Makətūbə̄ ń Pol ndang adə̄ Pilemo̰ ní 1
1
Pol rāā Pilemo̰ lápə́ya
1I mā Pol ń i dəngáy yā Jeju *Kərist ní, jḭḭ kə ngōkó̰ó̰jí Timote, jə-ndang najə̄ ń toō j-əlań j-adī ḭ̄ kó tár yājí Pilemo̰ madə̄ kəlají ō, 2ngōkó̰ó̰jí kə́ dəyá̰ Apya ō, madə̄ rɔ̄ɔ̄jí Arkipə ō, ngé kán̄ naā gə̄ kə́ kem kújə yāí tə́ ō.
3Ādə̄ Bɔbə̄jí Nə́ɓā nin̄ kə Kɔ́ɔ̄ɓē Jeju Kərist rāān̄ kem majə sesí ō, sɔlə̄n̄ kemsí ō.
Tár yā Pilemo̰ ō taā kem yān ō
4Dan ń m̄-ndɔ̄ȳ Nə́ɓā anī əga kemḿ dɔí tə́, adə̄ m̄-ndadə̄ Nə́ɓā yāḿ ngándáńg tām̄ yāí tə́. 5Tɔdɔ̄ m-ōō najə̄ tár yāí ō, taā kem yāí ō, kə́ ɔjə dɔ Kɔ́ɔ̄ɓē Jeju ō, de gə̄ yā Nə́ɓā malang ō. 6m̄-dəje Nə́ɓā kadə̄ kem kógə̄ḿ ń do̰ō̰jí naā tə́ seí kə ta kūl̄ taā kem yāí ní, rāā adə̄ ī-ger̄ yá̰á̰ kə́ majə gə̄ malang ń j-əngeī i kə ta kūl̄ ɓoojí naā kə *Kərist ní kə gōó majə. 7Tām̄, ngōkó̰ó̰ḿ, m-ə́nge rɔ̄nel̄ ngá̰ý ō, m-ə́nge tɔ́gə ō, najə̄ tár yāí tə́. Tɔdɔ̄ ḭ̄ ī-sɔl̄ kem de gə̄ yā Nə́ɓā.
Pol dəje yá̰á̰ kógə̄ḿ tām̄ yā Onejim tə́
8I tām̄ ń toō tə́ n mā ń *Kərist adə̄m̄ ta róbə kɔjiī yá̰á̰ gə̄ kə́ yā kadə̄ ī-rāā ní, 9m̄-gír̄ kadə̄ i só tə́ kadə̄ m-ə̄ndā tɔ́gə́ḿ dɔ tár tə́ m̄-rāāīneé ɓɔ́: Mā Pol ń i ɓə́ga ō, i dəngáy tām̄ yā Jeju Kərist tə́ kə̄ dɔ tə́ ɓáý to̰ ngɔlaā ō ní, 10m̄-rāāī ɓɔ́ tām̄ yā ngōnə̄ḿ Onejim ń m-ójən kə súlú jīḿ tə́ ní. 11Kété ni-teē yá̰a̰ tām̄ yāí tə́ alé, ba ngɔlaā a teē yá̰a̰ tām̄ yāí tə́, tītə̄ ń teēń yá̰a̰ tām̄ yāḿ tə́ ní.
12m̄-tél m-ə́la seneé gogə́ m-ādī, ni ń i dām̄ rɔ̄ḿ kə́rēý ní. 13Əndā kumḿ ngɔ̄mə̄n rɔ̄ḿ tə́, kadə̄ ni-rāā seḿ kum gotií, dan ń mā i dəngáyá tām̄ yā Najə̄ kə́ Majə tə́ toō. 14Banī m̄-gḛy rāā yá̰a̰ kanjə̄ koō yāí alé, yā kadə̄ kem majə yāí to tītə̄ kə́ i kə́ kɔsə seí ta rāā alé, banī i kə gō kem ndigə yāí tá.
15Majanī Onejim əya̰ī kum i ngá̰ý alé i yā kadə̄ ī-téĺ ə́ngen gogə́ ngándáńg ní, 16i kə́ ɓəlo tə́ to̰ alé, banī ni-mān̄ ɓəlo, adə̄ ni i ngōkó̰ó̰í kə́ kó tár yāí. Mə̄kɔ́ m̄-tárən ngá̰ý, ba ḭ̄ ā ī-tárən ngá̰ý aĺ naā, kə́ gō yā dā̰ rɔ̄ tə́ ō, tām̄ yā Kɔ́ɔ̄ɓē tə́ ō.
17Ré ī-rāām̄ mā i madí tə́ rɔ̄kum anī, ə́hɔn kə̄ rɔ̄í tə́ tītə̄ kə́ ə́hɔm̄ i mā nəkɔ́ kə̄ rɔ̄í tə́ beē. 18Ba ré ni-rāā yá̰á̰ kə́ gōtə́ aĺ seí, aké kə̄rā yāí i dɔn tə́ anī, ə̄ndā dɔḿ mə̄kɔ́ tə́. 19Mā Pol m̄-ndang najə̄ ń toō kə jīḿ mə̄kɔ́ na m-ā m-ə̄gā kə̄rā ní. M-ə́da i najə̄ kə̄rā yāḿ mā kə́ dɔí tə́ alé. 20A̰á̰ā̰, ngōkó̰ó̰ḿ, ī-rāā kem majə ń toō seḿ tām̄ yā Kɔ́ɔ̄ɓē tə́. Ī-rāā ādə̄ kemḿ tetə kə̄ nang tə́ kem *Kərist tə́.
21I tām̄ ger̄ kə́ m̄-ger̄ majə kadə̄ ā ōō najə̄ taḿ tə́ n m̄-ndangəń najə̄ ń toō ní. m̄-ger̄ kadə̄ yá̰á̰ ń m̄-dəjeī ní, ā ī-rāā kadə̄ mān̄ dɔ. 22m̄-dəjeī yá̰á̰ kə́ rang, i kadə̄ ī-rāā loo ndi yāḿ, tɔdɔ̄ m̄-gír̄ kadə̄ a télən̄ seḿ a adə̄n̄sí gogə́ kə ta kūl̄ ndɔ̄ȳ yāsí.
Lápə́ya kə́ ta tɔ̄l̄ ta tə́
23Epapəras dəngáy madə́ḿ kə́ tām̄ yā najə̄ yā *Kərist Jeju tə́, 24nin̄ kə madə̄ kəlaḿ gə̄ ń i Mark ō, Aristark ō, Demas ō, Luk ō ní, rāāīn̄ lápə́ya.
25Ādə̄ Kɔ́ɔ̄ɓē Jeju Kərist rāā kem majə sesí.
Currently Selected:
Makətūbə̄ ń Pol ndang adə̄ Pilemo̰ ní 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad