Maluko 12

Mofwano gwa mogoonda gwa mizabibu ne valemi

Mateo 21:33-46; Luka 20:9-19

1Yesu aleandya khopaala nanevo kho mefwano apalaa, “Muntu yomwi alealemaa mogonda gwa mizabibu. Alepilimya logelele, ne pakhate yakhwe asembaa isima lya khonogelelya divai, ajengaa no kedindiga cha kholindelelya. Akhodishilye mogoonda ogoo kho valemi, apenee apetaa kho nse ya khotale. 2Ituungo la khokongola panaa alelapikha, aleamotoma motomami wakwe apete kho valemi evoo, ili apete amosolele viligi vemoonga vya zabibu. 3Ila valemi evoo alevamogweela no khomokowa motomami oyoo, alevamodaga patokhola khomopeela viligi vyevyensi. 4Apenee muntu wa mogonda aleamotoma motomami yoonge apete khanke, oyoo nanuyo valemi alevamokowa khwiitwe no khomonojela mpola ja nsoni. 5Ila oyoo wa mogoonda aleamotoma khanke motomami yoonge, oyoo alevamowolaga. Epo apenee aleatoma vatomami vaange vinki, vamoonga va valemi alevawakowa ne vaange alevawawolaga. 6Owamogonda aleasigelagwa no muntu yomwi topo wa khomotoma, oyoo angile mwanakwe yunaa amotogwilee. Apenee amotomaa no khopaala, ‘Amo avamokholya mwanane.’ 7Ila panaa aleapikhaa, valemi evoo alevapalana venee kho venee, khwa khopalaa, ‘Oyo amwene mosaali, lekhaa khomowolage ne osaali wakwe olaawa wisu!’ 8Apenee vamogweela, vamowolaga no khomosutya panji no mogoonda ogoo gwa mizabibu.

9“Mokhoheewa muntu owa mogoonda khanoja kee? Aliija no khovawolaga valemi evoo ne khovakhodiselya vantu vaange mogoonda ogoo gwa mozabibu. 10Mbi, mokhasoma maandekho ega?

‘Ibwe lenaa alevasiita vajeengi,

seji lawaaga ibwe ikolo la mosingi.

11Odaada Matuunda amwene anogajaa mpola eye,

nanelo la otuntumu modugo khwisu!’ ”

12Apenee, vapumya matambekho valaala va Matuunda ne valaangi va njaanga ne vakhoombi, alevamanya kete mofwano ogoo aleokhovaloma. Kho nguno angile vagema khomogweela, ila alevatungumala winki wa vantu. Apenee alevamolekha vawookha.

Kholepa khodi khwa Kaisali

Mateo 22:15-22; Luka 20:20-26

13Panaa ituungo alelakela, valaala va Vayahudi alevawatoma vamoonga wa Mafalisayo ne vantu va idale la Helode, alevamoteeya ili vamogwele kho mpola jakwe mwenee. 14Vamopetela Yesu, vamowelaa, “Molaangi, khomanyile kete ogwegwe a muntu mosoga yunaa khopalaa khapanga topo, ninga okhakhomotungumala muntu yeyensi. Kho nguno okhakunaa olaala wa muntu, okholiga ganaa Matuunda khogapogaa. Mbi a njaanga khomolepa Kaisali khodi? Ao nkha gechoo, mbi, kholepe ao khokhalepe?”

15Ila Yesu aleamanya obe wonaa alevakunelelya, avawelaa, “Kho kee mokhonteeya? Nndeteli mpia ya kechele ya dinali mbone.”

16Vamoletela eyoo mpia ya kechele ya dinali. Yesu avawolya, “Osho owo wa muntu yenaa ipwale kho mpia eye ne maandekho ega ga nanuu?” Nanevo vamowelaa, “A ya Kaisali mwami mokolo wa Loma.”

17Apenee Yesu avawelaa, “Mopeli Kaisali mwami mokolo wa Loma ganaa gakwe ne ga momopele Matuunda ganaa gakwe.”

“Alevakumyaa modugo venaa Yesu aleinasolaa pa moteyo gwawe.”

Mpola ya khofufokha khopuma khwa vachi

Mateo 22:23-33; Luka 20:27-40

18Apenee idale la Vayahudi lenaa lekhwetwaa Masadukayo, vanaa vakhopaala khotopo khofufokha khopuma khwa vachi, vamopetela Yesu no khomowolya, 19vapaala, “Molaangi, Musa aleatwandekela khowa muntu mbe achee no khomolekha mokhiima atokhola mwana, modogwakwe amosole mosimbe oyoo, ili amolelele modogwakwe vana. 20Seji angile vapwale vadogo saba. Wa mwandyo aleatola, afwaa patokhola kholekha mwana. 21Apenee modogwakwe wa owele aleasalaa mosimbe oyoo, ila nanuyo afwaa patokhola kholekha mwana. Yaawa avivyoo no kho modogwakwe wa otato. 22Khotopo ninga yomwi kho vantu evoo saba yunaa alelekha mwana. Mudugo, mokhiima oyoo nanuyo aleafwaa. 23Seji khowelee, nsiko yenaa vantu valafufokha, mokhiima oyoo khaawa mokhiima wa ananuu? Kho nguno vensi saba alevikhala nanuyo kete moliji.”

24Yesu avawelaa, “Onywenywe mwanonaga, kho nguno mokhamanya maandekho ga Matuunda ninga olaala wa Matuunda. 25Kho nguno vachi panaa valafufokha khotopo viije vatoole ninga khotoolwa, valaawa kete vatomami va khochanya pa Matuunda. 26Ila khougela vantu khofufolwa, mbi, mokhasoma kho ketabu cha Musa kete Matuunda venaa alekhopalaa no Musa kho kesakha kenaa angile kekhopya moto? Matuunda aleamowela Musa, ‘Onene ne Matuunda wa Abulahamu, Matuunda wa Isaka no Matuunda wa Yakhobo.’ 27Matuunda nkha Matuunda wa vachi, ila a Matuunda wa vantu vanaa wome. Onywenywe mwanonaga modugo.”

Njaanga nkolo

Mateo 22:34-40; Luka 10:25-28

28Molaangi yomwi wa njaanga aleapikha no khovategeela vakhopalana. Panaa aleamanya kete Yesu alevawela visoga, ipumelya, amowolya, “Kho njaanga jensi, elenkhwee yenaa njaanga nkolo?”

29Yesu apalaa, “Njaanga yenaa nkolo ayenee eye, ‘Tegeleli onywenywe vantu va Izilaeli! Odaada Matuunda wisu, amwene Odaada aleemwi. 30Motogagwee Odaada Matuunda wakhoo kho mooyo gwakhoo gwensi, kho moye gwakhoo gwensi, kho masala gakhoo gensi no kho ngulu jakhoo jensi.’ 31Ne njaanga ya owele ayenee eye, ‘Motogagwee wa pepi wakho kete venaa witogwile ogwegwe.’ Khotopo njaanga yeenge yenaa nkolo khokela eje.” 32Oyoo molaangi wa njaanga amowela, “Molaangi! Wapalaga visoga kete Matuunda a yomwi topo ninga khotopo yoonge ila mwenee. 33Mpola eye a nsoga, khomotogwa Matuunda kho mooyo gwensi, kho masala gensi ne kho ngulu jensi ne khomotogwa wa pepi wakwe kete venaa witogwile mwenee. A visoga khomopumelya Matuunda sadakha ja matambekho ya khotimwa ne ja matambekho gensi.”

34Yesu panaa aleawona muntu oyoo, aleamowela khwa omanyi, amowela, “Ogwegwe ole pepi ne wami wa Matuunda.” Khwandelya epoo, khotopo muntu yunaa aleagemaa khomowolya khanke mpola jejensi.

Kilisto yunaa aleasagolwa no Matuunda a mwana wa nanuu?

Mateo 22:41-46; Luka 20:41-44

35Ituungo panaa Yesu angile kholigaa kho nyoomba Matuunda, aleavawolya, “Mbi valaangi va njaanga, vakhopaala kete Kilisto a Mwana wa mwami Daudi? 36Kho nguno Daudi mwenee khwa khongolwaa no Moye wa Matuunda, aleapalaa,

‘Mwene Matuunda waane, ikhalaa kho lwande lwaane lwa molyelo.

Mpakha panaa ndavatula vanyambuda vakhoo,

panse ya megolo jakhoo.’ 37Mbe Daudi mwenee khomwetaa ‘Mwene.’ Kho gechoo khakhowola Kilisto awe Mwanakwe?”

Yesu khovawela vantu vikhale miso ne valaangi va njaanga ja Musa

Mateo 23:1-36; Luka 20:45-47

Idale la vantu alevakhomotegelelya Yesu kho nsekho. 38Yesu kho malaangi gakwe, aleapalaa, “Ikhalagi miso ne valaangi va njaanga ja Musa, evenee vatogwile khogenda oko valyalaga myenda metale nokhotogwa kholamochwa khwa khokoliwa kho lwande jenaa vantu vakhwikhongan'yaa, 39ne panaa vakhopeta kho nyoomba ya khwitangela Vayahudi, angile vakhotogwa khwikala vegoda vya valaala, no kho lwande ja khokoliwa kho weenga. 40Vakhovakhosha kosha vasimbe no khosola nsawo vyawe, ne ili viigele vasoga, vakholoomba malombi matale. Vantu ewa valapelwa matengemekho makolo.”

Sadakha ya mokhiima mosimbe

Luka 21:1-4

41Yesu aleikhalaga khwa khukunana ne sandekho la witolelya sadakha. Awaa khokunaa venaa vantu vinki vakhopumya nsawo ne khojetola kho isandekho eloo. Vasawi vinki alevakhopumya mpia nyinki. 42Epoo aleiija mokhiima yomwi mosimbe yunaa mopeena, aleapumyaa mpia jewele ja kechele ja shaba jenaa alejekhakhwela khogolela vento vesoga. 43Epoo Yesu avetaa vahemba vakwe, avawela, “Khapanga nkovawelaa, mokhiima oyoo mosimbe yunaa mopeena amwene yunaa apumaja sadakha yenaa nkolo khokela vantu vensi. 44Kho nguno vaange vensi alevapumya masigilo ga nsawo jawe, ila mokhiima oyoo mosimbe ninga venaa mopeena apumya vyensi venaa aleatite ninga kenaa khosololela kho nguno ya opanga wakwe.”

Currently Selected:

Maluko 12: NTKIBL2025

Highlight

Copy