Nzyeté 13
13
1Ábalam la gwaa fó Egíbtò, é piŋ né Nengɛb, pɔ́ nzwě wé gwɔ́. À la gwaa fó wó piŋ púʼu, ńgẅiin kɔ̀ɔkɔ́ɔ gie áa yé. Lɔ̂d la gíŋe ńgwɔ́ yé nùɔ.
Ábalam pɔ́ Lɔ̂d fegé
2Ábalam laa ngàŋa mmó. À la gẅiin memǎa menùɔ menɔ̀ɔn, ńgẅiin nkáb tɛʼ, ńgẅiin tʉ̌ ngɔ̂ɔ. 3À la fó Nengɛb ńgiŋe ńzẅɛte tà ńdáʼ ńkúu Mbetɛɛ, á jʉʼ gie à la zɔɔn ńnéŋe wó, á gwɔ́ tsetsɛ̀ɛ Mbetɛɛ pɔ́ Ayî, 4Ajʉʼó ŋwɛ́ gwɔ́ jʉʼ gie à la pwóon jʉʼʉ lenuŋé pwɔʼ wó, ésẅíŋte Ssé jʉʼó, ńtóŋo yé lê «Cʉ̀apʉ̀a.»
5Lɔ̂d gẅie pɔ́ Ábalam laa kwò, la gíŋe ńgẅiin yé menùɔ menjʉ̀njÿò, ńgẅiin nùɔ mvfó tà mbɔɔ nùɔ mefòŋ; á la gíŋe ńgẅiin kwàʼ mé mentàb. 6Pɔ́ la te gíŋe ńkuʼu létsẅé tàʼa jʉʼ wɔ́, ńtí nue pʉ̀a mesoŋ laa ssé tà ńgyɔ́ɔn, menùɔ menɔ̀ɔn gíŋe ńgwɔ́ yɔ́b ssé tà ńgyɔ́ɔn tà legǐŋ ńteme jʉʼ ńtsẅé, à te gíŋe ńgwɔ́ wó wɔ́. 7Púʼu la, ndʉʼʉ́ndʉʼʉ́ gÿo ńkẅɛɛ tsetsɛ̀ɛ papféle menɔ̀ɔn pe Ábalam, pâ pe Lɔ̂d. Epʉ̀a Kánàhan pâ pʉ̀a Pelísè laa fʉʼó ŋwɛ́, ḿbú ńtsẅé pɔ́ ngwòŋ Kánàhan. 8Á cʉa púʼu, Ábalam gɔɔn né Lɔ̂d ngie: «Shúshu, n te ne ńkwoŋo ngie cÿɔ́g gwɔ́ tsetsɛ̀ɛ pɔ̀gɔ, tà mbɔɔ tsetsɛ̀ɛ papféle menɔ̀ɔn pɔ́gɔ̀ wɔ́; ńtí nue pɔ̀gɔ gwɔ̌ pɔ́ mefɛ̌. 9Ngwòŋ é wɔɔn ńké ńtyé tyé, kaŋa jú jʉʼ ńnéŋe wó: ɔ̀ lɔɔn ńdɔg ye gwoŋó pwó kyɛ̀bɛ, mbà mèŋ n ge lɔg ye gwoŋó pwó tʉ̀, ńdɔg ye gwoŋó pwó tʉ̀, mbà mèŋ n ge lɔg ye gwoŋó pwó kyɛ̀bɛ.»
10Ábalam gɔɔn púʼu, Lɔ̂d maʼa lejÿɔ́g, ńdíe, ńgyá páʼ kwòŋo tàʼ ntse Juundʉŋ pú ńgÿo, eshúm kwɔ́ʼɔ jʉʼó púʼu tà ńkúu Tsowa. Cʉ̀apʉ̀a la gwaa pyága Tÿǒsoŋo Sondɔm pɔ́ tÿǒsoŋo Ngomɔɔ, akwòŋo tàʼ ntse Juundʉŋ gwɔ́ páʼ nkáʼa Cʉ̀apʉ̀a, ńdɔgɔ ńgwɔ́ páʼ akwòŋo ye tàʼ ntse Nílè tsɛ̀ɛ ngwòŋ Egíbtò. 11Lɔ̂d gyá púʼu, ńdeen ḿbú ńkaŋa yɛ̌ gwǒŋ, ńtsɔ́ʼte mentàb mé, ńdɔg ńgee shÿó sǎʼnèm. Wɔɔn lɔg ńgwɔ́ páʼ Ábalam pɔ́ Lɔ̂d la fege púʼu. 12Ábalam zso jʉʼ gie à ka néŋe wó Kánàhan. Lɔ̂d gʉa, ńkwɛ́ mentàb mé ngʉ̀ŋe metÿǒsoŋ shÿó Juundʉŋ; mentàb mé ŋwɛ́ gʉa gʉa ńkúu tÿǒsoŋo Sondɔm. 13Panéŋe tÿǒsoŋ ŋwɛ́ lɔ́ɔn ḿbú fʉʼʉ menò tepòŋ tɛʼ, ńdɔgɔ tsẅé tepòŋ gie pɔ́ gẅiin, éfʉate menò mvfò Cʉ̀apʉ̀a.
14Lɔ̂d la gwɔ́ tà fó lejʉ́ŋ Ábalam ńgʉa, Cʉ̀apʉ̀a gɔɔn né Ábalam ngie: «Fó jʉʼ gie ɔ̀ tyé wó lɛ̂, ńnáʼa ḿbʉʼʉ twó ɔ́, ńdíe shÿó kwóŋ, ńdíe shÿó ntsíŋ, ńdíe shÿó sǎʼnèm ńgÿo shÿó mbyěnèm. 15Ngwòŋ gẅie ɔ̀ gyá lɛ̂, m bǔ ńná né gù ndàʼndàʼ, tà mbɔɔ né ngẅɛ̀ jù. 16N ge gÿo ngẅɛ̀ jù gyɔ́ɔn páʼ pfepfɔ́b; tà ngwɔ́ gie á la gwéʼe péʼe ńgwɔ́ gie ngwɔ́ mé sáŋa pfepfɔ́b, mbà ngwɔ́ mé sáŋ ngẅɛ̀ jù jú. 17Lo, pú ńgiŋte tsɛ̀ɛ láʼ jʉʼ ntsèm, á nue n ge gÿo ná né gù.»
18Ábalam pâ pʉ̀a pé tsɔ́ʼte mentàb mɔ́b, ńdɔg ńgʉa ne Mamlé á tsɛ̀ɛ pàga láʼ Embeloŋ, ńkwɛ́. Á gwɔ́ tsɔ́ jʉʼ gie tsɔ́ metÿǒ mie ée páʼ tÿǒ gʉ́m, mé tóŋ lê shÿɛ̂n ée wó. Ḿbiŋ ńkwɛ́ɛ jʉʼʉ lenuŋé pwɔʼ Cʉ̀apʉ̀a wó.
Currently Selected:
Nzyeté 13: nnh
Highlight
Share
Copy
Want to have your highlights saved across all your devices? Sign up or sign in
© 2026, CABTAL
Nzyeté 13
13
1Ábalam la gwaa fó Egíbtò, é piŋ né Nengɛb, pɔ́ nzwě wé gwɔ́. À la gwaa fó wó piŋ púʼu, ńgẅiin kɔ̀ɔkɔ́ɔ gie áa yé. Lɔ̂d la gíŋe ńgwɔ́ yé nùɔ.
Ábalam pɔ́ Lɔ̂d fegé
2Ábalam laa ngàŋa mmó. À la gẅiin memǎa menùɔ menɔ̀ɔn, ńgẅiin nkáb tɛʼ, ńgẅiin tʉ̌ ngɔ̂ɔ. 3À la fó Nengɛb ńgiŋe ńzẅɛte tà ńdáʼ ńkúu Mbetɛɛ, á jʉʼ gie à la zɔɔn ńnéŋe wó, á gwɔ́ tsetsɛ̀ɛ Mbetɛɛ pɔ́ Ayî, 4Ajʉʼó ŋwɛ́ gwɔ́ jʉʼ gie à la pwóon jʉʼʉ lenuŋé pwɔʼ wó, ésẅíŋte Ssé jʉʼó, ńtóŋo yé lê «Cʉ̀apʉ̀a.»
5Lɔ̂d gẅie pɔ́ Ábalam laa kwò, la gíŋe ńgẅiin yé menùɔ menjʉ̀njÿò, ńgẅiin nùɔ mvfó tà mbɔɔ nùɔ mefòŋ; á la gíŋe ńgẅiin kwàʼ mé mentàb. 6Pɔ́ la te gíŋe ńkuʼu létsẅé tàʼa jʉʼ wɔ́, ńtí nue pʉ̀a mesoŋ laa ssé tà ńgyɔ́ɔn, menùɔ menɔ̀ɔn gíŋe ńgwɔ́ yɔ́b ssé tà ńgyɔ́ɔn tà legǐŋ ńteme jʉʼ ńtsẅé, à te gíŋe ńgwɔ́ wó wɔ́. 7Púʼu la, ndʉʼʉ́ndʉʼʉ́ gÿo ńkẅɛɛ tsetsɛ̀ɛ papféle menɔ̀ɔn pe Ábalam, pâ pe Lɔ̂d. Epʉ̀a Kánàhan pâ pʉ̀a Pelísè laa fʉʼó ŋwɛ́, ḿbú ńtsẅé pɔ́ ngwòŋ Kánàhan. 8Á cʉa púʼu, Ábalam gɔɔn né Lɔ̂d ngie: «Shúshu, n te ne ńkwoŋo ngie cÿɔ́g gwɔ́ tsetsɛ̀ɛ pɔ̀gɔ, tà mbɔɔ tsetsɛ̀ɛ papféle menɔ̀ɔn pɔ́gɔ̀ wɔ́; ńtí nue pɔ̀gɔ gwɔ̌ pɔ́ mefɛ̌. 9Ngwòŋ é wɔɔn ńké ńtyé tyé, kaŋa jú jʉʼ ńnéŋe wó: ɔ̀ lɔɔn ńdɔg ye gwoŋó pwó kyɛ̀bɛ, mbà mèŋ n ge lɔg ye gwoŋó pwó tʉ̀, ńdɔg ye gwoŋó pwó tʉ̀, mbà mèŋ n ge lɔg ye gwoŋó pwó kyɛ̀bɛ.»
10Ábalam gɔɔn púʼu, Lɔ̂d maʼa lejÿɔ́g, ńdíe, ńgyá páʼ kwòŋo tàʼ ntse Juundʉŋ pú ńgÿo, eshúm kwɔ́ʼɔ jʉʼó púʼu tà ńkúu Tsowa. Cʉ̀apʉ̀a la gwaa pyága Tÿǒsoŋo Sondɔm pɔ́ tÿǒsoŋo Ngomɔɔ, akwòŋo tàʼ ntse Juundʉŋ gwɔ́ páʼ nkáʼa Cʉ̀apʉ̀a, ńdɔgɔ ńgwɔ́ páʼ akwòŋo ye tàʼ ntse Nílè tsɛ̀ɛ ngwòŋ Egíbtò. 11Lɔ̂d gyá púʼu, ńdeen ḿbú ńkaŋa yɛ̌ gwǒŋ, ńtsɔ́ʼte mentàb mé, ńdɔg ńgee shÿó sǎʼnèm. Wɔɔn lɔg ńgwɔ́ páʼ Ábalam pɔ́ Lɔ̂d la fege púʼu. 12Ábalam zso jʉʼ gie à ka néŋe wó Kánàhan. Lɔ̂d gʉa, ńkwɛ́ mentàb mé ngʉ̀ŋe metÿǒsoŋ shÿó Juundʉŋ; mentàb mé ŋwɛ́ gʉa gʉa ńkúu tÿǒsoŋo Sondɔm. 13Panéŋe tÿǒsoŋ ŋwɛ́ lɔ́ɔn ḿbú fʉʼʉ menò tepòŋ tɛʼ, ńdɔgɔ tsẅé tepòŋ gie pɔ́ gẅiin, éfʉate menò mvfò Cʉ̀apʉ̀a.
14Lɔ̂d la gwɔ́ tà fó lejʉ́ŋ Ábalam ńgʉa, Cʉ̀apʉ̀a gɔɔn né Ábalam ngie: «Fó jʉʼ gie ɔ̀ tyé wó lɛ̂, ńnáʼa ḿbʉʼʉ twó ɔ́, ńdíe shÿó kwóŋ, ńdíe shÿó ntsíŋ, ńdíe shÿó sǎʼnèm ńgÿo shÿó mbyěnèm. 15Ngwòŋ gẅie ɔ̀ gyá lɛ̂, m bǔ ńná né gù ndàʼndàʼ, tà mbɔɔ né ngẅɛ̀ jù. 16N ge gÿo ngẅɛ̀ jù gyɔ́ɔn páʼ pfepfɔ́b; tà ngwɔ́ gie á la gwéʼe péʼe ńgwɔ́ gie ngwɔ́ mé sáŋa pfepfɔ́b, mbà ngwɔ́ mé sáŋ ngẅɛ̀ jù jú. 17Lo, pú ńgiŋte tsɛ̀ɛ láʼ jʉʼ ntsèm, á nue n ge gÿo ná né gù.»
18Ábalam pâ pʉ̀a pé tsɔ́ʼte mentàb mɔ́b, ńdɔg ńgʉa ne Mamlé á tsɛ̀ɛ pàga láʼ Embeloŋ, ńkwɛ́. Á gwɔ́ tsɔ́ jʉʼ gie tsɔ́ metÿǒ mie ée páʼ tÿǒ gʉ́m, mé tóŋ lê shÿɛ̂n ée wó. Ḿbiŋ ńkwɛ́ɛ jʉʼʉ lenuŋé pwɔʼ Cʉ̀apʉ̀a wó.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2026, CABTAL