मार्क 9
9
1ईसु तियांहां कोयो, “आंय तुमुहूं खोरीज कोहो के जे इंहीं उबले होय, यांमेर्येए थोड़ेक एहलेहे होय, के जाअहूं जाआं देवोअ राजोहो सेक्तीइरी आवल्याहा ने देखीत लेय, ताअहूं जाआं तियांहां मोत ने आवे.”
ईसुउ बोद्लाअलू रुप
(मत्तय 17:1-13; लुक 9:28-36)
2सोव दिहोअ फाटी ईसु पेत्राहा आन याकोबोहो आन योहानोहो आरी लेदा, आन हुंद्ला जागामेहें एका उसा डोगोपोअ लेत गोयू. तिहीं तियांआं देखताइज ईसुउ रुप बोद्लात गोयू. 3आन तियाआ आंगड़े एहलेहे सोमके वोल्ये आन उजालो जाआं पोड़्यो, एतेहे के धरती पोअ कोड्लूज आंगड़ाआ तुवनारु बी तेतेहे उजले ने कोइत सेकतु. 4ताहां तीनू सेला मोशे आन एलियाहा ईसुउरी गोठी मिकत्लाहा देख्या. 5यापरोत पेत्रे ईसुहू कोयो, “गुरु, आपाआ इंहीं रोअलोअ केतोहो हाजो होय: तियाहा काजे आपू तीन तंबा बोणावता; एक ताआ काजे, एक मोशेए काजे, आन एक एलियाआ काजे.” 6पेत्र आन सेला एताहा बित गोया के कि उत्तर आपो तोज पेत्राहा ने समजाअयो.
7ताहां तियांहां एके वाद्ले टापित लेदा, आन तिया वाद्लामेहें रोत ओ आवाज निहींयू, “ओ माआं मेरालू बेटुह्हू होय, याआ उनाअजा#9:7 मत्तय 3:17; मार्क1:11; लुक 3:22भजन 2:7.” 8ताहां तियां शारी वोगेहे नजर टाक्यी, आन ईसुहू सोड़ीत तियांअरी बिहीरो कोडोज ने देखाअयो.
9डोगोप रोत उतरीइली वेले ईसु तियांहां कोयो के “जाअहूं जाआं माहुंउं बेटुह्हू मोल्यामेहें रोत जिवीत ने उठे, ताअहूं जाआं जों किबी तुमू देख्योहो तों कोडाहाज मा कोहा.”
10तियां तियाआ ए गोठ मानित लेदी; आन तियां तियांज गोठी कोआ वोल्या, “मोतोमेहें रोत जिवित उठिइलोअ ताहां कि ओय?” 11आन तियां ईसुहू फुशो, “कायदाअ मास्तरहों काहा कोताहा के एलियाआ पेल आविइलोअ जरुरी होय?”
12तिये तियांहां उत्तर आप्यो, “एलिया खोरीज पेल आवित आखोज हुदारे, पोन माहुंउं बेटाह्हाअ बाप्तिमेहें ओं काहा लेख्योहो के, तो खुब दुख वेठे, आन तियाहा नाकारी देय? 13पोन आंय तुमुहूं कोहो, के एलिया ते आवित लागुहू, आन जेहलोहो तियाआ बाप्तिमेहें लेख्योहो, तियांहां जो किबी कोओ लागो तों तियाअरी कोअयो.”
ईसुउ पुतवाअला पोर्याहा हुदारत्लू
(मत्तय 17:14-21; लुक 9:37-43)
14जाहां तो सेलाआं जागे आवयू, ताहां देख्यो के तियाआ शारी वोगेहे वोडी गोरदी ओवयिही आन कायदाअ मास्तरहों तियाअरी सोबा सोबी कोआ वोल्या. 15ईसुहू पालताज आखे जास्तीज पोंगलाए वोल्ये, आन तियांहां गुगदीत तियाहा सलाम कोअयो. 16ईसु तियाआ सेलाहां फुशो, “तुमू यांअरी किहाआ बाप्तिमेहें सुलाअताहा?”
17गर्दी मेर्येए एके जोएं उत्तर आप्यो, “गुरु, आंय माआं पोर्याहा ताआ जागे लेतायुहू, काहाके यामेहें मुकी आत्मा होय. 18जिहीं काबी ते तियाहा तोअहे, तिहींज आसाटी देहे: आन तो सोबीमेहें फेबद्रुउ वाली देहे आन दात कोकरावेहे, आन आखड़ात जाहे. आंय तियाहा काडे तेहें कोत ताआ सेलाहां बी कोयो, पोन ते तियाहा काडीत ने सेक्या.”
19ईसु तियांहां कोयो, “ए बिगर विश्वासी माअहूं, आंय तुमाआं आरी कोयों जाआं रोंव? आन कोयों जाआं तुमाआं वेठ्या कोओ? पोर्याहा माआं जागे लेतावा.” 20ताहां ते तियाहा ईसुउ जागे लेतावया:
आन जाहां तो आत्मा ईसुहू देख्यू, ताहां तिये तिया पोर्याहा ताबुड़ पिल्ली देदो; आन तो पुंयींपोअ पोड़्यो, आन सोबी मेहें फेबद्रुउ वालतोज ओंअडो वोल्यो. 21तिये तियाआ आब्हाहा फुशो, “याआ ए दशा कोयों रोत होय?”
तिये कोयो, “हानू रोत. 22तिये याहा आरवीइलाअ काजे केदिहीं आगी मेहें आन केदिहीं पाअयों मेहें टाक्यु; पोन जर ताहूं बी ओत सेकतोय, ताहां आमा पोअ किइमाय कोइत आमा पोअ उपकार कोअ.”
23ईसु तियाहा कोयो, “जर ताहूं बी ओत सेकेहे? ए कि गोठ होय! भरिवसू कोअनाराअ काजे आक्खोज ओत सेकेहे.”
24पोर्याआ बाह्हू ताबुड़ रोड़ी रोडीइ कोयो, “प्रभु, आंय भरिवसू कोअहो, माआं अविश्वासोहो काडी दे!”
25जेहेलाम ईसु पाल्यो के माअहें गुगदा गुगद कोअते गर्दी कोअतेहे, ताहां तिये खाराब आत्माहां एहें कोत कोइत धमकी आप्यी, “ए मुकी आन बोयरी आत्मा, आंय ताहूं आदेश आपोहो, तियाम रोत निहीत जा, आन फाश्यी तियामेहें केदिहींज मा फोहीही.”
26ताहरीइ ते आअड़ीत कोइत आन तियाहा मुउडीत कोइत, निहीत गोयी; आन पोर्यू मोल्याआ हारकु ओत गोयू, आन वारुज माअहें कोने वोल्ये के तो मोइत गोयू. 27पोन ईसु तियाआ आथ तोइत कोइत तियाहा उठाड़्यु, आन तो उठीत उबू रोयू.
28जेहेलामेहें तो कोअमेहें आयू, ताहां तियाआ सेला एखलामेहें तियाहा फुशो, “आमू तिया पुतोअ आत्माहां काहा ने काडीत सेका?”
29तिये तियांहां कोयो, “ए जात प्रार्थनाअ सिवाय बिहीरा किहाज वाअहीं नाहां निहीत सेकती.”
सोताआ मोतोअ बाप्तिमेहें ईसुउ फाश्यीइ भविश्यवाणी
(मत्तय 17:22,23; लुक 9:43-45)
30ते तिहीं रोत निहीया आन गालीलोमेहें रोत जाताते. तियाआ इश्शा ने ओती के कोडाहा मुंदू जाय, 31काहाके तो तियाआ सेलाहां सिकाडतु आन तियांहां कोतूतो, “माहुंउं बेटुह्हू, माअहुंउं आथोम तोइत आपाय, आन ते तियाहा माईंत टाके; आन तो मोए तिहीं रोत तीन दिहोम जिवीत उठे.” 32पोन यी गोठीइ अर्थ तियांहां नाहां समजाअयो, आन ते तियाहा फुसुहूं बिताते.
आखाम रोत वोडु कोडू?
(मत्तय 18:1-5; लुक 9:46-48)
33ताहराअ ते कफर्णहुमोमेहें आया; आन कोअमेहें तिये तियांहां फुशो, “वाटे तुमू किहाअ बाप्तिमेहें गोठी कोअत्ला तेरा?”
34ते ठावकाज रोया, काहाके वाटे तियां ए गोठी कोअयीते के आपा मेहें वोडू कोडू होय.#9:34 लुक 22:24 35ताहरुउ ईसु बोहीत कोइत आन बारा जोओंहों हादीत कोइत तियांहां कोयो, “जर एखू वोडू बोणनारु ओय, ताहां तो आखाम रोत हानू आन आखाआ सेवक बोणुहूं जोवे.”#9:35 मत्तय 20:26,27;23:11; मार्क 10:43-44; लुक22:26 36आन तिये एका पोर्याहा लेत कोइत तियांआं विसमेहें उबो कोअयो, आन तियाहा बोदाम लेत कोइत तियांहां कोयो, 37“जो एखू माआं नावसे यां पोर्या मेर्याआ कोडा एकाहा बी स्विकार कोअहे, तो माहूं स्विकार कोअहे; आन जो कोडो माहूं स्विकार कोअहे, तो माहूं नाहां, पोन माहूं मोकलिइनाराहा स्विकार कोअहे.”#9:37 मत्तय10:40; लुक 10:16; योहान13:20
जो आपाआ विरुद्दाम नाहां, तो आपाअ वोलेहे होय
(लुक 9:49,50)
38ताहरुउ योहान ईसुहू कोयो, “गुरु, आमू एका माहुंहूं ताआ नावो वाअहीं पुतोअ आत्माहां काडत्लो देखल्यो आन आमू तियाहा मा काडीही कोल्यो, काहाके तो आपा मेर्योअ ने ओतो.”
39ईसु तियांहां कोयो, “तियाहा मा रुकहा; काहाके एहेलोह कोडोज नाहां जो माआं नावसे वोडे कामे कोए, आन मामार माहूं खाराब कोत सेके, 40काहाके जो आपाआ विरुद्दाम नाहां, तो आपाअ वोलेहे होय.#9:40 मत्तय12:30; लुक11:23 41जो कोडो एक गिलास पाईं तुमुहूं याआ काजे पिवाडे के तुमू ख्रिस्ताआ होय, ताहां आंय तुमुहूं खोरीज कोहो के तियाआ फल तियाहा मिले.” #9:41 मत्तय 10:42
पापोअ काजे पारजाणो
(मत्तय 18:6-9; लुक 17:1,2)
42“मापोअ भरिवसू कोअनारा यां हानामेहें रोत एकाहा बी जों कोडो भरिवसू सोड़ावे, ताहां तियाआ गोलामेहें एकी वोडी कोअटीइ पुड़ बांदीत तियाहा दोर्यामेहें टाकी देद्ले तियाआ काजे हाजो आवे. 43जर ताआ आथ ताहूं विश्वास सोड़ावे, ताहां तियाहा वाडीत टाक. बेन आथ ओत नरकाआ आगीमेहें जाअलोअ या रोत जी ठुटो बोणीत हादाजल्म्याआं जिवनोमेहें जाअलोअ हाजो होय. 44#9:44 थोड़हा लेख्यामेहें ओं वसन नाहां जोड़तो.जिहीं तियाआ किडू नाहां मोअतु, आन आग केदिहींज नाहां उलाअती. 45जर ताआ गुडू ताआ विश्वास सोड़ावे, ताहां तियाहा वाडीत टाक! बेनु गुडा ओत नरकाआ आगीमेहें जाअलोअ, या रोत जी लेंगडू ओत हादाजल्म्याआं जिवनोमेहें जाअलोअ ताआ काजे हाजो होय. 46#9:46 ओं वसन थोड़हा लेख्यामेहें नाहां जोड़तोजिहीं तियाआ किड़ू नाहां मोअतु, आन आग केदिहींज नाहां उलाअती. 47जर ताआ डोऊ ताआ विश्वास सोड़ावे, ताहां तियाहा काडीत टाक! बेनु डोआ ओत बी नरकाआ आगीमेहें जाअलोअ, या रोत जी एक डोऊ लेत कोइत देवोअ राजोमेहें जाअलोअ ताआ काजे हाजो होय. 48#9:48 यशया 66:24जिहीं तियाआ किड़ू नाहां मोअतु, आन आग केदिहींज नाहां उलाअती.
49“काहाके जेहें कोइत देवोहो आपिइलोअ गाराहा खारा वाअहीं सोको कोअतेहे, तेहें कोइत हारेक जोओं आगी वाअहीं सोको ओवे.
50“खारो ते हाजो होय; पोन जर खाराआ सव जाती रोयी, ताहां तियाहा किहा वाअहीं खारसो कोइत सेकहा?
“तुमाआं विसमेहें खाराआ होस सव मिका, आन एकमेकाअरी होकेहे रोवा.”
Currently Selected:
मार्क 9: NST25
Highlight
Share
Copy
Want to have your highlights saved across all your devices? Sign up or sign in
The Noiri-Bhil Bible ©The Word For The World International and Noiri-Bhil Translation Samiti, Dhadgaon, Maharashtra, India, 2025.
