YouVersion Logo
Search Icon

Makətūbə̄ yā Ejekiel 1

1
Nə́ɓā ɓāŕ Ejekiel kadə̄ ni i nge koō ta
(1-3)
Kɔ́ɔ̄ɓē rāā yá̰á̰ kógə̄ḿ ɔjəń Ejekiel kadə̄ na n ndi noó
1-3Kem ɓāl̄ ń ɓālə̄ḿ i kutə mətá ní, kə ndɔ̄ kə́ nge ko̰ mí yā nāā kə́ nge ko̰ sɔ́ anī, mā Ejekiel ngōn̄ Buji kə́ *nge tun̄ yá̰a̰, m̄-ra i dan *Jipə gə̄ ń ɔyən̄də́ dɔ gúú tə́ aw̄n̄ sedə́ kadə man̄ Kebar tə́ ní. Anī m-á̰a̰ ta dɔ rā̰ teē ra wōyōó ō, Nə́ɓā rāā adə̄ m-á̰á̰ yá̰a̰ gə̄ ō. I kem ɓāl̄ ɓəlo yā mban̄g Joakin kə́ nge ko̰ mí tə́. m̄-ra i kem ɓē yā *Babilon gə̄ tə́ kadə man̄ Kebar tə́. Kɔ́ɔ̄ɓē ɔr̄ najə̄ seḿ i loo ń noō tə́ ō, tɔ́gən əhɔm̄ i loo ń noō tə́ ō.
4Yá̰á̰ ń m-á̰a̰ā̰ ní n toó: Néĺ kógə̄ḿ kə́ bo ḭḭ dām̄ mbɔ́r ɓē kə́ ko̰ó̰ tə́ a reē kə kil̄ man̄ kə́ il̄ ngá̰ý ō, tel̄ man̄ gə̄ teēn̄ tū kil̄ man̄ ní tə́ ō. Loo kə́ unjə̄ kow gīr̄ gidə kil̄ man̄ ní. Banī ngaadan kil̄ man̄ ní i hor kə́ a o̰o̰ ō, ndə́lē tītə̄ lɔ́ŕ kə́ kəla horoó adə̄ kərē beé ō. 5Yá̰á̰ kə́ kə kumuú gə̄ sɔ́ kə́ ton̄ tītə̄ de gə̄ i tū ngaadan kil̄ man̄ ní tə́. 6Nin̄ kógə̄ḿ kógə̄ḿ ní ta kumdə́ i sɔ́, sɔ́, kə dɔdə́ gēé ō, bɔ̄gə̄də́ gə̄ i sɔ́, sɔ́ kə dɔdə́ gēé ō. 7Njadə́ gə̄ ran̄ súmūú njururu ō, ta njadə́ to tītə̄ ta nja ngōn̄ man̄g ō, ndə́lē ngá̰ý tītə̄ gində̄ nə̄ngá kasə kə́ deē usə gidə adə̄ ndə́lē beé ō. 8Jī deē i gír bɔ̄gə̄də́ kə́ sɔ́ gə̄ tə́ kógə̄ḿ kógə̄ḿ. Jīdə́ gə̄ ní i kə́ tūr̄ kum kə̄ dām̄ mbɔ́r ɓē kə́ sɔ́ gə̄ tə́ tītə̄ yā ta kumdə́ ō, bɔ̄gə̄də́ gə̄ ō. 9Ta bɔ̄gə̄də́ gə̄ ɔdə naā. Nin̄ njə̄rān̄ i kumdə́ súmūú kanjə̄ tūr̄ rɔ̄də́. 10Nin̄ kógə̄ḿ kógə̄ḿ malang ní ta kumdə́ gə̄ ń toō i noó: Ta kumdə́ kə́ to tītə̄ ta kum deē i noó ō, ta kumdə́ kə́ to tītə̄ ta kum ɓɔl i dām̄ kə́ ko̰ó̰ tə́ ō, ta kumdə́ kə́ to tītə̄ ta kum man̄g kə́ bəra i dām̄ kə́ geleé tə́ ō, ta kumdə́ kə́ to tītə̄ ta kum kə̄rō i noó ō. 11Bɔ̄gə̄də́ kə́ jōó gə̄ ń jā̰ā̰n̄ kum kə̄ dɔɔ́ ní, tadə́ ɔdə naā ō, bɔ̄gə̄də́ kə́ jōó gə̄ utə̄nəń gidə rɔ̄də́ ō. 12Nin̄ kógə̄ḿ kógə̄ḿ ní, náā nəkɔ́ ɓáa njə̄rā i súmūú kumən sɔɔ̄ non. Nin̄ aw̄n̄ i kum kə̄ loo ń kemdə́ ndigə ní tə́, kanjə̄ tūr̄ rɔ̄də́. 13Yá̰á̰ kógə̄ḿ kə́ to tītə̄ yā̰l̄ hor to dɔ dáń yá̰á̰ kə́ kə kumuú gə̄ ní tə́, ba yá̰á̰ gə̄ kə́ ton̄ tītə̄ hor ngel̄ gə̄ beé a dáȳn̄. Hor ní ndə́lē ngá̰ý ō, tel̄ man̄ gə̄ teēn̄ kum tə́ ō. 14Yá̰á̰ kə́ kə kumuú gə̄ ní aw̄n̄ ō télən̄ ō kə ngɔ̄də́ kə́ ngá̰ý. Nin̄ ngɔ̄də̄n̄ tītə̄ tel̄ man̄ beé.
15Dan ń m-ə̄ndā ma̰ȳ yá̰á̰ kə́ kə kumuú gə̄ ní anī, m-á̰a̰ nja púsə́ kógə̄ḿ kə́ ɔdə nang kadədə́ gə̄ tə́ kógə̄ḿ kógə̄ḿ. 16Nja púsə gə̄ ní ndə́lēn̄ tītə̄ *mbal̄ kə́ gātə̄n i ngá̰ý beē. Nin̄ ton̄ tītə̄ naā malang ō, to tītə̄ kə́ tə́lan̄də́ i kem naā tə́ beē ō. 17Nin̄ asən̄ kaw̄ kum kə̄ kété dām̄ loo kə́ gíŕ sɔ́ gə̄ tə́ kanjə̄ rə̄ngō. 18Nja púsə gə̄ ní boon̄ to ɓōĺ ngá̰ý ō, hor kə́ kə́rā sir sir gīr̄ gidədə́ əla ta naā tə́ ō. 19Dan ń yá̰á̰ kə́ kə kumuú gə̄ ní njə̄rān̄ kum kə̄ kété anī, nja púsə gə̄ ní njə̄rān̄ kum kə̄ kété kə gō kadədə́ ō. Ré nin̄ ḭḭn̄ kum kə̄ dɔɔ́ anī, nin̄ ḭḭn̄ kum kə̄ dɔɔ́ ō. 20Nin̄ aw̄n̄ loo ń kemdə́ gḛy kaw̄ tū tə́ ní tə́, anī nja púsə gə̄ ní aw̄n̄ sedə́ naā tə́. Tɔdɔ̄ kem ndigə yā yá̰á̰ kə́ kə kumuú gə̄ ní rāā nja púsə gə̄ ní adə̄ nin̄ a njə̄rān̄ i kə gō kaāneé. 21Dan ń yá̰á̰ kə́ kə kumuú gə̄ ní a njə̄rān̄ kumdə́ kə̄ kété anī, nja púsə gə̄ ní njə̄rān̄ sedə́ naā tə́ kum kə̄ kété ō. Dan ń nin̄ dəban̄ anī, nja púsə gə̄ ní dəban̄ ō. Dan ń nin̄ ḭḭn̄ kum kə̄ dɔɔ́ anī, nja púsə gə̄ ní ḭḭn̄ sedə́ naā tə́ kum kə̄ dɔɔ́ ō. Tɔdɔ̄ nja púsə gə̄ ní a njə̄rān̄ i kə gō kem ndigə yā yá̰á̰ kə́ kə kumuú gə̄ ní.
22Yá̰á̰ kə́ rāā gār̄ tītə̄ no rā̰ i dɔɔ́ dɔ yá̰á̰ kə́ kə kumuú gə̄ ní tə́. Yá̰á̰ ní ndə́lē tītə̄ kəristal#1.22 Kəristal: I yá̰á̰ kə́ to tītə̄ bətēl̄ beé, ba gātə̄də́ ngá̰ý. beé. 23Yá̰á̰ kə́ kə kumuú gə̄ ń ndin̄ gír rā̰ tə́ ní, nin̄ kógə̄ḿ kógə̄ḿ ní, bɔ̄gə̄də́ kə́ jōó gə̄ ran̄ súmūú sɔɔ̄ ta naā ō, kə́ jōó gə̄ utə̄n̄neé gidə rɔ̄də́ ō. 24Dan ń nin̄ a ndɔ́tə̄n̄ loo anī m-ōō kōō bɔ̄gə̄də́ ń a ɓār̄ ní. Ɓār̄ tītə̄ kōō bā bo beé, tītə̄ ndū Nə́ɓā kə́ tɔ́gən i ngá̰ý beē, aláa tītə̄ kōō ngé rɔ̄ɔ̄ kə́ ngá̰ý gə̄ beé. Dan ń nin̄ dəban̄ anī, nin̄ télən̄ kə bɔ̄gə̄də́ kə̄ nang tə́. 25Rā̰ ń i dɔdə́ tə́ ní kōō yá̰á̰ kógə̄ḿ ɓār̄ dɔɔ́ dɔ tə́ 26Yá̰á̰ kógə̄ḿ kə́ to tītə̄ mbal̄ sapir#1.26 Sapir: Á̰a̰ī tū «Kum Najə̄ kə́ Ngón̄g Ngón̄g gə̄» tə́. ba to tītə̄ kōr̄ kāgə̄ mbang beé i dɔɔ́ dɔ tə́ ō, yá̰á̰ kógə̄ḿ kə́ to tītə̄ deē i dɔ kōr̄ kāgə̄ mbang ní tə́ ō. 27Yá̰á̰ kə́ to tītə̄ deē ní, m-á̰a̰n ndə́lē tītə̄ gində̄ beé ō, to tītə̄ kə́ hor gīr̄ gidən beé ō. Yá̰á̰ kógə̄ḿ kə́ to tītə̄ hor beé i gír kāgə̄ rɔ̄ deē ní tə́ nang tə́ ō, i dɔn tə́ dɔɔ́ ō. Hor ní unjə̄ kow dɔn tə́ kə̄ loo gə̄ tə́ malang 28Loo kə́ unjə̄ kow ń gīr̄ gidən ní, to tītə̄ kə́ dēsə́ bā kə́ teē tū kil̄ man̄ tə́ ndɔ̄ man̄ kə́ edə tə́ beē. Yá̰á̰ ní ɔjə i kum gotə *kɔsə gɔn yā Kɔ́ɔ̄ɓē. Dan ń m-á̰a̰ā̰ anī, m̄-teē m-ə̄sō m̄-sébə kumḿ nang tə́. Anī m-oō ndū deē kógə̄ḿ ɔr̄ najə̄ seḿ.

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy