Makətūbə̄ kə́ nge ko̰ jōó ń Piyer ndang ní 1
1
Piyer rāā de gə̄ lápə́ya
1I mā Simo̰ Piyer ń i nge kəla yā Jeju *Kərist ō, ngōmbang kəla yān ō ní n m̄-ndang makətūbə̄ ń toō m-ə́lań m-ādə̄ ngé gə̄ ń əngen̄ taā kem kə́ gātə̄n i ngá̰ý tītə̄ yājí, kə ta kūl̄ kəla kə́ gōtə́ yā Nə́ɓā yājí ō, Jeju Kərist nge kajəjí ō ní. 2Ādə̄ Nə́ɓā rajəsí ō, adə̄sí kem sɔl̄ lɔm ngá̰ý kə ta kūl̄ ger̄ ń sḭḭ̄ ī-ger̄niī ō, ī-gerī Jeju Kərist Kɔ́ɔ̄ɓē yājí ní ō.
Ɓāŕ deē ō, gə̄rā deē ō yā Nə́ɓā
3Tɔdɔ̄ Nə́ɓā adə̄jí yá̰a̰ malang i kə ta kūl̄ tɔ́gəneé, yā kadə̄ jə-ndiīneé kə kumjí ō, jə-rāāīneé yá̰a̰ kə gō ń ni ndigə ní ō. Ni-rāā adə̄ jə-gerī nge ń ɓāŕjí kə ta kūl̄ *kɔsə gɔn yān nəkɔ́ ō, kə ta kūl̄ kem majə yānneé ō ní. 4Adə̄n̄jí yá̰á̰ kə́ majə gə̄ kə́ gātə̄də́ i ngá̰ý ń ənīn̄ ndūdə́ yā kadə̄jí ní, i kə ta kūl̄ kɔsə gɔn yān nəkɔ́ ngeé ń toō ō, kem majə yān ngeé ń toō ō, yā kadə̄ ī-ɓooī naā kə Nə́ɓāá i kə ta kūl̄ yá̰á̰ kə́ majə gə̄ ngeé ń toō. Tɔdɔ̄ ɔrə̄n̄sí kɔ̄ɔ́ jī yá̰á̰ kə́ ndum kə́ dɔ nang tə́ ń kum ndaa yá̰a̰ a ulə̄n ní tə́. 5I tām̄ najə̄ ń noō tə́ n majə kadə̄ ə́hɔī rɔ̄sí tɔ́gə ba ə̄ndāī háĺ kə́ majə dɔ taā kem yāsí tə́ ō, ə̄ndāī yá̰a̰ ger̄ dɔ háĺ kə́ majə yāsí tə́ ō, 6ə́hɔī rɔ̄sí tɔgə ba ə̄ndāī tə́gā ta dɔ yá̰a̰ ger̄ tə́ ō, ə̄ndāī kəre rɔ̄ dɔ tə́gā ta tə́ ō, ə̄ndāī rāā yá̰a̰ kə gō ń Nə́ɓā ndigə ní dɔ kəre rɔ̄ tə́ ō, 7ə̄ndāī rāā tɔdɔ̄ naā yā ngákó̰o̰ naā gə̄ dɔ rāā yá̰a̰ kə gō ń Nə́ɓā ndigə ní tə́ ō, ə̄ndāī tár dɔ rāā tɔdɔ̄ naā yā ngákó̰o̰ naā gə̄ tə́ ō. 8Háĺ kə́ majə gə̄ ń sɔɔ̄ kadə̄ sḭḭ̄ āwīneé ní n noó. Ba ré háĺ kə́ majə gə̄ ngeé ń toō āwīneé ngá̰ý anī, i nin̄ n a rāān̄sí kadə̄ ā ī-rāāī kəla ō, ā ī-gerī Kɔ́ɔ̄jí Jeju *Kərist kum kə̄ kété kété ō ní. 9Ba deē ń a nal̄ háĺ kə́ majə gə̄ ngeé ń toō ní, ni i de kə́ nge kum tɔ̄ɔ̄ kə́ a mám̄ i loo. Dɔn ndígə̄nal dɔ kɔr̄ ń ɔrə̄n̄ majaĺ yān kə́ jóo gə̄ kɔ̄ɔ́ ní tə́.
10Ngákó̰ó̰ḿ gə̄, i tām̄ najə̄ ń toō tə́ n majə kadə̄ ə́gaī rɔ̄sí kə̄ nang tə́ ādī tɔȳ kə́ kété ɓáý ī-mbūsīneé gír ɓār̄ ń Nə́ɓā ɓāŕsí ní ō, gə̄rā ń Nə́ɓā gə̄rāsí ní ō, ādī ngan̄g ní. Tɔdɔ̄ ré ī-rāāī beé anī, ā ə̄sōī kum yá̰á̰ kə́ majaĺ tə́ aĺ i kə́ bátə́ gə̄ tə́. 11Tɔdɔ̄ i tītə̄ ń noō n a rāān̄ majə sesí, adə̄ a adə̄n̄sí ta róbə kudə kem Ɓē ko̰o̰ kə́ a to ngándáńg tə́ ní. Ɓē ko̰o̰ ní i yā Jeju Kərist ń ni i Kɔ́ɔ̄ɓē yājí ō, nge kajəjí ō ní.
12I tām̄ najə̄ ń toō tə́ n m-ā m̄-ter̄ kemsí kə ndɔ̄ gə̄ dɔ yá̰a̰ gə̄ ń toō tə́, ká ī-gerīdə́ kɔ̄ɔ́ ō, ī-raī ngan̄g dɔ najə̄ kə́ rɔ̄kum kə́ ī-taāī tə́ ō gə̄gē ní. 13Ba mā m-á̰a̰ kadə̄ dan ń m̄-ndi kə kumḿ ɓáý ní, i yá̰á̰ kə́ gō tə́ kadə̄ m̄-ter̄ kemsí dɔ tə́. 14Tɔdɔ̄ m̄-ger̄ kadə̄ m-ā m-ə́ya̰ rɔ̄ kə́ a oy ń toō kɔ̄ɔ́ ngɔr, tītə̄ ń Kɔ́ɔ̄ɓē yājí Jeju *Kərist ɔjəm̄neé ní. 15Adə̄ m-ā m-ə́hɔ rɔ̄ḿ tɔgə yā rāā yá̰a̰ malang ń tɔ́gə́ḿ asə ní yā rāań sesí kadə̄ ré m-óy anī, əga kemsí dɔ yá̰a̰ gə̄ ń noō tə́ ngándáńg.
Ngé gə̄ ń a̰a̰n̄ Kərist loo ndə́lē tə́ ní
16Tɔdɔ̄ j-əndā tɔ́gə́jí i dɔ súū gə̄ kə́ de gə̄ ɔrə̄n̄ kə kum kedēé ngá̰ý tə́ n j-ɔjəńsí najə̄ reē kə́ kə tɔ́gɔ́ ngá̰ý yā Kɔ́ɔ̄ɓē yājí Jeju *Kərist ní alé, banī jḭḭ kɔ́ gə̄ j-a̰a̰n kə kumjí dan ń ni-ndə́leń ngá̰ý tə́ ní. 17Bɔbə̄n Nə́ɓā rɔȳn ō, ɔsə gɔnən ō. Ni rāā nge ń noō i dan ń Nə́ɓā a ndə́leń ndə́lē kə́ majə ngá̰ý tə́ ní. Dan ngeé ń noō tə́ ní, ndū deē kógə̄ḿ teē tū ndə́lē ń Nə́ɓā a ndə́lē tə́ ní ɔr̄ najə̄ əda na: Nge ń toō i Ngōn̄ kó tár yāḿ kə́ nelə̄m̄ seneé ngá̰ý. 18Jḭḭ kɔ́ gə̄ j-oō ndū ngeé ń toō ń teē dɔ rā̰ tə́ ɔr̄ najə̄ ní kə mbījí, dan ń jḭḭ i seneé dɔ mbal̄ yā Nə́ɓā tə́ ní.
19Adə̄ jḭḭ j-əhɔ gír najə̄ ń *ngé koō ta gə̄ ədan̄ ní adə̄ ngan̄g ngá̰ý tɔȳ kə́ kété ɓáý. Ré ə̄ndāī kumsí gír najə̄ ní tə́ anī, ī-rāāī i yá̰á̰ kə́ majə. Tɔdɔ̄ ni-to i tītə̄ hor lámbá kə́ unjə̄ loo kə́ risə til tə́ beé bátə́ kadə̄ loo tīīń ō, tītə̄ dɔgə́ loo tīī kə́ teē ngarān̄g kemsí tə́ beé ō. 20Yá̰á̰ kə́ kété ń kadə̄ ī-gerī majə ní n toó: Najə̄ ń Nə́ɓā əndā ta *ngé koō ta gə̄ tə́ á ndangən̄ kem makətūbə̄ yān tə́ ní, de kə́ asə kɔjə kum kə dɔneé gətóo. 21Tɔdɔ̄ i kem ndigə yā deē n teē kə najə̄ kə́ Nə́ɓā əndā ta deē tə́ ní alé, banī i tām̄ kɔsə kə́ *Ndíĺ kə́ Táĺ ɔsə sedə́ n de gə̄ ədan̄neé najə̄ kə́ Nə́ɓā əndā tadə́ tə́ ní.
Currently Selected:
Makətūbə̄ kə́ nge ko̰ jōó ń Piyer ndang ní 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad