UJWANISI 16
16
1“Lokho ngikukhulume kini ukuze ningakhubeki. 2Nizakuqotjhwa ngemasinagogini, kodwana kuzakufika isikhathi lapha nanyana ngubani onibulalako azakudlumbana bona usebenzela uZimu. 3Lokhu bazakwenza kini ngombana bangamazi uBaba nami. 4Kodwana ngikhulume lokhu kini ukuze kuthi isikhathi sabo nasifikako, nikhumbule bona nganitjela izintwezi.
Umsebenzi kaMoya oCwengileko
“Azange nginitjele lokhu ekuthomeni ngombana gade nginani. 5Nje-ke kwanjesi ngiya kuye ongithumileko kodwana akakho noyedwa ongibuzako bona ngiyaphi. 6Yeke njengombana sengikhulume izintwezi, iinhliziyo zenu zembethwe lisizi. 7Kodwana nginitjela iqiniso nangithi kunilungele bonyana ngikhambe; nangingakhambiko, uMsizi angekhe eza kini. Kodwana nangikhambako, ngizamthumela kini. 8Begodu nakafikako yena, uzakwembulela iphasi mayelana nesono nokulunga nokugweba: 9Mayelana nesono ngombana bangakholwa kimi; 10mayelana nokulunga ngombana ngiya kuBaba angekhe nisangibona; 11mayelana nokugweba ngombana umbusi wephaseli selagwetjiwe.
12“Ngisenokunengi engifuna ukunitjela khona, kodwana angekhe nikwazi ukukuthwala kwanjesi. 13Kodwana kuzakuthi lokha uMoya weqiniso nasele afikile, uzanidosela kilo loke iqiniso ngombana akakazokukhuluma okungekwakhe, kodwana uzakukhuluma lokho akuzwako, anibikele nangalokho okuzako. 14Uyongiphazimulisa ngombana uzokuthatha okwami anazise khona. 15Koke uBaba anakho kungekwami, ngikho lokhu ngithe uzakuthatha kokwami anibikele khona.”
Isizi nethabo
16“Kuzakuba sikhatjhana ningangiboni; kuthi isikhatjhana ningibone godu.”
17Abanye babafundi bakhe babuzana bathi: “Utjho ukuthini nakathi, ‘Kuzakuba sikhatjhana ningangiboni; kuthi isikhatjhana ningibone godu’ nokuthi, ‘Ngombana ngiya kuBaba’ na?” 18Ngalokho bebabuza basithi: “Kutjho ukuthini ukuthi isikhatjhana na? Asazi thina bona ukhuluma ngani!”
19UJesu bekasazi bona bafuna ukumbuza, yeke wathi kibo: “Nibuzana bona ngitjho ukuthini nangithi, ‘Kuzakuba sikhatjhana ningangiboni; kuthi isikhatjhana ningibone godu?’ 20Kwamambala ngiqinisile ngithi kini: Nizakulila nibibitheke, kodwana iphasi lizakuthaba. Nina nizakuba lisizi kodwana isizi lenu lizakuphenduka ukuthaba. 21Umfazi nasele atjhidele ukubeletha, uzwa iinhlungu ngombana isikhathi sakhe vane sesifikile; kodwana umntwana nasele abelethiwe akasakhumbuli ubuhlungu ngombana sekubelethwe umntwana ephasini. 22Kunjalo-ke nangani: Kwanjesi nilisizi, kodwana ngizakubuye nginibone godu, ihliziywenu ithabe; nethabelo angekhe lathathwa mumuntu kini.
23“Mhlokho angekhe nabawa ilitho kimi. Kwamambala ngiqinisile ngithi kini: UBaba uzanipha nanyana yini enizayibawa ngebizo lami. 24Kufikela njesi anikabawi ilitho ebizweni lami. Bawani nizakuphiwa khona kuzakuzala ithabo lenu.”
Ngilahlule iphasi
25“Ngikhulume kini ngemifanekiso. Siyeza isikhathi lapha ngingasazukukhuluma ngemifanekiso, kodwana ngizakukhuluma ngoBaba kukhanye. 26Mhlokho nizakubawa ebizweni lami, angitjho bona ngiyonibawela mina kuBaba. 27Ngombana uBaba ngekwakhe uyanithanda ngombana nani ningithandile benakholwa bona ngivela kuZimu. 28Ngavela kuBaba, ngeza ephasinapha; kwanjesi ngitjhiya iphasi ngiya kuBaba.”
29Yeke abafundi bakhe bathi kuye: “Kwanjesi sewukhuluma kuzwakale ingasi ngokufanekisa. 30Siyazi kwanjesi bonyana wazi koke, awufuni omunye ongakubuza imibuzo. Lokhu kusenza sikholwe bona uvela kuZimu.”
31UJesu wabaphendula wathi: “Niyakholwa kwanjesi na? 32Isikhathi siyeza, sebesilapha, lapha noke nje nizakurhatjheka khona, omunye nomunye aye kwakhe mina ngisale ngingedwa. Nokho angisingedwa ngombana uBaba unami. 33Nginitjele izintwezi, khona nizakuba nokuthula kimi. Ephasinapha nizakuhlupheka, kodwana yibani nesibindi iphasi ngilahlulile!”
Currently Selected:
UJWANISI 16: SND12
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 2012. Used with permission. All rights reserved.