Mishingo 22

1“Banakwaina namatate, iwhani kuzwilwila kwangu kwandimuta mbeli kwenu.” 2Pabakawha kuti umulebeleka nabo mululimi lwechiHebhelu, bakawhilijila kasa. Iye wakati,

3“Imi ndinJuda, ndakazwalilwa kuTasusi muSilisiya, koga ndakakubusilwa munelino iguta mudako lyaGamaliyeli, ndikalayijwa munzila indemu inosimatija mulawo wamatate edu, ndakasungwalila Mwali sezwamuli mose nezhuba lyanasi. 4Imi ndakayangatisa banhu beNzila yeyi kuswikila kulufu, ndibasunga akale ndibasenga muntolongo bose banhulume nabanhukaji, 5untebuji unkulwana negota lyose lyabakulwana lingapa busumikiji nozwo. Kuva kunaibo ndakawana iwhalo jokunda kubanakwaina, akale imi ndakatola lwendo lwokunda kuDamasikasi kunotola yabo, bakabeli kwakale ndibabuza bakasungwa kuJelusalema kuti bojiijwa.

Paulu unolebeleka nokushanduka kukwe

(Mishingo 9:1-19; 26:12-18)

6“Ndili mulwendo lwangu akale ndabapelyo neDamasikasi, masikati makulwana, kwakandiswikila kupenya kukulwana kwakabeva kudenga. 7Ndakawila pasi ndikawha iwhi liti kwandili, ‘Saulu, Saulu! Ini undiyabisa Imi?’ 8Ndakashandula nditi, ‘Ndiwi ani, Tezi?’ Iye wakati kwandili, ‘Ndimi Jesu wokuNazaleta, waukumujiija.’ 9Ngweno yabo bakabeli nami bakabona lupenyo koga abajakawha iwhi lyoyo wakaba elebeleka kwandili. 10Imi ndakati, ‘Nditeni biya Tezi?’ Tezi wakati kwandili, ‘Nyamuka, unde muDamasikasi, kwakaleko unonobujwa zwose zwaulomisilwa kuti ute.’ 11Ndisichinobona pezhulu pokupenya kwakatikana, imi ndakabhatwa luboko nabo bandakaba ndilinabo tikanongwina muDamasikasi.

12“Umwe unowhi Ananiyasi, unhulume ulodimbwa zwechokomende mumulawo, elebelekwa nezwizwe zwibuyanana nabaJuda bose bakaba begala yomo, 13wakezha kwandili akama pelyo nami akati kwandili, ‘Mwanakwaina Saulu, bona!’ Pakalepo ndakava ndabona, naiye ndikombona. 14Wakati iye, ‘Mwali wamatategulu edu wakakumisila kuti iwi uzibe kuda kukwe, kuti umbone Iye wakalulama akale uwhe iwhi linova mundomo mumwe, 15nokuti iwi unoba unsumikiji uwe kubanhu bose wezwose zwawakabona nokuwha. 16Nokudalo, uchilomililani? Nyamuka ubhabhatizwe luchinyo lulo lushambiswe, ushoba izina lilye.’

Paulu unoshobwa kunopupulila Bokuzhe

17“Pandakati ndabuya kuJelusalema, ndili mukunamata ndili muTempeli, ndakaba sonhu umulota, 18ndikombona eti kwandili, ‘Kambijisa ubhude muJelusalema, nokuti abatobutambula busumikiji bubo pezhulu pangu.’ 19Imi ndakati, ‘Tezi, ibo bomene banoziba kuti ndakababiga muntolongo ndikaloba mumasinagogo yabo baludimbwa kunamwi. 20Akale ilopa lyaSitivini unsumikiji wuwo, palyakakutulwa, namibo ndakaba ndilimile pelyo ndivumila, akale ndakalondota zwimbalo zwayabo bakombulaya.’ 21Wakati kwandili, ‘Nyamuka, ukwende nokuti Imi ndichakutuma kule kunaBokuzhe.’” 22Bakonwhilila kuswikilaa kunelyo iwhi, bakanyamuka benyamula mawhi abo beti, “Ngebhiswe munyika unhu wakadai! Aatokwelela kuba umpenyu!” 23Belimukushomeja nokuzyiusa zwimbalo zwabo akale beposa lukuluba mumpepo, 24untungamili wabalwi wakalaya kuti iye ebuzwe mungumba yabalwi, akale akalaya kuti eshenengulwe nokulobwa, kuti kuzibikane kuti ini zwimutisa kuti kube nezhoba. 25Koga pabakati bonsunga neminchili, Paulu wakati kuntungamili wabalwi izana wakaba elimile pelyo naye, “Zwimo mumulawo na kuti munabhe unizi weRoma akale esina undandu!”

26Paakawha yezwi, untungamili wezana lyabalwi, wakenda kuntongi akati kwaali, “Walebotani ? Yoyu unhulume unizi weRoma.”

27Nokudalo untongi wakenda akati kwaali, “Ndibuje, unizi womuRoma na!”

Iye wakati, “Eya.”

28Untongi wakashandula akati, “Imi ndakabutenga bunizi yobu nemali inji kasa.”

Paulu wakati, “Koga imi ndakazwalwa ndili unizi,”

29Nokudalo yabo bakaba, babulowumpenyengula bakabhuda pelyo naye, nontongi wakabotya, nokuti wakaziba kuti Paulu unizi weRoma akale nokuti wakaba onsunga namaketani.

Paulu mbeli kwegota

30Koga muchimuka, eda kuziba chisoko chokuti baJuda bakaba bompomela undandu weni, iye wakonsupula, akalaya batebuji bakulwana negota lyose kuti beshangane, akale iye akabuza Paulu mudako akale akomisa mbeli kwabo.

Currently Selected:

Mishingo 22: LTP

Highlight

Copy