Najə̄ kə́ Majə yā Jeju ń Matiye ndang ní 2
2
Ngé ka̰a̰ yá̰a̰ tū tə́yō̰ tə́ gə̄ reēn̄ ka̰a̰ Jeju tə́
1Ojən̄ Jeju i Betlehem, gō nang kə́ Jude tə́, ɓāl̄ yā mban̄g Herod tə́. Gō tə́ anī, ngé ka̰a̰ yá̰a̰ tū tə́yō̰ tə́ gə̄ ḭḭn̄ gír ɓē tə́ reē ugə̄n̄ *Jerusalem, 2ba dəjen̄ na:
Mban̄g yā *Jipə gə̄ ń ojənən̄ ngɔr ɓáý ní ni i rá? Tɔdɔ̄ j-a̰a̰ tə́yō̰ yān gír ɓē tə́, adə̄ jə-reē i kɔsə nojí nang tə́ non tə́ tə́.
3Dan ń mban̄g Herod oō najə̄ ní anī, ni gə̄gē de kə́ *Jerusalem gə̄ malang gə̄gē ní kemdə́ nujə. 4Anī ni-ɔsə dɔ ngol gə̄ kə́ dɔ *ngé tun̄ yá̰a̰ gə̄ tə́ malang naā tə́ ō, ɔsə dɔ ngé ndóō de gə̄ ndū najə̄ yā ngán *Israel gə̄ naā tə́ ō, ba dəjedə́ na ké loo ń a ojən̄ *Kərist tū tə́ ní ké i rá wa. 5Nin̄-ədanən̄ na i Betlehem kə́ gō nang kə́ Jude tə́, tɔdɔ̄ *nge koō ta na ndang kem makətūbūú na i beé:
6Ḭ̄ Betlehem, ɓē kə́ gō nang yā *Juda tə́,
i ḭ̄ n i ngōn̄ ɓē kə́ dūú ngá̰ý tɔȳ gotə ɓē gə̄ kə́ gō nang yā Juda tə́ ní alé,
tɔdɔ̄ ngār kə́ nge kul̄ Israel gə̄ ń i gír deē yāḿ gə̄ ní a teē i kemií ḭ̄ tə́.
7Anī Herod ɓāŕ ngé ka̰a̰ yá̰a̰ tū tə́yō̰ gə̄ tə́ ní jəke, ba dəjedə́ na ké i ndɔ̄ kə́ rá tə́ bang n tə́yō̰ ní teēń ní wa. 8Gō tə́ anī əladə́ Betlehem, ədadə́ na:
Āwī, ī-dəjeī najə̄ kə́ dɔ ngōn̄ ní tə́ kə gōó, ba ré ə́ngeniī anī, ī-reē ə́damī, ādə̄ m-āw̄ m-ɔ́sə noḿ nang tə́ non tə́ m̄-rɔȳnneé ō.
9Dan ń nin̄-oōn̄ najə̄ yā mban̄g ní təgā anī, aw̄n̄. Anī tə́yō̰ ń a̰a̰n̄ kété ní teē njə̄rā nodə́ tə́ nodə́ tə́, ba aw̄ dəba dɔ loo ń ngōn̄ i tū tə́ ní tə́. 10Dan ń a̰a̰n̄ tə́yō̰ ní rɔ̄nel̄ asədə́ nák. 11Nin̄-udən̄ kújú anī a̰a̰n̄ ngōn̄ ní nin̄ kə kó̰o̰n Mari. Nin̄-ɔsən̄ nodə́ nang tə́ non tə́ rɔȳnən̄neé. Gō tə́ anī teēn̄ ta sandúkə́ yá̰a̰ kənge yādə́ gə̄, ba ɔyn̄ lɔ́r ō, kajaja ō, nō kāgə̄ *mír ō, ndējə̄n̄ ngōn̄ ní. 12Nə́ɓā tāādə́ kem nī tə́ na kə tél kə aw̄n̄ gogə́ rɔ̄ Herod tə́ alé. Adə̄ nin̄-tél aw̄n̄ ɓē yādə́ tə́ i kə róbə́ kə́ rangaá.
Jəjep nin̄ kə Mari a̰ȳn̄ kə ngōnōó
13Dan ń ngé ka̰a̰ yá̰a̰ tū tə́yō̰ tə́ gə̄ aw̄n̄ kɔ̄ɔ́ ní anī, *de kə́ dɔ rā̰ tə́ kógə̄ḿ yā Kɔ́ɔ̄ɓē rāā Jəjep kə nīí, ədan na:
Ḭ́ḭ dɔɔ́, ún ngōn̄ ō, kó̰o̰n ō, ba ā̰ȳ āw̄ sedə́ dɔ nang kə́ Ejiptə tə́, ba ī-ndiī noó bátə́ ādə̄ ré m-ə́daī tá ī-tél ī-reē sedə́ gogə́ ɓáý. Tɔdɔ̄ Herod a sāā tɔ̄l̄ ngōn̄ ní kɔ̄ɔ́.
14Jəjep ḭḭ dɔɔ́ ndɔ̄ɔ́, un ngōn̄ ní ō kó̰o̰n ō ba aw̄ sedə́ Ejiptə tə́. 15Ni-ndi tū tə́ noō bátə́ adə̄ Herod oy. Adə̄ najə̄ ń Kɔ́ɔ̄ɓē əndā ta *nge koō ta yān tə́ adə̄ əda ní reē udə gírí. Ni-əda na: m̄-ɓāŕ ngōnə̄ḿ kadə̄ teē kɔ̄ɔ́ kem ɓē kə́ Ejiptə tə́.
Herod tɔ̄l̄ ngáń kə́ dūú gə̄
16Dan ń Herod a̰ā̰ kadə̄ ngé ka̰a̰ yá̰a̰ tū tə́yō̰ tə́ gə̄ mbóon̄ i seneé anī, wōn̄g asən nák. Adə̄ ngáń kə́ dəngam gə̄ malang ń ojən̄də́ rāā ɓāl̄ jōó ō, ngé gə̄ ń ɓāl̄də́ asə jōó aĺ ɓáý ō ní, ni-əla tɔ̄l̄də́ tə́ kɔ̄ɔ́ kem ɓē kə́ Betlehem tə́ ō, kem ngán ɓē gə̄ kə́ gō nang kə́ Betlehem tə́ ō. Ni-rāā yá̰á̰ ní i kə gō ndɔ̄ ń ngé ka̰a̰ yá̰a̰ tū tə́yō̰ tə́ gə̄ ədanən̄neé ní. 17Adə̄ najə̄ ń Jeremi *nge koō ta əda ní reē udə gírí. 18Najə̄ ní n toó:
Oōn̄ ndū deē kógə̄ḿ kem ɓē kə́ Rama tə́:
Deē ní a nōō i mbée ō, a əga i kɔŕ yo kə́ ngá̰ý ō.
I Rasel n a nōō ngánən gə̄ ní,
ni ndigə kadə̄ deē sɔl̄ kemən alé,
tɔdɔ̄ ngánən gə̄ gətóon̄ kɔ̄ɔ́.
Jəjep nin̄ kə Mari télən̄ Ejiptə
19Dan ń Herod oy anī, *de kə́ dɔ rā̰ tə́ kógə̄ḿ yā Kɔ́ɔ̄ɓē rāā Jəjep kə nīí dɔ nang kə́ Ejiptə tə́, ədan na:
20Ḭ́ḭ dɔɔ́, ún ngōn̄ ō kó̰o̰n ō, ba ī-tél āw̄ sedə́ gogə́ dɔ nang kə́ *Israel tə́, tɔdɔ̄ ngé gə̄ ń sāān̄ tɔ̄l̄ ngōn̄ ní oyn̄ kɔ̄ɔ́.
21Anī Jəjep ḭḭ dɔɔ́, un ngōn̄ ō kó̰o̰n ō, ba tél aw̄ sedə́ gogə́ dɔ nang kə́ Israel tə́. 22Ba dan ń oō kadə̄ i Arkelawus n a o̰o̰ ɓē kə́ Jude gotə bɔbə̄n Herod tə́ anī, ni-ɓōĺ kaw̄ dɔ nang kə́ Jude tə́. Nə́ɓā tāān kem nī tə́ kadə̄ aw̄ dɔ nang kə́ Galile tə́. 23Ni-aw̄ ndi kem ɓē kógə̄ḿ kə́ a ɓārə́n̄ na i Najaret tə́, adə̄ najə̄ ń *ngé koō ta gə̄ ədan̄ ní reē udə gírí. Ədan̄ na a ɓāŕnən̄ na i de kə́ Najaret#2.23 Najaret: Á̰a̰ī tū kum najə̄ kə́ Ngón̄g Ngón̄g gə̄ tə́. .
Currently Selected:
Najə̄ kə́ Majə yā Jeju ń Matiye ndang ní 2: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad