TAKADA 17

Bulusu nja Selasi A siki Tasalonika

1Se Bulusu nja Selasi su biya ni Anpiboli nja Apoloniya, su tari ta Tasalonika, anya de kolonwa Yawudawa ma. 2Bulusu yuru a siki kolonwa Yawudawa son a nana asibi wuku yiride alada e yi ma, e yi musu nja ntani a siki takada beta Mirikisi. 3Bulusu yi su bayani e kuma tabata su nkye dole na Kiristi e sha Genbeki nja kuma yaa dege a siki kumsha bayi nana wuku. nkye, <<Bulusu pala nkye Yesu mu de Na pala gye ku beta a kiya e yi e shina ma kiristi.>> 4Se worosu su Yawudawa su yeda ndishiya daa su biya Bulusu nja Selasi, yomuna ntani Heleniyawa nyowa nsu zi womba ni Mirikisi nja yowa mata su gom kiya nja su.

5Sede Yawudawa sua yi kishi; se su tala yaya akusuka dege bije, su tala ntani su dege dishiya ntani a geri. su yi seberi yuru ta a gizi Yason sua bila Bulusu nja Selasi de su zo nsu a geba ntani de su Yawudawa tala. 6Sede su geni su ba, su ja Yason nja worosu su yayuwa ari geba toree geri, su mayi kuruwa nkye: <<Ntani worosu mu de sua sa damuwa a guru anya a durinya kuzukam su zo anya mu, 7Se Yason keleba su a gizi yi. Guru asu su yenteri doka ni seleki Kesar, sua nkye seleki daa ma, de sua sukwa yi Yesu.>> 8De su zi mbom, yowa ntani nja toree geri ankeli asu dege. 9Se su sa Yason nja worosu su sakisi ari su keleba gyolo a nani asu tuku su bila su te.

Bulusu Nja Selasi Ma Biriya

10De dederi yi, nsubiya Yesu seleme Bulusu nja Selasi ta Biriya. De su keyi anya ni, su yuru a kolonwa Yawudawa. 11Kuzukam ntani Biriya su mani bure dishiya pi ntani Tasalonika, su keleba manki nnani bi bi sua miminya takada beta Mirikisi kowon nana de su geni ko mbode Bulusu pala e ma gaskye. 12Yawudawa nyowa de su beigaskye, yomuna mata Helenawa nsu solota nja menza Heleniyawa nyowa.

13De Yawudawa ni Tasalonika zi nkye Bulusu yaa beyi manki ni kelima Mirikisi a Biriya, su te anya ni du, su zuga ntani su ma dege su ankeli. 14Dandani nsubiya Yesu sa Bulusu ta geba totolo riki, sede Selasi nja Timoti su ma Biriya. 15Ntani Worede su sa Bulusu su te nshi Atina se su kuma bayi manki keyi Selasi nja Timoti de su san shi seberi.

Bulusu Ma Atina

16De Bulusu yaa pekye su a Atina, e yi anwashi soseyi de e geni geri sika ni boka. 17Sobon yomu e yi musu a siki kolonwa ni Yawudawa nja Heleniyawa de sua yi womba ni Mirikisi, yomuna du abije kowon nana yaa yi nja worede su ma anya ni. 18Worosu Abikuriyawa nja Sitokiyawa nsu shina su yi musu nja Bulusu. worosu su a siki asu minya, <<Mina nsu yowa betamu yaa pala?>> Worosu nkye <<Yaama kankye yaa beyi manki boka de mu shina yi ba.>> Su pala yomu sobon Bulusu yaa beyi nabari kyakyawu a kiya Yesu nja dege e yi a siki kumsha. 19Se su la yi te nshi a Ariopagus anya de toree sua gom, anya ni su gye yi nkye, <<Ko ka gye mu de mu shina mbo sabuwa de ka kokoyi mu. 20Mbo worosu de mu zi ke ka pala mu taba zi yiri asu ba, mwa bila de mu shina mbode yaa yi nupi.>> 21Guru ntani Atina nja bakwe de su ma yi zunwa anya ni su pi so de su zi sabuwa beta, su kwa yi beta a kiya yi pi kowoni mbo.

22Se Bulusu dege sakisi a geba toree Ariopagus nkye, <<Ntani Atina Ni gane kuma nsu adini na soseyi a kowon turuki. 23Sobon a kwanki de Ni ma gyowe siki geri aku nja anya bowuta ku, Ni geni anya munka sedeka daa ni rubutu a kiya yi nkye, <Sobon Mirikisi de mu shina yi ba.>Kode ku shina nsude kuma bowuta yi ba, nse ni na Mma yi ku beta a kiya yi kuzukam.

24<< Mirikisi de yi durinya nja kowoni mbode ma a siki yi eshi na ema Obagizi bisi nja kisi yaa zunwa a laki lepa de su gina nnani ba. 25Yomu Mirikisi yaa bila nseda de sua yi nto ba, sobon eshi na e ba guru ntani leyi nja amushi nja guru mboye. 26Dege siki nseda kaka na Mirikisi yi guru ntani durinya, de su yaapi a guru a durinya. E kwa shiriya kwanki ba konwawa nja kyakya anya de kowoni nse sua zunwa. 27Mirikisi yi mbo mu de ntani su bila e yi nja de su samu yi, ko de nkye e ma nyisa anya nseda amu ba. 28<Sobon te anya Mirikisi la muma leyi nja mu yi tepiya a siki yi nja a siki yi la mu ma.> Nta yiride worosu nsu wonka aku su nkye, <mu ma juriya e yi.> 29<<Nkaa tunde mu ma juriya Mirikisi, kede mu yi tunani nkye Mirikisi ma kankye azuripa ko zinari ko dunsi, kankye woto de nsebeki shepe nja te anya beyiwa de e kokoyi. 30A kwanki de bise Mirikisi damu ni rishi shina ntani ba, sede kuzukam e beyi doka nkye guru ntani su juyi bila lepi asu. 31Sobon e sa nana de yaa zo yi durinya shiriya ni gaskye te anya nsude e zabi. Mirikisi beyi sheeda ni nsum ba guru ntani te anya dege nse a kumsha!>>

32De su zi Bulusu yi beta a kiya dege a kumsha, worosu asu yi bankama, sede worosu nkye,<<Mwa bila de mu zi ke jaja a kiya beta mu.>> 33Anya ni Bulusu butu bila asu. 34Sede worosu Ntani su kuma nbeyi zo anya Bulusu su beigaskye. A siki asu mu mani Diyonisiyus, yaa majelisa, nja mase daa de seni yi ma Damarisi, nja worosu ntani.

Currently Selected:

TAKADA 17: Gaa

Highlight

Copy