambula kale, ngatukwe.
10Lino ndiyanduula kulumbilizigwa abantu na, nikuba kwaLeza? Nikuba kuti ndeezya kubotezya bantu? Kuti ndachili kubotezya bantu, tandeelede kuba mulanda waKkirisitu pe.
Pawulu Mbwakaba Mutumwa
11Nkaambo bakwesu, ndiyanda kuti muzibe, kuti makani mabotu akakambawukwa andime teemakani azwa kumuntu pe. 12Nkaambo teendakaatambula kuzwa kumuntu pe, nikuba kuyiisigwa amuntu, pesi akaza mukwiinda muchiyubunuzyo chaJesu Kkirisitu.
13Nkaambo mwakamvwa buumi bwangu bwachiindi mbundakali kupona muchiJuda, mbundakapenzya imbungano yaLeza chabukali alimwi ndakeezya kwiinyonyoona. 14Alimwi ndakayendelela anembo muchiJuda kandili kunembo abayingi basaama akati kabantu bakulindiswe, aboobo ndakali musungu kapati nkaambo kaziyanza zyabamataata.
15Pesi Leza ooyo wakandisala kanditana ndazyalwa, alimwi wakandiita mukwiinda muluzyalo lwakwe, 16wakabotelwa kuyubununa Mwana wakwe kulindime, kuchitila kuti ndikonzye kumukambawuka akati kabantu batali baJuda, teendakayiisigwa amuntu kufumbwa pe, 17nikuba kwiinka kuJerusalemu kuli baabo bakali batumwa kunembo lyangu, pesi ndakayinka kuArabbiya; alimwi lubo ndakabweeda kuDamasikkasi. 18Eelyo nikwakayinda minyaka iitatu ndakayinka kuJerusalemu kuyooswaya Sifasi, mpawo ndakaakukkala anguwe kwamazuba alikkumi amusanu. 19Pesi taakwe bambi batumwa mbindakabona kunze kwaJakkobbu mwanike waMwami Jesu.
20Muli nzindilii kumulembela, kunembo lyaLeza, tandibeji pe!
21Eelyo ndakayinka muzilikiti zyaSiriya aSilisiya. 22Alimwi teebakalina ndibona pe kumbungano zyaKkirisitu muJudiya, 23bakamvwa biyo kakwaambwa kuti, “Ooyo wakali kutupenzya lino uliikukambawuka atala alusyomo ndwakeezya kunyonyoona.” 24Alimwi bakalumbayizya Leza ankaambo kandime.
Currently Selected:
BaGalatiya 1: TTP
Highlight
Share
Copy
Want to have your highlights saved across all your devices? Sign up or sign in
The Word for the World International
