Makətūbə̄ yā Daniel 1
1
Daniel ō, madə̄n gə̄ ō nin̄ i dɔ nang kə́ Babilon tə́
(1-6)
Daniel nin̄ kə madə̄n gēé
1Kem ɓāl̄ ko̰o̰ ɓē kə́ nge ko̰ mətá yā Joakim mban̄g kə́ *Juda tə́ ní, Nabukodonosor mban̄g kə́ *Babilon reē gīr̄ ɓē kə́ *Jerusalem kə rɔ̄ɔ́. 2Kɔ́ɔ̄ɓē əla Joakim mban̄g kə́ Juda kem jīn tə́ ō, əya̰n adə̄ ɔy núsə́ ngáń gájə́ yá̰a̰ rāā kəla gə̄ kə́ kem kújə yā Nə́ɓā tə́ ō. Ɔy aw̄ń dɔ nang kə́ Sinear tə́, aw̄ tə́ndā kem kújə yā nə́ɓā yān gə̄ tə́.
3Gō tə́ anī mban̄g əda Asəpenaj ngol ngé kəla yān gə̄ kadə̄ gə̄rā balsáa gə̄ kə́ *Israel tə́, kə́ gíŕdə́ i mban̄g ō, kə́ nin̄ i gír de kə́ bo gə̄ ō. 4Kadə̄ i balsáa gə̄ kə́ loodə́ kə́rēý kə́ nujə gətóo gə̄ ō, kə́ majən̄ deē gə̄ ō, kə́ ɔjən̄də́ kum kedə̄ gə̄ malang adə̄ gerə̄n̄ gə̄ ō, kə́ gerə̄n̄ yá̰á̰ ngá̰ý gə̄ ō, kə́ əndān̄ ma̰ȳ yá̰á̰ ngá̰ý gə̄ ō, kə́ tɔ́gə́də́ to gə̄ ō, kə reē sedə́ kadə̄ ran̄ ndogó mbangāá ō, kadə̄ ndóōn̄də́ loo ndang makətūbə̄ yā de kə́ Babilon gə̄ ō, ta yādə́ ō. 5Mban̄g əda kadə̄ yá̰a̰ kəsan nəkɔ́ ō, kasə *nduú ka̰ȳn nəkɔ́ ō kə adə̄n̄də́ tə́ kə dɔ ndɔ̄ gə̄ ō, kadə̄ ndóōn̄də́ yá̰a̰ ɓāl̄ mətá ō, kadə̄ ré gír ɓāl̄ kə́ mətá gə̄ ní gān̄g anī, udən̄ kəla yān ní mban̄g tə́.
6Ngáń kə́ *Juda tə́ gə̄ i dan balsáa gə̄ ní tə́. Adə̄ i Daniel ō Hanania ō Misael ō Ajaria ō. 7Ngol ngé rāā kəla ndogó mbangāá gə̄ təndā rī kə́ kijə dɔdə́ tə́. Ni-əndā rī Daniel na i Beltasar ō, rī Hanania na i Sadərak ō, rī Misael na i Mesak ō, rī Ajaria na i Abed Nego ō, 8Banī Daniel gḛy yḛr rɔ̄n kə yá̰a̰ kəsa yā mbangāá aĺ ō, kə kasə *nduú yā mbangāá aĺ ō. Adə̄ ni dəjə ngol ngé rāā kəla gə̄ kadə̄ ra seneé ta yḛr rɔ̄n kə yá̰a̰ kəsa gə̄ ń noō alé. 9Nə́ɓā rāā adə̄ ngol ngé kəla gə̄ ní nelə̄n kə Daniel ō rāā kem majə seneé ō, 10ɓá tā ba ni-əda Daniel na:
m̄-ɓōĺ kɔ́ɔ̄ḿ mban̄g ń ɔjə yá̰á̰ kə́ kadə̄ ə́saī ō, yá̰á̰ kə́ kadə̄ ā̰yī ō ní. Tɔdɔ̄ ré ni a̰ā̰ kadə̄ ta kumsí tél əja majaĺ tɔȳ yā madə̄sí gə̄ kə́ ɓāl̄sí asə naā anī, ā ī-rāāī kadə̄ m̄-rāā majaĺ kə mbangāá kadə̄ ni-gān̄g sarya yo dɔḿ tə́.
11Anī Daniel əda dəngam ń ngol ngé kəla gə̄ ənīn ta Hanania tə́ ō Misael tə́ ō Ajaria tə́ ō tan nəkɔ́ Daniel tə́ ō, kadə̄ a̰a̰ gōdə́ ní na:
12Beé ɓáa m̄-rāāī ɓɔ́ ba ī-nāājí kem ndɔ̄ kutə kógə̄ḿ á̰a̰ā̰. Ādə̄ adə̄n̄jí yá̰á̰ kə́ ndɔrɔ́ gə̄ ādə̄ j-əsa ō, ādə̄ adə̄n̄jí man̄ adə̄ j-a̰ȳ ō. 13Gō tə́ anī á̰a̰ ta kumjí ō, ta kum madə̄jí kə́ ngé kəsa yá̰a̰ yā mban̄g gə̄ ō. Ba i yá̰á̰ ń ā á̰a̰ā̰ ní n ā ī-rāań yá̰a̰ sejí ní. 14Dəngam ní ndigə najə̄ ní ō, nāā Daniel nin̄ kə madə̄n gēé ndɔ̄ kutə kógə̄ḿ ō. 15Dan ń gír ndɔ̄ kə́ kutə gə̄ ní gān̄g anī, a̰a̰n̄ kadə̄ ta kumdə́ majə tɔȳ balsáa gə̄ malang kə́ ngé kəsa yá̰a̰ kəsa mban̄g ō, a̰a̰n̄ kadə̄ nin̄ boon̄ majə tɔȳn̄də́ ō. 16Adə̄ yá̰á̰ ń kadə̄ əsan̄ ō, kasə *nduú ń kadə̄ a̰ȳn̄ ō ní, dəngam ń əndānən tadə́ ní na̰y kə̄ loo kɔy kɔ̄ɔ́ tə́, ba ni-adə̄də́ i yá̰á̰ kə́ ndɔrɔ́ gə̄. 17Balsáá kə́ sɔ́ gə̄ ní Nə́ɓā adə̄də́ kəndā ma̰ȳ ō, ndóōdə́ loo ndang makətūbə̄ ō, adə̄də́ kum kedə̄ ō. Tá Daniel ger̄ kum yá̰á̰ kə́ ka̰ā̰ gə̄ ō, kum nī gə̄ ō ɓáý to̰.
18Balsáa gə̄ ń gə̄rān̄də́ ní, dan ń ndɔ̄ ń ndɔ̄ ń mban̄g Nabukodonosor ɔjə kadə̄ reēn̄ sedə́ rɔ̄n tə́ ní ugə̄ anī, ngol ngé kəla gə̄ reē sedə́ rɔ̄n tə́. 19Mban̄g ɔr̄ najə̄ kə balsáa gə̄ ní, banī dandə́ tə́ malang ní ngé ké tītə̄ Daniel, aláa Hanania, aláa Misael, aláa Ajaria gətóo. Adə̄ ɔyn̄də́ kadə̄ rāān̄ kəla yā mban̄g.
20Yá̰a̰ malang kə́ a dəje i kum kedə̄ ō, kəndā ma̰ȳ yá̰a̰ ō ń mban̄g dəjedə́ najə̄ kə́ dɔ tə́ ní, mban̄g a̰ā̰ kadə̄ nin̄ tɔȳn̄ mbōlí gə̄ malang ō, ngé tə̄ɓā ndíĺ kə́ majaĺ gə̄ ō, kə́ kem ɓē ko̰o̰ yān tə́.
21Adə̄ Daniel rāā kəla yā mban̄g bátə́ ugə̄ń ɓāl̄ ko̰o̰ ɓē yā Sirus tə́.
Currently Selected:
Makətūbə̄ yā Daniel 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad