Yelemiya 3
3
Waizilaeli shiyo wakweli
1Zumbe Mulungu aghamba ivi, “Mghoshi akimueka mkazie, na uyo mvyee akaghuighwa ni mghoshi mtuhu, ivi uja mghoshi hadaha kumuuiya vingi mkazie. Kwa kughoshola ivyoho, shi heimtamile Zumbe Mulungu vigima. Miya iwe shi ya Izilaeli, uzaghoshola ukilanga na wangi na iviaha ukunda uniuiye! 2Welela kwe ntui za miima kwa laviiza ntogoo. Ivi kuna hantu mushivikileho mulungu? Mwaikala nkanda ya sia, sa mntu mbada mweghojeeza wantu mwe ughongo awahoke vintu. Muzaieka shi ishekundwe ni Zumbe Mulungu kwa mbuli ya ukilanga wenyu. 3Nee vyeleka fua izagwiwa, na fua za vui hezigwee. Mu sa wakilanga washinawo shoni.
4“Viviushe du nee ukiniiiya ukighamba, ‘Iwe utate angu, nee ukinikunda kuanduka nii mnkebe. 5Heukwewe ni maya kale, heuniihiwe imi kale.’ Izilaeli, ivyo nee ulongievyo miya uzaghoshola uhuza wosheni udahiewo.”
Izilaeli na Yuda shuti wavoteke
6Mwe ugholokezi wa zumbe Yosia, Zumbe Mulungu aanighambia ivi, “Uzaona Izilaeli ashiye mkweli aghosholevyo? Aanieka, akakwea mwe miima mitai na kuita shi ya kia mti wena mani maishi, akavika mulungu mituhu uko. 7Imi nafanyanya kuti, akibinda kughoshola mbuli zoshe, neaniuiye. Miya doo, haniuiye. Yuda umbuje ashiye mkweli, aaziona izi mbuli zosheni. 8Yuda aaona nikimnka Izilaeli talaka na kuwausha kwa mbuli ya kunihituka na kuvika mulungu mituhu. Miya Yuda umbuje ashiye mkweli, haaogohe. Yohena akahimba kuvika mulungu mituhu, 9kwa kuti kuvika mulungu mituhu kwa Izilaeli nee ni mbuli ndodo kwa Yuda. Kwa ivyoho ushe wantu wa Yuda wakahimba kuvika mawe na miti na kuighalusha shi iituke hantu hashitamaho kumvika Zumbe Mulungu. 10Hang'we na izo mbuli zoshe, Yuda umbuje ashiye mkweli haniuiye kwa ukweli, miya kwa lufyo du.”
11Zumbe Mulungu akanighamba, “Izilaeli ashiye mkweli akubalika kunivika kuiko Yuda mwena lufyo. 12Hita ukalonge na Izilaeli umti, ‘Iwe Izilaeli ushiye mkweli, uya. Imi senikuwelele kwa maya kwa kuti nina mbazi, seniituke na maya ya kale na iwe.’ 13Iwe voteka du kuti uzanihituka imi Zumbe Mulungu, Mulungu wako na shi ya kia mti wena mahungo maishi uzavika mulungu mituhu na hutegheleze kanwa changu.”
14Zumbe Mulungu aghamba, “Uyai inywi wantu mushiwo wakweli, kwa kuti inywi mu wantu ywangu. Nenighue mntu mng'we kulawa mwe kia mzi, na wantu waili kulawa mwe kia kolwa, niwauze mpaka muima Sayuni. 15Neniminke wagholokezi weniiva, ndiwo wamigholokele kwa unyanyi na viugho. 16Mishi iyo mukizamema na kughenea mwe shi, wantu hewajiange vingi sanduku jangu ja kilagha. Hewajifanyanye wala kujifukila, hewajikunde na hewaghoshole tuhu. 17Mwe iyo mishi, mzi wa Yelusalemu newiitangwe ‘Kiti cha Uzumbe cha Zumbe Mulungu’ na mbali zoshe neziunganyane uko Yelusalemu zinivike imi. Hewaghoshole kwa utii wa myoyo yawe. 18Mwe iyo mishi, wantu wa Yuda newaituke hang'we na wantu wa Izilaeli, wosheni newalawe mwe shi za kasikazini na kuuya mwe shi niwainkileyo wa ishe zenyu iituke shi yawe ya kale.”
Wantu wa Zumbe Mulungu watavika mulungu mituhu
19Zumbe Mulungu aghamba ivi,
“Izilaeli, nikundie nikukunde iwe sa ng'wanangu,
nikundie nikunke shi yeozoka, yetama kwa kuima na kushugha kuiko shi yoyoshe.
Nikundie uniitange tate,
na ungesheeka kuituka hang'we naimi.
20Miya sa mvyee ashiye mkweli kwa muume,
nee mushozievyo ukweli kwangu imi inywi wavyawa wa Izilaeli.”
Imi Zumbe Mulungu nizalonga.
21Kwaaivikana vuzo mwe vitui vikazu vya miima,
Waizilaeli waaiya na kusigiiya,
kwa kuti wazaikala kwa kughoshola uhuza
na wazamjaa Zumbe Mulungu wawe.
22Uyai inywi wana muekiewo kunitegheleza,
nenimihonye na kumigheusha wakweli.
Nenywi mwaghamba, “Welela ishwi titakuuiya, kwa kuti iwe niweyo Zumbe Mulungu, Mulungu lweshu. 23Kweli tizakilufya kuvika mulungu mituhu kwe miima. Kweli uvunizi wa Izilaeli uwanduka na kwa Zumbe Mulungu ye ike du. 24Kwa kumvika Baali zumbe atieteeye shoni kuzatieka ishwi tiaze vintu vyetu vyaondeezwavyo ni baba zeshu kwa kughoshola ndima kuanduka kale, mafyo ya ngoto, ng'ombe na wana wawe wa kimbwanga na wa wakindee. 25Shuti tikilaze he shanga kwa shoni, na kueka shoni yeshu itighubike. Ishwi na baba zeshu tizaghoshola uhuza mwe mesho ya Zumbe Mulungu lweshu kuanduka tiike wabwanga mpaka ivi lelo, wala hetamtegheleze Zumbe Mulungu lweshu.”
Currently Selected:
Yelemiya 3: SHBV
Highlight
Share
Copy
Want to have your highlights saved across all your devices? Sign up or sign in
The Old Testament in Shambala, @The Word for The World International, and Shambala Language translation. All rights reserved.
