Makətūbə̄ kə́ nge ko̰ jōó ń Pol ndang adə̄ Korḛntə gə̄ ní 1
1
Pol rāā de gə̄ lápə́ya
1I mā Pol ń i ngōmbang kəla yā Jeju *Kərist kə gō kem ndigə yā Nə́ɓāá ní ō, ngōkó̰ó̰sí Timote ō n j-əla kə makətūbə̄ ń toō ní.
J-əlań j-adə̄ i Egəlijə yā Nə́ɓā ń i kem ɓē kə́ Korḛntə tə́ ní ō, ngé taā kem gə̄ ń ndin̄ dɔ nang kə́ Akayi tə́ kə taá malang ní ō. 2Ādə̄ Bɔbə̄jí Nə́ɓā nin̄ kə Kɔ́ɔ̄ɓē Jeju Kərist rāān̄ kem majə sesí ō, sɔlə̄n̄ kemsí ō.
Pol ndadə̄ Nə́ɓā
3Jə-tɔ̄yī Nə́ɓā, Bɔbə̄ Kɔ́ɔ̄ɓē yājí Jeju *Kərist, ni ń i Bɔbə̄jí kə́ kumən o̰o̰n ngá̰ý ō, i Nə́ɓā kə́ nge sɔl̄ kem deē dan yá̰a̰ gə̄ tə́ malang ō ní. 4Ni-sɔl̄ kemjí dan wur kɔl gə̄ tə́ malang, i yā kadə̄ j-asiīneé sɔl̄ kem ngé gə̄ ń ndin̄ dan yá̰á̰ kə́ tōr̄ gə̄ tə́ ní ō. Ba j-a jə-sɔlī kemdə́ i kə kem sɔl̄ ń jḭḭ̄ kɔ́ gə̄ j-ə́ngeī jī Nə́ɓā tə́ ní. 5Tītə̄ ń yá̰á̰ kə́ tōr̄ gə̄ yā Kərist rāān̄jí ngá̰ý ní, i tītə̄ ń toō n jḭḭ̄ j-əngeīneé kem sɔl̄ ngá̰ý kə ta kūl̄ Kərist ō ní. 6Ré jḭḭ j-a̰a̰ tápə̄ anī, i tām̄ yā kadə̄ sḭḭ̄ ə́ngeīneé kem sɔl̄ ō, ájiīneé ō. Ré sɔlə̄n̄ kemjí anī, i yā kadə̄ sḭḭ̄ ə́ngeīneé kem sɔl̄ kə́ kadə̄ rāā sesí tá kadə̄ sḭḭ̄ ásiīneé tə́gā tasí dan yá̰á̰ kə́ tōr̄ gə̄ kə́ tītə̄ yājí tə́ ō. 7Adə̄ j-əndā kemjí dɔsí tə́ kə ngangāá ngá̰ý. Tām̄ jə-ger̄ kadə̄ dan ń yá̰á̰ kə́ tōr̄ gə̄ rāān̄sí sejí ní, ā ə́ngeī kem sɔl̄ sejí ō.
8Tɔdɔ̄ ngákó̰ó̰jí gə̄, jə-gḛy kadə̄ ī-gerī gō yá̰á̰ kə́ tōr̄ gə̄ ń rāān̄jí dɔ nang kə́ Aji tə́ ní: Yá̰á̰ kə́ tōr̄ gə̄ ní ɔȳn̄jí ngá̰ý, kɔȳdə́ tɔȳ tɔ́gə́jí, adə̄ j-əndā kemjí dɔ ndi tə́ kə kumjí to̰ alé. 9Jḭḭ j-ɔjəń na jḭḭ na i de kə́ gāngə̄n̄ sarya yo dɔjí tə́ kɔ̄ɔ́ ɓá. Banī yá̰a̰ gə̄ rāān̄ yá̰a̰ beé i yā kadə̄ jə-ndóoń kəndā kemjí dɔ rɔ̄jí jḭḭ kɔ́ gə̄ tə́ alé, ba i yā kadə̄ j-əndāń kemjí dɔ Nə́ɓā ń i nge ndól̄ de kə́ koy gə̄ ní tə́. 10I ni n ɔr̄jí ta yo kə́ tītə̄ ń noō tə́ ō, a ɔr̄jí ɓáý ō ní. A̰á̰ā̰, j-əndā kemjí dɔn tə́ kadə̄ a ajəjí ta yo tə́ ɓáý. 11Sḭḭ̄ kɔ́ gə̄ ā ī-ndɔ̄yī tām̄ yājí tə́ ō. Adə̄ Nə́ɓā a oō ndɔ̄ȳ yā de kə́ ngá̰ý gə̄ kə́ tām̄ yājí tə́ yā rāań kem majə sejí. Loo ń noō tə́ de gə̄ ngá̰ý a télən̄ yā ndadə̄n tām̄ yājí tə́.
Pol tūr̄ gíŕ yá̰a̰ gə̄ ń ni-ɔjə rāā ní kɔ̄ɔ́
12Yá̰á̰ ń ɔjə kɔr ta rɔ̄ yājí ní, i najə̄ ń toō ń kemjí ɔjəjí ní. Kemjí ɔjəjí kadə̄ háĺjí ń jə-ndiń dan de kə́ dɔ nang tə́ gə̄ tə́, ba mandang ɓáa i sesí sḭḭ̄ḭ́ ní, i háĺ kə́ kanjə̄ gól̄ loo ō, kə́ *unjə̄ njáý njáý ō, adə̄ i hál yā Nə́ɓā. I hál kum kedə̄ yā de gēé alé, banī i hál kem majə yā Nə́ɓā. 13Tɔdɔ̄ najə̄ yājí gə̄ ń jə-ndang j-əlań j-adə̄sí ní, i yá̰á̰ kə́ rang gə̄ n jə-ndang tū tə́ ní alé, ba i rɔ̄ yá̰á̰ gə̄ nəkɔ́ ń ī-tə́daī ō, ī-gerī kum ō ní ngóy. Banī m̄-taā kem kadə̄ najə̄ ń j-ɔr̄ sesí ní ā ī-gerī kum kadə̄ unjə̄, 14tɔdɔ̄ ī-gerī kum nge ń j-ɔr̄ sesí ní kɔ̄ɔ́ ɓá: Ndɔ̄ yā Kɔ́ɔ̄ɓē yājí Jeju tə́ anī, jḭḭ i yá̰a̰ kɔr ta rɔ̄ yāsí ō, sḭḭ̄ i yá̰a̰ kɔr ta rɔ̄ yājí ō.
15Dan ń m̄-taā kem mámák kadə̄ a to i beé ní, ta kəga dɔ m̄-gír̄ i kaw̄ loosí kadə̄ ə́ngeī yá̰á̰ kə́ majə kə́ nge ko̰ jōó. 16Gō tə́ anī kadə̄ m-ḭ́ḭ loosí m-āw̄ Masedəwan, tá kə m̄-tél Masedəwan m̄-reē loosí gogə́ ɓáý, yā kadə̄ ī-rāāīneé seḿ kə yá̰a̰ mbā kə́ kadə̄ m-āwń Jude. 17Dan ń m̄-gḛy rāā beé ní, m-ɔ́jə i kə̄ ndágá kadə̄ mā i de kə́ m̄-hɔɔ́lɔ̄ ngá̰ý a? Aké yá̰a̰ gə̄ ń m-ɔ́jə rāādə́ ní, i kə gō gír̄ yā deē nduluú, adə̄ a̰á̰ā̰ ō, hó̰ō̰ ō i kemḿ tə́ jōó mbak a? 18Nə́ɓā i de kə́ kum tə́ yāḿ, najə̄ ń j-ɔr̄ sesí ní, i a̰á̰ā̰ ō tél i hó̰ō̰ alé. 19Tɔdɔ̄ *Kərist Jeju, ngōn̄ Nə́ɓā ń mā ō, Silas ō, Timote ō, j-ɔjəsí najə̄ yān ní, i a̰á̰ā̰ tá tél i hó̰ō̰ alé. Banī ni i a̰á̰ā̰ yā Nə́ɓā, 20tɔdɔ̄ ni i a̰á̰ā̰ ń ɔjə kadə̄ kənī míndə gə̄ malang yā Nə́ɓā ton̄ rɔ̄kum ní. Adə̄ i kə ta kūl̄ Jeju Kərist n jḭḭ̄ jə-ndigiīń najə̄ j-ədaī na i rɔ̄kum yā kɔsəń gɔn Nə́ɓā ní. 21Banī nge ń mbūsə̄jí kadə̄ jə-ra ngan̄g naā tə́ sesí kem Kərist tə́ ō, ur yibə̄ dɔjí#1.21 Ur yibə̄ dɔjí tə́: Á̰a̰ī tū «Kum Najə̄ kə́ Ngón̄g Ngón̄g gə̄» kə́ dɔ yibə̄ kə́ táĺ tə́. tə́ ɔrə̄ń kam̄jí ō ní i Nə́ɓā. 22Ni-əndā tə́ré yá̰á̰ kógə̄ḿ rɔ̄jí tə́ yā kɔjəń kadə̄ jḭḭ i deē yān gə̄ ō, adə̄jí *Ndíĺ kə́ Táĺ kemjí tə́ tītə̄ yá̰a̰ kəhɔ gātə̄jí beē, yā kɔjəńjí kadə̄ na n-adə̄jí yá̰á̰ kə́ majə gə̄ ń ni ngɔ̄m̄ tām̄ yājí tə́ ní rɔ̄kum ō.
23Kə́ tām̄ yāḿ mā tə́ ɓáa m-úń Nə́ɓā kadə̄ ni i de kə́ kum tə́ yāḿ. Ré m̄-sor̄ i mbée anī ādə̄ ni-tɔ̄lə̄m̄ kɔ̄ɔ́. m̄-lōō gíŕ tél kaw̄ gogə́ Korḛntə tə́ i yā kadə̄ yá̰á̰ kə́ tōr̄ rāāńsí alé. 24Jə-sāā i ko̰o̰ ɓē dɔ taā kem yāsí tə́ alé, banī jə-rāā kəla i naā tə́ sesí tām̄ yā rɔ̄nel̄ yāsí tə́. Tɔdɔ̄ sḭḭ̄ ī-raī ngan̄g dɔ taā kem tə́.
Currently Selected:
Makətūbə̄ kə́ nge ko̰ jōó ń Pol ndang adə̄ Korḛntə gə̄ ní 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad