Johane 4
4
Yesu neNkadzimayi weku Nsamariya
1Sangwenu Yesu wakati aziba kuti baFarisi bawha kuti Yesu waka eyeta kakale ebvubika badiyiwa banji kupinda Johane, 2(nekutobe Yesu tjekukwe waka asingabvubike, koga kubvubika badiyiwa babe), 3wakati atjiwha ikoku akabva muJudiya akayenda kakale kuGalile. 4Kwakakwakafanila kuti apinde nemuSamariya.
5Ndizo wakaswika kunzi-nkulu weSamariya, unoyi Sayikha, pedlo neminda yaJakobe yaakapa nkololo uwe Josefa. 6Kwaka kuna tshime laJakobe ipapo, ndizo Yesu, anyala nentha yegwendo, wakagala ntome kwetshime. Kwaka kuli masikati, kungaba lubaka gwe awa yebutanhatu kubvisila hhuba libhuda.
7Kwakaswika nkadzimayi wekuSamariya ewhotjela vula. Yesu wakati kuwunli, “Undin'wise.” 8Ngobe badiyiwa babe bakabayenda kunzi-nkulu benotenga zodliwa.
9Nkadzimayi weNsamariya wakati kuwunli, “Ngentha yeni mukumbila kuti ndimun'wise, imwi muliNjhuta, imi ndiliNsamariya?” Ngobe maJuta haatodlidzana nemaSamariya.
10Yesu waka wun'handula eti, “Katshene wawuziba tjipo tjeNdzimu, nekuti ndiyani unoti kukuli, ‘Undin'wise,’ wawhowunkumbila, wabe ewhokupa vula inopa butjilo.”
11Nkadzimayi wakati kuwunli, “Tate, amuna tjinhu tjamungatjela natjo, kakale tshime lakajitila, ngono vula inopa butjilo mowhoyiwana poni? 12Munkulu pana tate bedu Jakobe, ibo bakatipa tshime ileli, bakan'wa mulili ibo tjekwabo, nebakololo babo, nezwipfuwo zwabo?”
13Yesu wakati kuwunli, “Umwe newumwe unon'wa vula iyeyi unowhobe nenyota kakale, 14koga unowhon'wa vula yandinowumpa haatjowhobe nenyota kakale, vula yandinowumpa inowhoba nsenya muwunli unobvilila unoswikisa kubutjilo gusingapele.”
15Nkadzimayi wakati kuwunli, “Tate, mundipe vula iyeyo, kuti ndisitjabe nenyota kakale, nekuti ndisitjabuye ngeno ndowhotjela vula.”
16Yesu wakati kuwunli, “Yenda, unodana nlume uwo, ukobuya ngeno.”
17Nkadzimayi wakawun'handula eti, “Andina nlume.”
Yesu wakati kuwunli, “Unolebesa hapa uti, ‘Andina nlume,’ 18ngobe wakabe nebalume bahanu, newawunaye sangwenu haate nlume uwo, ipapo walebesa.”
19Nkadzimayi wakati kuwunli, “Tate, ndobona kuti munlebesambeli. 20Bobatategulu bedu baka benamata Ndzimu padombo ileli, koga imwi maJuta moti muJerusalema ndipo panabugalo gwakafanila kuti gube ipo panonamatigwa Ndzimu.”
21Yesu wakati kuwunli, “Nkadzimayi, undigalemoyo, lubaka gowhohha banhu pabasingowhonamatila Tate mudombo ileli kene iko muJerusalema. 22Imwi maSamariya monamata tjamusingazibe, koga iswi maJuta tonamata tjatinoziba, ngobe tjidziwa kobva kumaJuta. 23Koga lubaka gohha, nayiko gwatjiswika, ipapo banhu pabanowhonamata Ndzimu mumeya nemulebeswa, ngobe beli igo ludzi gwebanamati Tate babanohaka. 24Ndzimu meya, kakale banowhunamata bakafanila wunamata mumeya nemumalebeswa.”
25Nkadzimayi wakati kuwunli, “Ndoziba kuti Mesiya unohha, iye unodan'wa Khirisitu. Hapa ehha, unowhotitjenesela zwinhu zose.”
26Yesu wakahandula eti, “Imi ndinolebeleka nawe ndi iye.”
27Nayigogo lubaka badiyiwa baYesu bakaswika. Bakatjenama bewuwana elebeleka nenkadzimayi iwhoyo, koga akuna wakawumbhuzwa kuti, “Mohakani?” kene iye wakawumbhuzwa kuti, “Molebelekelani naye?”
28Nkadzimayi eba esiya hali yevula, ebgwilila kunzi-nkulu, akati kubanhu, 29“Ihhani, mubone nlume wandibudza kose kwetjinga kwandakathama. Angabe ali iye Khirisitu?” 30Bakabhuda kuhhe kwenzi-nkulu bakayenda kuna Yesu.
31Kutjakajalo badiyiwa bakabekumbilisisa Yesu beti, “Rabhi, idlani zodliwa!”
32Koga iye wakabahandula eti, “Ndinazo zodliwa zwandinodla imwi zwamusingazibe.”
33Ndizo badiyiwa bakatangisa bhuzwana beti, “Kungabe kuna umwe wawumbhatila zodliwa kani?”
34Yesu wakati kubali, “Zodliwa zwangu whuwhilila iye wakandituma nekuti ndipedze n'hingo waakandipa kuti ndiwunthame. 35Amutoti, ‘Kutjina mimwedzi mina, kukoti kohha vuna’? Ndomubudza, musani meho enyu, mulinge minda, zwidlo zwatjiyibva kuti zwivun'we. 36Unovuna unowana mibhayilo, kakale unokubunganya mitjelo yebutjilo gusingapele, kuyetila kuti ndzwali nemvuni bahanhe panhu pan'ompela. 37Matama iyawa alebeswa anoti, ‘Umwe unodzwala kakale umwe unovuna.’ 38Ndakamutuma kuti munovuna zwamusakahinga, bamwe bakahinga, koga imwi mevuna zwabakatukutilila.”
39MaSamariya manjinji anobva kunzi-nkulu iwhoyo akagalamoyo muwunli nentha yebusupi gwenkadzimayi gunoti, “Wandibudza kose kwetjinga kwandakathama.” 40Ndizo maSamariya akati ehha kuwunli, bakawunkumbila kuti agale nabo, akagala po mahhuba mabili.
41Banjinji kwazo bakagalamoyo ngentha yedama lile. 42Bakati kunkadzimayi, “Atitjagalamoyo ngentha yematama awaleba, ngobe tazwiwhila iswi tjekwedu, kakale toziba kuti iwhoyu kwelebeswa ndiye Ntjidzi wehango.”
Yesu Unotjidza Nkololo weGombgwa
43Hule kwemahhuba mabili wakamilika akayenda kuGalile. 44Ngobe Yesu iye tjekukwe waka apa busupi gwekuti nlebesambeli haana lukudzo muhango yakanyi kukwe. 45Ndizo wakati aswika kuGalile, banhu bekuGalile bakawuwamutjila, kuli kuti babona kose kwaakathama kuJerusalema kunzano wePhasika, ngobe nayibo bakabayenda kunzano.
46Ndizo wakaswika kakale kuKana muGalile, kwaaka athama vula ikabe wayini. MuKhaphenawume kwakakuna nlume ugombgwa waka egwaligwa nenkololo. 47Wakati ewha kuti Yesu wahha kuGalile ebva kuJudiya, wakayenda akanowunkumbila kuti ahhe ewhotjidza nkololo uwe, ngobe waka egwalilafa. 48Ndizo ke Yesu wakati kuwunli, “Kuhhe kwekuti mubone zwilakidzilo nemakaabadzo amungagalemoyo.”
49Gombgwa lakati kuwunli, “Tate, ihhani mwana wangu asanhu afa.”
50Yesu wakati kuwunli, “Yenda, nkololo uwo unowhotjila.”
Nlumetate iwhoyo wakagalamoyo dama lakalebgwa kuwunli naYesu akayenda zwe. 51Wakati atjimuzila, balanda babe bakawun'hanganidza bakawumbudza kuti nkololo uwe wanaya.
52Ndizo wakababhuzwa kuti lubaka ni gwaatangisa ba hine, bakati kuwunli, “Luhhahhamo gwakapela hhulo masikati, mu awa yekutondeka kubvisila hhuba libhuda.” 53Tatayi bakaziba kuti ndigo lubaka Yesu paakati kubali, “Nkololo uwo unowhotjila.” Ibo tjekwabo bakagalamoyo, kose nen'ha wabo bose.
54Yetji nditjo tjilakidzilo tjebubili tjakayetiwa naYesu paakahha kuGalile ebva kuJudiya.
Currently Selected:
Johane 4: KTP
Highlight
Share
Copy
Want to have your highlights saved across all your devices? Sign up or sign in
The Word For The World International
