Makətūbə̄ ń Jakə ndang ní 1
1
Jakə rāā de gə̄ yā Nə́ɓā lápə́ya
1I mā Jakə ń i nge kəla yā Nə́ɓā ō, yā Kɔ́ɔ̄ɓē Jeju *Kərist ō ní n m-ə́la kə makətūbə̄ ń toō m-ādə̄ gír ɓē kə́ kutə̄ gidə i jōó gə̄ ń tḭ̄ḭ̄n̄ naā kə̄ dan nápar de gə̄ tə́ ní. m̄-rāāsí lápə́ya.
Taā kem ō, kum kedə̄ ō
2Ngákó̰ó̰ḿ gə̄, loo ń ré yá̰á̰ kə́ tayā tayā gə̄ a nāān̄sí anī, ī-rāāī yá̰a̰ gə̄ ń noō yá̰a̰ rɔ̄nel̄ yāsí tə́, 3tɔdɔ̄ ī-gerī kadə̄ yá̰a̰ gə̄ ń a nāān̄ taā kem yāsí noó i nin̄ n a rāān̄ tá kadə̄ taā kem yāsí a ojə tə́gā ta ní. 4Banī ī-tə́gāī tasí ngá̰ý tá kadə̄ ī-téliīneé de kə́ majə ɔtə̄ kə taá gə̄ ō, ī-nalīneé yá̰á̰ kógə̄ḿ aĺ ō. 5Ba ré deē kógə̄ḿ dansí tə́ nal̄ kum kedə̄ anī, ādə̄ ni-dəje Nə́ɓā ń adə̄ de gə̄ malang yá̰a̰ karī kanjə̄ kəda najə̄ kə́ tōr̄ dɔdə́ tə́ ní, na ni a adə̄n. 6Ba ādə̄ ni-əndā tɔ́gən dɔ taā kem tə́ dəjeń kanjə̄ kadə̄ kemən tɔ́sən. Tɔdɔ̄ nge ń kemən tɔ́sə̄n ní to i tītə̄ bəngál man̄ bā bo ń nél rāān adə̄ ḭḭ pukətu pukətu ní. 7Ādə̄ de kə́ tītə̄ ń noō lōō gír̄ kəda na Kɔ́ɔ̄ɓē na adə̄n yá̰á̰ kógə̄ḿ. 8Tɔdɔ̄ ni i de kə́ nge kem jōó. Ni-aw̄ kə̄ kété ō, a tél kə̄ gogə́ ō tū yá̰a̰ rāān gə̄ tə́ malang.
Ndoō ō, yá̰a̰ kənge ō
9Ādə̄ ngōkó̰ó̰jí kə́ nge ndoō ɔr ta rɔ̄n tām̄ kɔsə ń Nə́ɓā ɔsən kə̄ dɔɔ́ tə́ ní, 10ba kadə̄ de kə́ nge kənge yá̰á̰ ngá̰ý ɔr ta rɔ̄n tām̄ tél ń télən̄ seneé kə̄ nang tə́ ní, tɔdɔ̄ ni a mān̄ kɔ̄ɔ́ tītə̄ hútə̄ mu beé. 11Tām̄ mbang əɓa ō, néĺ kə́ təngā əla ō, anī mu tutə kɔ̄ɔ́ ō, hútən ur̄ kɔ̄ɔ́ ō, majən nujə kɔ̄ɔ́ ō. De kə́ nge kənge yá̰á̰ ngá̰ý a gətóo kɔ̄ɔ́ ta kəla yān gə̄ tə́ i tītə̄ ń noō ō.
Yá̰a̰ nāā gə̄
12Rɔ̄nel̄ i kə deē ń nāānən̄ á əhɔ sásáp ní. Tɔdɔ̄ dan ń nāānən̄ ba a̰a̰n̄ kadə̄ ni i de kə́ asə anī, a ənge ndi kə kumuú ń Nə́ɓā ənī míndən yā kadə̄ ngé gə̄ ń tárnən̄ á i *jākā mbang ní.
13Ba loo ń ré yá̰a̰ nāā deē kógə̄ḿ, ká i náā náā gə̄gē anī, ādə̄ kɔ́ɔ̄ lōō kəda na i Nə́ɓā n na nāān. Tɔdɔ̄ yá̰á̰ kə́ asə nāā Nə́ɓā kadə̄ Nə́ɓā rāā majaĺ gətóo ō, Nə́ɓā nāā deē kógə̄ḿ kadə̄ rāā majaĺ aĺ ō. 14Yá̰á̰ ń nāā deē kadə̄ a rāā majaĺ ní i ngur yá̰á̰ kə́ majaĺ kə́ kem deē tə́ ń a ndɔ́rə̄n ō, a kɔ́lən ō ní. 15Ba dan ń ngur yá̰á̰ kə́ majaĺ kə́ kem deē tə́ ní ndān̄ ngōn̄ anī, a ojə i rāā majaĺ, ba dan ń rāā majaĺ tɔgə anī a ojə i yo. 16Ngákó̰ó̰ḿ gə̄, sḭḭ̄ ń i kó tár yāḿ gə̄ ní, ī-lōōī gól̄ rɔ̄sí. 17Yá̰á̰ kə́ majə gə̄ malang ń adə̄n̄jí ní ō, kadə̄ karī kə́ majə ɔtə̄ kə taá mámák gə̄ malang ō ní, i yá̰a̰ gə̄ kə́ ḭḭn̄ i dɔ rā̰ tə́, ba teēn̄ i rɔ̄ Bɔbə̄ Ngōn̄ kə́ nge rāā loo kə́ unjə̄ kow tə́. Nə́ɓā tūr̄ aĺ ō, ni a ndɔ́tə̄ á a rāā ndíl dɔ yá̰a̰ gə̄ tə́ aĺ ō. 18Ni-ojəjí kə gō kem ndigə yānneé, kə ta kūl̄ najə̄ kə́ rɔ̄kum, ba əndājí loo kə́ kété tə́ dɔ yá̰a̰ rāān gə̄ tə́ malang.
Koō najə̄ yā Nə́ɓā ō, rāā yá̰a̰ kə gō najə̄ yā Nə́ɓāá ō
19Ngákó̰ó̰ḿ kə́ kó tár yāḿ gə̄, majə kadə̄ ī-gerī yá̰á̰ ń toō: Ī-nēlī mbīsí majə ōōīneé najə̄ láẃ, banī ɔ̄rī najə̄ láẃ aĺ ō, ī-rāāī wōn̄g láẃ aĺ ō. 20Tɔdɔ̄ wōn̄g yā deē a rāā yá̰á̰ kə́ gōtə́ yā Nə́ɓā alé. 21Tām̄ najə̄ ń toō tə́ ní ə́ya̰ī yá̰á̰ kə́ yḛr gə̄ malang ō, yá̰a̰ malang kə́ rāā kə kem nduluú ō kɔ̄ɔ́, ba najə̄ ń Nə́ɓā dubə̄ kemsí tə́ ní, ə́hɔī kə̄ rɔ̄sí tə́ majə kə sɔl̄ dɔɔ́, tɔdɔ̄ najə̄ ní asə kajəsí.
22Ī-rāāī yá̰a̰ kə gō najə̄ ní, ba ī-lōōī koō kə mbīsí ngóy. Tɔdɔ̄ ré ā ī-rāāī i beé anī, ā ī-gólī i rɔ̄sí sḭḭ̄ kɔ́ gə̄. 23Tɔdɔ̄ ré deē kógə̄ḿ i nge koō najə̄ ngóy, ba ni i nge rāā yá̰á̰ ń ədan̄ ní aĺ anī, ni-to i tītə̄ de kə́ nge ka̰a̰ kumən kə kútə́ramaá beē. 24Dan ń a̰a̰ kumən ní oy ba ɔtə aw̄ anī, kə̄ ta jī tə́ noō dɔn ndígə̄nal dɔ ta kumən ń ni-a̰a̰ tə́ ní kɔ̄ɔ́, adə̄ ni ger̄ ké ta kumən ní to i ba̰ý wa alé. 25Ba ré deē kógə̄ḿ əndā kumən gír ndū Najə̄ kə́ Majə ɔtə̄ kə taá mámák tə́ adə̄ i ndū najə̄ kə́ a rāā kə deé kadə̄ deē tél kəhɔ rɔ̄n ō, əndā rɔ̄n ta ndū najə̄ ní tə́ ō, ba i kə́ nge koō kadə̄ mān̄ kə nélé tə́ alé ba i nge rāā anī, deē ń noō a ənge rɔ̄nel̄ tū kəla rāān tə́.
26Ré deē kógə̄ḿ gír̄ kadə̄ ni i nge rɔȳ Nə́ɓā, ba ger̄ loo kəhɔ ta ndo̰n kə jámá aĺ anī, ni a gól̄ i rɔ̄n nəkɔ́: Rɔȳ Nə́ɓā yān i rɔȳ Nə́ɓā kə́ ndāńg karī. 27Rɔȳ Nə́ɓā kə́ kə gō ń Bɔbə̄jí Nə́ɓā ndigə ní, i go̰ō̰ ngán hal gə̄, kə dəyá̰ kə́ ngaa koy gə̄, dan wur kɔl yādə́ tə́ ō, i ngɔ̄m̄ rɔ̄ najə̄ yá̰á̰ kə́ yḛr gə̄ malang kə́ dɔ nang tə́ ō.
Currently Selected:
Makətūbə̄ ń Jakə ndang ní 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad