1 Samwẹl 5
5
Ikwukwur s'echekha ch'Ubinọkpaabyi k'ifhon s'aPhilistiya
1Masẹ aPhilistiya kk'Ikwukwur s'Echekha ch'Ubinọkpaabyi avạkha atima afona. Wa abẹ avạk bẹ sẹ ana k'Ẹbẹneza, abẹ atima sẹ afona k'ofhon kwabẹ kw'okpen Ashdọd. 2Abẹ atạkha Ikwukwur s'Echekha ata achok k'ọkhapa kw'abẹ achokhu ọkha f'okpen Dagọn, abẹ achok sẹ abaanga ọkpatanwa kw'Dagọn. 3Masẹ anạng p'Ashdọd n'aphyạbh k'ekpekpebha, abẹ n'ase bẹ́, Dagọn kk'uttia ukhubha ititikha k'isisek, ma ititikha s'ikwukwur s'echekha ch'Ọvaar Ubinọkpaabyi! Abẹ abina Dagọn abe k'ibyi sẹ. 4Okhenkha, masẹ iwu ẹbạra echobha o, abẹ aphyạbh ase adạkhẹ bẹ́, Dagọn kk'adạkhẹ uttia ukhubha ititikha k'isisek, ma ititikha s'ikwukwur s'echekha ch'Ọvaar Ubinọkpaabyi! Echo kk'ẹkpaara, mbọhk kk'iphyạkha iyima ma esemachi ch'ẹchọhmma; ibukhu sẹ mạnkkeni rọ n'irikhi. 5Ẹgwọ usi, tạrr ukpira chemma k'ofhon kw'Ashdọd, ode afọhnẹja p'Dagọn o, ọbạra ode anạng adwạkh-ọdwạk o, ọnạng kw'm'ọnwa k'ọkhapa kw'Dagọn kw'm'ọbhyạrẹ k'esemachi ch'ẹchọhmma kòde.
6Wa Ọvaar Ubinọkpaabyi ọnạng anạng p'Ashdọd ọkhạnkhạmọ kwididen; ọbạra usi ikhạmana s'ibirakpo imma bẹ. 7Masẹ anạng p'Ashdọd ase idik s'itto ikhebha bẹ, abẹ aben bẹ́, “Ikwukwur s'echekha ch'ọkha f'Israẹl níbaana bẹ́, ininga dạkhẹ ittra mạna e, ukwuru bẹ́, asẹ kk'mạna, ọttạra Dagọn kw'ode ọkha famạna ọkhạnkhạmọ ọnạnga.” 8Ma wọ, abẹ ayeri adecho p'ẹkhạma ch'aPhilistiya phyibh atobha, abạbh bẹ bẹ́, “M'ansi yạn ọttạra ikwukwur nna s'echekha ch'ọkha f'Israẹl o?”
Wa abẹ abhin bẹ́, “Adira ikwukwur nnọ s'echekha ch'ọkha f'Israẹl atima afona k'ukhubha kw'Gat.” Ma wọ abẹ adir ikwukwur s'echekha ch'Ubinọkpaabyi kw'Israẹl abina. 9Okhenkha, masẹ abẹ kk'sẹ adira, Ọvaar Ubinọkpaabyi ọbạra ọnạng anạng p'Gat ikhạmana s'ibirakpo, ọbạra oge ofhon ngwọ k'ojora fididen. Usi ikhạmana s'ibirakpo imma anạng p'ofhon ngwọ, tạma k'ọgbọsẹkhẹ kpira k'adennạng. 10Ma wọ abẹ atọhmọ ikwukwur s'echekha ch'Ubinọkpaabyi afona kha Ẹkrọn.
Masẹ abẹ kk'ikwukwur s'echekha ch'Ubinọkpaabyi kw'Israẹl atima anwa k'Ẹkrọn, anạng p'Ẹkrọn atạma ẹmạng k'ẹrạng-k'ẹrạng gạgạma aben bẹ́, “Abẹ kk'ikwukwur s'echekha ch'ọkha f'Israẹl atima akwu bẹ́, abẹ akwu afhọ mạna ọttạra anạng pamạna e!” 11Wa abẹ ayeri adecho p'aPhilistiya phyibh aben bẹ́, “Tte ikwukwur s'echekha ch'ọkha f'Israẹl ibina kamạna k'ofhon, ikpa nnạm k'ofhon kw'anạng p'akhaam sẹ, ọfha nạngẹ mạna ọttạra anạng pamạna ifhọ e.” Ukwuru bẹ, wa ojora kw'obo kk'ọnyaamma k'efhonfhạr phyi-phyibh. Wa Ubinọkpaabyi ọnạngẹ anạng mbọ ọkhạnkhạmọ kwididen. 12Anạng p'uwa nạnápua aning k'ọkhạnkạmọ kw'ibirakpo, wa mmạng sabẹ agạm k'ofhon ikpir k'ẹrạng.
Currently Selected:
1 Samwẹl 5: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
