Luke 1
1
Mraisam
1Mina kekiee ge, anui kakgade tei cang kelu hadung de hekwalu kera teidi, 2cidungde penui raitu gade kengaumedung nah samliakeyi kilamedung ne anuide rangkebeu nzwa eh, 3cide a ziemne de yi kera cet lulie, raitu gade maleune de ncet siakdelu eh, n dage maha aide rausiak de gai kera, yikemtingbe Theophilus, 4iciu eh ncu ledeu kebeudung de nang kesangsiakbe cilu kerane.
Duipumketeibe John de kemna ha mraikerang
5Judea deuceu gwangpei, Herod tingdau, Abijah kiria gade kegwang cingkupei ge pezi Zechariah bamla. Nah pe nau cai cingkupei Aaron leuhme gade, pe zi cai Elizabeth. 6Nah penai hangnana au Tinggwang dwade masang eh Rampaube ajadung nah zaidung pelane mzai eh kemau gah eh tetla. 7Dede penai hena gah, kedanemene Elizabeth nagahpui ge kecune, nah penai hangnana cingdi kecune.
8Nah cinzwa eh Tinggwang dwa ga pa cingku ta tei kebam dau, pe maame ratak ketei mlia ting ga, 9cingku teilung zai rehi gade, Rampaube kerecaki ga lüt eh marim kehengui ru kerane pecu dacak tei eh kedetlu.#Tet. 30:7 10Cu mina maabe pelane hegwale de marim kehengui ratak ketei tingdau kekie tei bam. 11Cidau Rampaube samgwame ge peu pecu ngau gai, kehengui recabam zetle saplu eh. 12Nah Zechariah pecu ngau kegaidau pecu kebwakdi nah kengngi pe da bamdi. 13Dede tinggimgwabe pe dage rangdi, “Zechariah, ngngi so, kedanemene n kekie kingneilu da, nah n nau Elizabeth mipeina ge ncu mna beu zie, nah nang pe zi John qu zie.” 14Nah nang n suiyisüt kecu bamlu zie, nah mina kekiee ge pecu mna kelune penui suiyisüt zie. 15Kedanemene pa au Rampaube dwade mina kemlang ge zie, nah zau mede zau kengkiengbe pa madaude sak kerabe ma, nah pe pui henabam gade de pecu Kemci Rabe ne kepui teizie.#1:15 Kubezau nah zau kengkieng tung kelak gade John Nazaritbe lie la. Cide pekie, mige kemlang sampet kegai gade pelung pelane teu Tinggwang de peudi kecu. 16Nah pa Israel napeidung kekiee ge de teunreu pwa Rampaube penui Tinggwang dage kai dai luzie. 17Nah pa Elijah rabe nah pe kengkieng gade Rampaube dwa rai gwang zie, mipeimedung lung teinreu pwa penui name dage kailu kerane nah samzai tei kemakme de kenzuime maci gage kailu kerane, ciciu eh minadung de pa Rampaube ziemne mteilwe teleilu kerane.#Mal. 4:5,6
18Pecai Zechariah tinggimgwabe dage rangdi, “Dainzwa Ih aide teigwang zielie kecu ci lulai? Kedanemene Ih au kecingme ge dida, nah a nau de cing dida.” 19Nah tinggimgwabe pe sam keli eh pe dage rangdi, “Ih au Gabriel#1:19 Gabriel: hezi pekie aide au “Tinggwang gu Kengkieng Mege”, samliakeyi paukelabe., Tinggwang dwa ga sap kelabe, nah acu ndage samliakeyi aide teu gwang rang beulo langgai lie. 20Nah ainie, nang n let gah dizie nah ma aidungde tei gwang kemaktane nang marang gailak dizie, kedanemene nang a samdung nlum kemakne, cide peting siakdau teicanglu zie.” 21Nah Zechariah de minadung kwabam, nah pa kerecaki ga bam tie kedine penui swagah bamdi. 22Dede pa mpet keludau, pa penui de resiu lu tadi nah penui pa kerecaki gade marengei ge ngauluda de eh cetlu; nah pa penui de marehidung tei lia bamdi nah maranglu mene bamdi. 23Nah cinzwa eh pa kerecaki ga cingkuta ketei ting cang dige, pa pe kilung ga gwangdi.
24Nah aipau tingbaziedung de cai, pe nau Elizabeth tetlak di, nah kei mengei ge pa pekatei mbai bamdi, 25pa rang eh, “Aide Rampaube a ziemne teigai da, acu pesui eh piegai kecu tingdau, minadung kakgade a ngam keu gidi kerane.”#Ken. 30:23
Mary Elizabeth da rwakemie
26Nah kei herok bekei#1:26 Kei herok bekei: Elizabeth tetlak kelu kei peherok bekei., Tinggwang tinggimgwabe Gabriel de Galilee ga Nazareth lie qukela namdi gage langgai, 27relei kemcipui mipei ge pe zi Joseph lie kecu, David kiriame pei, naurang tei pwa kebam pui dage kai, nah relei kemcipui zi au Mary. 28Nah tinggimgwabe peda gwang eh rangdi, “Nsuiyi lulo, Tinggwang suibepoi! Rampaube ncu ngngwa la.” 29Dede pe samdung ziemne pecu kebwakdi nah kelum kegai aide dai pai kenzwa ge bi kecu pa cet bamdi. 30Nah tinggimgwabe pe dage rangdi, “Ngngi so, Mary, kedanemene Tinggwang ncu ngau pesuilu delu. 31Nah pielo, nang tetlak luzie, nah mipeina ge de mna lu zie, nah nang pe zi Jisu qu zie.#Isa. 7:14 32Pa au disüt zie nah pecu Hutube Napei lie quzie, nah Rampaube Tinggwang pe pei David hegwangbam de pecu peu zie. 33Nah pa Jacob leuhme reu kelungta kedi tei zie, nah pe hegwangram au penli bamlak.” 34Dede Mary tinggimgwabe dage rangdi, “Ih relei kemci pui ge, cine dainzwa aiciu lulai?” 35Nah sam keli eh, tinggimgwabe pe dage rangdi, “Kemci Rabe n reu ga gwang zie, nah Hutube kengkieng ne ncu sunglu zie. Ciziemne, kemci nabe#1:35 Kemci nabe: Jisu mipui ge dade lunghlu nah cine pa mina kesang teidi. Pe pei au Tinggwang nah pa au Tinggwang Nabe. de mna lai eh kebam de de Tinggwang Nabe lie qu zie. 36Nah pielo, n kibaume pui Elizabeth, pade mipeina gede tetlakla dida pecing caine, nah aide pe ziemne kei peherok bekei dida, pecule nagahpuige lie qula. 37Kedanemene Tinggwang teigaikelak magede gahlu.” 38Ge Mary rangdi, “Pielo, Ih au Rampaube kilabepui. Nang kerang de nzwa a dage peu teigai lu.” Pecai tinggimgwabe pe dade tetdi.
39Pecai cipau tingbadung dau Mary cuhlu delwe kideutu nam, Judah namdi gega kelwa miedi, 40nah pa Zechariah kiga lütlu delwe Elizabeth de kelumgai. 41Nah Mary kelum kegai Elizabeth siu keludau, ngiena pe za kelade nsündi, nah Elizabeth da Kemci Rabe ne kepui teidi. 42Nah pa sahbak gai eh rangdi, “Nang mipuime kakgade samlampungtube pui, nah n za ga kela nade de samlampungtu. 43Nah ada aide dainzwa teilu no, ciu eh a Rampaube pui ada gwang kera? 44Kedanemene pielo, nang kelum kegai kwa siu herizi, a za ga kela ngiena de pesuiyi eh nsündi da. 45Nah Rampaube peda ma rangkedidung de teicanglu kera nlum kelube puide au samlam punglie.”
Mary lei
46Nah Mary ranggai,
“A keringria Rampaube de twala,
47nah a rabe acu rikelube Tinggwang gade pesui bamdida.#1 Sam. 2:1
48Kedanemene pa pe kilabepui hena eh kebam puide pie kegaine.
Kedanemene pielo, cu gade ceheu leune de acu samlam kepungbe pui lie eh qu zieda,
49kedanemene mapekiene ga Ngkiengtube Tinggwang a dage makedidung tei kegaine,
nah pe zi au mci,
50nah pe ngaugia au pecu rüt kelame da ceheu ge cai ceheu ge da lazie.#Lei. 103:17
51Pa pe bale makedi tei gaida;
penui mlung kecetdung ngang kelame de pa teizang dida.
52Pa hegwangmedung de penui hegwangbamdung gade gwagi dida
nah kehename de teucuh dida.
53Pa kemzeumedung de peu makeyidung le tyei nggei luda,
dede keheime de pa mta eh langgi dida.
54Pa pe ngaugia de nsung eh,
pe kilabe Israel de nghabeu da,
55pa anui peime dage rang kebeu nzwa, Abraham nah kelungta pe leuhme dage.”
56Mary au Elizabeth de keicum kenzwa ge ngngwa bamlu, nah pecai pe kilung ga cailigwangdi.
Duipumketeibe John de kemna
57Nah Elizabeth mna kerating gwangdi, nah pa mipeina ge de mnalu. 58Nah pe kidame nah pe kibaume Rampaube pe ngaugia kedi pe dage pwalia kegai ha siu luge, penui pecu ngngwa penui suisütdi.
59Ngiena lang hesetne dige, penui henanabe geurum kera gwanglu, nah penui pe zi pe pei zi leu eh Zechariah msiak zie lie bam. 60Dede pe pui keli eh rangdi, “Lak. Iciumeliene, pecu John lie quzie.” 61Dede penui pe dage rangdi, “N kibaume kakgade migede aipau zi de msiak pwa kebam gah.” 62Cidau penui pe pei dage marehidung tei gai, pa pe zi dai nsiak neu bambi keteu eh. 63Nah pa kerau kwak kielu delwe raugai, “Pe zi au John.” Nah penui pelane penui swagahdi. 64Ge zette pa pe mui ngngalu nah pe mleu nralu, nah pa marang eh, Tinggwang de twa bamdi. 65Nah penuide twagwa eh kelunghme pelane ngnyidi, nah maha aidungde pelane Judea kideutu nam pekiene ga rang gwangdi. 66Nah maha aidung siu kelu leu cidung de penui mlungdung gage kai pwa ladi eh, ranggai, “Hena aipau nade dai ketei nage zieno?” Kedanemene, Rampaube kengkieng pecu ngngwa kesanglu.
Zechariah lei
67Nah pe pei Zechariah Kemci Rabe le puipung eh cairasam rangdi,
68“Israelme Tinggwang, Rampaube de peu samlam pungkelube tei lulo,
kedanemene pa ri beuzie lie eh gwang nah pe minadung de kelilu da.
69Nah pe kilabe David leuhme gade
anui ziemne kelikelu kii ge#1:69 Kii ge: kii ge au ngkieng, kemdu, nah kengkieng rehi da. teucuhlu da
70(ndaa pe kemci caihakecime mui gade pa rangkebeu nzwa),
71anui ngauraume dade
nah anuide ngkau kelame pelane ba gade kelilu kerane;#Lei. 106:10
72anui paume de ngaugia liagai kera
nah pe kemci samkak de nsunglu kerane,
73pa anui pau Abraham dage sampet kegaide,
74anui ngauraume ba gade kelilu eh,
ngnyidi mene pe gwa teilu kerane,
75pe dwagade mci nah samsanglu kerane anui tingba zie pelane.
76Nah nang, henanabe, ncule pwa Hutube Tinggwang caihakecibe lie qu kesang zie,
kedanemene nang Rampaube dwa mie pe lampuidung mtei zielu;
77pe minadung de kelikelu maci de peu kerane
penui maudung gikebeu gade,
78anui Tinggwang ngaugia keyide ziemne aide tei luzie,
kedanemene cide ziemne kecehu gade naimiak pet eh gwang anuide ngha zie,
79kemui ga kebam nah ketsai mie kangga kelame de gi mbaalu kerane; anui pi sau pwa lungciep lampui gage sau gailu kerane.”
80Nah henanabe lungh cuh nah rabe lamde ngkienglu, nah pa Israelme mtei miakngau tei kemaktane pa hetaideu ga ladi.
Currently Selected:
Luke 1: NorthernZeme
Highlight
Share
Copy
Want to have your highlights saved across all your devices? Sign up or sign in
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
