YouVersion Logo
Search Icon

लुका आव किताप ज्युङला रो:रं

आव किताप ज्युङला रो:रं
लुका टोबो सा:रौ न्यामला लेव चाव सोरला चार गोटा कितापरंलाम टोबो किताप ची। आलं येसु ख्रीस्टलो उजीबनलो बर्नन डोसिव ले। नो स्यान्टैरंलाई “गोस्पल” डासिये आवलो ओमाने “चाव सोर टाये” आव कितापरं येसु उसिव छिन्डे मत्ती, मर्कुस, लुका सोनो युहन्नाराई यासोरो ची। लुकाये येसुलो उजीबनलो कठा याज़ ओसोरो माङ्कची, बुरु हो सिडे ज्युङडा ओटाव झिन्डे उसिसराई याडोव ये:नलो ओबारेलं पनि टोबो किताप ओसोरो, आव कितापलो उमिन प्रेरितराई याये:न ची। आव लुकाये ओसोरो चाव सोर ठ्याक्क खर्क, काङ सर्सिव आवलो ओबारेलं काङ्कालाई पनि ठा माले। हैनि पनि भ्या परिव मीराई ऐवार्रये येसु उजर्मिवकाम सहतंर बर्स छिन्डे आव किताप सर्सिव टाव ढुव।
आव किताप सर्ने लुका टोबो बैड लेव। जो झैडे होये आव किताप ओसोरो होकाम जो पाङङाम ओसोरो हो अनंसार आव ठा टाये, लुका टोबो भ्या परि:व मी लेव। लुकाये येसुलो उजीबनला रो:रं सहि सर्ने कोसिस डाडेनोयो। जो घटना जोझैडे ओटाव हैजैडेज़ सर्ने कोसिस डाडेनोयो, कडालेकं नोलो ओबारेलं परि:डे उरुरंलाई फाइडा गटाकं। १:१-३ लुका यहुडी माङ्कची। कलसी ४:१०-१४ होकाम होये ऐटाव तरिकाये आव किताप ओसोरो, कडालेकं यहुडीरंकाम उरुका मीराई पनि आव गुबुझिरंकं वार्डे। जो झैडे होये यहुडीराई याचलनलाई बुझैडेनोयो होटाम आव रो: गेलाई ठा टाये।
लुकाये ओसोरो आव किताप मत्ती सोनो मर्कुस स्यानाव ले। कडालेकं नोरं हो रो:ज़ हैटाव झैडेज़ बयान डोडेनैरं। आव सोम्बऱ्याङ कितापरंलाम बप्तिस्मा याने युहन्ना उजर्मीव बारेलं स्यानटैराई भन्डा भ्या लुकाये हैवार्डे ले। छेमा सोनो प्रार्ठनाटं लुकाये भ्या जोर याडे नोयो। छेमालो ओबारेलं। अड्या ३:३; ११:४; १७:३-४; २३:३४; २४:४७ प्रार्ठनालो ओबारेलं। अड्या ३:२१; ५:१६; ६:१२; ११:१-१२; २२:३२
उरुप
अड्या १:१-४ ल लुकाये ओल ओसोरो चाव सोरलो ओबारेलं बयान डाडे कडाने ओसोरो वार्ने रो:लो ओकारन हैवार्डेले।
होकाम नोये येसु उजर्मिव बारेलं सोनो येसुये ओडोव सेवालो ओबारेलं बयान डाडेनोयो। १:५—४:१३
ओसोरो कितापलो बाङ्कि भागलं येसुये चिन्न सोनो अचम्बला ये:नरं ओडोव होकाम जो रो:रं ओपोयो होलो ओबारेलं लुकाये हैवार्डे ले। ४:१४—२१:३८
आखिरलं आखिरला नेबऱ्याङ अड्यालं येसु कैजैडे उसिव, कैजैडे ओगाडिसिव, होकाम कैजैडे सिवलाम ज्युङडा ओटाव आव रो: हैवार्ये। २२:३२

Highlight

Share

Copy

None

Want to have your highlights saved across all your devices? Sign up or sign in