మార్కు 7

అక్కుఁయఁ కిత్తి మేర

(మత్తయి 15:1-9)

1యెరుసలేముటి వాతి పరిసయుఁయఁ నియొమిసాస్తురి జాప్నరి కొచ్చెకజాణ ఏవణి తాణ కూడివాతెరి. 2ఏవణి సిసుయఁ కొచ్చెకజాణ లగ్గెఎతి కెస్కతొల్లె, ఇచ్చిహిఁ మేరతొల్లె కెస్కకొడ్డయఁ నొరఅన రాంద తిచ్చణి మెస్తెరి.

3పరిసయుఁయెఁఎ యూదుయెఁఎ బర్రెజాణ కజ్జరి కిత్తి మేరతొల్లె కెస్కకొడ్డయఁ నొర్హిదెఁ సమ్మ రాంద తినొఒరి. 4ఓడె ఏవరి హాటపంగత హజవానటి హల్లెఁ కెస్కకొడ్డయఁ నొర్హకొడ్డఅన రాంద తినొఒరి, ఎచ్చెకెఎదెఁ ఆఎ డోకమండి కంచు మూంతయఁ ఏయుతొల్లె హోంబహఁ ఆతిఆఅ ఇల్లెతి మేరయఁ తొల్లె తాకినరి.

5ఎచ్చెటిఎ పరిసయుఁయెఁఎ నియొమిసాస్తురి జాప్నరిఎ “నీ సిసుయఁ ఏనఅఁకి కజ్జరి మేరతొల్లె తాకఅన, లగ్గెఎతి నొరఅగట్టి కెస్కతొల్లె రాంద తింజీనెరి?” ఇంజిహిఁ జీసుఇఁ వెచ్చెరి.

6ఎచ్చెటిఎ జీసు ఏవరఇఁ ఎల్లెఇచ్చెసి

“ఈ లోకు పంగతరోలెకీఁ బిత్రరోలెకీఁ మన్నరి నన్నఅఁ వరిఇ లూడయఁ తొల్లెఎదెఁ గౌరొమి కియ్యనెరి

సమ్మ, ఏవరి హిఁయఁ నంగె హారెఎ హెక్కొమన్నె.”

7ఏవరి, మణిసియఁ కిత్తి మేరాఁణి

మహపురుతి కత్తయఁలెఁ వెస్సీహిఁ

నన్నఅఁ లేనిఎ ఆరాదన కియ్యనెరి, ఇంజిహిఁ రాస్కిఆతిలెహెఁ బిత్ర రొండణి ఇట్టకొడ్డహఁ పంగత రొండణి జోలినతెరి మీ పాయిఁ యెసయా ప్రవక్త తొల్లిఎ వెస్తికత్త సరి ఆహెఎనె.

8“మీరు మహపురుతి కత్తతి పిస్సహఁ, మణిసియఁ కిత్తి మేరాఁణి అస్సీఁజెరి.”

9“మీరు మీ మేరాఁణిఎదెఁ మేర కియ్యలితక్కి మహపురు కత్తతి మెడ్డీజెరి.” 10మీ తల్లితంజితి గౌరొమి కిద్దు ఇంజిహిఁ, తంజిఇఁ ఇచ్చివ తల్లిని ఇచ్చివ దుసొని ఆనణఇఁ పాయినయి మన్నె, ఇంజిహిఁ మోసే వెస్తెసిమ. 11సమ్మ మీరు ఇచ్చిహిఁ ఇల్లె ఇంజెరి రొఒసి తల్లిని పట్టె తంజిఇఁ పట్టె సినికిహఁ, నా తాణటి మీరు పొందిని ఏనిలెఁతి సాయొమి ఇచ్చివ, “కొర్బాను” ఇచ్చిహిఁ మహపురుకి హెర్పితయి ఇంజిహిఁ వెస్తిసరి, 12మీరు ఏవణి తల్లిని కోసొమి ఇచ్చివ తంజి కోసొమి ఇచ్చివ ఏని కమ్మ కివికిఒరి. 13మీరు మీ కజ్జరి కిత్తి మేరాఁణి అస్సీనక్కి మహపురు బోలుతి హెల్లఅరేటు కిహీఁజెరి, ఓడె ఇల్లెతఅఁ హారెఎ గడ్డు మీరు కిహీఁజెరి ఇంజిహిఁ వెస్తెసి.

మణిసిఇఁ లగ్గెఎ కిన్నయి

(మత్తయి 15:10-20)

14ఎచ్చెటిఎ జీసు జన్నలోకుతి తన్ని తాణ హాటికిహఁ “మీరు బర్రెతెరి నాను వెహ్ని హాడ్డ వెంజహఁ అర్దొమి కిహకొడ్డదు. 15పంగటి బిత్ర హజ్జహఁ మణిసిఇఁ లగ్గెఎ కిన్నయి ఏనయివ హిల్లెఎ. 16సమ్మ, బిత్రటి పంగత వానయిఎ మణిసిఇఁ లగ్గెఎ కిన్నె, క్రియుఁ మన్నరి వెంజలి ఆడినెరి” ఇచ్చెసి.

17జీసు, జన్నలోకుతి పిస్సహఁ ఇజ్జొ వయ్యలిఎ, ఏవణి సిసుయఁ ఈ పుస్పొని పాయిఁ ఏవణఇఁ వెచ్చెరి. 18జీసు ఏవరఇఁ ఇల్లె ఇచ్చెసి “మింగె ఓడెవ అర్దొమి ఆహాజెఎకి? పంగటి మణిసి బిత్ర హన్నయి ఏనయివ ఏవణఇఁ లగ్గెఎ కియ్యలి ఆడ్డెఎ ఇంజిహిఁ మీరు తెల్హకొడ్డలి ఆడ్డిలొఒతెరికి? 19ఏది ఏవణి హిఁయఁత హోడఅన బండి బిత్ర హోడ్డహఁ గోలి కుగ్గినట్టి పంగత హోచహన్నె” ఇంజిహిఁ వెస్తెసి, ఇల్లెకీఁఎ తిన్ని రాందకూడ బర్రె నెహఁఇఎ ఇంజిహిఁ పుఁణ్బికిత్తెసి.

20“మణిసి బిత్రటి పంగత వాన్నఇఎ మణిసిఇఁ లగ్గెఎకిను. 21బిత్రటిఎ, ఇచ్చిహిఁ మణిసి హిఁయఁ బిత్రటి పంగత వానఇ లగ్గెఎతి ఒణ్పుయఁ దారికిన్ని కమ్మయఁ డొఙఆనఇఁ, 22లోకుణి పాయిని ఒణ్పు, సానిరేని ఒణ్పు, జూప్కఆనయి, గొర్బొ, కర్బి, ఈర్స, డాహ్రి, పగ్గ, మహపురుఇఁ దుసొవి ఆనఇ, బొడ్డొపొణొ ఆనఇ వాను. 23ఈ లగ్గెఎతఇ బర్రె బిత్రటిఎ పంగత వాహఁ, మణిసిఇఁ లగ్గెఎకిను” ఇంజిహిఁ జీసు ఏవరఇఁ వెస్తెసి.

సురో పెనికయతి ఇయ్యని నమ్మకొము

(మత్తయి 15:21-28)

24జీసు ఎంబటిఎ, తూరు సీదోను జాగత రో ఇజ్జొ హచ్చెసి, తాను ఎంబఅఁ మనిలెహెఁ ఎంబఅరివ పుంజఅపెరి ఇంజిహిఁ ఏవణి ఒణ్పు, సమ్మ ఏవసి ఏవరఇఁ తోంజఆఅరేటు మంజలితక్కి ఆడ్డఅతెసి. 25లగ్గెఎతి ఆత్మ బ్డూతి ఊణ మాంగని గట్టి రో ఇయ్య జీసు పాయిఁ వెచ్చె ఇంజహఁ, రేటుఎ వాహఁ ఏవణి పఅనాణ రీతె. 26ఏ ఇయ్య సురోపెకయ రాజిత జర్నఆతి గ్రీసు దేసతయి, ఏది తన్ని మాంగని తాణటి ఏ బూతొతి పేర్ము ఇంజిహిఁ ఏవణఇఁ బతిమాలితె. 27ఇంజహఁ జీసు ఏ ఇయ్యని ఇల్లె ఇచ్చెసి ఊణ కొక్కరి పోదయఁ తొల్లిఎ బండి పంజినయి మన్నె, ఊణ కొక్కరి పోదయఁ రాందతి కొడ్డహఁ నెస్కతక్కి మెత్నయి నెహిఁ ఆఎ ఇచ్చెసి.

28ఇంజాఁ ఏ ఇయ్య ఎల్లె ఇచ్చె ఏదికోఁ అస్సులెఎ ప్రెబు, ఇంజహఁ నెస్క డాల్కవ బల్లె డొఇక మంజహఁ, కొక్కరిపోదయఁ త్రొక్ని రొట్టె గండ్రాణి తిన్నుమా ఇంజిహిఁ జీసుఇఁ వెస్తె.

29ఏదఅఁతక్కి జీసు ఏ ఇయ్యని ఇల్లె ఇచ్చెసి ఈ హాడ్డ వెస్తి పాయిఁ హల్లము, బూతొ నీ మాంగని తాణటి హోచహచ్చె ఇంజిహిఁ ఏ ఇయ్యని వెస్తెసి.

30ఇంజాఁ ఏ ఇయ్య ఇజ్జొ హజ్జలెఎ, తన్ని మాంగని బూడ్హ మచ్చి బూతొ హోచహజలిఎ కట్టెలి లెక్కొ హుంజాసణి మెస్క హచ్చె.

జీసు బేర గుల్లఇఁ నెహిఁకినయి

31జీసు ఓడె తూరు, సీదోను జాగతి పిస్సహఁ దెకపొలి రాజి కుఇటి గలిలయ సమ్దురి దరి వాతెసి. 32ఎచ్చెటిఎ ఏవరి కీర్కవెనఅ గట్టి గుల్లఇఁ జీసు తాణ తచ్చిహిఁ వాహఁ, ఏవణి ముహెఁ నీ కెయ్యు ఇట్టము ఇంజిహిఁ బతిమాలితెరి. 33ఎచ్చెటిఎ జీసు ఏ లోకు తాణటి ఎట్క ఓహఁ, ఏవణి కీర్కాణ తన్ని వంజు ఇట్టహఁ, హూపహఁ, ఏవణి వెందొరితి డీగితెసి. 34ఇంజాఁ హాగుబక్కి మూంబు పెర్హాఁ నిట్టూర్చి, “ఎప్పతా” ఇంజిహిఁ ఏవణఇఁ వెస్తెసి, ఏ హాడ్డతక్కి “దెప్పిఆము” ఇన్ని అర్దొమి.

35ఎచ్చెటిఎ ఏవణి కీర్క దెప్పిఆతు, ఏవణి వెందొరితి ఈఁణయఁ తియ్యహఁ నెహిఁకిఁ జోలలి మాట్హెసి. 36ఎచ్చెటిఎ జీసు ఈదఅఁతి ఎంబఅరఇఁవ వెహఅదు ఇంజిహిఁ ఏవరఇఁ వెస్తి ఉప్రె ఏవరి హారెఎ గడ్డు ఏదఅఁతి వేంగి కితెరి. 37ఈవసి బర్రెతి నెహిఁ కిత్తెసి, బేరయఁ వెన్నిలెహెఁ గుల్లయఁ జోలినిలెహెఁ కిహి మన్నెసి ఇంజిహిఁ వెస్పిఆతెరి ఇంజాఁ హారెఎ కబ్బఆతెరి.

Currently Selected:

మార్కు 7: JST25

Highlight

Copy