Makətūbə̄ ń Pol ndang adə̄ Galatə gə̄ ní 1
1
Pol rāā Galatə gə̄ lápə́ya
1I mā Pol ń i ngōmbang kəla yā Jeju, banī i kə gō kem ndigə yā de gēé aĺ ō, i kə gō najə̄ kə́ ta deē kógə̄ḿ tə́ aĺ ō, banī i kə ta kūl̄ Jeju *Kərist nəkɔ́ ō, i kə ta kūl̄ Bɔbə̄jí Nə́ɓā ń ndól̄ Jeju dan de kə́ koy gə̄ tə́ ō ní, 2i mā ō, ngákó̰ó̰jí gə̄ malang ń i seḿ ní ō n, j-əla kə makətūbə̄ ń toō ní. J-əlań j-ādə̄ i de gə̄ kə́ kem Egəlijə gə̄ kə́ gō nang kə́ Galasi tə́. 3Ādə̄ Bɔbə̄jí Nə́ɓā, nin̄ kə Kɔ́ɔ̄ɓē Jeju Kərist, rāān̄ kem majə sesí ō, sɔlə̄n̄ kemsí ō. 4Jeju Kərist, i nge ń adə̄ rɔ̄n kə gō kem ndigə yā Bɔbə̄jí Nə́ɓāá tām̄ yā majaĺ yājí gə̄ tə́, yā kɔrə̄ńjí kɔ̄ɔ́ dan yá̰á̰ kə́ majaĺ kə́ dɔ nang tə́ laā tə́ ní. 5*Kɔsə gɔn i tām̄ yān tə́ kə dɔ ɓāl̄ gə̄! *Adə̄ i tītə̄ ń noō!
Najə̄ kə́ Majə i kógə̄ḿ beē ngóy
6Ɔr kumḿ sesí tɔdɔ̄ ī-téliī láẃ kɔ̄ɔ́ gō Nə́ɓā ń ɓāŕsí ba rajəsí kə ta kūl̄ Kərist ní, yā kunəń gō Najə̄ kə́ Majə kə́ rang. 7Kə́ rɔ̄kum tə́ tā anī Najə̄ kə́ Majə kə́ rang gətóo, ba m-ɔ̄r̄ najə̄ sesí tītə̄ ń noō i tām̄ yā de kə́ ngé tə́la najə̄ kemsí gə̄ tə́. Nin̄-gḛyn̄ i tūr̄ gidə Najə̄ kə́ Majə yā *Kərist kɔ̄ɔ́. 8Ní, ré i jḭḭ kɔ́ gə̄ gə̄gē, aké i *de kə́ dɔ rā̰ tə́ kógə̄ḿ gə̄gē n ɔjəsí Najə̄ kə́ Majə kə́ to tayā gō ni ń j-ɔjəsí kété tə́ ní anī, kadə̄ ndɔ̄ĺ i dɔn tə́. 9J-ədasí kété kɔ̄ɔ́ ɓá, ba m̄-téĺ m-ə́dásí ɓōólaā ɓáý to̰. Ré deē kógə̄ḿ ɔjəsí Najə̄ kə́ Majə kə́ to tītə̄ nge ń ī-taāī kem ɓá ní aĺ anī, kadə̄ ndɔ̄ĺ i dɔ kɔ́ɔ̄ tə́.
10Ní, mā m̄-sāā i kadə̄ i de gə̄ n kə ndigəmə̄n̄, aké i Nə́ɓā n kə ndigəm̄ ḿ? m̄-sāā i kadə̄ nel̄ de gə̄ seḿ a? Ré i de gə̄ n m̄-sāā kadə̄ kə nel̄də́ seḿ anī, mā i nge kəla yā *Kərist to̰ alé.
Loo téĺ ń Pol tél ngōmbang kəla ní
11Ngákó̰ó̰ḿ gə̄, m-ə́dásí wáńg, na Najə̄ kə́ Majə ń m-ɔ́jə́sí ní, i deē ndul n kumən teē dɔ tə́ ní alé. 12Tá i deē n ɔjəm̄ aĺ ō, ndóōm̄ aĺ ō, ba i Jeju *Kərist nəkɔ́ n teē kumḿ dɔ tə́ ní.
13Tām̄ sḭḭ̄ ōōī gotə háĺ yá̰a̰ rāāḿ kə́ kété jóo gə̄, dan ń mā m̄-rāań kəla m-ādə̄ Nə́ɓā kə gō róbən yā *Jipə gēé ní. m̄-rāā kum Egəlijə yā Nə́ɓā ndoō tə́ kə ngangāá ngá̰ý ō, m̄-rāādə́ yá̰á̰ kə́ majaĺ ngá̰ý ō. 14*Jipə madə́ḿ gə̄ ń ɓāl̄jí asə naā ní, m̄-rāā kəla m-ādə̄ Nə́ɓā kə gō róbən yā *Jipə gēé m̄-tɔȳdə́. Tām̄ o̰o̰m̄ tɔdɔ̄ yá̰a̰ kāgə̄ ɓē yā kaaḿ gə̄ tɔȳ yādə́.
15Banī Nə́ɓā rajəm̄, ni-gə̄rām̄ dan ń mā i kem kó̰ó̰ḿ tə́ ɓáý ní, ba ɓārə́m̄ kadə̄ m̄-rāā kəla m-ādə̄n. 16Ba loo ń ni teē kumḿ dɔ Ngōnən tə́ kadə̄ m-ɔ́jə de gə̄ kə́ nin̄ i Jipə aĺ gə̄ Najə̄ kə́ Majə yān ní, m-āw̄ rɔ̄ deē kógə̄ḿ tə́ m̄-dəjen kɔjə̄ aĺ ō, 17de gə̄ ń nin̄ i ngámbang kəla gə̄ kété noḿ tə́ ní, m-āw̄ ka̰a̰də́ tə́ *Jerusalem aĺ ō, ba m-āw̄ i gō nang kə́ Arabə tə́ kanjə̄ kɔr bā̰ā̰ ō. Gō tə́ anī, m̄-tél dɔ tə́ m-āw̄ gogə́ Damas ō. 18Ɓāl̄ mətá gō tə́ anī m-āw̄ Jerusalem kadə̄ m̄-ger̄ Kepas, ba m̄-ndi seneé ndɔ̄ kutə gidə i mí. 19M-á̰a̰ ngōmbang kəla kə́ rang kógə̄ḿ alé, ba i Jakə kə́ ngōkó̰ó̰ Kɔ́ɔ̄ɓē ngóy.
20M-ə́da kə̄ ta kum Nə́ɓā tə́, najə̄ ń m̄-ndang m-ādə̄sí toō i najə̄ kə́ sor̄ alé.
21Gō tə́ anī m-āw̄ gō nang kə́ Siri tə́ ō, kə́ Silisi tə́ ō. 22Ba dan ngé ń noō tə́ ní, de gə̄ kə́ kem Egəlijə gə̄ yā *Kərist kə́ gō nang kə́ Jude tə́ ger̄mə̄n̄ mā alé. 23I najə̄ ń de kə́ rang gə̄ a ədan̄ dɔḿ tə́ ní ngóy n nin̄-gerə̄n ní, de gə̄ ədan̄ na: Deē ń kété a rāā kumjí ndoō tə́ ní, ngɔlaā a ɔjə i najə̄ taā kem ń ni sāā nujəń kɔ̄ɔ́ ní. 24Adə̄ nin̄-ɔsən̄ gɔn Nə́ɓā najə̄ yāḿ tə́.
Currently Selected:
Makətūbə̄ ń Pol ndang adə̄ Galatə gə̄ ní 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad